Рабочая программа по родному(мокшанскому) языку в 5 классе
рабочая программа (5 класс) на тему

Муниципальное бюджетное общеобразовательное учреждение

«Тарханско-Потьминская  общеобразовательная школа»

Составитель учитель родного языка и литературы Кирдяпина Е.С.

 1. Пояснительнай запискась.

Мокшень кялень рабочай программась тиф ветеце классонь тонафнихненди, конанди основакс сявф:

• Российскяй Федерациянь Федеральнай законць «Об образовании в Российской Федерации» №273  29.12.2012 кизось.
• Основной и средняй школань примернай программась мокшень кяльса 5-11 класса Российскяй Федерациянь  национальнай школань  2000 кизотькса;
• Мордовия Республикань Образованиянь Министерствань «Мокшень кялень программат 5-11-це классненди» 2017 к.,
• Федеральнай Государственнай образовательнай стандартсь, кона примаф Российскяй Минобразованиять приказонц коряс  05.03.2004к.;
•   Учебнай планонц коряс МБОУ «Тарханско-Потьминскяй ООШ» 2018-2019 к.к.

Афкуксонь календарно-тематическяй планированиясь тиф, нежедемок «Мокшень кялень программа 5-11 классненди», кона нолдаф 2017 кизоня Саранскяйса Мордовскяй книжнай издательстваса, программать сермадозь Г.С. Иванова, Т.И.Ломакина.

    Программась ащи фкакс 5-це классонь тонафнемань книгати общеобразовательнай учрежденияса, книгать автороц Имярекова В.М.,Седойкина П.Е. Саранск, 2017к.

Программась тиф,  ваномок системнай, научнай и доступнай принципнень лангс, а станя жа преемственнай и перспективнай лия курсонь разделхнень коряс. Программась аноклаф 70 частонди. Мокшень кялень  урокти 5-це класса макссеви кафта частт недляти, общеобразовательнай программать коряс сизьгемонь част, школань тонафнемань планть коряс 35 тонафнемань недля, марнек 70 част кизоти.

Кяльсь – инь эрявикс и пяк кунардонь общественнай явления. Сонь вельденза ломаттне фкя-фкянь мархта корхнихть, азондсазь мяльснон-арьсемаснон, шарьхкодихть  фкя–фкянь. Кяльсь ванфтсы и пачфтьсы сянь, мезе ульсь народть эряфса, вельденза азондови сонь ётаф киц. Фкявок ши аф эрявихть ломаттне апак корхтак.

Мокшень кяльсь – мокшетнень шачема кяльсна, кона ётась касомань и вииямань пяк кувака кигя. И тяни сон мокшэрзянь народть национальнай литературнай кялензон эзда фкясь.  Кяльсь школаса кода тонафнемань предмет занци пяк эрявикс васта, сонь оцю тонафнемань и цебярь потмовиень касфтомань смузец.

Школаса родной кяльсь тонафневи сянкса, штоба анокламс культурнай, сембе ширде содай ломатть, максомс тейст мокшень литературнай кяльса морафтомань, корхтамань и сёрмадомань содамошит.

Тя тевса шачема кяльть асувоц аф азовомшка оцю. Велеса мокшень иттне тонафнема пингснон ушедомда инголе сидеста марнек перьфпяльть, ломаттнень ёткса соткснень колга мяльснон и содамошиснон маштыхть азондомст аньцек мокшекс, тейст тя кяльсь – пъцтай ськамонза фкя- фкянь мархта корхтамань, фкя-фкянди мялень азондомань средства. Мокшень идть содамошинзон сяда тов касфтоманкса аф эрявихть сязендемс сотксне, конат тя пингти ладявсть ни сонь кяленц и мялензон-арьсеманзон ёткса. Мекланкт, ня сотксне коль кемокснихть и касыхть-виензайхть родной кялень урокнень эса. Шачема кяльть цебярьста содамац пяк лезды келептемс перьфпяльть колга содамошитнень, сон максы пара лезкс рузонь кяльть тонафнемста, грамматиканц, марнек козяшинц и виенц шарьхкодемста.

Тонафнихненди эряви максомс сатомшка содамошит родной кялень фонетика, лексика, морфология, валонь тиевомась, синтаксис и стилистика разделхнень коряс; пачфтемс эряфса кяльть асувонц, сяда тов касоманц и виияманц,  масторлангонь лия кяльхнень ёткса сонь вастонц колга. Шачема кяльть  вельде, сонь лангозонза нежедемок, эряви касфтомс иттнень логическяй мяльснон-арьсемаснон, ёжамарямань, морафтомань и корхтамань маштомошиснон. Максомс сёрмадомань, пунктуациянь и интонациянь кеме маштомошит, кеподемс синь мяльснон цебярьста содамс, кельгомс и ванфтомс тядянь-алянь кяльть.

Ня тефне оцюфт и аф тёждят. Синь цебярьста пяшкодевихть аньцек эста, мъзярда сонць учительсь вятьсы эсь предметонц тевонь содазь, цебярь методса и приёмса, апак лотксек кърхкалгофнесыне и келепнесыне кяльть коряс содамошинц, методическяй и общепедагогическяй ширде аноклафшинц, мъзярда сон тевонц тиендьсы седи виень путозь.

Мезе тонафневи 5-це класса родной кяльть коряс

Мокшень кяльть келиста тонафнемац ушедови 5-це класса. Тоса работамась веши тонафтыть ширде сянь, штоба содамс начальнай классонь программать.

 5-це класса мокшень кялень школьнай программаса сувафтфт сведеният фонетикать, валлувксть, валонь пялькснень, валонь тиевомать, морфологиять, синтаксисть, орфографиять, пунктуациять коряс, азондозь и сермадозь корхтамань маштомошит и стак тов.

Сембе тя содамошитне максовихть тяниень пингонь кялень наукать сатфксонзон мяльс сявозь. 5-це класса тонафневихть синтаксиссь (нюрьхкяняста), фонетикась, графикась и орфографиясь, валлувкссь, валонь пяльксне и валонь тиевомась.

Тонафнемань кизоть ушедомста и аделамста ётафть лятфтаманкса программаса нолдафт башка частт. Синь эрявихть ётафтомс васендакиге ся пялькснень и тематнень лятфтамста, конатнень тонафнихне содасазь сяда лафчста. Сатомшка мяль эряви шарфтомс марнек ётафть шарьхкодеманцты.

Эряви кирдемс мяльса, тяда башка, сявок: эрь темать или мъзярошка темань тонафнемда меле ётафневихть эрь кодама видонь письменнай контрольнай работат. Тя тиендеви теоретическяй содамошитнень маштомошитнень кемокстаманкса и корхтама маштомать касфтоманкса. Мекольцесь программаса лемтьф кода цебярьста корхтама.

Корхтама маштомать касфтоманкса работатне программаса занцихть сатомшка васта,  макссевихть тонафневи теоретическяй материалть мельгя. Ётафневихть синь кизоньберьф. Марнек программать эзга срафтф письменнай работатне эрявихть ётафтомс тонафнемань эрь кизонди максф корхтама маштомать касфтоманкса разделхнень коряс, коза сувафтфт тянкса часттне.

Тонафнемань цельхне.

• тонафтомс шабатнень родной кяльть и литературать вельде шарьхкодемс эсь народоньконь историянц и тяниень пингонь эряманц;
• воспитандамс афкуксонь патриотт;
• касфтомс содамошиснон мокшэрзянь народть историянц, культуранц колга;
• касфтомс шарьхкодемаснон кяльть национальнай башкаширенц колга.

Задачатне

• кемокстамс сембе речевой видонь деятельносттне : морафтомась, аудированиясь, корхтамась, сёрмадомась.;
• формировандамс универсальнай учебнай действиятнень: познавательнай, регулятивнай, коммуникативнай;
• кемокстамс орфографическяй и пунктуационнай маштомошиснон и навыкснон, маштомс корхтама литературнай кяльса, ваномок сембе норматтнень.

                                                              Марнек программать  характеристикац.

Программать вешфксонзон коряс 5-це класса тонафнемат кялень тяфтама тематне: «Фонетикась, графикась, орфографиясь» и «Валлувкссь». Тяда башка, тонафнемань кизоть ушедомста и аделамста ётаф материалть лятфтаманкса и кемокстаманкса программаса нолдафт башка частт. Кизоть ушеткста лятфтави «Валзюлмось», сонь эсонза главнай и зависимай валхне, «Корхтамать целенц коряс валрисьмонь виттне», «Валрисьмоть главнай пяльксонза», «Валрисьмоть второстепеннай пяльксонза», «Однороднай пялькс мархта валрисьмотне» тематне.

  Эряви азомс, што, тяда башка, 5-це класса тонафнемань кизоть ушетксста эряви шарфтомс башка мяль существительнайть, прилагательнайть и глаголть колга кой-кона ётаф правилатнень лятфтамаснонды. Семботь тянь тиемс программась максси вете частт. А вяре азф синтаксисть и пунктуациять коряс тематнень пара улель аф аньцек лятфтамс, но и келептемс и крхкалгофтомс, сяс мес начальнай класснень эса ётаф материалть коряс иттнень сидеста аф сатомшкат содамошисна кода валзюлмотнень, станя и лия видонь валрисьмотнень колга, а сяфтома онафтыти стака работамс ученикнень связнай корхтамаснон цебярьгофтоманц лангса. Учебникса семботь тянь тонафнемс максф сатомшка материал, учительти аньцек эряви мумс пинге сонь тонафнеманцты.

Кода программаса, станя учебниксовок мезевок аш азф сложнай валрисьмоть и виде корхтамать колга, хоть синь корязост сведениятне и практическяй работатне пяк лездольхть учительти сяда товонь работасонза, сембода пяк лездольхть учительти сяда товонь работасонза,  мзярда сон кармай тонафнема ученикнень мархта «Валлувкссь» разделть. Тоса вдь васьфтевихть сембе типонь валрисьмотне, синь ётксост сложнайхневок и виде корхтамаське. Сяс, минь койсонок, повторениянь урокнень пингста, тексттненди анализонь тиемста, учительти эряви шарфтомс башка мяль синь лангозост и сяда лацкас лятфтамс ученикнень мархта семботь, мезе ётаф валрисьмоть и сонь структуранц колга, сембода пяк нинге сяс, мес эрь фонетическяй, а станя жа валлувксонь явлениясь (правилась) сави ванондомс аф аньцек башка валса, но и валзюлмоса, валрисьмоса и связанай текстса.

