Рабочая программа по родному (мокшанскому) языку 9 класс на 1 час
рабочая программа (9 класс)

                                Муниципальное бюджетное общеобразовательное учреждение

«Тарханско-Потьминская основная общеобразовательная школа»

Рабочая программа

учебного курса

 «Мокшень кяль»

для  9  класса

Всего часов на изучение программы 34

Количество часов в неделю 1

Составитель:                          

                                                                                    учитель родного

                                                                                    языка и литературы

                                                                                    Кирдяпина Е.С.

1.Пояснительнай записка

Мокшень кялень рабочай программась тиф вейхксоце классонь тонафнихненди, конанди основакс сявф:

• Российскяй Федерациянь Федеральнай законць «Об образовании в Российской Федерации» №273 от 29.12.2012 года.
• Основной и средняй школань примернай программась мокшень кяльса 5-11 класса Российскяй Федерациянь  национальнай школань  2017 кизотькса;
• Мордовия Республикань Образованиянь Министерствань «Мокшень кялень программат 5-11-це классненди» 2001 к.,
• Федеральнай Государственнай образовательнай стандартсь, кона примаф Российскяй Минобразованиять приказонц коряс  05.03.2004к.;
•   Учебнай планонц коряс МБОУ «Тарханско - Потьминскяй ООШ»  
• МБОУ «Тарханско-Потьминская ООШ» Уставоц

Афкуксонь календарно-тематическяй планированиясь тиф, нежедемок «Мокшень кялень программат 5-11 классненди», кона нолдаф 2017 кизоня Саранскяйса Мордовскяй книжнай издательстваса, программать сермадозь Г.С.Иванова, Т.И.Ломакина.

    Программась ащи фкакс 9-це классонь тонафнемань книгати общеобразовательнай учрежденияса, книгать автороц  Алямкин Н.С. Саранск, 2020к.

Программась тиф ваномок системнай, научнай и доступнай принципнень лангс, а стня жа преемственнай и перспективнай лия курсонь разделхнень ёткса. Программась аноклаф 34 частонди.

Кяльсь – инь эрявикс и пяк кунардонь общественнай явления. Срнь вельденза ломаттне фкя-фкянь мархта корхнихть, азондсазь мяльснон-арьсемаснон, шарьхкодихть  фкя–фкянь. Кяльсь ванфтсы и пачфтьсы сянь, мезе ульсь народть эряфса, вельденза азондови сонь ётаф киц. Фкявок ши аф эрявихть ломаттне апак корхтак.

Мокшень кяльсь – мокшетнень шачема кяльсна, кона ётась касомань и вииямань пяк кувака кигя. И тяни сон мокшэрзянь народть национальнай литературнай кялензон эзда фкясь. Мокшень кяльсь школаса кода тонафнемань предмет занци пяк эрявикс васта, сонь оцю тонафнемань и цебярь потмовиень касфтомань смузец.

Школаса родной кяльсь тонафневи сянкса, штоба анокламс культурнай, сембе ширде содай ломатть, максомс тейст мокшень литературнай кяльса морафтомань, корхтамань и сёрмадомань содамошит.

Тя тевса шачема кяльть асувоц аф азовомшка оцю. Велеса мокшень иттне тонафнема пингснон ушедома инголе сидеста марнек перьфпяльть, ломаттнень ёткса соткснень колга мяльснон и содамошиснон маштыхть азондомст аньцек мокшекс, тейст тя кяльсь – пъцтай ськамонза фкя- фкянь мархта корхтамань, фкя-фкянди мялень азондомань средства. Мокшень идть содамошинзон сяда тов касфтоманкса аф эрявихть сязендемс сотксне конат тя пингти ладявсть ни сонь кяленц и мялензон-арьснманзон ёткса. Мекланкт, ня сотксне коль кемокснихть и касыхть-виензайхть родной кялень урокнень эса. Шачема кяльть цебярьста содамац пяк лезды келептемс перьфпяльть колга содамошитнень, сон максы пара лезкс рузонь кяльть тонафнемста, грамматиканц, марнек козяшинц и виенц шарьхкодемста.

Тонафнихненди эряви максомс сатомшка содамоши родной кялень фонетикаста, лексикаста, морфологияста, валонь тиевомаста, синтаксисста и стилистикаста; пачфтемс марнек эряфса кяльть асувонц колга, сяда тов касоманц и виияманц и масторлангонь лия кяльхнень ёткса сонь вастонц колга. Шачема кяльть лезксонц вельде, сонь лангозонза нежедезь, эряви касфтомс иттнень логическяй мяльснон-арьсемаснон, ёжемарязь морафтомань икорхтамань маштомошиснон. Максомс сёрмадомань, пунктуациянь и интонациянь кеме маштомошит, кеподемс синь мяльснон цебярьста содамс, кельгомс и ванфтомс тядянь-алянь кяльть.

Ня тефне оцюфт и аф тёждят. Синь цебярьста пяшкодевихть аньцек эста, мъзярда сонць учительсь вятьсы эсь предметонц тевонь содазь, цебярь методса и приёмса, апак лотксек кърхкалгофнесыне и келепнесыне кялть коряс содамошинц, методическяй иобщепедагогическяй ширде аноклофшинц, мъзярда сонь тевонц тиендьсы седи виень путозь.  

  Сембе тя содамошитне максовихть тяниень пингонь кялень наукать сатфксонзон мяльс сявозь .

9-це класса тонафневи сложнай валрисьмось, цебярьста корхтамась.

