Урок родной литературы в 7 классе "Поэзиясь – народонь ойме…"
план-конспект урока (7 класс) на тему

Темась: « Поэзиясь – народонь ойме…»

             (А.М.Моронь «Русь» стихотворениянть коряс).

Целесь: Панжомс поэтэнть эрямонь ды творческой кинзэ; «Русь» стихотворениянть содержаниязо ды идейной ёнксозо; маштомс видестэ  панжомо художественно-изобразительной ёнкстнэнь; невтемс Россиянть сюпавчинзэ, мазычинзэ, эсь масторонь вечкемась, сонзэ ванстомась.

Оборудованиясь:А Моронь портрет, географической карта, книгань выставка, артовкст эсь велень мазычиденть.

Эпиграфось: Мон – эрзян,

                               Прясто пильгс эрзян !

                               Эрзянь кельсэ од морот моран…

Планось: 1.Ушодксонь вал.

                       2.А. Моронь эрямонь ды творческой кизэ.

                       3. «Русь» стихотворениясь.

                       4.Обобщениясь:

                        а) артовксонь ваннома;

                        б) «Монь Толкан велем» стих-сь;

                        в) лацезь стихень кунсолома.

                       5.Уроконь итогось.

                       6.Кудонь важодема.

Уроконть ютавтомазо.

Ушодксонь вал.

Ушодсынек уроконок паро ёжосо. Кунсолотано кавто мелодият. Ули покш мелем содамс: конась тенк маряви седе мазыекс, малавиксэкс, вечкевиксэкс.(1-сь «Кштема», 2-сь «Барыня»).

Кавонест мелодиятнень кунсолозь кепети потмоёжот, сайтянзат кеняркс.А конась седе вечкевсь, седе малавикс тенк- васенцесь эли омбоцесь? Мекс?

-Кода арсетядо, конась эйстэст эрзянь?

-А конась рузонь?

Эрьва раськенть эсензэ келезэ, моронзо, мелодиянзо.

Эрьва раськенть ули мелезэ невтемс перть пельксэнть мазычинть, эсензэ виевчинть, покшчинть, шумбрачинть.Ёроков ломантне невтить пертьпельксэнь мазычинть творчествасо. Веенст арсить музыка: паро,гайгиця, мазый.(композиторт)

Лиятне жо невтить те мазычинть краскань тюссо.

- Кить истятнэ? (художникть).

(невтевить артовкст)

Вана тынк икеле артовкст. Неяви  эли а неяви пертьпельксэнть мазычись неть артовкстнэсэ? (нама неяви)

-Кинень мезе сехте мельс тусь артовкстнэсэ?

-Эйкакшт вана тынк икеле арасть краскат, лия артомапельть.

-Кода жо те мазычинть арсетядо панжомс? Мейсэ? (валсо)

-А кить невтить те мазычинть валсо? (поэтнэ, писательтне).

Виде, пертьпельксэсь, мазычись невтеви, музыкасо, краскасо ды валсо.

Ламо писательть, поэтт сёрмадсть виртнеде, келей паксятнеде, лейтнеде, вечкевикс мастордонть,сонзэ лангсо сюпав ойме ломантнень эрямодост ды ламодо лиядо.

Од материалось

1.А Моронь эрямонь ды творческой кизэ.

Течи минь тынк марто теевтяно содавиксэкс эрзянь сехте вечкевикс поэтэнть марто – те Афанасий Матвеевич Осипов, сонзэ литературной псевдонимезэ – Артур Моро. Карматано важодеме  А.Моронь «Русь» стихотворениянзо лангсо. Уроконь эпиграфокс аштить Моронь валонзо (ловновить).

А.Моронь поэзиянзо содасызь аволь ансяк мокшэрзянь ломантне ,но и рузтнэ, татартнэ, башкиртнэ, чуваштнэ, мариецтнэ, грузинтнэ, казахтнэ,секс што сонзэ моронзэ ютавтозь эрзянь кельстэ неть народтнэнь кельс.

Сондензэ содыть масторонь томбале: Чехиясо, Германиясо, Польшасо ды лия масторсояк.

