Равил Шиһап улы Шәрәфиев һәм Дания Нургаяз кызы Нуруллина белән очрашу кичәсе.(әдәби музыкаль кичә өчен сценарий)
материал по теме

Равил Шиһап улы Шәрәфиев һәм Дания Нургаяз кызы Нуруллина белән очрашу.

(Азалия.)1алып баручы:Хәерле кич кадерле дуслар, хөрмәтле укытучылар, укучылар, килгән кунаклар.

Безнең мәктәптә бүген бәйрәм - очрашу кичәсе. (2, 3 слайд)

(Айрат)2 алып баручы:Мәктәбебездә кунакта Рәсәй һәм Татарстанның халык артисты, Татарстанның Тукай һәм Җәлил исемендәге Дәүләт премияләре лауреаты –Равил Шиһап улы Шәрәфиев

 1алып баручы: һәм Рәсәйнең атказанган артисткасы, Татарстанның халык артисты Дания Нургаяз кызы Нуруллина.

2 алып баручы:       Хуш килдегез, безгә кунаклар,

                 Түребезгә рәхим итегез.

                 Якты, чиста, иркен һәм кунакчыл

                 Мәктәбебезне безнең күрегез.

1алып баручы: Сезне  сәламләп 7г сыйныфы укучысы Хөснетдинова Альбина җырлый. ”Ак чәчәкләр”

2.  алып баручы:

  Җилдәй җитез узып киткән гомер,

  Күпме юллар сизми узылган.

  Якты хатирәләр юл буена

  Гүя маяклар күк сузылган.

1 алып баручы: (4 слайд)

Мәскәүдә укып кайткан бер төркем щепкинчылар халык арасында бик тиз популярлашып, бүгенге көнгә тиклем тамашачының “сөйкемле сөягенә әверелде. Алар бүген дә татар театрының мөнбәрендә һәм Камал сәхнәсен “тотып торучы легендар шәхесләр”. Әйе,безнең аларны легендар дип атарга хакыбыз бар. Россия һәм Татарстанның халык артисты Равил Шәрәфиев әнә шул бөекләрнең берсе.

     2 алып баручы: (5-13 слайдлар)- (чиратлап әйтәләр)

Равил абый Шәрәвиев бик күп рольләр башкара. Менә аларның кайберләре:”Хуҗа Насретдин”комедиясендә Хуҗа, “Әлдермештән Әлмәндәр”комедиясендә Әҗәл, “Ханыма”комедиясендә Кнәз Пантиашвили, “Банкрот” комедияседә Сираҗетдин, “Диләфрүзгә дүрт кияү” комедиясендә Исмәгыйль, “Бабайлар чуагы” нда  Әнсар,”Мулла”да Сәләхетдин, “Арбалы хатыннар”да Кара Гобәй,”Ут  күршеләр”дә Вәлиулла образы.  Алар безнең күңелләребездә мәңге онытылмый!

1  алып баручы:

  Чәчләрдәге көмеш картлык түгел,

  Шаулап узган тормыш билгесе,

  Тырыш хезмәт, күпме  түгелгән тир,

  Ирешелгәннәрнең көзгесе.

2 алып баручы:

Безнең мәктәп укучылары Сезнең хезмәтегезне олылап,ихтирам йөзеннән  татар халык биюен бүләк итә (14-15 слайдлар)

1 алып баручы:

Татарстанның халык, Россиянең атказанган артисты Дания Нуруллинаны сәхнә өчен яратылган артист дими ни дисең.  1966 нчы елдан бирле театр дөньясында. Камал театры артисткасын яратып үзара “Нурлы” дип йөртәләр.  Ул, кояштай балкып сәхнәгә чыгуга, күңелләрне күтәреп җибәрә. Ул уйнаган образлар күңелләрдә сеңеп кала.