Повторениять главнай целец ащи сянь эса, штоба лятфтамс мокшень кялень грамматикаса сембода эрявикс правилатнень, конатнень тонафнезь ученикне начальнай класснень эса. Повторениять пингста ученикнень васенце устнай ответснон и письменнай работаснон анализснон коряс няеви, конашкава козя синь валонь запассна, кодама синтаксическяй конструкцият сембода сидеста синь ноляйхть тевс корхтамста и сермадомста, кодама афсатыкст васьфневихть синь связнай  корхтамасост. Тя эряви сембода пяк сянкса, штоба няемс, кодама навыкт получасть иттне устнай и писменнай корхтамаса – эста учительти шарьхкодеви, кода строямс мокшень кяльть тонафнемац сяда тов.

Тяда башка, кизоть ушетксста начальнай класса ётаф материалть лятфтамац пяк кондясти 5-це класса мокшень кяльть тонафнеманцты.

Сембода пяк важна лацкас лятфтамс и сияк крхгалгофтомс синтаксисть коряс ётаф тематнень, сяс мес кяльть сембе разделонза тонафнемат синтаксисть мархта сотнефста. Фонетикать, лексикать и морфологиять тонафнемста сембе явлениятнень сяда пара ванондомс валзюлмоса, валрисмоса, связанай текстса (кода и тиф од учебникса). Тя максы возможность тонафтомс ученикнень ётаф правилатнень корхтамста и сермадомста тевс нолямост.

Повторениянь урокса учительти эряви ладямс тевсь станя, штоба ученикнень содамошиснон лангс ванозь, можна улель лятфтамс лия тематненьге, сянкса эрь упражненияти максомс тага лия задания или кочкамс учебникса максф упражненияда башка лия заданиятка.

Штоба ученикне лацкас тонадольхть грамматическяй и лексическяй факттнень и явлениятнень явфнема, грамматическяй правилатнень корхтамста и сермадомста тевс ноляма, учительти эрявихть кочкамс работань стама метотт и приёпт, конат максольхть возможность аф аньцек лятфтамс тонафнеф материалть, но и пуроптомс сонь фкас, крхкалгофтомс, кемокстамок тянь мархта иттнень содамошиснон. Тяфтамкс можна лувомс грамматическяй (фонетическяй, морфологическяй, синтаксическяй) разборть, кялень факттнень фкя-фкянь мархта сравниндамаснон, выводонь и обобщениянь тиемать и ст.тов. Но сембось тя эряви тиендемс станя, штоба ученикненди аф стака улель ванондомс валхнень и форматнень мельге и азондомс эрь фактть колга эсь мяльснон.

Кода повторениять ётафтомста, станя и од материалть тонафнемста пяк лезды техническяй средстватнень тевс нолдамасна, сембода пяк компьютерть.

Техническяй средстватнень тевс нолдамасна тонафтсыне ученикнень: 1) выразительнайста лувома; 2) валхнень, валзюлмотнень и валрисьмотнень видеста азома; 3) корхтамать содержаниянц шарьхкодема; 4) связнайста корхтама и сёрмадома.

Сембода важна кулхцондомс учительть или цебярьста луви учениконь корхтамать программань тяфтама разделхнень повторяндамста и тонафнемста:

1. Интонациясь простой валрисьмоса (азондомань, кизефтемань, кошардомань и сярьгядемань валрисьмоса), интонационнай средстватнень мархта простой валрисьмоть эрь кодама пяльксонзон явфтомасна.
2. Однороднай член мархта валрисьмотне и синь интонированиянь особенностьсна (перечислительнай интонациясь, сопоставлениянь интонациясь; пъшкядема мархта валрисьмотнень интонациясна).
3. Виде и косвеннай корхтамать интонационнай особеностенза и лиятне.

   Башка мяль шарфтома учительти «Фонетика, графика и орфография» разделть тонафнеманцты. Кода няфнесы практикась, сембода лама эльбятькс сёрмадомстонга шабатне ноляйхть фрнетическяй явлениятнень аф содамаснон сюнеда (кайги и аф кайги согласнайхнень сермадомасна, ляпе тяштенять эрявикс вастс путнемац, ингольце рядонь а-ть сёрмадомац). Сяс фонетикать коряс систематическяй занятиятне ётафнемат станя, штоба синь лездольхть ученикнень орфографическяй навыкснон касомаснонды.

Ученикненди эряви няфтемс тонафневи фонетическяй явлениятнень практическяй значенияснон. Башка эряви толкавамс, што аньцек фонетикаса получаф содамошитнень вельде можна цебярьста тонафнемс валлувксть и морфологиять, што кяльть тя разделонц содамац лезды орфографиять тонафнеманцты, што вайгялькснень тиевомаснон колга правилатнень апак шарьхкотть стака ули тонадомс литературнай произношениянь норматнень.

Лиякс азомс, фонетикать тонафнемста учительть основной задачанза стапт: 1) лездомс ученикненди сяда парста шарьхкодемс фонетикать роленц ломаттнень фкя-фкянь мархта общенияса; 2) максомс иттненди виде шарьхкодема вайгялькснень и букватнень (сёрмаса вайгялькснень няфтемаснон) колга; 3) шарьхкодевиста азондомс вайгялькснень тиевомаснон; 4) крхкалгофнемс шабатнень содамошиснон гласнайхнень и согласнайхнень, ударениять, слогть, ляпе и калгода, кайги и аф кайги согласнайхнень и алфавитть роленц колга; тонафтомс ученикнень валкснень мархта работама; 5) знакомондамс синь орфографическяй и орфоэпическяй правилатнень мархта; няфтемс иттненди, што фонетикась лезды видеста шарьхкодемс валть строениянц и смузенц; тонафтомс синь вайгяльксть и буквать ёткса аф фкаксшитнень содама и кошардомс аф юкснемс сянь колга, што сидеста валхне сермадовихть аф станя, кода азовихть, и, меколанкт, корхтамста аф фалу эряви ваномс сянь лангс кода сёрматфт; 6) аф эряви юкснемс, што инь оцю аф фкаксшись литературнай корхтамать и диалекттнень ёткса – фонетикать эса; 7) фонетикась и графикась 5-це класста меле башка аф тонафневи, хотя орфографическяй и орфоэпическяй эльбятькснень ламосна эрь класса лисенди фонетикать кальдявста содаманц сюнеда. Сембось тя корхтай сянь колга, што фонетикать тонафнеманцты эряви шарфнемс оцю мяль аф аньцек 5-це класса, но и сембе класснень эса родной кялень урокса.

Эряви азомс, што аф аньцек начальнай класса ётаф материалть лятфтамста, но и фонетикать тонафнемста, ученикне сидеста кармайхть васьфнема содаф материал, мезсь максы учительти возможность урокста урокс крхкалгофнемс иттнень содамошиснон, касфнемс, кемокснемс и цебярьгофнемс синь корхтамань и сермадомань навыкснон. Вдь кода ётаф материалть лятфтамста, станя фонетикать и валлувксть тонафнемста учительть основной задачац – иттннень устнай и письменнай корхтамаснон цебярьгофтомац. Тя тиендеви: а) орфоэпиянь и выразительнайста морафтомань навыкнень касфтомаснон лангса работаса; б) иттнень валонь запасснон козякофтомаса; в) валзюлмотнень строямаснон колга правилатнень содамаса; г) связнай корхтамань навыкнень касфтомаса.

Устнай и письменнай корхтамать касфтомаса работась туй лац эста, кда учительсь видеста шарьхкодьсы, мезе стамсь устнай корхтамась и мезе стамсь письменнайсь, мезень пяльде синь фкат и мезень пяльде аф, и кодама ётксост соткссь.

Устнай корхтамась шарьхкодеви пилетнень мархта кулезь, кулхцондозь, а письменнайсь – сельмоса няезь. Устнай корхтамась аф сяшкава пяшксе, сяс мес корхтайсь кой-коста эсь мялензон азондсыне аф аньцек валса, но и кядензон и прянц, шаманц мархта. Устна корхтамста валхне ащихть сяда свободнайста, сяс мес азондысь корхтаманц тисы сяда точнайкс, сяда шарьхкодевикс эсь вайгяльсонза, смузень коря аерфнесыне сяда эрявикс валхнень, логическяй центратнень.

Устна корхтама тонафнемать задачац ся, штоба тонафтомс ученикнень устна эсь мяльснон лиянди азондома, тя корхтамась должен улемс лиянди шарьхкодеви, яснай, выразительнай.

Устнай корхтамась веши: вайгялькснень видеста азондомаснон, валхнень азомста орфоэпиянь норматнень ванфтомаснон (сембе, но аф симбе, ведь но аф видь, корхтайхть, но аф корхташть, вете, но аф вите), валрисьмотьь выразительнайста лувоманц, лиякс мярьгомс, видеста логическяй ударениянь и паузань тиемать, корхтамаста аф эрявикс валхнень ёрямаснон (кле, мле, мон аля, мон бать и лият), эсь мяльхнень прясот кирдема и фкя-фкянь мельге апак лотксек синь азондома маштомать.

Ученикть эрь устнай ответоц ащи упражнениякс устнай корхтамати. Сембода сидеста ня упражнениятне васьфневихть кайгиста книгань морафтомста (сонць кайгиста морафтомась, кизефксненди ответтне, морафтфть азондомац).

Ученикть азксонза природать мельге эсь ванондоманзон колга, эсь переживаниянзон колга, картинкать коряс устнай ответонза – нят станя жа устнай корхтамань упражненият.

Аф эрь сочинениясь должен аделавомс письменнай работаса, но эрь письменнай изложенияда или сочиненияда инголе ётафневи устнай работа.

Основакс, фундаментокс корхтама маштомать касфтоманцты ащи иттнень валонь запасснон козякофтоманц лангса работась. Кда ученикть запасса аш сатомшка валоц, тейнза аф тиеви цебярь валрисьме, лац-ряц аф азови эсь мялец.

Валхнень лангса работать задачац ащи сянь эса, штоба шабась тонадоль кода можна сяда мазыста корхтама. Сяс сембе мокшень кялень урокнень эса ётафнема тонафнихнень мархта валхнень лангса оцю работа.

Эрь урокть ётафтомста учительти эряви фалу мяляфтомс сянь, што аш кода кадондомс ученикненди апак азонтт фкявок аф шарьхкодеви вал или валонь группа. Шабась лияста аф шарьхкодьсы инь простой валть смузенц. Тя сяс, мес кальдявста вятеви работась валть смузенц шарьхкодеманц коряс. Кда учениксь изь лотка од валть лангс, аф кемоста шарьхкодезе сонь видексонь смузенц, ся валсь лия предметтнень эсовок ляткшни шобда вастокс. Сяс учительти эряви фалу ваномс тянь мельге, эста сяда кржа ляды апак шарьхкотть валда, а значит и эльбятькстовок. Смузень ширде содаф валхне сяда курок сувайхть шабатнень активнай словарезост. Сяс сембе урокнень эса азонкшневихть аф шарьхкодеви валхнень смузьсна, тяка ёткть учительсь мярьги, штоба иттне сувафтолезь ня од валхнень сяда товолдень работазост. Тяфта валом-валом козякофневи ученикть кялец валонь ширде.