А.Моро чачсь 1909 иестэ панжиковонь(май) 11-це чистэ Куйбышевской областень Подбельской  райононь Ключовка велесэ. Те кезэрень покш эрзянь веле. Тетязо батрачась сюпавонь кедьсэ, чуросто якась Рав лангов батрачамо, пачколесь Сибиревгак, натой, Сэтьме(Тихой) океанонть маласкак якась чугункань кинь теме. Правтсь вирь, эзь брезгова кодамояк роботадо. Авазо кастась эйкакшт ды истяжо важодсь сюпавонь кедьга.

7 иесэ Охоня тусь важодеме ломань кедьга. Пансесь сокамсто алашат, вансь тувот, реветь, вачочись лиясто пансизе, натой, сускомонь пурнамояк.

11-иесэ тусь Сибирев прянь трямо, пачколесь натой, Петропавловск  ошонть видьс, косо сонзэ саизь эйкакшонь кудос.

1922-це иестэ велявтсь кудов ды  кармась тонавтнеме начальной школасо.

Стакадояк стака эйкакшпорадонть А. Моро сёрмадсь: «Эйкакшпингстэ перець стручкакс касынь, нужась ламо вий эйстэнь сайсь».

Веле. Эрзянь Ключовка веле. Кода стака эзь ульне тензэ, сон свал теке киве, таргась, тердсь эйсэнзэ кудов. Вишкинестэ уш токилизе Охонянь эрзянь келесь седеензэ, конань эйсэ сон кортась свал, косо илязо уле.

1929 иестэ сёксня Охоня туи Московов роботань вешнеме.

«Якстере Теште»газетань редакторось П.Глухов лезды тензэ прядомс ФЗУ ды получамс наборщикень специальность, чокшне тонавтни рабфаксо.

1930 иестэ лиссь васенце стихезэ «Пиже тумо ало», кона печатазель газетасо.Те пек кенярдовтызе сонзэ.Те шкастонть сон ламо тонавтни Пушкинэнь, Есенинэнь пельде сёрмадомо. Теке жо иестэнть тонавтни киноинститутсо кинооператорокс, служи кавто иеть армиясо,мейле тонавтни пединститутсо. Прядомадонзо мейле важоди Московской областень велесэ рузонь келень ды литературань тонавтыцякс.

1941-це ие. Туи фронтов. Ульнесь НКВД дивизионной газетань редакторокс. Казезь «Якстере Теште» орденсэ ды зярыя медальсэ. Войнань иетненень алтызе сборникензэ «Моран эрямонть».

1949-це иестэ пряды общественной наукань Академия. Сёрмады робота Чиаурели кинорежиссёронть творчествадо, тень кис макссть  тензэ искусствань наукань кандидатонь степень.

Ламонь таркава савкшнось важодемс Моронень. Сон роботась СССР-нь писателень Союзонь правлениясо, институтонь преподавателькс, Мордовской Госуниверситетсэ ветясь эстетика.

1969-це иестэ тусь эрямо Московов. Моро эсь творчествасонзо невтсь аволь ансяк чачома ёнксонь пертьпельксэнть мазычинзэ. Сон алтась эсь творчествасонзо зярыя стихотвореният Крыментень, Кавказонтень, Средней Азиянтень.

Аволь весе валанясто мольсь поэтэнть эрямосо. Ламо эйсэнзэ критиковасть и тевень, и стяконь кисэ. Примеркс, ламо эйсэнзэ сёвность сень кисэ, мекс эсензэ творчествасонзо нежедсь Есенинэнь поэзиянтень ды смелстэ, апак пеле, кортась сонзэ поэзиянть вечкемадо. Те ней весе вечксынек Есенинэнь, а сестэ шкатне ульнесть аволь истят. Дневниксэнзэ А.Моро стака шкасто сёрмадсь: «Монь кисэ тесэ кияк а мелявты, уян ломань лейсэнть ськамон волнакс…»

Зяро сёрмадсть Мородо критической статьят, зняро эзть сёрмале эрзянь поэтнэде кидеяк. Ульнесть истяткак, конат чумондсть весе сонзэ творчестванзо, кандсть эйсэнзэ то вейке, то омбоце «уклонистэкс».

Натой, тонавтсть эйсэнзэ, мезе ланга сёрмадома ды кода, хоть сынсь те тевенть овсе эзть чарькоде.

Тень лангс апак вано, А.Моро ульнесь, ули ды карми улеме сехте вечкевикс эрзянь поэтэкс.

«Русь» стихотворениянть лангсо  важодемась.

