"Содак ды вечкик тиринь енксот"
план-конспект урока (8 класс) по теме

             МОУ «Кочкуровская средняя общеобразовательная школа»

Кель-валонь кастомань урок – книгань анокстамо

                                        Урокось ютась 8- це классо.

                                        Ютавтыцясь: Юртайкина (Кочеткова) С. И.

Темась « Содак ды вечк эсь тиринь енксот».

             Кель-валонь кастомань урок – книгань анокстамо.

                                         Цельтне:       1) содавтомс эйкакштнэнь

эсь енксонь содавикс ломань

марто;

2) тонавтницятнень кортамонь ды

сермадомань кель-валонь кастомась;

3) кепедстемс сынст граждан-

ской, патриотической, нравс-

твенной ежомарямост; кепед-

стемс содамочис бажамост.

                                  Оборудованиясь: альбомт, презентация «Содак ды

                                   вечк эсь тиринь енксот», презентация «Юрий

                                   Дырин».

                          «Бути  эрьва ломанесь эсь мода панкскенть

                           лангсо теевель  весе, мезе тензэ тееви,

                           кодамо бу мазый улевель минек моданок.»

                                                                     А.П. Чехов.

 .                          Монгак эрямган паро мельсэ

                            Бажан кадомс эсь мельган кикс.

                           Ансяк а содан, эрзянь кельсэ

                           Кодамокс сонзэ лемдьсызь кикс.

                                                                         И.Прончатов.

                      Уроконь молемась.

I.Эйкакшт, течинь минек уроконок явови лиятнень эйстэ

сеньсэ, што тенек эряви анокстамс книга. Тынь икелепелев       получакшныде заданият.

Сынст коряс минь тейсынек книганть содержаниянзо.

Книганть кармить истят пельксэнзэ:

1. Эрзянь  просветительть ды педагогт.
2. «Геройкс  а чачат. Героекс  улят».
3. Талантось а еми.
4. Эрзянь литературань масторось .

Штобу панжомс книганть,мерян весенень стямс.

Нолдави Мордовиянь гимнась.

0. Озадо.

1)Тонавтыцянь вал.

     Якшамговонь 10-це чистэ минек республиканок тешкстасы  эсензэ чачома чинзэ. Сонензэ топодить 80 иеть. Минь тынк марто течи сонензэ тейтяно казне - книга, конаньсэ евтнетяно эсь енксонь содавикс ломантнеде.

        Минек республикадонть меельце шкасто седее сеедьстэ кармасть кортамо Россиянть келес. Секс мекс эрямонок минек чиде чис яла вадрялгады: строявит од кудот, школат, лецямо таркат,ознома кудот, спортивной комплекст. Эрямонок яла седе вадрялгады ды теньсэ покш таликазо минек прявтонть Н.И.Меркушкинэнь. Сон маштозь вети эсь тевензэ.А стяко секе тев паро валт ней марятано эсь республикадонть Россиянь правительстванть пельде.

Шумбрач , Мордовия , шумбрат!

Шумбрачи арсян тонеть певтеме.

Тон мазыят ,

Виеват,

Вадрят,

Зярдояк а аштят тон тевтеме!

Шумбрачи,  Мордовия , шумбрат!

Мазычить ды сюпавчить неия.

Умаринакс садсонть тон цветят,

         Минек республиканок аволь сюпав промышленностезэ, природной ресурстнэнь коряс, но пек сюпав превей, талантливойломаньсэ. Мокшэрзянь масторсто лиссть ламо мирэнь келес содавикс ломанть: патриархось Никон, протопопось Аввакум,историкесь В.О. Ключевский, скульпторось Степан Эрьзя, художникесь Ф. Сычков ды ламо лият. Минь кенярдтано тень кувалмаяк, што неень спортсментнэ теизь те « картасо а неявиця масторнэнть»  мирэнь келес содавиксэкс.

