Кода содасыть кортамо пелькстнэнь?
план-конспект урока (7 класс) на тему

 Урок –викторинань сценариесь.

 Анокстызе:

Тонавтыцясь:       Сигимова Надежда Геннадьевна.

Школась:               МОУ-сь «Поселкань средней общеобразовательной

                                 2-це школась»  

Районось:               Отяжбуе ёнксось .( Атяшевский муниципальный район)

Уроконь темась:  « Кода тон содасыть кортамо пелькстнэнь?»

Классось:                 7-це

Ютавтомань  формась:  Викторина

Уроконь бажамотне ды  путовкстнэ:   (2-це слайдась )

1) ледстямс, домкалгавтомс ды кемекстамс тонавтницятнень

содамочист кортамо пелькстнэде;

2) маштомс сынст валрисьместэ, текстстэ мукшномо, эрьвейкедест явомо; лексикань ды грамматикань смустест невтеме;

3) кастомс эйкакштнэнь ёрокчинь, кортамонь ды арсемань маштомачист;

4) кирвазтемс тонавтницятнень седейс мелень путома, вечкема тиринь

келентень; таштамс содамочить эсь раськень содавикс ломантнеде, сынст путовкстост весе раськенть ванстомга, коензэ-кирданзо вельмевтемга, культуранзо кастомга.

Уроконь кедьёнкстнэ: компьютер, фонохрестоматия, мультимедия,

                               интерактивной доска, альбомт ( «Эрьзя», «Ф.В.Сычков»    

                              « Мордовия: народное искусство»), книгань выставка.    

                                                 Уроконь  пелькстнэ:

I   Уроконь пурнамонь - теемань шкась.                             (3 минутат)

II. Тонавтомань кис кармавтоматнень топавтомась.      (20 минутат)

III. Оймсема шкасто.                                                               (10 минутат)

IV.Уроксо ютазенть вейсэндямось.                                       (5 минутат)

V. Уроконь цётамось.                                                                (5минутат)

VI. Кудонь тевесь.                                                                      (2 минутат)

                             Эпиграфось   Сеедьстэ эрси- валось вейке  ( 3-це слайдась)

                                                    Ансяк а вейкеть тевть теи…

                                                                                             (В. Суслов)

                                        Уроконь молема лувось.

           I.  Уроконь пурнамонь - теемань шкась (5 минутат) Тонавтыцянть валозо. Эйкакшт, минь тынк марто кавто тонавтнема иеть ютынек грамматикань покш пелькс. Тынь  таштыде те шкань перть ламо содамочить, сюпалгавтынк эсь кель- валонь сюпавчинк. Течинь уроксонть минь весе тень ледстясынек, кемекстасынек, вейсэндясынек. Те урокстонть минь карматано кортамо  валоть покштояк покш тевдензэ. Валось – те келенть сехте вишка прявтпелькс, кона невти чарькодема предметтэ, тевтеемадо ды сынст башка ёнкстнэде. Валось невти лексикань ды грамматикань смустть. Весе  валтнэ кельсэнть явовить кортамо пелькска. Секскак уроконь темась минек «Кода тынь содасынк кортамо пелькстнэнь?» Нама, ве уроксо эрьвантень ламо шка а явови, кода сынст седе келейстэ ды домкасто тонавтнемстэ. Но бажамонок икеленек аштить истят: мельс сынст ледстямс; маштомс сынст валрисьместэ муеме; формань ды башка ёнксост коряс содамо; кортамсто ды сёрмадомсто сынст тевс колсто нолдамо.Ушодсынек , эйкакшт,  уроконть паро ёжосо.

           II. Тонавтомань кис кармавтоматнень топавтомась (20 минутат)

           Тонавтыцясь:      

                   Тиринь Келень покш масторсо,

                   Валсо сюпавдо сюпав кужосо

                   Эрить ламо пингеть вейсэ

                    Кемень ялакст ояксчисэ.

                    Кототне сынст ютксто  прявтт,

                    Башка смусть канды эрьвась.