«Русь»стих-ть А.Моро сёрмадызе войнань шкань иетнестэ. Тень лангс апак вано, сонзэ содержаниязо кеместэ сюлмавозь минек неень шкань эрямонок марто.

Минь весе вечксынек тиринь масторонок, чачома ёнксонок.Великой Отечкственной войнань шкасто, зярдо фашистнэ бажасть истожамс минек эрямонок ды тапамс минек Родинанть, Родинанть кисэ ламот путызь эсь пряст, максызь од эрямост. Войнань шкане  Русь ды Родина чарькодематне вэйсэндявсть. «Русь» стихотворениясонть невтезь поэтэнть эсь Родинанзо мелензэ-превензэ кода тиринь масторонь вечкиця ломаненть, поэтэнть ды воинэнть.

-Эйкакшт, вана тынк икеле географической карта, ёвтнинк, мезе содатадо минек масторонть покшчидензэ ды мазычидензэ.

(карта икеле ёвтнема)

Минек масторось – Россиясь мирсэнть сехте покш государства. Сонзэ площадезэ 17 ды вейке кеменце пелькс квадратной километрат. Россиясь ашти сехте покш материксэ – Евразиясо. Бути ванномс Россиянь географической положениянзо, то минек сельмс сеске каяты сонзэ эрьва ёндонь чачозо. Те видеяк, Россиясь зани келей тарка сеске кавто масторонь пельксэ – Европасо ды Азиясо. Россиянть границянзо ютыть…

Минек покш масторонок явови эрьва кодамо природань авейкетьксчисэ. Арктической островтнень кежей мазычист полавтовить вирень зонань мазый пейзажсо, певтеме крайтеме валаня таркатнева чудить а ёвтавикс лейть, покш пандтнэ вельтязь эйсэ.

Минек масторсо можна неемс кежей вулканической изверженият. Ули домка озера Байкал, сехте вишкине лей –Азовской, улить самай покш площодень коряс вирть. Минек Россиясо моданок лововить рашты раужо модакс.

Минек Россиянь природной особенностнеде можна кортамс валтнэсэ « сехте,сехте, сехте». А стяко сонзэ покшчидензэ ды мазычидензэ кортыть поэтнэ, писательтне, артыцятне, музыкантнэ.

- Ней, Эйкакшт, ванносынек кода минек масторонть покшчидензэ ды мазычидензэ сёрмады А. Моро - поэтэсь.

Ловносынек стихотворениянть.

(кунсолови записьсэ или ловносы учителесь)

1. Кода ловнови те стихотворениясь?

(Стих-сь ушодови кенярдомасо, мейле аламо шкас те ёжомарямось ёми, стихенть песэ вельмеви поладови одов)

-Ловнынк эсь пачканк стих-ть.(2 мин)

- Кинь мелезэ ули ловномс стих –ть одов?

(ловныть тонавтницят 2-3)

- Кодат Родинадо арсемат ёвтась А.Моро эсь стихотворениясонзо?

( А.Моро невтинзе эсензэ ёжомарямонзо вечкевикс Родинантень. Невтизе сонзэ мазычинзэ ды покшолманзо. Сонзэ кисэ эрямоськак максомс аволь жалка)

-Кодат нетядо полавтовкст, явовкст авейкетьксчи стихотворениянь сёрмадома шканть ды неень шканть ютксо?

(невтевсь СССР, но сон яжавсь. Но Русесь, Россиясь эзь яжаво ды зярдояк а яжави кодамояк стакачинень)

-Кода чарькодьсынк, поэтэнть истят поэтической ёвтамотнень:

…мештеть лангсо касынь мон – тонь тякат, ванстасть эйсэнь авань чевте кедть…

( што кассь вечкевикс моданзо лангсо, масторось ванстсь эйсэнзэ кода авазо.)

…СССР – чудань теиця Русь…

( икеле ульнесь СССР, козонь совакшность 15 республикат. Эрьва республикась мазылгавтсь масторсонть эсензэ койсэ, путсть покш путовкс. Весе республикатне ульнесть кеместэ сюлмазь вейкест-вейкест марто.)

…гайгить моротне  сизьгемень кельсэ…

(эрьва республикась кортась эсензэ кельсэ и кияк  тенеде эзь визде, сынь ульнесть теке патят – ялакст, лездасть вейке-вейкенень.)