               Мезе тонафнись должен содамс 9-це класса:

- сложносочиненнай валрисьмотнень,

- сложноподчиненнай валрисьмотнень,

- союзфтома сложнай валрисьмотнень,

 -схематнень  сложносочиненнай, сложноподчиненнай, союзфтома сложнай валрисьмотненди,

- стакалготф синтаксисонь конструкциятнень

9-це класста меле иттненди эряви маштомс:

- простой и сложнай валрисьмотнень фкя-фкянь эзда явома,

- сложносочиненнай валрисьмоса башка пялькснень и простой валрисьмоса однороднай сказуемаень группатнень фкя-фкянь эзда явома,

- подчинительнай союснень, союзнай и няфтемань валхнень сложноподчиненнай валрисьмотнень видеса тевс ноляма,

- союз мархта и союзфтома сложнай валрисьмотнень кода синтаксисонь сининимонь корхтамаса тевс ноляма.

Тага эряви содамс:

- сложносочиненнай валрисьмотнень,

- сложноподчиненнай валрисьмотнень,

- союзфтома сложнай валрисьмотнень,

 -схемань  сложносочиненнай, сложноподчиненнай,союзфтома сложнай валрисьмотненди.

Кода тонафтомс цебярьста корхтама и

морафтома

     Программаса оцю мяль шарфневи цебярьста корхтамати. Тянкса нолдаф сатомшка пинге 9-це класса.

Эрь пяльксть, эрь темать тонафнемац и содамац лезды тонафнихненди мяльснон-арьсемаснон и корхтама маштомаснон касомаснонды. Тянди оцю лезкс максыхть фонетикаса, лнксикаса, морфологияса, синтаксиса и стилистикаса определениятнень тонафнемасна.

   Мокшень кялень урокса оцю мяль шарфневи стилистикань элементтненди, конат сувафневихть фонетикать тонафнемста, лиякс мярьгомс, корхтамань норматнень ваномста.

Орфоэпиять содамац лезды корхтаманьконь видеста ладяманцты Тяса оцю смузьсна гласнай и согласнай вайгялькснен.

 -Диафильмань, кинофильмань, радиопередачань и телепередачань содержаниянь коряс нюрьхкяня изложениянь тиема (устна и сермадозь).

-Максф ушетксть, петь, пейзажть и сюжетть коряс азондомань характер мархта сочинениянь сермадома. Эсь мяльхнень лангс ванозь и корхтамань коряс ломаненди описаниянь тиема.

-Художественнай произведениянь персонашненди сравнительнай характеристикань тиема.

-Художественнай произведениянь колга письменнай отзывонь максома.

-Выводонь и эсь мялень-арьсемань мархта заметкань сермадома.

-Рузонь кяльста родной кяльс валрисьмонь, художественнай аф оцю текстонь етафтома.

   Кодама урокт нолявихть тевс? Комбинированнай урокт, повторительно-обобщающай урокт, урок-путешествия, экскурсиянь урокт и стак тов.

Контролень виттне: контрольнай диктант, урок-зачет, тесттнень лангса работамась,творческяй диктант,объяснительнай диктант и стак тов.

2.Базовай курсть родной (мокшанскяй) кяльть 9-це класса основной содержанияц.

I.Кафксоце класса тонафнефть лятфтамац(1ч.+1ч.)

   Валрисьмось. Валрисьмонь главнай и зависимай пяльксне. Фкя главнай пялькс мархта валрисьмотне. Однороднай пялькс мархта валрисьмотне.

II.Сложнай валрисьмось. Цебярьста корхтамась.(1ч.)

   Сложнай валрисьмось. Кафта и сяда лама валрисьмоста сонь ащемац. Союз мархта и союзфтома сложнай валрисьмотне.

Демонстрациясь:

-таблицатне,

-карточкат,

-тестовай заданият.

III.Сложносочинённай валрисьмотне(3ч.+2ч.)

   Соединительнай, противительнай и явомнь союз мархта сложносочинённай валрисьмотне.

   Сложносочинённай валрисьмонь пялькснень ёткса запятойсь.

Демонстрациясь:

-таблицатне,

-карточкат,

-тестовай заданият.

IV.Сложноподчинённай валрисьмотне(11ч.+3ч.)

   Главнай и придаточнай валрисьмотне.

   Союснень и союзнай валхнень вельде главнай и придаточнай валрисьмотнень сотовомасна. Главнай валричьмоса няфтемань валхне.

   Главнай валрисьмоть видеса придаточнай валрисьмоть вастоц.

   Сложноподчинённай валрисьмоть пяльксонзон ёткса запятойсь.

   Сложноподчинённай валрисьмотнень видсна: изъявительнай, определительнай, обстоятельственнай.

   Соподчинительнай и последовательнай подчинениянь сотксса моли лама придаточнай валрисьме мархта сложноподчинённай валрисьмотне. Запятойсь путомаса башка случайхне.

Демонстрациясь:

-таблицатне,

-карточкат,

-тестовай заданият.

V.Союзфтома сложнай валрисьмотне(3ч.+1ч.)

   Союзфтома сложнай валрисьмотнень пяльксснон ёткса смузень соткссь.

   Союзфтома сложнай валрисьмоть видеса интонациясь и лотксема тяштенятне: запятойсь, точка мархта запятойсь, кафта точкатне и тиресь.

   Сложносочинённай валрисьмотне и лия типонь валрисьмотнень мархта синь синонимикасна.

   Сложноподчинённай валрисьмотне и лия типонь валрисьмотнень мархта синь синонимикасна.

   Союзфтома сложнай валрисьмотне и лия типонь валрисьмотнень мархта синь синонимикасна.

Демонстрациясь:

-таблицатне,

-карточкат,

-тестовай заданият.

