«Тодметним (прилагательной). Солэн огъя грамматической валатонэз, морфологической тодметъёсыз, синтаксической функциосыз»
план-конспект урока (6 класс)

Тема: Тодметним (прилагательной). Солэн огъя грамматической валатонэз, морфологической тодметъёсыз, синтаксической функциосыз 

Пуктэм азьмугъёс: прилагательной сярысь огъя валан сётоно;  вераськон кылазы валаса кутыны дышетоно; вераськон но гожъяськон кылзэс азинтоно; удмурт кылэн тунсыкъяськон мылкыд пыӵатоно.

Ужъемышъёсыз:

Личностной: ортчем темая мылкыдзэс верало, удмурт кылэн тунсыкъяськон мылкыдзэс азинто.

Метапредметъем:

РегулятивнойУУД: дышетӥсен ӵош уроклы азьмугъёс пукто; ужан радзэс чаклало; ужамзылы дунъет сёто.

Познавательной УУД: тодон-валанъёссы вылэ пыкиськыса, выль ивортодэт утчало но шедьто; тодэмзэс быдэстэм ужъёс пыр возьмато.

Коммуникативной УУД: ог-огенызы но дышетӥсен кенешыса ужало; малпанзэс валамон , радызъя шараяло.

Предметъя: прилагательной сярысь огъя валан  басьто; вераськоназы куто.

Уроклэн мынэмез

Ужпумо югдур кылдытон но уроклы азьмугъёс пуктон люкет.

Дышетӥсь.(Д.) Пиналъёс, ти яратӥськоды –а кузьым кузьманы? Мар быгатӥськоды кузьманы туннэ, али ик? ( канфет, ручка, эшъяськон ….)

Д. Нош ӟеч мылкыд кузьмамды луэ-а? Ойдолэ ог-огмылы кузьмаломы ӟеч мылкыд, чебересь кылъёс вераса.( кузьмасько тыныд ӝутскем мылкыд, задор, капчи, умой .. )

Д. Кыӵе вераськон люкетъес луо мылкыдмес возьматись кылъёс? (Тодметним)

Д. Малы озьы малпаськоды? (макенимлэсь тодметсэ возьмато, кыӵе юанлы верало)

Д. Малы вераськонамы кутӥськом тодметнимъёсты? (вераськонмес чебер, яркыт каро)

Д. Пиналъёс асьмеос туннэ малы ке туж трос вераськиськом тодметним сярысь. Малы меда? (Туннэ урокмылэн темаез «Тодметним»)

Д. Тетрадямы гожтомы туннэ числоез, классын уж, темаез.

Д. Кыӵе азьмугъёс пуктомы туннэ уроклы? (тодамы ваёмы ваньзэ, мае тодӥськом вал тодметним сярысь; дышетском тодметнимъёсты вераськонамы кутыны)

Ужез радъян люкет.

Д. Пуктэм азьмугъёсты быдэстон понна, кызьы радъяломы ужмес?

- сётэм ужъёсты быдэстыса, тодметним сярысь тодон-валанмес юнматыны но азинтыны тыршом;

-валэктонъёсмес правилоосын ӵошатом;

- тодэммес ужъёс пыр юнматон.

Утчаськон-эскерон люкет.

Д. Пиналъёс, тӥляд ӝӧк вылады тӧдьы но ӵуж кагаз вылын вань текстъёс, ойдолэ соосты лыдӟом. (одӥгез дышетскись лыдӟе тӧдьы кагаз вылысь текстэз, мукетыз – ӵуж кагаз вылысьсэ)

Д. Маин висъясько та текстъёс (тӧдьы кагаз вылын сётэм текстын ӧвӧл тодметнимъёс, ӵуж кагазын кутэмын тодметнимъёс, соос текстэз яркыт, чебер каро)

Д. Пиналъёс, ӵош одӥг тодметнимлы морфологической разбор лэсьтомы.

Пиналъёс ужан листъёсын ужало. Ужан листъёсын предложениос но заданиос  сётэмын.

Ужан лист

Сайкыт омырен, сяськаё возь вылэн вуиз улосэ турнан дыр. Чебересь нылмуртъёс, муспотон кенакъёс туннэ дырто возь вылэ. Бусыос татын паськытэсь.

1. Шедьтэ тодметнимъёсты.
2. Юан пуктэ.
3. Эскере предложениын кыӵе членэз луэ.
4. Малпаське, малы кулэ   тодметнимъёс.
5. Одӥг тодметнимлы морфологической разбор лэсьтэ.
6. Кластер амалэз кутыса,  гожтэ ваньзэ, мае тодады ваиды тодметним сярысь.

Таӵегес кластерзы пӧрме

 Пиналъёс кластеренызы тодмато, ог-огзылэсь верамзэс кылзыса, ватсанъёс пырто.

Д. Малпанъёсмы шонер-а меда тодон вылысь учебникысь правилоез лыдӟомы. (пиналъёс ужало)

Шутэтскон вис.

Киосмес вылэ ӝутом,

Соос сьӧры кыстӥськом.

Ӝог киосмес лэзёмы,

Туннэ уг яра мӧзмыны.

Тодметнимез дышетӥм,

Трос ужаса, ми жадим.

Солань-талань тэтчалом,

Йырынымы сэзъялом,

Мугормес но бергатом,

Выльысь ужаны кутском.

Творческой уж.

Д. Пиналъёс, тӥляд котькуддылэн ик вань матысь эшты. Сётэм кылъёсты кутыса, гожтэ эшты сярысь.

Сётэм кылъёс:

Ӝужыт, лапег, начар, чебер, бадӟым, пичи, лыз синмо, вож синмо, сьӧд синмо, лякыт, урод, зеч, кескич, востэм,каньыл,зӥбыт, визьмо,задор мылкыдо, сэзь, визьмо, сюлмо, шӧртчи, лякыттэм, ваменэс, керӟег.

Дунъян.

Д. Пиналъёс, тодэмдэс эскерыса, «Шонер но шонертэм веранъёс» таблица бордын ужалом.

Доре уж.

1. Ортчем правилоосты юнматоно.

2. 141 ужез быдэстоно

3. «Ӟечбур!» газетысь гожтоно 5 предложение тодметнимъёсын.

Текст 1

Тӧл воштӥськиз

   Нюлэсъёс сьӧрысь, лымшор палась, шуныт тӧл шокчиз. Сылмыны кутскиз юж лымы. Липетъёс пуме, укно наличникъёс улэ азвесь йӧӟузыриос ошкиськылӥзы. Соос каллен шунаны кутскизы. Жингрес, чылкыт, сэзь уйёс. Кизилиос бадӟымесь, яркытэсь, быдэс ин ворекъя, ӝуа. (М.Петров)

Текст 2

Тӧл воштӥськиз

   Нюлэсъёс сьӧрысь, лымшор палась,  тӧл шокчиз. Сылмыны кутскиз   лымы. Липетъёс пуме, укно наличникъёс улэ   йӧӟузыриос ошкиськылӥзы. Соос каллен шунаны кутскизы.  Уйёс. Кизилиос ,  быдэс ин ворекъя, ӝуа.