…нужась – горясь а велявты – тусь.

(зяро нейсь Русесь пайстомочи – те весе тусь и зярдояк а велявты).

-Эйкакшт, тынь ёвтниде минек масторонть покшчидензэ. А кие мусынзе картастонть сеть лемтнень, конат лецтязь стихотворениясонть?

-Кода арсетядо, мезекс те эрявсь поэтэнтень?

( неть лемтнень вельде поэтэсь кемексты стих-нь васенце строчкасонть ёвтазь мельтнень-арсематнень: « Аволь ёвкссо истямат пек мазый, монсь неитинь, родной, сырнень Русь». Тень кисэ поэтэсь лецтни Украинанть, Тянь-Шаненть, Крыменть, Араратонть ды лия таркатнень. Но кодат мазыйть иляст уле сынь поэтэнтень,ялатеке сехте питней Русесь, конань мазычизэ « сырнень» .)

2. Родинанть виензэ, мазычинзэ невтемантень поэтэсь кочки седейшкавань эпитет ды сравненият. Мусынек сынст ды сёрмадсынек тетрадьс.

(…сырнень Русь;  певтеме Россия;  героизмань волнав океан;  валдо чи, цёков гайть, гюлистан – эпитет.

«Гюлистан» валонть поэтэсь совавты сень кисэ, штобу седе домкасто панжомс цветиця эпитетэнть, ведь кортамось моли народонь кеме союздонть. Секскак поэтэсь пряды стихенть домка мельсэ: « Тонь кисэ тунь а жаль мик эрямом.Тон максык монень сонзэ, о, Русь!»)

(…розатне зорювакс палсть;  волнатне жемчугсо валсть;  эрьва народось – менельсэ чись – сравненият.)

-Стихотворениясонть валтнэ весе эрзянь или совавтозь лия келеньгак? Муинк. Мекс совавтозь? ( родной,знаменитойкс, бедной…)

(Сынь лездыть поэтэнтень седе выразительнойстэ ёвтамс эсь мельтнень-превтнень.)

3. Кода арсетядо, кодамо те произведениянть композициязо? Кинь пельде ёвтавить арсематне стих-ть?

   ( Мон арсян сёрмадозь произведениясь монологонь формасо.  Лирической героенть пельде. Лиякс меремс те произведениясь – вейке героень монолог. Сонзэ эйсэ видестэ ёвтазь лирической героенть арсеманзо ды ёжомарямонзо эсензэ вечкевикс Родинадонть)

4.Обобщения.

а) Минь ванынек весе стих- ть смустензэ. Кодамо можна теемс обобщения минек кортамодонть.

( 1.А.Моро «Русь» стих-ть невтизе минек масторонть мазычинзэ ды покшолманзо. Родинанть морамонь туртов поэтэсь путы весе седей виензэ ды лембензэ.

2.Стихесь гайни прок моро или седе видестэ меремс кода торжественной гимна.

3.Войнань шкасто Русь ды Родина чарькодематне лирической героенть мельсэ-превсэ вейсэндявить.)

И наверна седеяк кепедевить сынь неень шкасто, зярдо кепедеви Россиянть экономической ды политической лувозо.

б) кевкстемат:

1. Козонь кандови минек велесь?  Мокшэрзянь масторось?

(Россиянь пелькс)

в) Эйкакшт мон кудов максокшнынь задания: анокстамс артовкст минек велень сехте вечкевикс таркатнеде.

    (ванновить артовкстнэ )

г) А ванна кода эсь чачома таркадо сёрмадсь А.Моро.

 (ловнови « Лисинь паксяв…)

 Давайте миньгак теевтяно вишкине ушодыця поэтэкс, арсетяно эсь чачома веледе, минек велень сехте вечкевикс таркатнеде, содавикс ломантнеде стихотворения.Те заданиясь ульнесь максозь тенк кудов.

( кунсоловить эйкакштнэнь стихотворенияст ды  ванновить артовксост)

Весе тень лангс нежедезь таго велявтано ды ловносынек «Русь» стихотворениянть, вандано лия вановтсо, потмоёжонь путозь.

(ловнови « Русь» стих-сь)

Уроконь итогось

Кудонь важодема.

1.Содамс поэтэнть эрямонь ды творчесой кинзэ.

2. «Русь» стихотворениянть тонавтнемс наизусть.