VI.Синтаксисонь сложнайгофтф конструкциятне(1ч.)

   Сложносочинённай и сложноподчинённай пялькс мархта синтаксисонь конструкциятне.

   Однороднай пяльксса сложнайгофтф валрисьмотне.

   Явфтови башка пяльксса сложнайгофтф валрисьмотне.

VII.Виде и аф виде корхтамась(3ч.+1ч.)

   Виде корхтамать шарьхкодемац. Виде корхтамать видеса авторть валонза.

   Виде корхтама мархта валрисьмоса лотксема тяштенятне.

   Ламонь корхтамась, сонь видесонза лотксема тяштенятне.

   Цитатась, сонь видесонза лотксема тяштенятне.

   Аф виде корхтама мархта валрисьмоса лотксема тяштенятне.

   Виде и аф виде корхтама мархта валрисьмотнень синонимаксна.

Демонстрациясь:

-таблицатне,

-карточкат,

-тестовай заданият.

VIII. Кизоть песта тонафнефть лятфтамац(3ч.)

   Сложносочинённай валрисьмотне.

   Сложноподчинённай валрисьмотне.

   Союзфтома сложнай валрисьмотне.

   Синтаксисонь сложнайгофтф конструкциятне.

Демонстрациясь:

-таблицатне,

-карточкат,

-тестовай заданият.

3.Учебно-тематическяй планированиясь

5. Календарно-тематическяй планированиясь

Сембоц---34;

К\к-8;

Диктантта-2

6.Учебнай предметть материально- техническяй базац

Таблицатне:

-Фкя составонь валрисьмотне.

-Однороднай пялькснень видеса лотксема тяштенятне.

- Однороднай пялькснень водеса обобщающай валхне.

-Лиянь корхтамась. Лотксема тяштенятне видесонза.

-Фкя составонь валрисьмотне.

-Сложнай валрисьмотне.

- Простой валрисьмотне.

-Сложносочиненнай валрисьмотне.

-Сложноподчиненнай валрисьмотне.

-Союсне и синь явомасна.

7. Кабинетса литературась тя предметть коряс

-Поляков О. Е. «Мокшень кяль»,Саранск, 2008к.

-Гришунина В.П., Левина М.З., Алямкин Н.С. «Мокшень кялень практикум», Саранск 2008к.,

- Гришунина В.П., Кабаева Н.Ф., Левина М.З. «Мокшень кялень практикум», Саранск 2005к.,

- Гришунина В.П., Кулакова Н.А., Рогожина В.Ф. «Диктант и изложеният 5-11 классненди», Саранск 2010к.

-Киреев В.Л. «Методическяй разработкат 6-7-це классонь мокшень кялень учебникть коряс», Саранск 1977к.,

-Голенков Н.Б. «Уроки мокшанского эрзянского», Саранск 2006к.,

-М.А.Келин «Занимательнай грамматика» Саранск, Саранск 1998 к.,

-Б.А.Серебренников, А.П.Феоктистов, О.Е.Поляков «Мокшень-рузонь валкс. Мокшанско-русский словарь» Саранск 1998к.,

-В.И.Щанкина «Мокшень-рузонь валкс – Русско-мокшанский словарь» Саранск, 1993к.,

-О.Е.Поляков «Русско-мокшанский школьный словарь» Саранск, 1996

-М.А.Келин «Валть пяльксова явоманц коряс мокшень кялень валкс» Саранск,

-О.Е.Поляков «Касыксонь валкс» Саранск, 1998к.

8.Цифровой образовательнай ресурсне

Библиотека мордовской литературы /lib.e-mordovia.ru/

9.Практическяй деятельностть содержанияц

Сембоц контрольнай работада -2ч.

Контрольнай диктанттнень темасна.

Контрольнай диктантсь №1 «Сложносочиненнай валрисьмоть коряс».

Солдатонь арьсемат.

Армияса Галош пандти тактическяй занятияс сявондемазь сидеста. Весть – кафксть куцемс – валгомс – ся аш мезевок. А мъзярда мельцек тянь тиендемс колма – ниле част – каяфтк гимнастеркацень и салыяфтт потмозонза куярхт. Тага арьсезеват…

Содатонь ризфне, къда пиземсь лангстот аф штасыне, эсь ливозьсот лихтевихть. Но шобдаваста илядьс кошардозь эрямась – сембода стакась. Мяльхне лиендихть кати – куваня, васетькшнихть кельгома и содаф ломаттнень мархта, а тон матфат кевонь кяскаву – казармав, и марясак пряцень керф паця нармонькс. Шиньберьф сизят куломшка, но эстокигя аф матодоват. Стака арьсемада аралатанза удомась. Ваят бъта кърхка томбас. Тейть – арам, тодуценьге ашеть кенере эждемс, а тяса ни пря потмоцень пидесы «Подъем!» - аеркс валсь. Тага арьсек 45 секундатнень колга. А завтракамда меле тага учсетянза ошть песа Галош пандсь. Тага эрявихть шовсемс боконза пеккедьса. Ся ванондомс пара перьфпяльть панда пряста, а вов куцемс тоза, да нинге ласькозь или пеккедь лангса… Э – хе – хе… (141)

Контрольнай диктантсь №2 «Сожноподчиненнай валрисьмотнень коряс».

Максимкань седец.

Максимка кельгозе семьянц, тундать и узерть, конань вельде нинге кеветие кизоняса кармась сатнема прянь трямс кши.