                    Нилетне жо лездыть тенст

                    Цяк лиясто сынтемест.

                    Кода эрявсь арыть рядс,

                    Валонь рисьме кодыть ладс.

                    Арсян , кецявтсамизь монь

                    Ёвтнетядо эрьвадонть.

                    Штобу парсте сынст ледстямс,

                    Кужонть лемензэ ёвтамс,

                    Каршо вал максодо виде

                    Ды кортадо апак визде.

                    Невтевкст превсэ тынь кирдеде,

                    Каршо валонк свал идеде.  

          1-це кармавтомась. Максомс кевкстематнень лангс виде каршо вал.(10 минутат)

         (Тонавтыцясь кирди пейделькине, конань цецянь лопиненть удало ули кевкстема. Эйкакштнэ мельга-мельцек саить  лопине ды максыть каршо вал , кемекстыть сонзэ невтевкссэ. Каршо валонть максомадо мейле цецянь лопиненть эрьвась педявсы магнитной доска лангс мекевланг. Те тееви сень кис, штобу лисевель удало сёрмадозь букватнестэ грамматикань пельксэнть лемезэ )

М     Кодамо кортамо пельксэнтень мерить существительной? Ёвтнек сонзэ

башка ёнкстнэде.

О     Кодамо кортамопельксэнтень мерить прилагательной? Ёвтнек сонзэ

        башка ёнкстнэде.

Р     Кодамо кортамо пельксэнтень мерить местоимения ? Ёвтнек сонзэ

       башка ёнкстнэде.

Ф    Кодамо кортамо пельксэнтень мерить числительной ? Ёвтнек сонзэ

       башка ёнкстнэде.

О    Кодамо кортамо пельксэнтень мерить наречия? Ёвтнек сонзэ

        башка ёнкстнэде.                              

 Л     Кодамо кортамо пельксэнтень мерить  глагол? Ёвтнек сонзэ

         башка ёнкстнэде

 О     Кодамо кортамо пельксэнтень мерить союз? Ёвтнек сонзэ

         башка ёнкстнэде.

Г       Кодамо кортамо пельксэнтень мерить  валмельгакс? Ёвтнек          

         сонзэ башка ёнкстнэде.

И      Кодамо кортамо пельксэнтень мерить  частица? Ёвтнек          

         сонзэ башка ёнкстнэде.

Я      Кодамо кортамо пельксэнтень мерить  междометия? Ёвтнек          

         сонзэ башка ёнкстнэде.

    Тонавтыцясь:     Кортазь кортыде вадрясто,

                                   Эрьвадонть ёвтниде парсте.

                                   Ней содамочинк невтинк,

                                   Валрисьместэ сынст муинк.  

   2-це кармавтомась. (3 минутат)               4-це слайдась                                               Ёвтамс, кодамо кортамо пельксэс кандови эрьва валось максозь текстстэнть. Те кармавтомась тееви кортазь, апак сёрмадо.  

                              Робинзон Крузонь киява

       Сестэ тонавтнинек котоце классо. Вова ялгам марто та-кода кунсолынек радио, тосо ёвтнесть од ломанде, конат понгонесть покш эрькень усияс. Сисе                                    

м чить эрясть тосо. Кодамояк ярсамопель мартост эзть сайне: мезе муят, седе ярсак, зяро мелеть удок.

     - А мезе, Миша, - велявтсь ёнон Вова, - те тевесь миненек кизна  оймсема шкасто тееви. Пижелгадыть виртне, лугатне, сестэ сыргатано  ковгак…Ансяк те весе улезэ эсенек юткова. Сайсынек Петянь, Витянь  Андреень.

    3-це кармавтомась.(3минутат)   ((5-це слайдась))

        Максозь валтнэстэ теемс валрисьметь.( тееви сёрмадозь).

       Мельга-мельцек лисить доска икелев важодеме колмо тонавтницят.

       Эрьвась теи валрисьме, сёрмадсы.

