Панжада урок « Историзматне и архаизматне »
план-конспект урока (5 класс)

   МБОУ «Темниковская средняя общеобразовательная школа имени Героя Советского Союза А.И.Семикова»

          Панжада   урок

« Историзматне и архаизматне »

                                Етафтозе Уткина М.П.

                                        мокшень кялень и        

                                        литературань

                                        тонафтысь

                                        5-це классонь

                                        тонафнихнень

                                        мархта.

                          2017 к.                                                                     

Цельхне:

                1.максомс иттненди содамошит историзматнень  

                   колга;

                2.тонафтомс историзматнень и архаизматнень

                   текстста мушендомост, касфтомс корхтамань

                   асуснон;

                3.касфтомс кельгомать шачема ширети, кяльти,

                   перьфпяльти.

   Оборудованиясь: сире вещат, мокшень нарятт, картинкат, Ф.В.Сычковонь иллюстрациянза.

                             Урокть молемац

Шумбратада, шабат. Озада. Эрьдова ванцаськ, кода тинь содасасть эсь кялентень. Мон карман няфнема картинкат нармоттнень, вирень и кудонь животнайхнень, шуфттнень колга, а тинь азондость лемснон васенда рузкс, а сяльде мокшекс и кда содасасть – эрзякска.Кепотьксонди: корова- тракс(мокш.),скал(эрз.) береза- келу(мокш.), килей(эрз.) и стак тов.

      Викторина «Мокшэрзянь щапне».

      Учительницась наряжаф мокшень щамса(ожакиса, крганяса, кушакса,пувнялентаса, «кудряса», гарсовайса, жилеткаса, цюлкапочкса).Иттне азондсазь щапнень лемснон.Азондови «кудрятнень» колга: ломаттне кунаркиге кельгозь толгань кочксемаснон.Ня толганятнень мархта мазопнезь щамснон и кудботмоснон.Сидеста васьфневсть толгатне мокшаватнень мазы серма мархта щамсост.Тиендсть эздост украшеният, конатнень каннекшнезь иласта .Фкя мокшень сире тяфтама наряжамбяльть лемдезь кудрят.

     Иттне тиихть сравнения Темниковскяй и лия райононь ингольдень и тяниень щапненди. (слайтт)

             Од материалть лангса работась.

      Тяни, шабат,ня щапнень няендьсасть аньцек музейса, да щавантень и бабантень арзяста.Юмсихть синь лемсновок кяльстонк.Вдь кяльть лексикац кемоста сотф обществать марнек эряфонц мархта.Сонь полафтоманц мархта полафтови мяльське, сонь валонь составоц.Кяльсь аф аньцек пяшкотькшни од валса, но кой- кона валхне мзяра пинге етазь сиретькшнихть, юмсихть ломаттнень корхтамаста, и валом- валом синь юксневихть.Тя лисенди сяс, мес ня валхнень мархта сотф понятиятне, явлениятне предметтне юмсихть обществать эряфста.

      Мокшень од ломаттнень эзда кржа кие содасы, мезе стамсь кесаксь, эвгонць, лавжась, цуфцомсь, сяс мес тяни мокшаватне лоткасть котфонь кодамда.Ламоц валхне сотнефтольхть оцязоронь пингонь эряфть мархта: баяр, ума, дацькя.Ня валхне тусть мокшень кяльть лексикастонза марса сире койхнень мархта.

      Сиретьф валхненди мярьгихть архаизмат или историзмат, «архаизма» валсь греческяй, сонь смузец мокшеннеса- «сире, кунардонь».Сянкса ся учрежденияти , коса ванфтовихть кунардонь докуметтне, сермадомань памятникне, мярьгихть архив.Эсь смысланц и функциянзон коряс тя валсь мала архаизма валти.

      Архаизматне мокшень кяльса васьфневихть устнай народнай творчествань произведениятнень эса, художественнай литератураса историческяй событиятнень, сире пингонь койхнень няфтемста.

              Од материалть кемокстамац.

     1. Лувомс самостоятельна книгаста текстть.

              Кизефкст:

     а) мес кой- кона валхне юмасть корхтамаста и синь юкснесазь?

     Б) Мезе стамсь историзмась?

     В) Коса васьфневихть историзматне?

    2. 248- це упражнениясь.