Пиче велеса, къда кочкамс фкя порядкас куттнень, конатненди токсесь узерец, кочкаволь кувака ульця. Алясь, къле, содасы шуфтть кяленц. Но мезенди теенза золотой кяттнень, къда велеса ломаттне лоткасть кудонь путомда. Оттне, сят тонадсть аноконяти, тест колхозсь стяфни финскяй куднят фанерань щитста и кирпицьста. А од семьяти пара, конешна, сувамс аноконь кудняс, содаф, мъзяра ярмак и эрьгя эряви тяшка тевть веляфтомс.

Эряй Максимка ляй търваса. Тунда вальмаванза кулеви, кода цяторды Иссать лангса эйсь, мярьгат, марнек модась танцтиста нуворготкшни.

Эрь кизоня эйть сявомда инголе калафнекшнесазь Иссать туркс седть, а ведть озамда меле меки кочксесазь. Кемоньшка кизода инголе сонць ерась машфтомс эсь тевонц. Сявсь карандаш, кагод и ушедсь рисавама. Колмошка илядь Максимка ливоськоткшнесь кагодть вельхксса и рисавась седь, кона, арьсеманц коряс, афоль синнев аф шадозь эйхненди, аф стака машинатненди. Въдь нинге атяц азонкшнезе, што сонь одкс пингстонза Иссать туркс ащесь седь эень лазондома мархта и кирнесь лама киза. (162)

Контрольнай диктантсь №3«Сюзфома сложнай валрисьмотнень коряс».

Аляшка цёрокш.

Недяля Антошась  ванць Михей атянь мархта. Шитне лямбондсть, тусь од тише, и траксне тонадсть паксяти, кармасть ярхцема сятявста. Антошатьке тевоц сяда теждялгодсь, ласькондемада тяни сяда кържаль. Лихтьсазь стадатнень шобдава рана, нинге вишке раса, траксне пуромихть марс и нувайхть шинять стямс, расать эжемс. Ся пингть мадыхть постуфневок, ваймяйхть.

Весть Чаграйсь мярьгсь:

- Кулить? Саты якамс велень стадать мархта, тяни яфт Михей атянь эзда.

Аф пароль тяфта Антошати, лажаткшнель Филькати, но старандась угадямс азоравати. Сяколь седиень петемацка – стойлась: стойласа синь эрясть тага марса.

Аньцек – аньцек тонадсть траксонза – састь тундань пси шитне, тихтедсть пуропне, каруфне, сяськне. Аньцек кеподи шись шуфтонь серь – лисендихть и уромихть стадать лангс, ройкс роендайхть тракснень мельге. А сят, кодак марясазь бъзфснон, кеподьсазь пулоснон и туйхть шемотом кона ков, паксять келес ардыхть ляйть шири: теест аньцек тоса прянь араламась! Антошась тонадсь ни: аньцек эжди шись, эсь стаданц нолдасы ардома и содасы: ляйда башка вазнявок козонга аф туй. (147)

Контрольнай диктантсь №4. Итоговай контрольнай диктант.

Церанц шири инжикс.

Федярясь кунара ни молель ширезонза, да коль аф досуколь. Васенда модамаренза эрявсть таргамс, каямс седялу, матфу. А бабать мархта кафоненза дяряй лама тият? Сонць прянц нинге лац марясы, а авозец, Ольга баба, ся аньцек кочкама и сафтсы; фкя ведарка канды ворафста седялу, цю мъзярс ваймоси. Савсь помочь серьгядемс – сашендсть курнянь аватне: Алдакаерясь, Вера баба, Матя… И то кафта шит возендасть.

То – та, таргазень модамарензон – пизепт – ърдаст тусть, аньцек кямоса кялеват разъезду. А кодама ни кялись, Федярясь… суфтозе ушенц – капстань тапама пингське сась. Федярять сонцень капстанза ашельхть – перец вярьгак вастса ащи: тунда озафты рассада, валондсыне – тисыне юрнятнень, сексети, ванат, сянгяря лопатне сяка аф ашкодыхть пряс. Лямонди кондястихть, а салыяфтомс – аф. Вов и сашендови рамсемс капстат. Ляй беряк курняста. Тонатнень пересна алгак вастсот – хоть капстатне, хоть куярхне апак валонтт касыхть…

Кафоненза лама – аф лама, а сядошка кила эряви: лямонди, модамарь мархта. Капстань тапама тага помочь сашендовсь тернемс. (143)

Изложеният.

Пара тият – пара учт.

Андрейня содазе, што вальмаснон вельхксса пизоняса ульсть колма пъзьгата лефкскат. И вдруг – эздост аньцек кафта лядсь…

А коса ина колмоцесь?

Андрейнясь лиссь ульцяв и кульсы: кусторкснень потмоса тюжя катосна мърноси и емла лефкскять кеворясы мадясонза.

Церанясь нельгозе катоть кядьста емла пъзьгатанять и путозе кядьлапшезонза, а нармоннять седиец станя шавсь, мярьгат, вов – вов комоти мяштьстонза. Цють живой нармоннясь аньцек кургонянц панчсесы. Фкя пильгоняц нюрьгсь – синтьфоль.

- Ёрдак сонь, - мярьгсь соседонь церанясь. – Месть возсят мархтонза?

Но Андрюшась ашезе кулхцонда ялганц, кандозе нармоннять куду. Няфтезе алянзонды – тядянзонды. Кармасть ямбарнять пъкафтомонза. Саворня видептезь синтьф пильгонянц, кафта сардоня еткс сотнезь бинтса.

Церанясь пъцтай изь тушенда нармоннять маласта. Сон макссесь теенза ярхцамс сукскат, унжанят, кайсесть инголенза ведня. Но нармоннясь изь симе, изь ярхца.

