Урок-КВН "Сказки" на коми языке ("Мойдъяс")
план-конспект урока (5 класс) на тему

УРОК - КВН «МОЙДЪЯС»

Уроклöн мог:  вöчны кывкöртöд мойдъяс йылысь, юклыны мойдъяс содержание серти, велöдны челядьöс радейтны мойдъяс.

Урок мунöм

- Челядь, мый тi тöданныд мойд йылысь?

- Кутшöм овлöны мойдъяс содержание боксянь? (Фантастическöй, бытöвöй да пемöсъяс йылысь.)

Тi ичöтсянь кывлiнныд «Катша, катша, китш-котш», «Кань да петук», «Руч да кöч» мойдъяс. Кодъяс лоöны геройясöн тайö мойдъясас? (Пемöсъяс)

Сiдзкö, тайö пемöсъяс йылысь мойдъяс.

А мый тi тöданныд волшебнöй мойдъяс йылысь?

Волшебнöй мойдъясысь пырджык позьö тöдмавны уна пöлöс чудесаяс. Танi ми аддзам волшебникъясöс.  Öтияс вöчöны бур, а мöдъяс – омöльтор. Аддзам сiдзжö гундыръясöс, змейясöс. Тайö мойдъясын йöз пöртсьöны звер-пöткаясö, шоръясö, изъясö, а пемöсъяс – йöзö.

А öнi ворсöны кык команда.

I. Юалöмъяс

Кодi тöдмалас, кутшöм мойдысь тайö кывъясыс да эм-ö гижысьыс?

1) «Иван водiс да регыд и унмовсис. А кык вок и кутiсны сёрнитны, вай жö Ивантö виам. Огö кö пö виöй, сiйö пö пондас ошйысьны... А вай пö коксö кералам...» ( «Гундыр»)

2) «Барин видзöдiс, видзöдiс да сюйис кисö пу потасас, кöсйис видлыны, збыль-ö пу пытшкöсыс шоныд. Мыйöн барин сюйис кисö, мужик чер тышкöн чеччöдiс тувсö, а баринлöн киыс топалiс кер потас костö». («Мужик да барин»)

3) «Мый эськö тэ кутiн керны, тэнö кö купечö пöртiсны?

- Кутшöм купечö?

- Кык зобъя купечö, кодлöн горшыс паськыд, а зепъясыс джуджыдöсь»

(«Тэнö кö эськö купечö пöртiсны»)

4) «... Став Туръяыс Иванöс кутiс мöдöдны война вылö. Пасьтöдiсны, сетiсны мышноп, мышнопас сукарторъяс, и ставöн бöрдiгтыр колльöдiсны сикт помöдз». («Туръяса салдат»)

5) «Ветлiс сэнi пашкыр ош моз

Гундыр сяма гöна морт,

Гашкö, вакуль пöвстысь петысь,

Гашкö, вöрсаяслöн ёрт». (М. Лебедев «Яг морт»)

6) «Öдйö восьлалöны вокъяс,

Ылö коли налöн горт.

Ягын паныдасис накöд

Еджыд тошка пöрысь морт:

«Кывзöй, энö мунö водзö,

Шуис налы тошка дед:

Тайö туйöд, муса пиян,

Нинöм тiянлы оз шед». (М. Лебедев «Зарни чукöр»)

7) «Зэв ёна бать скöрмис Елена вылö да Василей пиыслы сетiс сабля да тшöктiс дзик пыригмозыс и керыштны юрсö, сiдз кö пö олö. Но батькалы жаль, и сы вöсна Василейлы тшöктiс вайны Еленалысь сьöлöмсö».

(«Елена Прекрасная»)

8) «А Емельлы сетiс джын сарствосö. Сэсся сэтшöма Емельöс уважайтны кутiс: «...Емель тай вöлöма куталысьыд, абу тай найö волöмаöсь куталысьясыд!» («Емель»)

9) «Öтчыд нылыд петiс йöрö,

Кытöн батьыс вöлi гöрö.

Видзöда да мича, шань

Мунö гежöм кузя кань,

Зарни бöжа, эзысь кока,

Югзьö кодзув кыкнан бокас» («Зарни бöжа кань»)

10) Салдат локтö армияысь. Сэсся поп ордö пырас, да поп медалас сiйöс, салдаттö, казакö:

- Вай миянлы медась, казакö!

- Медася. Вонас öтчыд печиктöмысь... («Салдат»)

II. Аукцион. Быд юалöм вылö сетны стöч вочавидзöм.

1. Кодi гижис «Эзысь мойд»? (К. Жаков)

2. Кутшöм мойдын гöтыр вайис верöслы дас кык пи, кок пыдöсныс - тöлысь, юр пыдöсныс - шондi? («Шомвуква»)

3. «Яг морт» мойдын жöниклöн ним? («Туган»)

4. Кыдзи заводитчö «Зарни чукöр» мойд?