Словарнай работать ётафтома учебникса максф сатомшка лама упражнения кода повторениянь разделса, станя и фонетикать и валлувксть тонафнемста. Эрь параграфть эса, аф ваномок темать лангс, ули материал валть, валзюлмоть, валрисьмоть, а станя жа связнай корхтамать лангса работань вятемс. Словарнай работать ётафтомс учебникса максф упражнениятне пцтай сембе лексико-грамматическяйхть, синь лездыхть ученикнень грамматическяй навыкснон касомаснонды и валонь запасснон козякодомаснонды.

Эрь од валть толкавамста эряви азомс аф аньцек сонь смузенц, но и тиемс анализ сонь форманцты (фонетическяй, грамматическяй, валлувксонь и орфографическяй). Эрь од валть ученикти эряви кулемс, лувомс, азомс и сермадомс.

Валть смузенц можна шарьхкотьфтемс эрь кодама способса: толкавазь, предметонь няфтезь, нагляднай пособиянь тевс нолдазь, валть составонцты анализонь тиезь, родственнай валонь, синонимонь, антонимонь кочказь.  

   Содамошинь, маштомошинь и навыконь контролень виттне вановихть: входной контрольсь  четвертть ушеткста и аделамста; текущай —  устнай, фронтальнай опросса, контрольнай, словарнай (валонь) диктантса, предупредительнай, объяснительнай, комментированнай, выборочнай, графическяй, творческяй, свободнай, зрительнай диктанса, самодиктантса «Проверяйть содамошитнень», диктантса-ётафтомаса, диктантса  грамматическяй задания мархта, тестса, проверочнай  работаса, диагностическяй работаса, контрольнай изложенияса, контрольнай сочиненияса, взаимоконтрольса, самоконтрольса, эрь кодама разборонь видса  (фонетическяй, лексическяй, словообразовательнай, морфологическяй, синтаксическяй, лингвистическяй, лексико-фразеологическяй), итоговай контрольнай диктантса, словарнай диктантса, комплекснай текстонь анализса.

  2.Учебнай курсть родной (мокшанскяй) кяльть 5-це класса основной содержанияц.

I.Кяльсь – корхтамань инь эрявикс средства.

Начальнай класснень эса тонафнефть лятфтамац                                                                          (3ч.+1ч.)

Валсь. Валть пяльксова явомац.

Корхтама пяльксне. Самостоятельнай и служебнай корхтама пяльксне.

Валрисьмось. Валрисьмонь главнай и зависимай пяльксне. Аф распространённай и распространённай валрисьмотне.

II.Синтаксиссь. Пунктуациясь. Цебярьста корхтамась                                                                            (8ч .+7ч.)

   Валзюлмось. Валзюлмоса главнай и зависимай валхне. Валзюлмось и валрисьмось, синь ётксост аф фкаксшись.

   Корхтамать целенц коряс валрисьмотнень видсна: азондомань, кизефтемань и кошардомань. Серьгядемань валрисьмотне.

   Валрисьмоть главнай пяльксонза: подлежащайсь и сказуемайсь.

   Валрисьмоть зависимай пяльксонза: дополнениясь, определениясь, обстоятельствась.

   Кафта главнай пялькс мархта аф распространённай и распространённай валрисьмотне.

   Фкя составонь валрисьмотнень шарьхкодемасна.

   Однороднай пялькс мархта валрисьмотне. Однороднай пялькснень ёткса и, а, но союсне. Однороднай пялькснень видеса запятойсь.

Пъшкядемась. Пъшкядемать видеса лотксема тяштенятне.

   Союз мархта сложнай валрисьмотне, мъзярда эрь пялькссь моли кафта главнай пялькс мархта. Запятойсь  сложнай валрисьмоть пяльксонзон ёткса и, а, но, да, што, штоба, сяс мес, кона, кодама, мъзярда, къда, коса валхнень инголе.

Виде корхтамась.Виде корхтамась авторть валда меле и инголе.

Виде корхтамать видеса лотксема тяштенятне.

Ламонь корхтамась. Ламонь корхтамать шарьхкодемац. Ламонь корхтамать видеса тиресь.

Мезе тонафнити эряви маштомс темать тонафнемда меле:

• вайгяльть лац вятема азондомань, кизефтеиань, кошардомань и серьгядемань валрисьмотнень азомста иморафтомста;
• выразительнайста ламонб корхтама мархта текстонь морафтома;
• синтаксисонь коряс аф пяк сложнай текстти лотксема тяштенянь путнема и путнеманон азома;

III.Фонетикась. Графикась и орфографиясь. Цебярьста корхтамась                                             (10ч.+4ч.)

   Корхтамань вайгяльксне. Корхтамань вайгялькснень тиевомасна. Гласнай и согласнай вайгяльксне.

   Слогсь. Валхнень слогова явомасна.

   Гласнай вайгяльксне. Рядонь коряс гласнай вайгялькснень явомасна. Кяльть кеподеманц коряс гласнай вайгялькснень явомасна. Тървань и аф тървань гласнайхне.

   Ингольце рядонь а (а) гласнай вайгялькссь, сонь тиевомац, азомац и сёрмаса няфтемац.

   Лафча (ъ) гласнай вайгялькссь, сонь тиевомац, азомац и сёрмаса няфтемац.

   Согласнай вайгяльксне. Кайги и аф кайги согласнайхне. Кайгомань и аф кайгомань коряс парнай согласнайхне: б-п, в-ф, д-т, д,-т,, г-к, з-с, з,-с,, ж-ш, й-йх, л-лх, л,-л,х, р-рх, р,-р,х. Кайгомань и аф кайгомань  коряс аф парнай согласнайхне: м, н, н,; ц, ц,, ч, х.

   Калгода и ляпе согласнайхне. Калгодошинь и ляпошинь коряс парнай согласнайхне: д-д,, т-т,, з-з,, с-с,, н-н,, л-л,, р-р,, лх-л,х, рх-р,х, ц-ц,. Калгодошинь  и ляпошинь коряс аф парнай согласнайхне: б, п, в, ф, г, к, ж, ш, х, м; й, йх, ч.

   Ударениясь. Валхнень эса ударениять вастоц. Валхне, конатнень эса ударениясь аф васенце слогса.

   Орфоэпиясь. Гласнай и согласнай вайгялькснен, согласнаень сюлмотнень азомасна.

   Вайгяльксне и букватне. Вайгялькснень букваса няфтемасна. Алфавитсь. Согласнай вайгялькснень ляпошиснон сёрмаса няфтемасна: ляпе(ь) тяштенясь и я, е, ё, ю, и гласнай букватне согласнайхнень ляпошиснон няфтемаса. Я , е, ё, ю гласнай букватнень вайгяльксонь смузьсна.

   Лх, льх, рх, рьх, йх буквань сюлмотнень вайгяльксон смузец. И, ы гласнайда мелех буквать вайгяльксонь смузец.

   Явфты ъ и ь тяштенятне мокшень и лия кяльста сявф валхнень эса.                      

  Фкя строчкаста строчкас валонь ётафтомась.  

Мезе тонафнити эряви маштомс темать тонафнемда меле:

• гласнай и согласнай вайгялькснень признакснон содама и азома;
• валса и валзюлмоса гласнайхнень и согласнайхнень видеста азома;
• валти фонетикань разборонь тиема;
• валхнень слогонь-слогонь явома;
• лх, льх, рх, рьх, йх буквань сюлмотнень корхтамста и морафтомста видеста азома и сёрмадома;
• их, ых буквань сюлмотнень морафтомста видеста азома и сёрмадома;
• дс, тс, дсь, тсь, дьс, тьс буквань сюлмотнень морафтомста видеста азома и сёрмадома;
• валса ударениять видеста путома;
• сёрмадомста я,е,ё,ю,и,ь букватнень вельде согласнайхнень ляпошиснон няфтема;
• фкя строчкаста омбоцети валонь ётафнема;
• орфографиянь валкс мархта работама.

IV.Лексикась. Цебярьста корхтамась                                                           (15ч.+5ч.)

   Лексикать шарьхкодемац.

   Валть смузец. Валть фкя и лама смузенза. Валть виде и аф виде смузенза.

Омонипне. Омонипнень типсна.

Синонипне и антонипне, корхтамаса синь рольсна.

   Кевонзаф валзюлмотне (фразеологизматне).

 Мокшень кяльть валлувксонь составоц: валхне, конат ванфтовсть финно-угрань общностть эзда, валхне, конат ванфтовсть мокшэрзянь общностть эзда: валхне, конат тяни аф васьфневихть мокшень кяльса; лия  кяльста сявф валхне: рузонь валхне, тюркань валхне, интернациональнай валхне.

   Мокшень литературнай кяльсь и диалекттне. Диалектонь валхне. Диалекттнень рольсна мокшень литературнай кяльть козякофтомаса.

   Мокшень валхне, конат прасть тяниень пингонь мокшень кяльста(сире валхне: историзматне и архаизматне).

   Од валхне (неологизматне).

   Мокшень кялень валкснень содамасна.

• Мезе тонафнити эряви маштомс темать тонафнемда меле:

• текстса или устнай корхтамаса валхнень виде и аф виде смузьснон содама;
• омонипнень лама смузьса валхнень эзда содама;
• синонимонь рядонь кочкама, синонимонь рядонь эрявикс вал мархта валрисьмонь арьсема;
• смузень коряс антонимонь парань кочкама и мархтост валрисьмонь арьсема;
• текстста фразеологизмань мушендома и смузьснон шарьхкодема;
• лия кяльста сявф валхнень и фразеологизматнень устнай корхтамаса и письменнай работаса маштозь тевсноляма;
• валкс мархта работама.

V.Валбяльксне и валонь тиевомась, орфографиясь. Цебярьста корхтамась                                   (10ч.+3ч)

Валбяльксне. Валъюрхтсь и валбесь. Апак тик и тиф валъюрхтсь. Гласнай и согласнай валъюрхтсь. Афкуксонь, полатф и кирьфтаф валъюрхтсь. Валъюрсь, суффикссь и валбесь кода валса смузень няфти пялькст. Сотксонь гласнайсь.

Валонь тиевомась.Суффикс вельде валхнень тиевомасна и синь сёрмадомасна: кядь – кятькс, пуромомс – пуромкс, лем – лемдемс, пандомс- панкс, мазы- мазыста. Валонь тии валъюрхтсь.

Сложнай валхне. Сложнай валхнень тиевомасна и сёрмадомасна: вайгяльбе, эйзюра, ведьбайге, варсиньбря, шеероньгарькс.