И аньцек эста, мъзярда пъзьгата лефкскять кургс кармась кайсема ламбама ведня, сярядинясь элякодсь. Сонь пиндолгодсть сельмонянза, кармась пацянзон кепсема. А курок тонадсь ярхцама сонць.

Нармоннясь ушедсь пъчкама. Пильгоняцка пъчкясь, но изь мянцев. А сяс, мъзярда кармась лиендема, сон мадянянцты кирнезе видеста.

Пъзьгатанясь кассь. Андрюша сонь лихнезе ушу. Нармоннясь шятнесь емла азорнянц лафтус и эсь оржа нярнянц нарнезе шяярензонды.

Но весть, мъзярда Андрейть ялганза эвфтезь толгавнять, сон лийкстась азоронц лафту лангста и шоворсь пъзьгатань стаяти.

- Вов тейть «цебярь тият – цебярь учт!» - рахсесь ялгац.

Изь ту Андрюшать мяльс ялганц рахсемац. Мольсь куду и ярхцамонга изь карма. Сон шинек – венек форточканц кирнезе панжада. Но нармоннясь изь тихтетькшне. Улема, музень эсь братканзон, сазорнянзон и мархтост налхкси ошень кудбрява, юкстазе Андрейнять.

Но етась сексесь, мельганза шаржу тялоське сась и етась.

Тага меки сась мазы тундась, и пъзьгататне мърдасть севонень эсь куднязост. Тяни эздост ульсь сяда лама. Но тя пингть ломаттне строясть лама од куд, и ули коза толгафнендиге тиемс севонень куднят.

Андрюшась оцю мяльса ванондсь, кода пъзьгататне строяйхть куднят. Но вдруг сон кенярдезь ювадсь:

- Аляй, тядяй! Пъзьгатаняньке меки мърдась. Вона сон. Няйсасть, конань пильгоняц аф мянцеви. И видекс, тя ульсь Андрейть пъзьгатаняц. Сон мърдась лямбе ширде. Тяни сонга оцю пъзьгатакс арась.

Андрюшать вальманц вельхксса сон занязе тядянц куднянц, и курокста тихтедсть лефксканза. Сон эсь иднянзонды кунтсесь и каннесь унжанят, сяськт.

И весть тя нармоннясь Андрюшати мтаня лездсь, што лезксонц колга сонцьке изь шарьхкоде.

Андрейсь мадсь удома, а вальмять кадозе панжада. Шоподемшовор шяйста кеподсь маштыксонь канды оцю пеке сяськсь. Кеподсь и лийкстась церанять лямбе вальманцты. А церанясь уды и аф содай мезевок зиянонь канды сяськть колга. И пъзьгатаняське нувазевсь. А сяльде кульсы нармоннясь: лии и бъзнай кяжи сяське. Аноклась пря сон, учезе, сяськсь маладсь, и цоп – сонь нилезе.

Андрейнясь мянь тячемс аф пяк верондай, што цебярь тевсь тяфтак аф юмай.

А шавос. Сире ломаттне виденц корхтайхть: пара тият – пара учт. (420)

Кода шачендыхть легендатне.

Мъзярда етасайть ичкоздень китнень и саят пульснон шукадема шачема кудонь порогти, тон тага кульсайть кунардонь содаф лепнень. Тонь  мяльце, васендакиге, симомс Поварнянь или Нарвадонь эшиняста, а вакссост тага лятфтасак шаржу легендать.

Къле, кунара тя ульсь, пяк кунара. Эрясть ня эшинятнень ваксса кафта мокшень алят - богатырьхть. Фкять лемоцоль Поварня, омбоцеть - Нарвад. И ульсь ня браттнень аньцек  фкя узерьсна. Эрявксты сон киндевок фкяти, ювади: «Брат, ёрдака узерть!» А эшинятнень ёткса, маряк, колмошка вайгяльбе. Ёрдасы Нарвад узерть, а тона прай видеста Поварнять эшинянц ваксс. Вов конашкава тазатольхть браттне, вов конашкава кайгихтельхть вайгяльсна.

Поварнянь эшиняц тяни велеса, а Нарвадоннесь паксяса. Эрь ётайсь лоткай ваксозонза. Цю конашка серес пиксы лихтибрясь, комболфнесы акшаза шуварть, а ведец кельме - кельме, мянь лазсыне пейхнень. Сонь таньфоц мъзярдонга аф юкстави.

Но ломанень лепт макссихть аф аньцек эшинятненди. Мъзярда етасайть кувака китнень и саят шачем куду – куваня афолеть моле, няйсак келу поранять, кона таргавсь Саразонь потма лоткста Курган пряти. Тяса мъзярда – бъди шава вастоль. А тяни вармать ала жойнязевсть сянгяря касса келунятне, и аш сяда мазы васта перьфпяле. Тяза сашендыхть стирьхне «тундань първажама». Мъзярда эреклакшни шуфттнень соксна, иттне якайхть келуведьта симома. Сексенда келунятнень ала эвондакшнихть вирень пангонят – мазы лангонят. Вирень мазышись – роснень ваксса! Тялонда тяза кадондсазь пильгокиснон нумолхне.

Кона ширде тят малада велети, тон няйсайть ня виде ронгонятнень, конат стирь лаца лиссть паксять кучкас. А мъзярда няйсайть, мярьгат: «Мон тага кудсан!»

«Стёпть келунянза» - мярьгихть ня шуфтонятненди. Сяс месс озафнезень Резепов Степань бригадац. Аш шиса ни тевонь содай, машты кядь алясь. Пара тев тись сон эряфсонза. А пара тефне аф юксневихть.