         Нама, штобу сынст ледстямс миненек эряви аволь вейке урок, аволь вейке книга. Секскак течи минь лоткатано ансяк сетнень лангс, конат сюлмавозь минек веленть, райононть марто. Евтнемс сави тенк нурькинестэ,  лиякс меремс, тейтяно презентация.

     Панжсынек васенце пельксэнть. Киде карматадо евтнеме те пелькссэнть?

(Тонавтницясь евтни Е.В.Скобелевде.Презентациясо невтеви)

- Мон карман евтнеме Елисей Васильевич Скобелевде. Скобелев – ученой, просветитель, васенце букварень автор. А мекс мон кочкия те лементь? Елисей Васильевич чачсь Кочкурвелес аштемговонь 26-це чистэ 1887-це иестэ. Алкуксонь сонзэ фамилиязо Кочетков. Стака ульнесь сынст эрямост. Семиясост ульнесть 25 ломанть, кудынест жо вишкинель, уштстькак эйсэнзэ раужосто – турбатомо. Ялатеке уш вишкапингстэ ульнесь сонзэ мелезэ, штобу минек народось лисевель те чоподастонть: тонадовольть ловномо, сермадомо. Васня Елисей Васильевич туи тонавтнеме Пичалев, тосо прядсы васенце классонть.1898 –це иестэ Кочкурвелес панжови церковно-приходской школа, ды Скобелев сы мекев. 1900-це иестэ прядсы те школанть ды туи тонавтнеме Челпановской школав. Тесэ сон вастови ламо стакачи марто, ялатеке бажамось эзь синдеве. Елисей Васильевич парсте прядсы школанть, ули примазь Казанской инородческой семинарияс.

1. Тесэ тензэ лезды М.Е. Евсевьев. 1906-це иестэ сон туи роботамо Уфимской губернияв, тесэ пряды учительской институт.
2.    Ламо вий максы Скобелев сенень, штобу анокстамс книгат эрзятненень.1920-це иестэ нолдась букварь «Тундонь чи»,1925-це иестэ – «Од ки», 1930-це иестэ «Од эрямо».1940-це иестэ Е.В. Скобелев сы Саранскоев ды карми  МАССРэнь Наркомпроссонь школань управляющеень прявтокс. Тесэ сон лезды тонавтыцятненень кода кастомс мастерстванть.
3.       Сон весе эрямонзо максызе народонть превтнень касомантень.
4. - Паро. Оштё  кинь тынь совавтыде те пельксэнтень?
5. - А мон ёвтнян М. И. Наумкиндэ. Сон истя жо, кода и Скобелев ламо тейсь, штобу минек народось лисевель чоподастонть.
6.      Чачсь М.И. Наумкин Кочкурвелес апрелень 28-це чистэ 1889-це иестэ. Рана кулость тетянзо-аванзо, ды семиясь кадовсь покш лелянзо лангс. Максимень ульнесь мелезэ тонавтнемс. Сон пек парсте прядызе колмоклассонь школанть. Мейле поладызе тонавтнеманзо Челпановасо, а седе мейле Казанской инородческой семинариясо. М.Е.Евсевьев рединзе Наумкинэнь способностензэ, кода маштсь лездась тензэ. Сайнизе мартонзо фольклоронь пурнамо.
7.        Ламо стакачи марто вастневсь М.И. Наумкин революциядо икеле шкастонть.
8.       1928-це иестэ сон лездась «Марс» колхозонть панжомсто. А эсензэ просветительской тевензэ  эзизе кадно. 1932-це иестэ нолдась «Эрзянь кель, грамматика, кортамонь кастома»книга, иень ютазь лиси истямо жо книга омбоце класснэнь.Мейле сермады книга покштнэнень.
9.       Кулось М.И. Наумкин мартонь 25-це чистэ 1942-це иестэ.
10. -Кидеяк евтнетядо эли прядсынек сынст эйсэ?
11.  -Монь койсэ, те рядонтень эряви совавтомс Дергачев Степан Ильичень.
12. -Эряви, эйкакшт, пек эряви. А стяко минек школань стенасо  понгавтозь колмо Мемориальной доскат :Скобелевнень, Наумкиннэнь,Дергачевнень. Инескеть, кармадо.
13.       Степан Ильич Дергачев весе эрямонзо максызе школантень.А стяко сонензэ максозь васня Мордовиянь Заслуженной учителень лемесь, а мейле СССР-нь Народной учителень лемесь.Зярдо сон ульнесь школань прявтокс, опытэнь саеме сакшность аволь ансяк минек республикасто, а васолдо сонзэ томбальдеяк. Инжеть школав сакшность натой Финляндиясто(Суоминь масторсто) ды Болгариясто.
14.       Степан Ильич сермадсь книгаткак : «Край, в котором мы живем», «Школьная нива», «О родине малой моей».Сынст эйсэ сон евтни минек велень, школань историядонть,тевтнеде. Ней уш зярыя иеть ютасть, кода Степан Ильич арась, ялатеке сонзэ ушодозь тевенть поладыть тонавтыцятне ды тонавтницянтне. Музеенть, конань панжизе Дергачев, содасызь аволь ансяк минек республикасонть.