Сермадомс 5 валрисьмот. Азомс валхнень смузьснон: кяряд- эсь лацонь инзама, кесак - ровнайста марс пуроптф сюрень пусма, морафтома куд - тяниень читательнай зал, волостной старшина - (Октябрьскяй революцияда инголе минь странаньке ульсь явф волостева, конатненди оцювонди кочксевсть волостной старшинат и стак тов.

    3.249 - це упражнениясь.

Устна .Азомс предметтнень лемснон и мезе синь мархтост тиендевсь.

   4.250- це упражнениясь.

Сермадомс 3 валрисьмот.Мумс историзматнень и архаизматнень, алгаст таргамс китькскат. Азомс ня валхнень смузьснон: лапотмакс - сюрень кштирдемань инструмент; ума - паксяса сероса видеф мода пакш; писарь - ломань, кона серматкшни кодамовок важнай канцелярскяй каготт; уезд- округ, ламода сяда оцю волостть коряс; сапоня- авань щамбяль.

  5.Учительсь морай мокшень мора:

     Шись нюрьхкалгодсь, весь кувалгодсь,

     Курок тялонь якшамсь сай.

     Мокшень стирнясь лапанц ваксса

     Озаф кштирди и нувай.

     Тялоньберьф сонь тевоц сяка,

     Ащемс кудса пялевес.

     Кода лама кесак кштирдемс,

     Штоба улель тейнза аф визькс.

6. « Морозе народозти ».

Артур Матвеевич\Моронь стихотворениянц, конань эрзяннеста етафтозе Сергей Кинякин, ваномац.

     Сятненди мон тячи

     Сединь мора моран,

     Горят и нужат,

     Кинди кандсть туф пинкне.

     Сельмоведьта - моря,

     Кинь козялянь кяльхне

     Лемнекшнезь унжакс.

     Сятненди мон тячи

     Сединь мора гайфтян,

     Бралгсть кит атякарьса,

     Вешендсть паваз пакш,

     Етазь марнек масторть -

     Аф шта шачем крайснон, -

     Меки куду каннесть

     Сяда оцю ашт.

К.Г.Абрамов «Эрзянь цера» романцта пакш.

     Стирькс Наста ульсь мазы. Валда шяяренза кувакат. Кемгафксува киза эряй Самаркиттнень кудса, и тя пингста аф ламонь- аф ламонь солась мазышиц. Якстерь шамац олась, сери ронгоц мяндевсь. Тялоньберьф Наста аф лоткси кштирдемда, меле кодай, кизонда нуй, сексенда тяляй, самботь тиендьсы цератнень мархта ряцок. Лия авань коряс Настань эряфоц аф сяда кальдяв, ули авозец, атявозец, пянакуд инголи арси шуроста.

         Кочкавихть архаизматне. Азомс синь смузьснон.

    Валхнень мархта работась: няфтевихть тонафнихненди сире предметт. Эрявихть азомс лемсна и устна арьсемс валрисьмот ( кштирь, кесак, цеканьзюра, карь, голатка, цуфцом и лият).

7.Валонь фонетикань разборсь.

 Шабатне тиихть «карь» валти фонетикань разбор.

8.Картинань коряс работась.

 Няфтевихть Федот Васильевич Сычковонь картинанза, конат лемтьфт мокшень аватненди: «Стака етама», «Од рьвяня».

    Шабатне арьсихть валрисьмот, коза сувафтыхть архаизмат.

   Аукциононь элемент.Шабатнень мархта етафтови аукцион.Кие сяда лама азы архаизмада, сянди максови казне.

            Выводсь темать коряс.

1.Учительсь путы оценкат.

2.Кудонь заданиясь.Сермадомс кудса, музейса ванфтови сире предметонь лепт.Азомс ня валхнень смузьснон.

          Учительть мекольдень валоц.

          - Шабат, тясть юксне эсь кялентень, кельгость и содасть сонь. Ацергоды седиезе, мзярда кульса и няйса, кода кой - кона мокшетне виздихть мокшекс корхтамаснон. А вдь минь кяленьке пяк мазы. Вов кода родной мокшень кяльть колга сермадсь писательсь Е.И.Пятаев:

         Мазы кяленьке, пяк мазы,

         Тундань варьхмодема лаца,

         Кода питни- питни казне,

         Кода марлю панжи садса.

         Мес миндейнек сон инь мазысь,

         Мес сонь шнасаськ кепотьф мяльса?

         Сяс мес васень валхнень азоськ

         Тядянь - авань родной кяльса.