Да, легендатнень пачфнесазь тейнек аф аньцек кунардонь пинкне. Синь шачендыхть тянивок. Стёпть келунянзон вакс совхозсь озафнесь марлюнь сад. Шуфтонятне нинге аф серихть, аньцек тусть касома. И мон арьсян, путыхть ломаттне лем тя садтиге, кона эвондась шава паксяса модать мазоптомонза, ломаттненди пользань кандома. Мъзярда кармай панжема тя садсь, Стёпть келунянза арайхть ни оцю шуфтокс, увназевихть вармати и ванфтсазь кяжи даволда марлюнятнень акша – розовай панчфснон. (312)

Творческяй диктант.

Тиемс валрисьмотненди схемат, няфтемс придаточнай пяльксть видонц.

1. Авась изь ёра, штоба сонь кивок няелезе. 2. Авась корхтась ёфси аф кяжиста, хоть и щафоль милициянь щамса. 3. Изь кулев авардема вайгялец ся шинявок, мъзярда  инксонза сась аляц Цямкаерять пяли. 4. Ня цифратнень эса учсь, бъта кати - кодама снадобьянь, конань эзда, пади, пъчкяй сяряди седиец . 5. Сувась  сембонь мархта, кие ульсь тоса, шумбрандась кядьта, пеедсь. 6. Да, да, Кержаев Сёма мяляфтсы, кода Очижинь омбоце шиня сон угадясь Аверяскинонь пяли. 7. Къда стяй ветеста и эрь частоня ицьколдай  кота вайгяльбет, эста Хованьца ули кафкса частса. 8. Ваня азондозе, кода паркса Игорь ялганц мархта валхтозь столба пряста атёкшть. 9. Пяштяльмов вешезе сельмованфса сянь, кие тяшкава рахафтозень ломаттнень.

Корхтама маштома кассфтомань урокне (18).

1. Арьсемс азкс сувафтф валрисьме мархта.

2. Сочиненияти анокламась. Содамошинь кемокстамань урок.

3. Сочинения «Монь тядязе»

4. Работась эльбятькснень лангса. Лувомс выразительнайста текст сложносочиненнай валрисьме мархта.

5. Изложенияти анокламась. Содамошинь кемокстамань урок.

6. Изложения «Пара тият- пара учт».

7. Сочиненияти анокламась.Содамошинь кемокстамань урок.

8. Сочинения картина коряс.

9. Творческяй диктант.

10. Работась эльбятькснень лангса. Арьсемс валхнень мархта валрисьмот.

11. Арьсемс валрисьмот кафта точка мархта союзфтома сложнай валрисьмотнень коряс.

12. Изложениянди анокламась. Кемокстамань урок.

13. Изложениянь сермадомась « Оцю кал».

14. Эльбятькснень лангса работась.Валрисьмонь арьсемась.

15. Лувомс выразительнайста текст сложнайготф синтаксисонь конструкция мархта.

16. Арьсемс валрисьмот сложнайготф конструкциятнень  коряс

17.Ламонь корхтамань арьсемась.

18.Эльбятькснень лангса работмаась.Текстонь етафтомась рузоннеста мокшекс (187-це упражнениясь).

Тесттне

1-це вариантсь 

 А1 Кона валрисьмоса точкатнень вастс аф путови тире?
1) Школань пирьфоньке …кода сад.
2) Эрямс …служамс Родинати.
3) Саранскяйсь…Мордовиять столицац.
4) Минь задачаньке …тонафнемс цебярьста.
 А2 Кона валрисьмоса лия шрифтса валхнень инголе аф путови запятой?
1) Минь васьфтеськ Митянь кафта кизода меле кода цебярь ялгань.
2) Кульк, тядянязе-крайнязе, монь валозень, сон пичефксу и виде кода пичетне.
3) Сон валонзон эса видесь станя жа маштозь и уряднайста кода природась озафни видьмонят аньцек панжема ушеды шинжарома пряс.
4) Валентина Терешкова кода мирса васенце-авась космонавтсь, содаф сембонди.
 А3 Максф валрисьмотнень эса улихть?
Инжихне састь обедта меле. 
1) вастонь обстоятельстват

2) пингонь обстоятельстват
3) туфталонь обстоятельстват

4) мерань и степенень обстоятельстват
 А4  Кона валрисьмотнень эса улихть однороднай подлежащайхть?
1) Сура аф видят – ям аф пидят.
2) Коса пачат – тоса аф вачат.
3) Сонь кизонза кемонь кукувонди аф кукавихть.
4) Вирьхнень эса ламоль нармоньда и зверьда.

А 5 Кона валрисьмотнень эса улихть однороднай сказуемайхть?
1) Эрясть-ащесть ката и пине. 
2) Катось фалу якась вири, кочксесь панкт.
3) Аф стак корхнихть: шабрада мала кивок аш.
4) Сась тялось.
 А 6 Кона валрисьмотнень эса улихть однороднай дополненият?
1) Кода и тяни шуфттнень пряста пяярсть лопатне, солсесь модать сянгяря шамац, а менельсь нюрьгсь и бта ёфси кудбрятнень вельхксса.
2) Тядяц шумбраль-тазаль, а аляц рязсь-сярядсь пянакудлангса.
3) Васильев Андрей лоткась, кулхцондсь.
4) Финскяй учёнайсь Х. Паасонен ётась мокшень и эрзянь велева, тяшнесь морот, ёфкст, азкст. 
 А7Азость кафта точкатнень путомаснон максф валрисьмоса:
Сибирскяй тайгаса сидеста васьфневихть хвойнай шуфтт: пичет, пихтат, кедрат.