Парнай валхнень. Парнай валхнень тиевомасна и сёрмадомасна: алят-цёрат, акат-сазорхт, уштомс-явафтомс, пидемс-панемс, тяса-тоса.

   Кирьфтаф сложнай валхне кода рузонь кяльста сявф валлувксонь единицат. Синь азомасна и сёрмадомасна.

Мезе тонафнити эряви маштомс темать тонафнемда меле:

• валбяльксова валть явома, сонь смузень няфти пяльксонзон мума;
• апак тик, тиф и валонь тии валъюрхттень ёткса аф фкаксшить содама; гласнай и согласнай, афкуксонь, полатф и кирьфтаф валъюрхтнень содама;
• фкя валъюронь мархта валонь кочкама;
• валъюрста или валъюрхтста суффикс вельде од валонь тиема и видеста синь сёрмадомост;
• простой, сложнай, парнай сложнай и кирьфтаф сложнай валхнень фкя-фкянь эзда явома;
• сложнай валхнень валзюлмотнень эзда, кода и парнай сложнай валхнень эзда, явома и видеста сёрмадома;
• кирьфтаф сложнай валхнень корхтамста видеста тевс ноляма, азома и сёрмадома.

VI.Кизоть песта тонафнефть лятфтамац                                                       (4ч.)

Валзюлмось и валрисьмось. Валрисьмотнень видсна. Валрисьмотнень главнай и зависимай пялькссна. Кафта главнай пялькс мархта аф распространённай и распространённай валрисьмотне. Однороднай пялькс мархта валрисьмотне.

   Корхтамань вайгяльксне. Гласнай и согласнай вайгяльксне, синь явомасна. Вайгялькснень букваса сёрмадомста няфтемасна.

   Лексикась. Фкя и лама смузь мархта валхне. Омонипне. Синонипне и антонипне, кевонзаф валзюлмотне, корхтамаса синь рольсна. Валлувксть составоц.

   Валбяльксне и валонь тиевомась. Валхнень смузень пялькссна.

                                    3.Учебно-тематическяй планированиясь

5.Вешфксне  5 классть аделаманцты

Тонафнихненди эряви содамс:

• кяльть колга основной сведениятне, конат тонафневсть 5-це класса;
• мокшень кяльть ролец, кода мокшэрзянь народть национальнай литературнай кялензон эзда фкясь , понятиятнень смузьсна: устнай и письменнай корхтамась, фкянь корхтамась, ламонь корхтамась;
• основной стильхнень мокшень кяльса: книжнай (научнай, публицисткиань, официальнай тевонь стильсь), корхтамань (литературнай корхтамань и просторечнай корхтамань);
• основной жанратненьособенностьснон  научнай, публицистикань, официальнайтевонь стильхнень и корхтамань (литературнай и просторечнай);
• текстть признаконзон  текста и сонь функциональна-смузень  типонза (повествованиясь, описаниясь, рассуждениясь).

Тонафнихненди эряви маштомс:

аудированиясь

• шарьхкодемс научнай и художественнай тексттнень основной содержанияснон (объёмс коре аф оцю), азондомс кудьфть коряс;
• няфтемс текстть основной мыслянц выделять основную мысль;

фонетикась и графикась

• валть эса корхтамань вайгялькснень няфтема;
• фонетическяй характеристикань максома;
• няфтема ударнай и аф ударные слокнень аф фкаксшиснн; аф шорьсемс вайгялькснень и букватнень;
• валти фонетическяй разборонь тиема;

орфоэпия

• гласнай и согласнай вайгялькснень признакснон азома;
• валса и валзюлмоса гласнайхнень и согласнайхнень видеста азома;
• валса ударениять путома;
• работама  орфоэпическяй валкс мархта;

валлувкссь

• текстса или устнай корхтамаса валхнень виде и аф виде смузьснон содама;
• содаф валхнень лексическяй значенияснон азома  и кочксемс валхненди синонипт и антонипт;
• эпитетнень, метафоратнень, олицетворениятнень, кодакорхтамнь выразительнай средствань няфтема;
• валкс мархта работама;

валонь тиевомась

• валбяльксова валть явома, сонь смузень няфти пяльксонзон мума;
• фкя валъюронь мархта валонь кочкама;
• валти составс коре разборонь тиема;
• валкс мархта работама;

синтаксиссь

• валзюлмоть и валрисьмоть  фкя-фкянь эзда явома;
• главнай и зависамай валть няфтема;
• эрь кодама видонь  простой и сложнай валрисьмонь арьсема;
• простой валрисьмотненди синтаксическяй разборонь тиема;

орфографиясь

• мушендомс валста тонафнеф орфограммать, маштомс азома эсь выборцень и правильна сёрмадомс валхнень тонафеф орфограмматнень мархта;
• правильна сёрмадомс валхнень аф проверяндави согласнайнь мархта, конат тонафневихть 5-це класса;
• орфографиянь валкс мархта работама;

пунктуациясь

• вайгяльть лац вятема азондомань, кизефтемань, кошардомань  и серьгядемань валрисьмотнень азомста исёрмадомста;
• аф пяк сложнай текстти лотксема тяштенянь путнема и путнемаснон азома;

цебярьста корхтамась

• азомс темать и текстть основной мылянц, сонь стиленц;
• текстти простой планонь тиема;
• повествовательнай сочинениянь сёрмадома;

Тонафнихненди эряви содамошиснон и маштомшиснон тевс ноляма кода практическяй покодемаса, станя жа эряфса, сянди:

• касфтомс корхтамань культурать,  шачема кяльти  бережнай и сознательнай отношениятнень;
• анокламс культурнай, сембе ширде содай ломатть;
• максомс тейст мокшень литературнай кяльса морафтомань, корхтамань и сёрмадомань содамошит;

УУД, сформированные в процессе усвоения программы

содамс:  

• мокшень кяльсь мокшэрзянь народть национальнай литературнай кялензон эзда фкясь;
• понятиятнень смузьснон: устнай и письменнай корхтамась; монологсь, ламонь корхтамась;
• кяльть основной стилень признаконзон;
• стилень норматнень шарьхкодемасна;

маштомс:

• корхтамань и лия стильхнень ёткса аф фкаксшиснон няфтема;
• темать и текстть основной смузенц  и сонь стиленц азома;

аудированиясь  и морафтомась:

• письменнай и устнай сообщенияса информациять шарьхкодема;
• разнай стилень и жанрань текстонь лувомачитать тексты разных стилей и жанров;
• лия источникста эрявикс информациянь вешема;

корхтамась и сёрмадомась:

• стенгазетав заметкань, нюрьхкяняста азксонь сёрмадома;
• азксонь, статьянь колга отзывонь максома;
• картинань, диафильмань, кинофильмань содержаниянь азондома;
• азондомань характер мархта сочинениянь арьсема и сёрмадома;
• башка предметонди или животнаенди максови описания мархта изложениянь и сочинениянь сёрмадома;
• кружоконь, пуромксонь колга объявлениянь сёрмадома;

Предметть личностнай  результатонза:

• маштомс маряма клять мазышинц и выразительностенц;
• кельгомась и уважениясь Отечествати, сонь кяленцты и культуранцты;
• устойчивай познавательнай интерезсь морафтомати, ламонь корхтамань вятемати текстонь авторть марха; потребностсь морафтомати;
• интерезсь сёрмадомати,  эсь текстонь сёрмадомати,  письменнай формань корхамати
• интерезсь тонафневи кяльти ;

Предметть метапредметнай результатонза  (УУД).

Регулятивнай УУД:

• самостоятельна азомс урокть проблеманц (теманц) и целензон;
• самостоятельна максомс анализ  условиятненди  и маштомс пяшкодема путф цельхнень;
• самостоятельна темс план, кода решандамс учебнай проблемать;
• работамс  планц коре, корректировандамс эсь  деятельносцень;
• учительть мархта диологса максомс оценка кода эсь тейть, станя жа и  лия тонафнехненди;

Познавательнай УУД:

• кульфть коряс шарьхкодемс текстть основной и дополнительнай информациянц;
• маштомс тевс ноляма разнай видонь морафтомать;
• маштомс  планонь, таблицань, схемань тиема;
•   морафтф (кулхцонтф) текстть подробнайста, кирьфтафста, выборчна азандома
• валкс, справочник мархта работама;

Коммуникативнай УУД:

• маштомс  эсь мненияцень азома;
• максомс оценка устнай и письменнай корхтамати
• кулхцондомс и кулемс лиятнень, полафтомс эсь ванфцень;
• аудиториять инголе сообщениянь азондома;
• кизефксонь максома;
• максомс анализ и оценка тиф заданиятненди;
• маштомс  кизекфксонь лангс максома кувака и нюрьхкяня каршек вал;

  ИНГОЛИ МОЛИ САТФКСНЕ

•   Личностнайхне:
• -шарьхкодемс мокшень кяльть вастонц эряфса, фкя-фкянь ёткса корхтамста, перьфпялень ванфтомста
• -маштомс кочкаф содамошитнень и сатфкснень нолямс школань и эрь шинь эряфса;
• -касфтомс маштомашитнень ялга и оцю мархта прянь вятема; шабрань ломаттнень мархта сотксонь     кирдема;-
• - содамс иттненди народоньконь эряфста: мокшетнень эряма койснон, унксснон;
• Метапредметнайхне:
• - шарьхкодевиста марямс кайги мокшень кяльть ;
• - маштомс  кизекфксонь лангс максома кувака и нюрьхкяня каршек вал;
• - маштома эльбятьксфтома, выразительнайста и эрявикс интонациянь вятема лувомста,
• - кувакаста и нюрьхкяняста азксонь азондома;
• - максомс  анализ и оценка тиф заданиятненди;
• - маштомс корхтама мокшень литературнай  кяльса.
• Предметнайхне:
• - морафтома валть марнек,
• - валть эса ударениять путома;
• - валрисьмоть потмоса арьсемань канды инь эрявикс валхнень вайгяльса няфтема;
• - валрисьмоть песа интонациять вятема;
• -маштомс учительть морафтоманц и азондоманц, а станя жа эсь ялгаснон морафтомаснон и азондомаснон кулхцондома;
• - устна  ответонь максома фкя темань коряс путф кизефксонь лангс;
• -художественно-выразительнай средствань мушендома;
• - аф оцю морафтф статьянь пяльксонди лемонь максома;
• - эсь тевонь колга азксонь арьсема.

   6.Мокшень кяльть коряс содамшинь, маштомшинь и навыконь оценкать норманза.