   - Виде, эйкакшт. Улить эште евтнеманк те пелькссэнть? Арасть? Сестэ панжтано лия пелькс, конасонть минь карматано кортамо мирэнь ванстыцятнеде. Киде васня карматадо евтнеме?

      -Эйкакшт, 60 иеть ютасть кода прядовсь Великой Отечественной войнась, кона сайсь ниленьгеменде ламо ломанень эрямот. Войнанть минь содасынек телевизорга, книгань евтнемань коряс  ды паз аштек неемс тенек эсь сельмсэ. Минек велестэ войнав саезель363 ломанть, сынст эйстэ эзть велявто пелест – 181. Лиякс меремс, те зыянось токинзе малав весе семиятнень. Кие велявтськак те толстонть – велявтсть ранения орма марто, конатнень уш а витьсынзе виев врчтнэяк. Яла седее аламо ды аламо кадовить ветерантнэде, секскак, эйкакшт , уледе седеймарицякс, лездадо тенст. А ней вал максан тыненк. Инескеть, евтнеде.

     - Монь ули мелем евтнемс генерал –майордонть Н.А. Дедаевде.

     Дедаев чачсь ноябрянь 7-це чистэ 1897-це иестэ Кочкурвелесэ.1915-це иестэ саезь Дедаев ветясь покш подпольной робота. Печатась листовкат, кантнесь «Правда» газетанть. Неть тевтнень кисэ сонзэ ламоксть вешнилизь эрямо тарканзо. Аштесь тюрьмасо. Февралень 23-це чистэ 1918-це иестэ совась Якстере Армияс. Дедаев ульнесь Советэнь омбоце съездэнь делегатокс. Истя жо ульнесь Зимней Дворецэнь саемстэ. Гражданской войнань иетнестэ командирэсьДедаев тюрсь Врангелень войскатнень каршо. Казезь Якстере Знамянь Орденсэ.

   Великой Отечественной войнасо генерал – майор Дедаев идесь Лиепая ошонть.1941-це иень июнень 25-це чистэ сон чавовсь.