• Касомс, минек, ды, Мордовиянь, мазылгадомс, чиде, чис, прявтош.

  ( Чиде чис касы ды мазылгады  минек Мордовиянь прявтошось. )

• Од цёра, самс, тейтерть, ды, Саранск, тонавтнемс, тёжат, вузтнэс.

ламо.

          (Ламо тёжат од цёрат ды тейтерть сыть тонавтнеме Саранск          

            ошонь вузтнэв)

• Ёнкс, ютавтомс, кодат, покшчить, эрьва, минек, келень, кой, кирда, ванстомс, вельмевтемс, ды.

    (Минек ёнкссо ютавтовить эрьва кодат покшчить тиринь            кельтнень , койтнень – кирдатнень ванстомга ды вельмевтемга)

     4-це кармавтомась.(3минутат)        (6-це слайдась)

    Тонавтыцясь: Максозь валрисьметнень ваннынк валрисьмень пелькстнэнь коряс, невтинк схемасо. Эрьва валонть вельксэс сёрмадынк, кодамо кортамо пельксэс сон кандови. 

1. Аволь умок ютазь пиземетнеде мейле таго ушодовсть маней чить.

     2.  Ловтаня сувсо таргазь менельганть сэтьместэ уить ашо пельнеть.

     3.  Тантейстэ качадыця коське тикшесь оймавты нурсема мородо вадрясто.

    Тонавтыцясь: Толковинк, кода максозь валтнэстэ теевсть валрисьметне?.Мезе эряви мельсэ кирдемс?

    Тонавтницясь: Штобу теемс валрисьметь, эряви мельсэ кирдемс кона     валось полавтневи. Сестэ сонзэ путсынек эрявикс формасо.

   5-це кармавтомась.(3мин.) Максозь валтнэнь явинк курова схематнень коряс. (Важодемась тееви интерактивной доска лангсо 7-це слайдась) 

                                 
ушодокшномс, кирьгапарь, эряза, вирьсэ, паморькстэме, штатол, ашола, ведьга, куракш, иневедь, тештевтеме, ожолгадсь.

  Тонавтыцясь:    Валонь пелькстнэ элякадсть

                                Кужонть келес весе срадсть.

                                Ветядо прянк тынь ёжовсто,

                                Пурнынк сынст седе куроксто.

   6-це кармавтомась Суффикстнэнь вельде тееде од валт, сёрмадынк сынст.(2 минутат)          (8-це слайдась)

Ве, а, эно                                                                               -в

Сур, што,пек                                                       -лгад-о-мс

Пиже                                                                              -кс

Ниле                                                        -нза-мс

Паро                                                                                  -нза-мс

Моро                                                  -ыця/-иця

Ловномс                                                                   -сте

Тикше                                                           -ма

Налксемс                                                                                     -зь

    Тонавтыцясь: Весе максозь валтнэ суффикс вельде теить од валт?

    Тонавтницясь: Аволь весе кортамо пельксэнь валтнэстэ суффикс вельде теевить од смусть марто валт. Сынст ютксо  созтнэ, частицатне, валмельгакстнэ…

    7-це кармавтомась. Кель-валонь кастомга важодема. Картинань коряс арсемс апокш ёвтнема, сёрмадомс тетрадьс, мейле кавто-колмо тонавтницят ловносызь эсь арсевксэст марямга.          ( 5 минутат)                          (9-це слайдась)

   III. Оймсема шкасто. (10 мин.)

   Тонавтыцясь:   Седеем оштё эзь витевть.

                                Кармавтомат прясон велить.                                            

                               Уш пек  покш мелем содамс  

                               Эйстэнк кие седе  кол.

                               Ловнан тыненк мон саевкст

                               Содынк, киде, мезде кортамось?