Иттенень  тонафнемаса оцю воспитательнай ролец синь содамошиснонды, маштомошиснонды и навыкснонды видексонь, лац и эсь пингстонза оценкать максомац. Сон лезды касфтомс тонафнемаса школьникнень ответственностьснон, ванфтомс тонафнемань дисциплинать, касфтомс тонафнихнень эстейст вешфксснон, ваномс эсь лангозост видексонь сельмоса, ащемс видешить инкса, тяка пингть ученикнень содамошиснонды касфтф и кирьфтаф оценкань путомась колсесы синь мяльснон, кошярясыне эсь колгаст вельф цебярьста арьсема,прянь шнама, аф вийс и содамошис коря эстейст оценкань максома.

Формализмать и оцю процентонкса панемать каршес молемать инкса содамошитненди оценкань максомста эрявихть кирдемс мяльса синь кърхкалмосна и кемошисна, проверямс школьникнень маштомшиснон, лац и арьсефста учебнай и практическяй задачань тиемста, кемоста ванфтомс ладяф норматнень.

Оценкань норматнень коряс мярьгондеви ладямс мокшень кяльса сембе тонафнихнеь содамошиснонды, маштомошиснонды и навыкснонды фкя лацонь вешфкст. Синь эсост ладяфт: 1) мокшень кяльть устнай и письменнай форманзон эрь кодама ширеснон содама оценкань фкя лацонь критерийхть (сёрмадомань грамотностти, сотф корхтамать кялень ширде ладяманцты, корхтамать содержаниянцты оценкань критерийхть); 2) содамшитненди, моштомшитненди и навыкненди оценкань фкя лацонь нормат; 3) эрь кодама видонь контрольнай работань оцюлма; 4) эрь кодама видонь контрольнай работанкса отметкань лувкс.

 Тонафнихненди путневихть вешфкст аньцек тяфтама маштомшинкса и навыконкса, конатнень лангса работасть или работайхть проверямань пингста. Мокшень кялень урокса проверявихть: 1) кяльть колга получаф сведениятнень содамасна; 2) сёрмадомань навыкне; 3) корхтамань маштомшитне.

1.Тонафнихненди устнай ответонь оценкасна.

Устнай кизефнемась – васенце способсь, конань вельде содавихть мокшень кяльть коряс тонафнихнень содамшисна, маштомшисна и навыксна. Ученикть ответонцты оценкань максомста эрявихть кирдемс мяльса тяфтама критерийхть: 1) ответть целайшиц и видешиц; 2) тонафнефть шарьхкодемац; 3) ответть кялень-валонь ширец.

Тонафнить ответоц лувондови сатомшкакс и кърхкакс, къда сон сотф азф темать мархта, логикань ширде сон ащи мельцек моли корхтамакс, конань эса няеви  определениятнень, правилатнень тевс нолдамаса маштомась.

«5» оценкась путови, къда учениксь: 1) сатомшка марнек азондсы тонафнеф материалть, максы кялень понятиятненди виде определеният;   2) педа пес шарьхкодьсы материалть, машты содамшинзон тевс нолдама; сявонди эрявикс кепотькст аф аньцек учебникста, но и арьси сонцьке; 3) азондсы материалть мельцек-мельцек, эсонза логическяй сотксонь кирдезь и литературнай кялень норматнень ванфтозь.

«4» оценкась путови, къда ученикть ответоц ладяй няка вешфксненди, конат эрявихть «5» оценкань путомста, но тяка пингть ноляй 1-2 эльбятькс, ня эльбятькснень петнесыне сонць, мзярда учительсь шарфтсы лангозост тонафнить мяленц; азондомаса кялень-валонь ширде и эсонза эрявикс сотксонь кирдемасонга эльбятькста 1-2.

«3» оценкась путови, къда тонафнись содасыне и шарьхкодьсыне азф темать основной ширензон, но: 1) азондсы материалть аф марнек и ноляй афсатыкст правилатнень азомста или понятиятненди определениянь максомста; 2) аф машты кърхкаста и цебярьста эсь мялензон-арьсеманзон ладяма, эсь примерсонза синь кемокстамост; 3) азондсы материалть аф мельцек-мельцек и азондомасонза ноляй кялень-валонь эльбятькст.

«2» оценкась путови, къда тонафнись аф содасы ётаф материалонь максф разделть оцюшканц, определениянь и правилань азомста тиенди стама эльбятькст, конат ёфси колсесазь ня определениятнень и правилатнень смузьснон, азондсы кодамовок сотфксфтома, аф кемазь. «2» оценкать мархта няфтевихть тонафнить анокламаса стама афсатыкст, конат шоряйхть тейнза сай пингонь материалть тонафнемста, шарьхкодемаста.

«1» оценкась путови, къда тонафнись ёфси аф содасы или аф шарьхкодьсы материалть.

Оценкась («5», «4», «3») путневи аф аньцек фкя ответонкса (мзярда тонафнить анокшинц проверяманкса ноляви башка пинге), но и мзярошка ответонкса, конатнень максозень учениксь уроконь пингста (лихневи марнек уроконкса балл), къда урокть пингста аф аньцек кулхцонкшневсть тонафнить ответонза, но и практическяй ширде ванондовсть содамошинзон тевс нолямасна.

2. Диктантонь оценкась

Диктантсь – орфографиянь и пунктуациянь содамошитнень проверяманкса эрявикс форматнень эзда фкясь.

Диктантонди эряви сявондемс отф текст, кона отвечай тяниень литературнай кялень вешфксненди и содержаниянь коряс  шарьхкодеви тя или тона классонь тонафнихнеди.

Диктантть оцюлмоц тяфтама: 5 класса – 90-100вал, 6 класса – 100-110 вал, 7 класса – 110-120 вал, 8 класса – 120-140 (150), 9 класса – 140-160 (150-170) вал, 10 класса – 160-180 вал, 11 класса – 18-200 вал. (Валхнень лувомста сявондевихть мяльс кода самостоятельнайхне, станя и служебнайхне).

Примечания. Къда диктантсь граматикань задания мархта, то сонь оцюлмоц кирьфтави.

Контрольнай словарнай диктантть вельде проверявихть кальдявста и стакаста мяляфтови орфограмма мархта валхнень сёрмадомасна. Эзонза сувафневи: 5 класса – 15-20 вал, 6 класса – 20-25 вал, 7 класса – 25-30 вал, 8 класса – 30-35 вал, 9 класса – 35-40.

Сявф темань коряс тонафнихнень содамошиснон проверяманкса диктантти сувафневихть тя темать основной орфограмманза или пунктограмманза, тяда башка, эряви, штоба няеволь сяда инголе получаф навыкнень кемошисновок. Итоговай диктанттнень вельде, конат ётафневихть тонафнема кизоть пялестонза или пестонза, проверявихть ученикнень анокламасна сембе тематнень коряс.

Контрольнай диктантонди эряви кочкамс стама текст, конань эса сявф темать коряс тонафневи орфограммада или пунктограммада 2-3. Сяда ингольдень тонафнефть эзда сувафневихть аньцек основной орфограмматне и пунктограмматне, эздост марнек 1-3. Сембоц контрольнай диктантти сувафтови: 5 класса – 12 эрь кодама орфограмма и 2-3 пунктограмма, 6 класса – 16 эрь кодама орфограмма и 3-4 пунктограмма, 7 класса – 20 эрь кодама орфограмма и 4-5 пунктограмма, 8 класса – 24 эрь кодама орфограмма и 10 пунктограммат, 9 класса – 28 эрь кодама орфограмма и 15 пунктограмма, 10 класса – 32 эрь кодама орфограмма и 20 пунктограмма, 11 класса - 36 эрь кодама орфограмма и 25 пунктограмма.

Контрольнай диктнтонь текстти сувафтовихть одс тонафнеф аньцек ся орфограмматне, конат сатомшка кемокстафт (инголе ётафт 1-2 урокса).

Васенце четвертть шумордамс ( а 5 класса – васенце пяле кизоть шумордамс) контрольнай диктантонь текстть оцюлмац стама жа, кода и сяда ингольце класснень эса.

Диктантти оценкань максомста петневихть, но аф лувондовихть орфографиянь и пунктуациянь эльбятьксокс:

1. Фкя строчкаста омбоцети валонь ётафтомаса;
2. Правилаттненди, конат аф сувсихть школань программати;
3. Апак тонафнек правилатненди;
4. Авторонь пунктуациять коряс.

Петневихть, но аф лувондовихть эльбятьксокс, сёрматфне, мъзярда фкя буквать вастс апак учентт тяшневи лия, кепотьксондинеше (неже вастс), кадра (карда вастс), мельме (кельме вастс).

Диктантти оценкань максомста эряви ваномс, оцю или аф эльбятькссь. Эльбятькснень лувомста кафта аф оцю эльбятьксне сявондевихть фкянь вастс. Аф оцю эльбятькснень ёткс сувафневихть:

1. Правиласта исключениятне;
2. Составной собственнай лепнень эса  оцю буквань сёрмадомась;
3. Сложнай валхнень, конатнень эса пяльксне исть колав, исть кире, башка валса сёрмадомасна (кепотькс: стирь шаба – стирьшаба вастс, азор ава – азорава вастс);
4. Составной лепнень сложнай валкс сёрмадомасна (кепотькс: кенкшкундама – кенкш кундама вастс; ульмолгоня –ульме олгоня вастс);
5. Парнай сложнай валхнень пяльксснон запятой вельде сёрмадомасна (кепотькс: акат, сазорхт – акат-сазорхт вастс, куцюфт, шаванят – куцюфт-шаванят вастс);
6. Наречиянь смузьса фкя валъюрста ащи кафта валхнень сёрмадомасна (кепотькс: волнань волнань – волнань-волнань вастс, пингонь пингонь – пингонь-пингонь вастс, лиезь-лиемс – лиезь лиемс вастс, лаказь-лакамс – лаказь лакамс вастс);
7. Лия кяльста сявф собственнай лепнень  сёрмадомасна;
8. Фкя тяштенянь вастс лия тяштенянь сёрмадомась;
9. Мельцек моли тяштенятнень эзда фкять нолдамац или вастснон полафтомасна.

Къда контрольнай диктантса 5-да лама петькс (аф лац сёрматфсь петьф лац сёрмадомакс), оценкась кирьфневи фкя баллда, сембе сяка аф удовлетворительнай оценка тонафнить рабатанцты аф путови. «5» оценкась аф путневи, къда работаса 3 или сяда лама петькс.

Диктантть инкса оценкань путомста эряви  кирдемс мяльса тя или тона оценканкса эльбятьксонь ламошить вярце пределонц. «4» оценкати тяфтама пределкс ули орфогрфиянь коряс 2, «3» оценкати – 4 (5 класса -5), «2» оценкати – 8 эльбятьксонь нолдамась.

