Шэнэ үе сагай багша
статья на тему

Шэнэ үе сагай багша

Жалсанова Людмила Владимировна  Аршаанай лицей-интернадта долоодохи жэлээ хүдэлнэ. Энээхэн хугасаа соо багша  хэжэ байһан ажалдаа өөрынгөө онсо хандаса, абьяас бэлигээ гэршэлэн, шабинарай сэдьхэл буляажа, түрэл хэлэ шудалха хэрэгтэнь шэглүүлжэ шадаһан байна. Людмила Владимировна арадтаа, хэлэндээ, дайдадаа тон дуратай хүн. Эдэ мэдэрэлнүүдээ һургажа байһан үхибүүдтээ дамжуулхадаа, багша өөрын онсо арга боломжонуудые хэрэглэдэгынь урматай. Людмила Владимировнагай шабинар зүжэгшье табижа, шүлэг рассказшье зохеожо, шэнжэлхы ажалшье ябуулжа, тордиһогүй ульгамаар түрэл хэлэн дээрээшье хөөрэлдэжэ шададаг. Гэхэтэй хамта ганса һурагшадаараа бэшэ, мүн лэ тэдэнэй түрэлхидөөр, суг хүдэлдэг багшанараараа, Аршаан нютагайнгаа зоноор хамта ажалаа ябуулдаг байһаниинь үрэ дүн ехэтэй. Жэшээлбэл, жэл бүри үнгэргэгдэдэг заншалта болоһон буряад соелой декадада бүхы һургуули, түрэлхид, багшанар хабаадажа, дүнгүүдынь нютагай клубай тайзан дээрэ үргэн дэлисэтэй һайндэрөөр түгэсэдэг.

Багша һурагша бүхэниие анхаржа, тэрэнэй амжалта ехэтэй байхын тула аргагүй ехэ ажал ябуулдаг. Тиимэһээ шабинарынь аймаг соогоо буряад хэлэнэй олимпиаданууд болон конференцинүүдтэ илажа, республика соо, уласхоорондын конференцидэшье түрүүшын һууринуудые эзэлдэг. Иигэжэл буряад хэлэнэйнгээ һүлдэ үргэнэ бшуу. Амжалтатай багшын шабинаршье амжалтатай байнгүй яахаб! Өөрөө Людмила Владимировна аймагай «Эрхим багша» гэһэн мэргэжэлтэ мүрысөө илажа, республикын лауреат болоһон, республикын һуралсалай Интернет – ресурснуудай конкурсда «Использование УММ на внеклассных занятиях» гэһэн номинацида 2-дохи һуури эзэлһэн байна.

Бэлиг түгэлдэр, урагшаа һанаатай багшын ажаябуулга шэнэ үе сагай эрилтэдэ таатай гэжэ тобшолмоор. Энэ багша дээдэ гарай багша мүн.