(«Öти сиктын, öти грездын,

Бура олiсны кык вок.»)

5. «Иван-дурак» мойдын Иванöс кöсйисны вокъяс юкмöсö вöйтны. Кыдзи вермис сiйö мездысьны?

(Иван кутiс горзыны: «Менö мырдысьöн царö пуктöны, а ме царавны ог куж!» Тайöс кылiс купеч, купеч и веськалiс юö сы пыдди.)

6. «Яг морт» мойдын невесталöн ним? (Райда)

7. «Туръяса салдат» мойдын кыдзи ыдждöдлiс ошкöс Иван? (Михайло Иванович.)

8. Мыйö пöртсис «Шомвуква» мойдын Иванлöн гöтыр, кор мöдöдчисны море дi вылö?

9. Кыдзи шуисны «Седун» мойдын Седунлысь гöтырсö? (Марпида)

10. «Зарни чукöр» мойдын вокъяслöн нимъяс. (Ваньö да Öньö)

11. Кыдзи пырджык заводитчöны мойдъяс? (Олiсны-вылiсны... Важöн олiсны-вылiсны…)

12. Мыйöн торъялö литературнöй мойд йöзкостса мойдысь? (Литературнöй мойдлöн эм автор.)

III конкурс. Кутшöм мойдысь тайö серпасъясыс?

IV конкурс. Тöдмав кывъяс отсöгöн мойд.

Листбок вылын гижöма кывъяс. Колö тöдмавны, кутшöм мойдысь тайö кывъясыс.

1. Кыз, зобъя, купеч, сеталi, йöй. («Тэнö кö эськö купечö пöртiсны»)
2. Царь, куим, кузнеч, пи, гундыр, сабля, Ёма. («Гундыр»)
3. Бать, гу, гöрд вöв, серöй вöв, ворöнöй вöв. («Седун»)
4. Паччöр, тöрöканъяс, вуджöр, ыжъяс, мыр, мешöк, купеч, юкмöс. («Иван-дурак»)

V конкурс. «Мый вöлi водзö?»

1. Олiсны-вылiсны пöрысь гозъя. Налöн вöлi куим ныв. Тулысын бать петiс град йöрö гöрны, нывъясыс град лэптыны кутiсны.

Лэптiсны, лэптiсны, видзöдлiсны – град костöд зарни бöжа кань котöртö. Ыджыд ныв шыбитiс зыртö, котöртiс кань бöрся. Вöтчис сы бöрся потшöс дорöдз. Потшöс дорын кань тупыльтчис да ошкö пöри».

(«Куим чой». Ош нуис сiйöс гортас.)

2. И вот, öтчыд ичиньыс ыстiс Анушöс öтнассö вöрö мырпом вотны. Лунтыр Анушыд ветлöдлiс вöртi, наберушка тыр вотöс чукöртiс. А сэсся воши пемыд вöрад… («Зарни чунькытш». Ануш паныдасис Бурморткöд. Бурморт петкöдiс сiйöс вöрысь да сетiс сылы зарни чунькытш.)

3. Локтiс мужик гортас да и шуö:

- Ветлi базар вылö да аддзылi: öти барин ньöбис жонь да быдса ветымын шайт мынтiс сыысь. Вай жö ми мунам да сiйö бариныслы вузалам ыджыд петуктö. Жонь серти кö, уна и сьöм сетасны. («Мужик да барин». Скöрмис барин, кучкалiс мужикöс да вöтлiс, а петуксö мырддис.)

4. И вот миян великан,

Сера юра тöрöкан

Лоис став звер вылын хан...

Лёкысь равзö зверъяс вылын:

«Ноко, пияннытö вайöй,

Талун рытнас сёя найöс!»

 (Илля Вась «Тöрöкан». Локтiс ичöт пышкай, кокыштiс тöрöканöс.)

VI конкурс. Тöдмавны кроссворд.

1. Кутшöм ю визувтö «Туръяса салдат» мойдын Туръя сикт дортi? (Емва)

2. Мый ньöбис барин 50 шайтысь «Мужик да барин» мойдын? (Жонь)

3. «Шондi пи» мойдын мöд вокыслöн юрсиыс вöлi чим сьöд. Кыдзи кутiсны шуны сiйöс бур войтырыс? (Вой пиöн)

4. Кутшöм сиктысь гусялiс Яг морт Райдаöс? (Кыпыд)

5. Вöвлöн ним «Зарни чукöр» мойдын. (Рыжко)

6. Кутшöм двореч аддзис зон медводдзаöн «Эзысь мойдын»? (Ыргöн)

7. Мый отсöгöн мам тшöктiс вуджöдны батьсö «Шомвуква» мойдын? (Носöвик)

VII конкурс. Вöлi сетöма гортса удж. Кыкнан команда пасьтöдöны  öти персонажöс. Паськöм серти, мимика серти тöдмавны, кутшöм геройöс петкöдлöны.

❧❧