    - Кезэрень шкане ставкстнэ теевильть- анокставильть эсь кедьсэ, ульнесть пек мазыйть., явовильть лия раськенсетнеде.А стяко лия ёнксонь ломантне, конат яксесть мокшэрзянь масторга, ледстнемасост сёрмадсть:                         « Мокшэрзянь тейтерь-аванть васня марясак, мейле несак.»  (9-це слайдась) 

    Тонавтницясь: Кортамось моли мокшэрзянь оршамотнеде. Алкукскак. сынь пек мазыйть. Весе оршамопелесь ульнесь пек мазыйстэ викшнезь: якстере, раужо, ожо, сэнь ды пиже тюсонь пона суресэ.Вельть мазыельть эрзянь прясюлмавкстнэ, икельга пацятне, пулайтне. Теде башка . минек аватне пек вечкильть эрьгеть, сюлгамот, пилекст, суркст. Оршамонть мазылгавтомга понгавтнильть эзганзо сиянь ды пижень ярмакт, горниповт – гальдерькат, конат молемстэ нолдыть сиянь жойть.

     Каршо валонь максомадо мейле «Валдо тештень рисьме» леметь ало    10-це слайдасонть невтевить портреттнэ.

        1. Сон сёрмадызе эрзянь пакшатнень туртов васенце букваренть (1884- це иестэ). Чачсь Уфимской губерниянь Калейкина велесэ. Сон ульнесь эрзянь раськестэ васенце тонавтницякс Казанень инородческой семинариясо ,конань прядомадо мейле кадокшнызь тоско важодеме тонавтыцякс.

                       (Юртов А.Ф.)  (невтеви слайд)  

      2. Цярмун велесь сравтовсь а покш лейненть кувалт. Те веленть марто  кеместэ сюлмавозь те покш ломаненть эрямозо. Сон тонавтнесь Казанень инородческой семинариясонть, зярыя иеть важодсь тесэ тонавтыцякс. Сёрмадсь ды нолдась зярыя тонавтнема книгат, научной роботат, ламо мель явсь раскень шкинемань пурнамонтень, велетнева пурнась мазый оршамопельть, снимсинзе, анокстась альбом ды кучокшнынзе выставкав.

                        (М.Е.Евсевьев) (невтеви слайд)

    3. Те ломаненть искусствань чарькодицятне совавтызь модамасторонь вете весемеде содавикс ды ёроков ломантнень юткс. Сон эсь произведениянзо. кедьтеевксэнзэ кармась сёрмадстомо эсь раськень лемсэ. Эрьва кедьтеевкс-сэнзэ потсо чавить седейть.

                                  (С.Д.Нефёдов (Эрьзя))

      4.                      Мокша леенть велькссэ - сэнь менелесь,

                               Уить пельтне кие соды ков.

                               Вана Кочелаева покш велесь,

                         Вана кудось, козонь чачсь…..(Сычков) (невтеви слайда)

    5. 25 000 ламоксть морась те ломанесь сцена лангсо. Сонзэ лисеманть свал вастсь виев цяпамосо. Морамстонзо кунсолыцятне каштмольсть, мерят, эрьвась арсесь эсь арсеманзо ды стувтылизе морыцянть. Морась и эрзянь, и рузонь морот, арият. Эсест велесэ нейгак ледстнить, кода вайгелень вийсэнзэ, васоло аштезь, мадстнекшнесь суликавтомо лампань тол.

                              (И.М.Яушев) (невтеви слайд)

   6. Минек масторсо лемезэ теевсь ёвксонь лемекс. Сонзэ морамодо мейле пельсстувтовозь моротнеяк одов теевильть мельстуицякс. Вейкеяк лия морыця сеть шкатнестэ эзь пелькставо мартонзо – истя покшоль сонензэ ломантнень вечкемаст.

                             (Л.Русланова). (невтеви слайд)

  7. Лиянь ёнов а молиця , килангов шождасто кепедевиця те авась ютась зняро  эрзянь велеть, морсесь зняро школасо, клубсо, маряви,  а содыцянзояк арасельть. Весемеде покш бажамозо ульнесь- морамс эсензэ ладсевть моротнень ды каземс тень вельде ломантненень мельспаро.