1. обобщающай валсь ащи однороднай членда инголе;
2. однороднай члеттнень ёткс;
3. союзфтома сложнай валрисьмоса;
4. кафта точкатне мъзярдовок аф путовихть однороднай члеттнень инголе.

А8 Кона валрисьмоса улихть вводнай валхт, вводнай валзюлмот?
1) Тон, Арьша, коза тяфта наряжать?
2) И траксонь сюронь синни мартсь, кода корхнихть, педа-пес кандозе эсь кельмонц.
3) Сембось перьфпяльгя туман потмоса.
4) Вирьса минь кочксеме къстыхть, инезихть, нормальхть.
 А9 Кона валрисьмоса аш пъшкядема?
1) «Суркин сержант, Морозов виденц корхтай?!».
2) «Кизонда, вирняй, пиже лопаняй...».
3) Спасиба тейть, мокшень аля, – кеняртькшнесь оцязорсь.
4) Ушесь ульсь сетьме, вармафтома.

А10 Мусть виде ответть валрисьмоть характеристикаста: Тят кяжия лангозон, мон въдь ня валхнень тейть азыне паронь арьсемга.
1) валрисьмось сложнай, сложносочиненнай
2) валрисьмось сложнай, сложноподчиненнай
3) валрисьмось простой, кафта составонь
4) союзфтома сложнай валрисьме
 А11 Максф валрисьмоса и союзсь соты:Тяса ульсть и рахамат, и кенярдемат, иретьфти воляши и кельгома, кштимат, морамат и сяпи сельмоветть.

1) однороднай члетт
2) простой валрисьмот
3) сложнай валрисьмот
4) обособленнай члетт

 А12 Сёрмадость валрисьмотнень станя, штоба лисель текст 

1) Лия шрифтса максф валть явость пяльксова. 
2) Мъзяра грамматическяй основада колмоце валрисьмоса.
3) Кодама корхтама пяльксонди кандови фталдонза валсь.
2-це пялькссь

1. Рана шобдава ушеса нинге кельмоль. 2.Мон щань фуфайка, сявонь кептерня и лисень пирьфи назёмонь каннема. 3. Ашень кенере ёрдамс кептернязон колма каймот назём, лийсь малазон пъсьмар. 4. Сон бта мядондафоль, бокова толганза сязентьфт. 5. Улема, тюрсь кинь-кинь мархта. 6. Да нинге шамордсь. 7. Но прянц кирдезе отькорьста. 8. Комотнесь, тяряфнесь мумс срафнеф назёмста лефксонзонды сукст. 9. А назёмсь коськоль, и сукст эсонза ашельхть.10. Пъсьмар лефксне пешкоткшнесть, анасть ярхцамс. 11. Сембе мелавнятне, унжатне кельмоти пря исть няфне. 12. Пъсьмарти стакаль андомс лефксканзон. 13. Сон юватькшнесь кайгиста, седиень токай вайгяльса. 14. Мон шарьхкодень: нармонць анай лезкс.15. Путыне лафту лангозон каймозень и тунь лотконяти, коста фалу тарксень сукст калонь кунтсемс. 16. Пъсьмарсь лийсь малазон и кармась учема. 17. Мон таргань вете сукст и ёрдайне тейнза. 18. Сон фатязе фкять и лийкстась пъсьмаркудти. 19. А мон мърдань пирьфи. 20. Ашезь ёта вете минутатка, пилезон прась сяка вайгяльсь. 21. Пъсьмарсь маладсь тейне и кармась эняльдезь юватькшнема.22. Аньцек аськолдань лотконять шири, пъсьмарсь ульсь ни тоса. 23. Таргань лама сукс. 24. Мъзярда пъсьмарсь андозень лефксонзон и, сонцьке топодсь, озась пъсьмар кудть пряс и ушедсь морама.П. Мочалов.

В1 1-14 валрисьмотнень эзда сёрмадость фкя составонь валрисьмотнень номерснон. 

В2 11-21 валрисьмотнень эзда сёрмадость сложноподчиненнай валрисьмотнень номерснон. Сёрмадость придаточнай валрисьмоть видонц.

 В3 Мусть текстста кевонзаф валзюлмотнень.

В4  Сёрмадость 15-21 валрисьмотнень эзда сёрмадость союзфтома сложнай валрисьмотнень номерснон.

 В5 Сёрмадость 1-10 валрисьмотнень эзда вводнай вал мархта валрисьмоть номеронц.

II-це вариантсь
1-це пялькссь

 А1 Кона валрисьмоса точкатнень вастс аф путови тире?
1) Минь мастороньке …кода сад.
2) Эрямс …служамс Родинати.
3) Москусь…Россиять столицац.
4) Сёрмадомс мезе-мезе одня Пушкинонь колга … пяк стака.
 А2 Кона валрисьмоса лия шрифтса валхнень инголе аф путови запятой?
1) Цёрась аф мольсь, а лиезь лийсь вайгяльти кода мелавнясь толняти.
2) Ленась кулось. Мархтонза Тихононь кельгомацка тусь кода ведсь коське шуварть пачк.
3) Монга въдь ломанян… И нинге од ломанян, а эрян тя кудняса кода кельме кельяса монашка.
4) Сон ульсь школьнай пуромксса кода родитель и корхтась тонафнихнень прянь вятемаснон колга.