2 алып баручы: (16-26 слайд)      (27-28 слайдлар)(чиратлап әйтәләр)

“Зәңгәр шәл”дә Мәрфуга,”Алты кызга бер кияү”дә Хәдичә, “Мылтык”та Гөлфидә,”Казан сөлгесе”ндә Әсма, “Гергери кияүләре”ндә Гөрпинә,”Зөбәйдә адәм баласы”нда Җәүһәрия,”Үлеп яратты”да Мөхлисә Бубый, “Сөясеңме, сөймисеңме”дә карчык образларын халык яратып кабул итте.

2 алып баручы: Әйе, Азалия,әлеге образлар татар халкының күңеленә сеңеп кала.Бу образлар безнең күңелләрдә  җыр, моң булып яңгырый......

1 алып баручы: Мәктәбебезнең сандугачы Альбинаның җыры сәхнәбезне ямьләндерер, күңелләрдә җылы хисләр уятыр..........

2 алып баручы:

“Бер күрешү үзе бер гомер” дип әйтә татар халкы. Көтеп алган кунакларыбызга безнең сорауларыбыз да бар.

 Равил абый:(чиратлап)

1 алып баручы: –Сезнең рольләрегез арасында нинди генә ир-ат образлары юк. Алар арасында үзегезгә охшаган холык-фигыльлеләре дә бардыр. Образдан чыга алмыйча йөргән чакларыгыз булмыймы?

Дания апа:

2  алып баручы: – Үзегезнең театрда беренче мәртәбә спектакль караган чагыгыз истәме?

1 алып баручы: Равил абый, Спорт турында әйтмичә калсак, сезнең портретыгыз тулы булмас иде. Сез артистлар арасында дан казанган чаңгычы да, велосипедта йөрүче дә...тагын өстәп ниләр әйтә аласыз?

2 алып баручы:

Әйдәгез,залда утыручыларның сорауларын тыңлап китик:

1 Равил абыйга.-Сезгә Әҗәл ролен уйнарга авыр булмадымы?Нинди кичерешләр күңелегездә калды?(залдан әйтәләр)

2. Дания апага -Сез чит илләргә йөрергә яратасыз дип беләбез. Башкаларга кайларга барырга киңәш итәр идегез?

3. Равил абыйга.-Сез бәхет төшенчәсен ничек аңлыйсыз?

4. Дания апага -Хатын-кызның бәхете нәрсәдә, сезнеңчә?

1алып баручы:

Без дә театрны бик яратабыз.Сез уйнаган рольләрне , андагы образларны күреп сокланабыз.Безнең күңелләрдә дә: “Эх, Равил абый, Дания апа кебек артист булсаң иде!”дигән теләк туа. Театр сөюче укучылар мәктәбебездә бик күп.

Бүген без Ләбиб Леронның «Алтын күкәй яки киндер сюрприз" әсәреннән сәхнәләштерелгән өзек әзерләдек.Без әле өйрәнәбез генә, ләкин шулай да үзебезнең беренче иҗат җимешебезне тәкъдим итәсебез килә.

(Айрат).2 алып баручы:Дания апа,

2- Кайсы рольләр сезнең үз сыйфатларыгызны чагылдыра дип саныйсыз?

Спектакльдән берәр өзек уйнап күрсәтә алмассызмы?

1 алып баручы:

Менә очрашуыбыз ахырына якынлашып, аерылыр минутлар да җитте. Вакыт табып мәктәбегезгә килгән  өчен рәхмәт Сезгә.

Сезгә ныклы сәламәтлек, күңел тынычлыгы, гаилә шатлыгы, кайгы-хәсрәтсез көннәр, ак бәхетләр, бәхетле озын гомер кичерүегезне телибез. Киләчәгегез җыр кебек матур, кояш кебек якты булсын.

2 алып баручы:

Күңелләрдән күңелләргә салдык күперләр

Насыйп булсын бу юллардан кабат үтүләр.

Сезне сагынып сайрар һәрчак күңел кошыбыз,

Кабат очрашканга кадәр, хушыгыз!

(җыр)