Сявондевихть станя жа мяльс ламоксть и фкя лацонь эльбятьксне. Къда эльбятькссь ламоксть моли фкя и сяка валса или фкя валъюрса, то сон лувондови фкя эльбятьксокс. Фкя лацонь эльбятьксокс лувондовихть сятне, къда лац сёрмадомась ащи валть грамматикань и фонетикань башка ширензон эзда (кардта, нурдта; шида, ловда; ломанць, нармонць; тракссь, алашась).

Эльбятьксне аф лувондовихть фкя лацоннекс тяфтама правиланди, конань эса валть лац сёрмадоманкса эряви кочкамс лия вал или сонь форманц (шуфтса-шуфтоня, шуфта; ведьс – ведь, ведьня; ардсь – арды, ардомс).

Васенце колма фкя лацонь эльбятьксне лувондовихть фканкса, сяда мельдень эрь тяфтама эльбятькссь лувондови кода самостоятельнай.

Примечания. Къда аф проверяви орфограмма мархта фкя валса нолдаф 2 и сяда лама эльбятькс, то сембе синь лувондовихть фкя эльбятьксокс.

Диктантть инкса путневи фкя оценка.

«5» оценкась путови эльбятьксфтома работать инкса или фкя аф оцю орфографиянь или фкя аф оцю пунктуациянь эльбятькс мархта работать инкса.

«4» оценкась путови, къда диктантса 2 орфографиянь и 2 пунктуациянь коряс эльбятькст, или васенцетнень эзда 1, омбоцетнень 3, или васенцетнень  эзда аш, омбоцетнень эзда 4. Орфографиянь коряс 3 эльбятькс мархта диктантивок путневи «4» оценка, къда эльбятькснень ёткса улихть фкя типонь.

«3» оценкась путови, къда диктантса 4 орфографиянь и 4 пунктуациянь эльбятькст, или васенцетнень эзда 3, омбоцетнень 5, или васенцетнень эзда аш, омбоцетнень эзда 7. 5 класса «3» оценкась путневи и ся диктантть инкса, конань эса нолдаф 5 орфографиянь и 4 пунктуациянь коряс эльбятькст. «3» оценкась путневи и снярда, мзярда работаса 6 орфографиянь и 6 пунктуациянь коряс эльбятькст, но къда ётксост улихть фкя типонь и аф оцю эльбятькст.

«2» оценкаь путови, къда диктантса 7 орфографиянь и 7 пунктуациянь коряс эльбятькст, или васенцетнень эзда 6, омбоцетнень эзда 8, или васенцетнень эзда 5, омбоцетнень эзда 9, или васенцетнень эзда 8, омбоцетнень эзда 6.

Къда эльбятькста сяда лама, диктантть инкса путови «1» оценка.

Конторльнай работать инкса, кона ащи диктантса и дополнительнай заданияста, путовихть кафта оценкат, работань эрь видть инкса башка.

Дополнительнай заданиятнень инкса оценкатне путовихть тяфта:

«5» оценкась путови, къда тонафнись лац тиезень сембе заданиятнень. «4» оценкась путови, къда тонафнись тиезень лац заданиятнень колма нилецекс пяльксснон. «3» оценкась путови работать инкса, конань эса лац тифт заданиятнень  аф пяледа кържасна. «2» оценкась путови работать инкса, конань эса апак тикт заданиятнень пяледа ламосна. «1» оценкась путови, къда тонафнись ашезь тие фкявок задания.

Примечания. Орфографиянь  и пунктуациянь эльбятьксне, конат нолдафт дополнительнай заданиятнень тиемста, лувондовихть диктатть инкса оенкань максомста.

Контрольнай словарнай диктантонкса оценкатнень путнемасна мярьгондеви тяфта:

«5» оценкась путови диктантть икса, конань эса аш эльбятькст. «4» оценкась путови диктантть инкса, конань эса тонафнись нолдась 1-2 эльбятькст. «3» оценкась путови диктантть инкса, конань эса нолдаф 3-4 эльбятькс. «2» оценкась путови диктантть инкса, конань эса нолдаф 7-шка эльбятькс. Сяда лама эльбятькс мархта диктантть инкса путови «1» оценка.

3. Сочинениянь и изложениянь оценкась

Сочинениятне и изложениятне – лац и мельцек-мельцек мялень азондома тонафнихнень маштомошиснон, синь корхтама маштоммаснон проверямс эрявикс формат.

5-11 класснень эса сочинениятне и изложениятне ётафневихть программаса «Корхтама маштомать касфтомац» разделть вешфксонзон мяльс сявозь.

Подробнай изложениянди текстть примернай оцюлмац тяфтама: 5 класса – 100-150 вал, 6 класса – 150-200 вал, 7 класса – 200-250 вал, 8 класса – 250-300 вал, 9 класса – 350-450 вал, 10 класса  - 450-500 вал, 11 класса 500-550 вал.

8-11 класснень эса итоговай конторльнай подробнай изложениянди текстть оцюлмоц мжна касфтомс 50 валда, сяс мес тяфтама урокса аф уленди инголькиге аноклама.

Оценкань максомста класса сёрмадови сочинениятнень оцюлмосна тяфтама: 5 класса – 0,5- 1 страница, 6 класса – 1-1,5 страница, 7 класса – 1,5-2 страница, 8 класса – 2-3 страница, 9 класса – 3-4 страница, 10 класса – 4-4,5 страница, 11 класса –4,5 -5 страница.

Тя оцюлмась примернай, сяс мес тонафнить текстонц оцюлмоц ащи сочинениять стиленц и жанранц, темать характеронц и арьсефшинц, онафнихнень вишкста или валом сёрмадомаснон, сембе ширде содамошиснон, почеркснон эзда.

Сочинениянь и изложениянь вельде  проверявихть: кода тонафнись машты темань панжема; темать панжеманкса кялень эрявикс средстватнень ноляма; кялень норматнень и орфографиянь правилатнень ванфтома.

Эрь кодама сочинениять и изложениять инкса путовихть кафта оценкат: васенцесь – содержаниянь и кялень-валонь коряс; омбоцесь – орфографиянь и пунктуациянь норматнень ванфтоманкса.

Кафцьке оценкатне лувондовихть мокшень кялень коряс оценкакс, ся случайда башка, мъзярда проверяви литературать содамац. Эста васенце оценкась лувондови литературань коряс оценкакс.

Работати содержаниянь и кялень-валонь ширде оценкань максомста тяфтапт:

• Тонафнить работанц темати и основной мяльти-арьсемати ладямац;
• Темать марнек панжемац;
• Сёрматф материалть видексшиц;
• Сёрматфть мельцек-мельцек лац молемац.

Сочинениятнень и изложениятнень кялень-валонь ширде ладямаснонды оценкань максомста сявондевихть мяльс: корхтамать валонь ширде козяшиц; корхтамать стилень ширде фкаксшиц и мазышиц; кялень и стилень эльбятькснень лувкссна.

Орфографиянь и пунктуациянь коряс содамошитнень инкса оценкась путневи нолдаф эльбятькснень лувксснон мяльс сявозь.

Содержаниянь и кялень-валонь ширеть инкса путневихть тяфтама оценкат:

«5» оценкась путови, къда : рабатать содержаниянц марнек темать коряс; эльбятькст аш; содержанияц моли эрявикс последовательностьса; работась козя валонь ламошинь и синтаксисонь конструкциятнень нолямаснон коряс, валхнень лац тевс нолямаснон коряс; текстса няеви стилень фкаксши и выразительность.

Работаса ноляви содержаниянь коряс 1 афсатыкс, кялень-валонь коряс – 1-2 афсатыкс, грамматикань – 1эдьбятькс.

«4» оценкась путови, къда: работать содержанияц пъцтай марнек темать коряс; содержаниясь видексонь, но ули аф лама афсатыкс; аф ламода колсеви мяльхнень мельцек азондомасна; лексикань и грамматикань ширде сёрматфсь сатомшка козя; текстса ванфневи стилень эрявикс фкаксшись и сатомшка выразительностсь.

Работаса ноляви содержаниянь коряс аф 2-да лама афсатыкс, кялень-валонь коряс аф – 3-4-да лама афсатыкс, грамматикань эльбятькста аф 2-да лама.

«3» оценкась путови, къда: работать содержанияса улихть темать эзда аердомат; работась видексонь сембоса, но эсонза улихть башка эльбятькст; васток-васток колсеви мельцек азондомась; аф козя валонь ширде, фкат синтаксисонь конструкциятне, васьфневихть афсатыкст валхнень аф эсь вастсост тевс нолямасна; стилень ширде аш фкаксши, кяльсь-валсь аф выразительнай.

Работаса ноляви содержаниянь коряс аф 4-да лама афсатыкс, кялень-валонь коряс аф 5-да лама афсатыкс, грамматикань эдьбятькста аф 4-да лама.

«2» оценкась путови, къда: работась аф темань коряс; нолдаф лама афсатыкс; работать сембе пяльксонзон ёткса аш эряикс соткс, синь эсост аш мельцек молема, работпсь аф отвечай темати; пяк ашу валонь ширде, работась сёрматф фкя типонь нюрьхкяня валрисьмоса, ётксост сотксне лафчт, сидеста васьфневихть валхт, конат нолдафт тевс аф лац; текстса колаф стилень фкаксшись.

Работаса нолдаф содержаниянь коряс 6 афсатыкст, кялень-валонь коряс – 7-шка афсатыкс, грамматическяй эльбятькста 7-шка.

«1» оценкась путови, къда работаса нолдаф содержаниянь коряс 6-да лама афсатыкс, кялень-валонь коряс – 7-да лама афсатыкс, грамматикань коряс – 7-да лама эльбятькс.

Примечаният.

1. Сочиненияти оценкань максомста эрявихть сявондемс мяльс работать самостоятельностец, эсонза мяльхнень-арьсематнень оригинальностьснон, композициянь и кялень-валонь ширде лац-ряц ладяманц. Арьсефть оригинальностенц и сонь тевс нолдаманц инкса васенце оценкась касфневи фкя баллда.
2. Къда сочиненить оцюлмоц тяса азфть коряс фкя пяле мархтонь – кафтонь-кърдада сяда оцю, эста норматифне касфтовихть «4» оценкати – фкя единицада, «3» оценкати – кафта единицада. Кепотькс, грамотностть инкса «4» оценкась путови работати, конань эса орфографиянь коряс 3, пунктуациянь коряс 2, грамматикань коряс 2 эльбятькст, или 2-3-2, 2-2-3 соотношениятнень пингста; «4» оценкась путови 6-4-4, 4-6-4, 4-4-6 соотношениятнень пингста. «5» оценкань путомста сочинениять оцюлмац мяльс аф сявондеви.
3. Васенце оценкась аф положительнай, къда темась илядсь апак панчт, хъть сочинениянь лия ширетне аф кальдяфт.
4. Сочиненияти и изложенияти оценкань масомста эльбятькснень лувомста эряви кирдемс мяльса ся, мезе азф 11 разделса фкя типонь и аф оцюэльбятькснень и тонафнить кядьса тиф петькснень колга.