   - Мон карман евтнеме М.А. Пуркаевде. Сон чачсь Пичалес 1894-це иестэ.Семиясост ульнесть кото ломанть, эрясть беднойстэ, секскак тетянстэнь савсь тукшномс Лена леенть лангс роботамо,Максимень сайнизе мартонзо. Мейле армия, Васенце Мировой войнась, революциясь. Зярдо жо ушодовсь Великой Отечественной войнась , сон васенцекс евтась Г.К.Жуковнень,што гитлеровецтнэ каявсть СССР-нть лангс.Васенце жо читнестэ М.А.Пуркаев аравтозь Юго-Западной фронтонь штабонь прявтокс. Украинасо и мольстькак самай стака бойтне. Войнань перть сон невтизе прянзо кода паро организатор, патриот. Войнадо мейле Пуркаев поладызе военной тевензэ.Сон аравтозь Дальней Востоконь Штабонь  прявтокс.Сондензэ парсте кортась Советской Союзонь Маршалось Р.Я.Малиновский: «Роботанзо вети пек вадрясто…Сон Покш военоначальник…»  Январень 1-це чистэ 1953-це иестэ М.А. Пуркаевень лоткась чавомдо седеезэ. Чачома веленть лемдизь Пуркаевакс.

  - Вадря. Паряк,киньгак эште ули мелезэ ?

- Киде карман кортамо мон, а путови те рядонтень. Но, монь коряс, войнасонть геройтне сеть, кить виень апак жаля тюрсть ятонть каршо. Секскак мон евтнян простой солдатто –сыре покштядон. Евтнян сырькаень валонзо коряс. Сонзэ тетянзо, Бурлаков Сергей Трофимовичень саизь войнав 1943-це иестэ. Нейгак сырькаень сельмензэ икеле неть остатка минутатне, но сон эзь арсеяк, што а сави неемс тетянзо. Серматне сакшность чуросто, но эрьва сермасонть сермадсь, што курок сы, што живой ды шумбра, мелявтсь семиянзо кисэ. Но вастовомась эзь лисе, маень 1945-це иестэ Берлинсэ сон маштозель. Мон лован эйсэнзэ героекс.

  А кинь оште тынь совавтовлиде те пельксэнтень?

 ( Моли кортнема)

   А ней стятано ды ледстясынек кулозетнень лемест чатьмонемань минутасо.

     А пельксэнть мон прядовлия минек буень поэтэнть Александр Араповонь стихотворениясо , конаньсэ авторось арси тенк а неемс зярдояк война. Кунсолынк.

 Кадык апак мелявто ды пейдезь,

Мазый цецят тейтерькась пурны.

Кадык минек модась пурьгинеде,

Ансяк аволь бомбадо сорны.

 Ды вейкеде мельтне арсематне ,

Эрьва чине – течи, вандыяк:

Войнынесэ налксиця эйкакштнэ

Иляст сода война зярдояк.

Кадык лисни паломо эждямо

Эрьва валске пандонть экшстэ чись,

Маней менель тонеть, вишка ломань,

Кадык валдо ули свал тонь кись.

  Шка панжомс колмоце пельксэнть.

  - Мордовиясь сюпав талантливой ломаньсэ.  Минек веленекак сюпав сынст эйсэ.  Кинь совавтано те пельксэнтень?

- Монь ули мелем евтнемс ялакстнэде-Дыринтнэде. Истя жо анокстынь презентация.(Презентация Юрий Дыриндэ) Сынст эйстэ содыть ней уш васоло Россиянь томбале. Чачсть сынь минек велес 1967-це иестэ. Школань прядомадо мейле тонавтнесть Саран ошсо Художественной училищасо, седе мейле армия. Армиядо мейле поладызь тонавтнемаст. Училищань прядомадо мейле 1992-це иестэ Витя карми тонавтнеме Москов ошсо Строгановонь лемсэ государственной университетсэ, конань прядсы 1998-це иестэ ды карми роботамо васня художественной училищасо, мейле Эйкакшонь художественной школасо. Витянь ульнесть зярыя выставканзо кода картинань, истя и скульптурань.

    Юра жо училищань прядомадо мейле кармась ламо роботамо. Сонзэ картинань выставканзо ульнесть а весть Саран ошсо , Московсо, Прагасо , Хельсинкисэ, Таллинсэ, Дрезденсэ. Роботанзо сонзэ эсь енкс мартот. Икеленк стить евксонь персонажт ломанень рунгонь пелькс марто.Те весе максы артовкстнэнень философской смусть. Мон арсян, што Дыринтнэ оште васов кузить те талантонть марто. А умок сонзэ талантонзо редизе содавикс мультипликаторось Сергей Меринов ды картинанзо коряс аравтозель «Куйгорож» мультфильмась.