                (С.М.Люлякина)  (невтеви слайд) Нолдави састыне фонограмма сказительницанть ловноманзо марто.

       Ловновить саевкст эсь Отяжбуень содавикс ломантнеде( 11-це слайдасонть портреттнэ истя жо невтевить  каршо валонть максомадо мейле).

      1.Те ломанесь чачсь минек Отяжбуень эрзянь велесэ.Сон эйкакшпингестэ саезь  пек вечксь кунсоломо ёвкст, эрзянь морот, кезэрень шкадо ёвтнематнень. Сёрмадсь поэма, конань эйсэ весе вийсэ гайгезевсь эрзянь келесь, конань мазычизэ пиземечирькень тюссо цитни эрьва валсто. Те произведениянть кис сонзэ чумондызь ды пекстызь тюрьмас. Аштесь тосо 20 иеть.

                                    (Я.Я.Кулдуркаев. «Эрьмезь» поэманть авторозо)

    2.                              Тосо, косто Штырма леесь

                                     Саи сиянь жой ведензэ.

                                     Тува сравтовсь эрзянь велесь

                                     Кулязбуе мерить тензэ.

     Ёвтынк стихотворенисто саевксэнть авторонзо, кона чачсь те велесэнть.  Сон а вешни произведениянь геройтнень- сынь эрить ютксонок. Сон прозаик, юморист- сатирик, паро журналист.

                              (П.А.Ключагин)

    3. Сон чачсь минек тиринь велесэ. Школадо мейле прядсь Краснослободскоень технической училища. Армиясо служамодо мейле кармась тонавтнеме Н.П.Огарёв лемсэ МГУ - со велень хозяйствань механизациянь факультетсэ. Вузонть прядомадо мейле  кадызь важодеме теске тонавтыцякс.   Ульнесь кочказь велень хозяйствань механизациянь ды электрофикациянь факультетэнь деканокс. Сёрмадсь зярыя научной  роботат. Неень шкане вети покш  важодема  минек Республикань тевтнесэ.  

                               (В.Н.Конаков)  

    4. Сон  чачома ёнксонь коряс Пилезьвелень ( с.Пилесево). Прядсь  Н.П.Огарёвонь лемсэ университет, заочна аспирантура НИИЯЛИЭ, экономист, экономикань наукань кандидат. 1995 иестэ саезь РМ парочинь Фондонь  прявт.  

                                 (Н.В.Петрушкин )

   5. Те мазый тейтерьавась чачсь  Таразбуе эрзянь велесэ. Сон морыця. Морось сонзэ туртов – те эрямонь тансть, ормаменькс, кона кенярксов шкасто кецявты, стака шкасто оймавты. Сон морси «Келу» ансамблясонть. Лиссть сонзэ башка дисксэ моронзо.

                                (А.Атласова)    Састо нолдави морыцянть морамозо.

            Тонавтыцясь: Эйкакшт , штобу седе ламо содамс минек раськень содавикс ломантнеде, ютко шкасто ловнодо выставкас пурназь книгатнень.        

             Арседе грамматикань задачатнень, ёжов кевкстематнень лангсо.

• Муинк се прилагательноенть , кона мекевланг ловномсто велявты рузонь предлогокс. (Од-до).
•  Мезе ломанесь неи конязь сельмсэ?(он)
•  Кодамо кевесь ведьсэ? (начко)
• Тон дым он, дыминь Тонь марто. Ламо ли эйстэнек?(кавонек)
• Озясть глаголонть теинк нармунекс. (саемс ь знаконть)
• Мезе эряви теемс сядо валонть велявтомстокармавтома наклонениянь глагокс? (С мельга путомс т согласной - сдядо)

            IV. Уроксо ютазенть вейсэндямось.

              Тонавтыцясь:         Нама, тынь прыде ве мельс,

                                                 Ёвтасынк ней апак пельть.

                                                 Кода лемезэ те кужонть,

                                                 Косо валтнэ секе тев

                                                 Эрьва кодат теить тевть.