4.Тонафты работань оценкась

Тонафты работатнень (эрь кодама видонь упражнениятнень, тяка лувксса и аф контрольнай диктанттнень) оценкань критериясна марнек сяда оцюфт, сяда кемот контрольнай работатнень коряс.

Тонафты работатненди оценкань путомста ванондовихть: тонафнить самостоятельностец, тонафнемань этапсь; работать оцюлмац;  чёткостсь, аккуратностсь, каллиграфиянь ширде цебярьста сёрмадомась.

Къда тонафты упражнениятнень и диктанттнень сёрмадомста учсевикс эдьбятькснень аф нолдамаснон инкса ётафтф эрявикс работа,эста «5» и «4» оценкатне путневихть аньцек эста, мъзярда тонафнись изь нолда эльбятькст или нолдась, но петезень синь. Тяка пингть эрявикс оценкась кочкави сянь лангс ванозь, улихть или аш опискат, аккуратнайста ли сембось сёрматф. Работаса, конань эса валда сяда лама тя или тона классонди диктантть оцюлмонц коряс, «4» оценкати ноляви и 2 эльбятьксонь петькс.

Васенце и омбоце работатнень инкса (кода классонь, станя и кудонь), конат ётафневихть тя или тона маштомошинь или содамошинь кемокстаманкса, проверямда меле оценка путневи аф фалу.

Самостоятельнай работатненди, конат тифт инголькиге мяльс сявф эльбятьксонь анализфтома, макссеви оценка ся норматнень коряс, конат ладяфт тяфтама или мала видонь контрольнай работати.

5.Итоговай оценкань путомась

Тонафнема четвертть и тонафнема кизоть инкса путови итоговай оценка. Сон фкя, и вельденза няфтеви мокшень кяльть коряс тонафнить  сембе ширде аноклафшиц: теоретическяй материалть сламаса, маштомошиса, кялень-валонь коряс касомаса, орфографиянь и пунктуациянь грамотностьса.

Итоговай оценкась путови аф аньцек цифратнень лангс ванозь. Васендакиге эряви ваномс сянь лангс, кодама содамошит няфти тонафнись сембе параметратнень коряс оценкань путома пингста. Сембе сяка, штоба учениксь лац аноклакшнель сембе занятиятненди марнек тонафнема кизоть пингста, мяльс сявондеви оценкать путомста ся, кода тонафнесь сон марнек тя пингть.

 Итоговай оценкань путомаста сяда оцю мяль шарфневи оценкатненди, конатнень вельде няфневихть тонафнить сембе ширде маштомошинза, навыконза. Сяс итоговай оценкась аф уленди положительнайкс, къда четвептть, кизоть ётамда меле контрольнай работатнень пяледа ламоснон тонафнись сёрмадозень «2» и «1» оценка мархта.

Старшай класснень эса сочинениять инкса кафцьке оценкатне, конат няфнесазь тонафнить литератураса содамошинзон и сонь грамотностенц, сёрматкшневихть дробьса класснай журналса литературать коряс страницаса

7. Календарно - тематическяй планированиясь

Сембоц-                -       70ч.                                      К/К        -                       20ч.

Контрольнай диктантта- 6ч.

 8.Учебнай предметть материально - техническяй базац.

Таблицатне:

- Ингольце рядонь а гласнайть сермадомац.

- Глаголть основац.

-Ингольце рядонь а гласнайть сермадомац.

-Калгода и ляпе согласнай вайгяльксне.

-Ламонь-кърдань видонь глаголхнень сермадомасна.

-Кайги и аф кайги согласнай вайгяльксне.

-Лафча гласнайть сермадомац.

-Эсь местоимениять склоняндамац.

-я,е,е,ю гласнай букватнень вайгяльксонь смузьсна.

-Гласнайса шумордаф существительнайхнень падежга полафнемасна и окончаниясна.

-ъ гласнайть сермаса няфтемац.

- я,е,е,ю гласнай букватнень вайгяльксонь смузьсна.

-Ляпе знакть сермадомац.

-Валсь лама значенияса.

-Антонипнень рольсна.

-Ляпе знакть сермадомац.

-Падешнень лемсна и кизефкссна.

-Указательнай склоненияса сущ-нень  склонениясна.

-Валть пяльксонза.

-Существительнайхнень лично-притяжательнай суффикссна.

-Падешнень кизефкссна и песна.

-Существительнайхнень склонениясна.

-Притяжательнай склонениясь.

 -Существительнайхнень суффикс вельде тиемасна.

 -Келин В.Л. «Дидактическяй материал»,

- Келин М.А.»Дидактическяй материал мокшень кяльть коряс»,

-Киреев В.Л. «Таблицатненди методическяй руководствась»,

- Келин М.А. «Мокшень кяль», Саранск 2002к.,

- СД- дискт.

9. Кабинетса литературась тя предметть коряс.

-Имярекова В.М, Седова П.Е. «Мокшень кяль»,Саранск, 2005к.

-Гришунина В.П., Левина М.З., Алямкин Н.С. «Мокшень кялень практикум», Саранск 2008к.,

- Гришунина В.П., Кабаева Н.Ф., Левина М.З. «Мокшень кялень практикум», Саранск 2005к.,

- Гришунина В.П., Кулакова Н.А., Рогожина В.Ф. «Диктант и изложеният 5-11 классненди», Саранск 2010к.

-Киреев В.Л. «Методическяй разработкат 6-7-це классонь мокшень кялень учебникть коряс», Саранск 1977к.,

-Голенков Н.Б. «Уроки мокшанского и  эрзянского», Саранск 2006к.,

-М.А.Келин «Занимательнай грамматика» Саранск, Саранск 1998 к.,

-Б.А.Серебренников, А.П.Феоктистов, О.Е.Поляков «Мокшень-рузонь валкс. Мокшанско-русский словарь»Саранск 1998к.,

 -В.И.Щанкина «Мокшень-рузонь валкс – Русско-мокшанский словарь»

Саранск, 1993к.,

-О.Е.Поляков «Русско-мокшанский школьный словарь»

Саранск, 1996

-М.А.Келин «Валщнь тиевома мокшень кялень валкс»

Саранск, 1991к.,

-О.Е.Поляков «Касыксонь валкс»

Саранск, 1998к.,

10.Цифровой образовательнай ресурсне.

11.Практическяй деятельностть содержанияц.

Сембоц контрольнай работада -6ч.

Контрольнай диктанттнень темасна.

Контрольнай диктантсь №1 «Синтаксиссь» темать коряс».

Исса  ляйсь.

  Рана шобдава Иссать вельхксса качады уле шонгараза туман. Пуроми сон шудерьксста и кандсыне эсь ару кельме ведензон паксянь, лугань, коса и вирень туркс. Тиенди шаркст. А кой-коса и ётни ёфси велень пачка, коса шудемац афи содави. А коса горняй налхкшекс няеви кевня ланга, штоба пачфтемс эсь ведензон да пуроптф эрьганц мокшень крайса инь содаф и сембода кели ляйти – Мокшети. А ся сявсыне сазоронц Цнать мархта сонь ведензон сяда тов. И туйхть марса Окати, шовордасазь ламонзаф вийснон, эрьгаснон  и казьсазь Волгати – рузонь масторонь сембода оцю ляйти. (86) .

Контрольнай диктантсь №2  «Однороднай пялькснень коряс».

Тядя

   Тядя! Мъзяра тя валса лямбода, мъзяра кенярдемада! И тя лямбонясь кармай эжнемонза ломанть мянь сиредемозонза сяс,  мес тядясь – масторлангса инь мала ломанць. Сонь кельгомац шави лихтибрять лаца и аф коськи мъзярдовок. Тядясь сембе цебярть и пароть идензонды макссесы питнефтома.

  Ёмласта тядяце каннензе кядьнучксонза ляпе нуланя потмоса, симнензе лофцонядонза да аннензе куцю нярняса ямняда, штоба тон касолеть и кадолеть масторлангти цебярь пильгокит и лятфнемат. Тядясь тонь тонафтонзе корхтама, якама. Тядясь фалу тонь мархтот: и кеняртьфса, и пичефксса, и кельмоса, и псиса хоть ёмла пингстот, хоть оцюста.

      Мяляфтк, кельгома тядясь максси тейть эряф, ёнь.

Тят тиенде теенза ризф, сярятькс.(98).

Контрольнай диктантсь №3 «Фонетикась» разделть коряс.

Алязень исац.

   Алязе кунара ни аш шиса. Васенда войнань ранатне пульзяфтозь-веляфтозь васта лангс, а меле ёфси първажазь  сонь кельме модати. Алязе аш мархтонк, но фалу лятфни колганза исась, кона  касы велеса кудоньконь инголе. Финц тарадонзон сон кеподезень вяри менельти, а омбонцнень бъзоргофтозень шири.

  И аш стама ши, штоба велеряйхне пара валса афолезь лятфне алязень исать озафтоманкса.

  Афи эряволь, улема, тъняра корхтамс аньцек фкя шуфтть колга. Но сяда лама потма мяльда кирдян прясон аф исать, а алязень ломанень кельгоманц, тейст паронь арьсеманц колга. Нинге азондан тя исать колга сяс, мес весть сон ванфтсь зиянда лама куд, лама ломанень эряма васта. (100).

Контрольнай диктантсь №4 «Орфография» разделть коряс».

Пингсь моли.

    Тага сась кеняртьфти тундась.  Ёмла шудерькскаса, ведь мархта лотконяса аделавсь шадось. Коськсь ни кунара, панжихть лаймотне, сянгяря вельхтердаса кяшсть ляйть търваса кальхне, и синь шобда потмосост веньберьф апак сизсек морась цёфкссь кельгомать колга. Сембось перьфпяльгя сянгярьготкшни кърхка сенем менельть ала, лямбе сюролдаса валдопты шить каршеса. Шобдава нингя морайхть пъсьмархне, а шить синь тушендыхть ярхцамбялень кочкама, штоба андомс эсь ялгаснон, конат козонга аф лисендихть пъсьмаркуднятнень эзда: лихтихть. Иляттне сяшкава манихть, сетьмот и съняра эсост лайме панчфонь шинеда, што аф саты кодамовок вий кирдемс кудса. Аф, ошса тяфтама тундат аф эряйхть. (90).

Контрольнай диктантсь №5 «Валлувкссь» разделть коряс».

Тундань келунят.