 А3 Максф валрисьмоса улихть? Ломаттне састь вирьста ялга. 
1) вастонь обстоятельстват 
2) пингонь обстоятельстват
3) туфталонь обстоятельстват
4) мерань и степенень обстоятельстват
 А4 Кона валрисьмотнень эса улихть однороднай подлежащайхть?
1) Тялонь веня вармась сувозь суви.
2) Азорсь и Трифон оцязе васенда симсть кафтонь-колмонь кружка пуре.
3) Кафта нумол мельге панят, фкявок аф кундат.
4) Келунясь, акшеня и кудрявай, кассь ляй берякть търваса.
 А 5 Кона валрисьмотнень эса улихть однороднай сказуемайхть?
1) Эрясть-ащесть атят-бабат. 
2) Иван тись кафта-колма аськолкс коридорнява и лоткась.
3) Пандть фталда няфнезе прянц ковнясь.
4) Шиньберьф работань тракторса.
 А6 Кона валрисьмотнень эса улихть однороднай дополненият?

1) Азорсь сувась куду, лихтсь панар да штанат.
2) Ашезь учев цёраснон свадьбац.
3) Тонафнихненди лац покодеманкса макссть питни казнет.
4) Тя ломанць штада кядьса аф кундави.
 А7 Азость кафта точкатнень путомаснон максф валрисьмоса: Нъльня ведьгя уенди нармоттневок: мацихне, локстихне, яксяркневок, – минь лангозонк ваномок, эвотькшнесть.
1) обобщающай валсь ащи однороднай членда инголе;
2) однороднай члеттнень ёткса;
3) союзфтома сложнай валрисьмоса;
4) кафта точкатне мъзярдовок аф путовихть однороднай члеттнень инголе.

 А8 Кона валрисьмоса улихть вводнай валхт?
1) Корхтайхть, июльсь – кизоть тёкшец, инь пси пингоц.
2) Но тяддесь косьфтасы-рязьфтасы сонь седиенц.
3) Шабатне корхтайхть кайгиста.
4) Ару ваномакс тячизе колаф. 
 А9 Кона валрисьмоса ули пъшкядема?
1) Прощай, кельгома ляй, кельгома лаймот, кельгома вирьхть!
2) Вазьфтома цёрась куду сувась васенцекс.
3) Сембе велеть явозь кемонень-кемонень куд.
4) Кяжиста увазевсь кудть ваксса равжа пинесь.
 А10 Мусть виде ответть валрисьмоть характеристикаста: Велеса аноклайхть тундань видемати.
1) валрисьмось простой, фкя составонь, глагольнай, определенно-личнай.
2) валрисьмось простой, фкя составонь, глагольнай, аф определенно-личнай.
3) валрисьмось простой, фкя составонь, глагольнай, аф личнай.
4) лемдемань
 А11 Максф валрисьмоса и союзсь соты: Шить и веть, и шобдава, кода уроз одава, явси, ранги, аварди – сельмоведнят пяярди.
1) однороднай члетт
2) простой валрисьмот 
3) сложнай валрисьмот
4) обособленнай члетт
 А12 Сёрмадость валрисьмотнень станя, штоба лисель текст

1) Лия шрифтса максф валть явость пяльксова. 
2) Мъзяра грамматическяй основада колмоце валрисьмоса.
3) Кодама корхтама пяльксонди кандови пяк валсь.

 2-це пялькссь

1. Темникавть эзда колмошка вайгяльбеса, мазы вастса Мокша ляйть търваса, ащи сери церькав. 2. Вакссонза нинге сяда вяри кеподезе прянц колокольнясь – пайгонь шавома вастсь. 3. Тя – Санаксорень монастырсь, 18-це веконь архитектурань и искусствань содаф памятниксь.4. Сембе, кит сашендыхть монастырть ванома, мъзярошка пингоня да ащихть калмоть ваксса, конань кевонцты сёрматф: "Тяза калмаф сонь превосходительствац рузонь флотонь вятнись и лия масторонь лама орденца казьф адмиралсь Федор Фёдорович Ушаков..." 5. Мелямба флотоводецсь Ф.Ф.Ушаков азф Саранскяй и Мордовскяй епархиянь иняру ломанькс. 6. Сонь лемоц путневи серцек Александр Суворовонь, Александр Невскяйнь, Михаил Кутузовонь, Павел Нахимовонь и лия содаф героеньконь лемснон мархта. 7. И тяка пингть Ушаковонь сонцень башка вастоц историяса. 8. Сонь лемонц мархта сотф Черноморскяй флотть тиевомац. 9. Ушаков кеподезе сяда оцю серес военно-морской искусствать.10. Россиять врагонза пельсть Ушаковонь эзда. 11. Сонь смелшинц и моряса тюрема маштоманц колга латсесть легендат. 12. Флотонь вятнить славац кайгсь мирть келес, а тя машнефтезень оцязорть перьфкя пульхкихнень. 13. Теест улель сяда пара, къда сиретькшни адмиралсь лядыкс кизонзон ётафтолезень сяда ичкозе столицать эзда. 14. Мокшэрзянь масторсь арась геройти тяфтама вастокс. 15. Нона векнень и тянивок Мордовиясь кельгозь ванфтсы мялямть Ф.Ф.Ушаковонь колга. Т.Козлов

В1 10-15 валрисьмотнень эзда сёрмадость фкя составонь валрисьмотнень номерснон. 

В2 1- 9 валрисьмотнень эзда сёрмадость сложноподчиненнай валрисьмотнень номерснон. Сёрмадость придаточнай валрисьмоть видонц.

 В3 10-11 валрисьмотнень эзда сёрмадость глагольнай валзюлмотнень.

В4 10-15 валрисьмотнень эзда сёрмадость именной сказуемайть.

В5 Сёрмадость 1-15 валрисьмотнень эзда обособленнай член мархта валрисьмотнень номерснон.
Виде ответтне
I-це вариантсь

 II-це вариантсь