     Тонавтницятне вейсэ: МОРФОЛОГИЯ.

     Тонавтыцясь: Виде, эйкакшт. Мезе тонавты грамматикань те пельксэсь?

     1-це тонавтницясь:  Морфологиясь – те валонь полавтнемадо, формань теемадо тонавтома.

     Тонавтыцясь: Виде. Оштё мезе ёвтатадо?

     2-це тонавтницясь: Морфологиясь ванны грамматикань смусттнень, кода ды мейсэ сынь невтевить.

     3-це тонавтницясь: Полавтневи – а полавтневи валось, бути полавтневи, кода  (падежга, лицява, числава, шкава).Кодат улить кортамо пелькст ды кодат сынст явовтыця ёнксост.

    Тонавтыцясь:Эйкакшт, кодамо грамматикань категория эрзянь кельсэ арась?

    4-це тонавтницясь: Эрзянь  ды лия финно- угрань раськень кельтнесэ арась родонь категориясь.

   Тонавтыцясь: Зняро ,эно, весемезэ кортамо пелькстнэде?

   5-це тонавтницясь: Кортамо пелькстнэде кемень: 6 ськамочинь кортамо пелькст ды 4 лездыця .

  Тонавтыцясь: Мезе невтить ськамочинь кортамо пелькстнэ?

  6-це тонавтницясь: Ськамочинь кортамо пелькстнэ лемдить предмет, уликсчи ды тешксчи, ламочи, тевтеема ды аштема – улемачи или ансяк невтить сынст. Неть валтнэнь улить лексикань ды грамматикань эсест смустест. Сынь эрсить валрисьмень пельксэкс.

  Тонавтыцясь: Ёвтынк неть кортамо пелькстнэнь         

  7-це тонавтницясь: Те кужонтень кандовить истят кортамо пелькст: существительноесь, прилагательноесь. местоимениясь. числительноесь, глаголось, наречиясь.

  Тонавтыцясь: А деепричастиянть ды причастиянть кодамо кужос кандсынк?

  8-це тонавтницясь: Деепричастиясь ды причастиясь- неть глаголонь формат. Причастиянть улить глаголонь ды прилагательноень ёнксонзо, а  

деепричастиянть-глаголонь ды наречиянь.

  Тонавтыцясь: Мезекс жо эрявить лездыця кортамо пелькстнэ?

    9-це тонавтницясь: Лездыця кортамо пелькстнэнь арась лемень максомань тевест.Но сынь сюлмить вейкест – вейкест марто кода валтнэнь, истя валрисьметненьгак,  панжить тюсост сеть смусттнень ды ёжомарямотнень , конатненень максыть лем ськамочинь кортамо пелькстнэ. Тей кандовить валмельгакстнэ. союзтнэ, частицатне.

   Тонавтыцясь: Мон эзинь маря   ёвтамсто междометиядонть?

   1-це тонавтницясь: Междометиятненьгак арась лемень максомань тевест. Сынь невтить ёжот, седей марямот.

   V. Уроконь цётамось

   Тонавтыцясь:         Вана  урокось шашты пес.

                                     Арсян парсте тенк оймсемс,

                                     Кизэнь перть тенк вийть пурнамс ,

                                     Касомс превейкс ды шумбракс.

                                     Сёксня одс  вастовтано,

                                     Превть таштамо ушодтано.

                                    «Морфологиянть» ледстяснык,

                                     Эрьва уроксо тевс нолдаснык.

                                     Ютазенть мельсэ  кирдеде,

                                     Икелев апак пельть моледе.

                                     Лия пельксэв вети кись,

                                     Конанень мерить «Синтаксис»!

    Вадрясто важодеманк кис весеменень максан паро питне.

     VI.Кудонь тевесь. Кармавтомась: Морфология валонть  эрьва буквастонть  сёрмадомс эрьва кодамо кортамо пельксэнь валт . Невтемга: М – мода, мон, мазый  морамс, марявиксстэ, моразь…

                        Урокось прядовсь. Вастовомазонок!