тереебут тылы уерэтии билинни туруга
материал (11 класс)

Тѳрѳѳбүт тылы оскуолаҕа үѳрэтии билиҥҥи туруга

Саха оҕото ийэ тылыттан тэйиитэ дириҥээтэр дириҥээн иһэрэ биһигини барыбытын дьиксиннэрэр. Оскуолаҕа төрөөбүт тылы үөрэтии оҕо тылын-өһүн, сахалыы өйүн-санаатын сайыннарар кыаҕынан атын биридимиэттэрдээҕэр баһылыыр суолтаны ыллаҕына эрэ, саха оскуолатыгар үөрэхтээһин уопсай туруга тупсуоҕа. Онтон билигин тѳрѳѳбүт тылы кѳйгѳтүү олох бары эйгэтигэр күүскэ барда. Оскуолаҕа саха тылын биридимиэтин чааһын элбэтэр эбэтэр сарбыйар туһунан кэпсэтии буолбакка,  тѳрѳѳбүт тылы оскуолаҕа үѳрэтии билиҥҥи проблематын тула кэпсэтии тахсыахтаах. Саха тылын  учебниктарыгар уонна үѳрэх программатыгар  ѳссѳ да уларытыы киллэриэххэ наада. Манна сүрүн болҕомто морполуогуйаҕа уонна сиинтэксискэ буолбакка, лиэксикэҕэ уонна ситимнээх саҥаны сайыннарыыга ууруллара буоллар, оччоҕо программа ирдиир үѳрэх сатабылларын сайыннарыы, ытык ѳйдѳбүллэри иҥэрии түмүктээх буолуо этэ. Саха тылын учуутала уруокка сахалыы эйгэни үѳскэтиэхтээх: ийэ тылынан ирэ-хоро кэпсэтэн, ийэ тылы имитэн-хомутан ырытан, сахалыы ырыаны-хоһоону  дуойуһа истэн. Онтон билигин саха тылын учуутала уруогар тыл грамматикатын научнайдык үѳрэтиинэн муҥурданар, оҕоҕо тоҥ билиини иҥэрэ сатыыр. Онтон ити иҥэрэ сатыыр тоҥ билиибит кини күннээҕи олоҕор туһата суоҕун кэриэтэ.  Ис турукпут ону ылыммат, онтон үѳрэх программата уонна учебник ону ирдиир. Ити курдук бэйэбит оҕолорбутун ийэ тылтан тэйитэбит, тулалыыр эйгэбит онно олук буолар, ханна да тиий сахалыы эйгэ суоҕун кэриэтэ.