"Буряад хэлэеэ аршалая!"
статья на тему

Буряад хэлэеэ, буряад нэрэеэ бурхан шэнгеэр сахижа ябая!

«Уян hайхан буряад хэлээрээ

Урин зөөлэхэнөөр хэлэжэ hураял,

Уг изагуураа, удха заяагаа

Улам сэгнэжэ, үргэн ябаял».

Э.Манзаров

        Ухаан бодолой, хүгжэлтын эхин – түрэл хэлэн мүн. «Түрэл хэлэнэйнгээ хүсөөр хүн гээшэ бүхэжэдэг, далижадаг, арад зонойнгоо түүхэ домогые, абари зангые, оюун ухаанайнь баялигые бэедээ шэнгээн абадаг», -гэжэ ородой агууехэ багша К.Д.Ушинский хэлэhэн юм.

         Элинсэгүүдэймнай хэр угhаа дээрэ  үргэжэ, алта мүнгэн шэнгеэр абажа ябаhан, энэ болотор үргэжэ асарhан Эхэ буряад хэлэмнай хүндэ байдалда оронхой байнал даа. Буряад хэлэеэ абарха, аршалха  сагнай буугаад  байна.  

       Манай республикын үхибүүд гүрэнэй хоёр хэлэ тон адлихан, нэгэ хэмжээндэ мэдэхэ, шудалха, харилсаха ёһотой.  Буряад хэлэ үзэлгэ үхибүүдтэ һаалта болохогүй. Бусад хэлэ шудалалгада туһа болодог юм гэжэ эрдэмтэд шэнжэлэнхэй бшуу. Буряад хэлэ ганса факультативай түхэлдэ оруулаад, һайн дураараа үзэхэ болобол, одоол буряад хэлэмнай хосорхо бшуу.

        Һургуулида хэлэеэ үзэнгүй, буряад хэлэн дээрээ дуугарангүй, уншангүй байбал, манай арад һүнэһэ голоо алдаһан хүн  шэнгеэр үлбэртэн хосорхол!

         Бидэ, буряадууд, өөрынгөө түрэл  хэлэ мартангүй, дэмжэхэ, үргэдхэхэ, шудалха, үеһөө үедэ дамжуулха, баяжуулха уялгатай байха ёhотойбди. Арадайнгаа түмэн жэлдэ абажа ябаhан ёhо заншал,соёл, үльгэр түүхэ, домог, үндэһэн хэлэ саашань дамжуулха – бүгэдэ манай буряад зоной нангин хэрэг гээшэ.

        Хэлэгүй  арад  хадаа  арад   бэшэ   гэжэ  хэлсэдэг  гээшэ  ааб  даа.  Хэлэеэ алдабал, буряад арад үгы болохо гэжэ мэдэрхэ шухала. Түрэлхи хэлэеэ һайн шудалһан арад алишье талаараа хүгжэнги байдаг.

         Буряад хэлэтэй, буряад сэдьхэлтэй, үндэһэн арадаа хүндэлдэгөөр үхибүүдээ хүмүүжүүлэел даа! Түрэл хэлэеэ хүгжөөхэ, соёл заншалаа уһанда хаянгүй, хүгжөөн һалбаруулха зэргэтэйбди.

          Хайрата буряад хэлэмнай иигээд хосоржо дүүрэхэ ёһогүй!

Буряад хэлэеэ аршалая!