  Сась тундась. Полафтсь марнек перьфпяльсь. Од ърьвянякс шнафнесазь келунятне фкя-фкянди акша паляснон. Прясост цифтордыхть сиянь ожнат. Ванан вальмава, и пелян нъльня шерьхкозевомс: каба афоль юма сельмингольден тя мазышись! А келунятне бъта кштима  сърхкасть: видет, уряднайхть, ёфси мокшават. Арушиснонды марнек ушесь-ушенясь сельмоди! Варманясь саворня и кельгозь тапаряй сянгяря сёралснон эса. Синь колгаст кельгомань лямбе валса тяштихть поэттне, лемозост кайгихть ваймонь токай морот.

   Келунясь банясонга парятанза таньфу тяльмосонза, пенганзон псисна лезды азораватненди пицемс суронь танцти пачат. Сон эряй и кудсонк-шисонк: ванк лацкас,  мезе тиф эздонза эряма вастсот.

   Россиянь келусь! Акша пильге-тарад келусь! Сон фалу кармай ваймоньконь эжнема, а минь фалу карматама кельксемонза! (104).  

Контрольнай диктантсь №6 «Итоговай контрольнай диктант».

Ломанень эзда кяшенди.

   Кемоньшка кизоса цёраня кадсть алашатнень ваксс. Ниле алятне тусть ласькозь вири. Мерзаев марязе шумть, сувась поювонь ситерьксс. Тоса сон эрязста каязень кямонзон и, явфнемок кафту ёмла шуфтонятнень, вишкста ласьксь сяда тов. Вов тага маштсь ситерькссь, лиссь кужес. Върьгаз лаца варжакстсь кафта пяли и ёрдась пря ляйбрять шири. Сонь крута беряконза ульсть касфт мелкай кусторксса, върьгазмаринаса. Алу валгомста курькстсть пильгонза и кеворезь прась алу. Сонь шобда потмакссонза ведь и лебонь. Фкя бокста няйсь ведень караф, кона похожай офтонь утонди; сонь сярядсть боконза, ангоряф шамац, кяденза. Сувась ся варяти и прась кунф.(90)

18-25Изложения.

Сянгяря ялганьке.

   Вирьхнень сидеста лемнесазь сянгяря океанкс. И тя виде. Синьфтомст, кода ведьфтома–кожфтома аш кода эрямс ломанти. Вирсь сембе пинкнень ульсь и иляткшни миндейнек пара ялгакс и аралайкс: андсамазь и пъчкафтсамазь, щасамазь и карясамазь. А сонць веши эздонк фкя – эсь колганза азоркс забота.

   Эрь гектар вирсь кизоньберьф аропни кемгафксува миллион кубометра кожф. Вов и лувость, мъзяра аропни кожфта кемзисемге тёжянь гектарсь. Тъняра вирь кемокстаф мокшэрзянь краень тонафнихнень мельгя. Синь пара мяльса якайхть мельганза, веляфнесазь эряф-ащеф шуфттнень, а валда васттненди озафнихть од вирнят.(82)

Изложения.

Атям.

   Панчфкятне  и тишесь то комафнезь  мазы пряснон, то кепотькшнезь, варжакснесть перьфпяльгя. Стака розьбрятнень прява вармась колендезь пяльнесь золотань кудрянят. Дуборгодсь атямсь, азсь латта, што тяза сай пизем. Туцятне саворня шаштсть алга нюрьгозь. Сембе перьфпяльсь шоподсь.

   Къфчядсь ёндол, лазозе благой туцять пакшень пакш. Атямсь тага торазевсь – равжа сумань лаца туцясь сязевсь. Модать мяштенцты тоста пяярсть ару путьконят. А минутада меле пиземсь лоськофтсь сембе вийсонза. Шары вармаське начксь и сутямсь.

   Кемоньшка-кеветиешка минутада меле туцятне срадсть, и пиземсь ётась. Модать ланга горнясть шудерькскат, кадондсть эсь мельгаст кърхка боразданят… Атямсь тяни ни унась ичкозе-ичкозе. А ёндолхне стаки налхксть шинь стяма ширеса. Яфодьсазь толонь плёткаснон, валдоптсазь перьфпяльть сиянь валдса и тага куроконя мадыхть.

  Ульцяса вастова валдста кърьвязсть лампочкатне, валдоптозь модать шамас туцяста шудеф сельмоветтнень.(125)

Корхтама маштома касфтомань урокне (18).

1.Сочинения «Сёксе».

2.Арьсемс аф оцю азкс эрь кодама валрисьме мархта.

3. Кудонь сочинения (Упр.65).

4.Арьсемс валрисьмот эльбятькснень коряс.

5. Арьсемс валрисьмот пъшкядема мархта.

6. Арьсемс ламонь корхтама.

7. Сочинения (упр.232).

8. Ударениясь. Изложенияти анокламась.

9. Изложения «Сянгяря ялганьке».

10. Сочиненияти анокламась. Фкя строчкаста омбоцети валонь етафтомась.

11. Сочинения «Монь семьязе».

12. Арьсемс азкс (упр. 249).

13. Омонипне. Сочинения «Спортсь-минь шумбрашиньке».

14. Текстонь етафтомась рузонь кяльти.

15. Азкс «Компьютерсь и эряфсь».

16. Текстонь етафтомась мокшень кяльти.

17.Изложения «Атям».

18. Арьсемс азкс, нолямок парнай сложнай валхнень.

Тестонь заданият «Фонетика» пяльксть коряс

1-це вариантсь
А1 Мъзяра мокшень кяльса согласнай вайгялькста?
1) 41
2) 33
3) 40
4) 32
 А2 Няфтесть, кона гласнайхне улихть аньцек мокшень кяльса?

1) и,е
2) а.., ъ
3) и,у
4) о, у

А3 Мусть валонь пуромксть, конатнень эса мъзяра буква – съняра вайгялькс.

1) марь, кяльса, ётамс, няемс
2) лопадсь, вельхтязе, ёнь, шяярь
3) налхкш, тётьмак, идь, сёвонь
4) офта, лопа, парямс, фкя
 А4 Кона рядть эса гласнай вайгяльксне аф фкат рядонь коряс?

1) курок, пуромкс
2) или, вели
3) куду, тоду
4) тунда, каземс
А5 Мусть валонь рядть, коса сембе валхнень вайгялькста сяда лама букватнень коряс?

1) оцю, вишке, сапонь, сърмамс
2) стирь, куяр, шуфта, нумол
3) пал, весть, сельме, върьгаз
4) пою, ёжу, яфодемс, валъюр, юв

 А6 Мусть рядть, коса аф васьфневихть сонорнай согласнайхне

1) мърнамс, търнатомс, кяль, вай 
2) шобда, ташта, капста, ведь
3) кой, тол, мяль, лофца
4) сёвонь, люпштамс, колендемс, налхкомс

 А7 Мусть валонь паратнень, коса валхнень смузьсна аердыхть согласнайхнень кайги-аф кайги шиснон коряс?
1) мар – марь, кяль – мяль
2) марямс – марамс, коламс – ноламс
3) уша – ужа, косат – козат
4) мон – тон, потамс – потямс

А8 Мусть валонь рядть, конатнень эса аньцек фкя слог

1) атя, мода, ава, архтомс, ал
2) тов, алаша, снав, сюре, куд
3) лов, сюлма, салмокс, шямонь
4) кштирь, марьхть, марс, ульсь, кирьхкс
А9 Мусть валонь рядть, коса валхне ётафтфт строчкаста строчкас эльбятьксфтома?
1) а – ва, то –- по – демс, ар – хцамс, тю – ремс
2) па – йге, ви – рьхть, кър – га, ка – ннемс
3) тер-демс, чё-па – фтомс, сю – ре – ня
4) лю – пштамс, ол – га, пан – га, ну – мол 
 А10 Кона валонь рядть эса аш а (ингольце рядонь) гласнайсь?

1) кудня, эль, пря, ульме, кяскав
2) эводемс, мянемс, эряви, кяшемс
3) тяла, перямс, эряф, ёжиямс
4) шятямс, шяв, шяярь, шямонь

 2-це вариантсь
В1 Кона группаса фкя и сяка вайгялькссь няфтеви разнай букваса?

1) нярь, пря, мяль, кудня
2) мадомс, ваномс, лувомс, валомс
3) эши, кяль, вирьгя, мяль
4) нола, коламс, торамс, шобда

 В2 Няфтесть группать, коса ляпе-калгода шинь коряс парнай согласнайхнень ёткс сувафтфт согласнайхть, конатнень аш ляпе парсна?

1) д, р, с, т, ц
2) н, з, б, ж, л
3) р, рх, л, с, ц
4) лх, т, с, н, з

В3 Максф валхне (сяда – сада, сура – сюре, лакси – лякси, таза – тяза, парямс, парамс, ваз – вазь) аердыхть фкя-фкянь эзда
1) фонематнень кайги-аф кайги шиснон коряс
2) гласнай фонематнень рядснон коряс
3) согласнай фонематнень ляпе-калгода шиснон коряс
4) гласнай фонематнень кеподемаснон коряс 
 В4 Кона рядса аш вайгяльксонь пропорция?

1) д:т= б:п
2) г:к = в:ф
3) лх:л’х = з:з’
4) м: м’ = ж:ш

В5 Мусть правильнай ответть
1) Фонетикаса тонафневихть сембе вайгяльксне.
2) Фонетикаса тонафневихть валхне. 
3) Фонетикаса тонафневихть корхтамань вайгяльксне.

4) Фонетикаса тонафневихть корхтамань единицатне.
В6 Мусть валонь рядть, коса валхне ащихть аньцек фкя слогста?

1) кярьмодемс, сърхкамс, шаштомс, шямоню
2) шяярь, шуфта, атямъёнга, вайгяльбе
3) кирьхкс, пурхц, вирьхть, щамс
4) лов, тол, куля, тёждя

В7 Няфтесть согласнайхнень, конат улихть аньцек мокшень кяльса?

1) ъ, ц’, х, ч, г
2) р’х, рх, л’х, лх, йх
3) й, т’, б, ж, ф
4) п, н’ р, к, м
В8 Азость мъзяра вайгялькста тяштьса валса?

1) 7
2) 6
3) 8
4) 5
В9 Няфтесть валонь рядть, коса е буквась няфти ъ вайгялькс?
1) келу, кепотькс, ве, лефкс
2) вачеда, тюремс, шинец, лотксемс
3) съезд, Лена, перьфпяль, пьеса
4) пе, велясь, кеворсь, ведь
В10 Къда лама слогонь валсь фкя лувксса аделави и, ы лангс, то лама лувксса тя гласнайть мельгя сёрмадови:

1) й буква
2) йх буквань сочетания
3) х буква
4) и буква

Виде ответтне

Тесттне «Фонетика» пялькссь

1-це вариантсь

2-це вариантсь