     - Прядсынек те пельксэнть. Ютатано нилеце пельксэнтень -

«Эрзянь литературной масторонтень». Кинь тезэнь тынь совавтынк?

  - Мон кенярдан, што монь крестной авам – од поэтессась Люба Дергачева.

       Люба прядызе школанзо1991-це иестэ ды поладызе тонавтнеманзо МГУ-нь филфаксо эрзянь отделениясо. Уш школасо тонавтнемстэ печатавкшность стихензэ «Чилисема» журналсо. Университетсэ тонавтнемстэ те тевентень кундась весе вийсэ. Тонавтнемде мейле, чокшне ланга, роботась «Сятко» журналсо. Сонзэ лиссь стихень башка книгазояк «Оймесь мородо а чами», косо невти весе эсь вечкеманзо тиринь енксонтень , аванстэнь – тетянстэнь, лелятненеь – патятненень…

 Люба Россиянь писателень Союзонь член.

  -Пек паро . Паряк, киде эште евтнетядо?

- Монгак евтневлинь эсь роднядон – Яков Сергеевич Слушкиндэ.

    Я.С. Слушкин чачсь Кочкурвелес 1911-це иестэ. Эрясть сынь беднойстэ , тетянзо мелезэ арасель, штобу церазо туевель тонавтнеме , секс мекс эзть сато цера ломанень кедть. Ялатеке  Яков тонавтнесь васня  Кочкурвелесэ, мейле – Шейн-Майдансо. Великой Отечественной войнасо Яков Сергеевич пек стакасто  ранязель  ды велявтозель кудов. Сонзэ кармавтсызь «Марс»колхозонь прявтокс. Те шкане сон карми сермадомо роман эсь велень ломантнень ланга «Семья Кочкуровых». Те книгась теизе сонзэ содавиксэкс. Истя жо сермадсь лия произведеният.

   -Прядсынек те пельксэнть? Сестэ прядома тенек эсь книганокак. Эрьва книгасонть ули меельце вал. Тейтяно миньгак. Лиякс меремс, тейтяно уроконтень итог. Тусь мельзэнк урокось?

 - Монь койсэ, истят урокт эрявить ютавтнемс седе сеедьстэ, штобу минь седе парсте содавлинек эсенек историянок. Аволинек стувтне сеть ломантнень, конат ламо тейсть сень кисэ, штобу минь парсте эрявлинек истямо мазый енкссонть.

 - Нама. Ловносынек эште весть эпиграфтнэнь.

-Евтынк, неявикс кикс сынь кадсть эсь мельгаст? Ламо паро тевть тейсть сынь масторонть мазылгавтоманзо коряс?

Но шканок ульнесь пек аламо, штобу домкасто ванномс эрьва пельксэнть, роботамс лия глава лангсо. Мон арсян те тевенть минь поладсынек ды совавтано эсь книгантень разделт велень хозяйствадо, культурань ломантнеде, спортивной эрямодонть…

Минек енксонок пек мазый  вадря, а стяко эрзянь поэтэсь Никул Эркай евтась эйстэдензэ истят валт

        Мон вечкса Дубенкань краенть,

        Тесэ пек трудить ломантне.

        Секс тесэ ютавтан тундонть, маенть,-

         Сюронь сталмодонть натой медявсть паксятне.

А уроконок прядсынек эрзянь моросонть «Тиринь велем», секс мекс те моронть истя жо можна ловомс минек велень гимнакс.

  - Оценкань путомась.

-  Кудов заданиясь: арсемс книгантень лем, а киде евтнемась педясь седейзэнк, сермадодо корязонзо очерк, вейсэнь тевсэ нолдамс книга.