Конспект урока татарского языка на тему "Ө хәрефе" во 2 классе (татарская группа).
план-конспект урока по теме

Кадыйрова Айгөл Фәһим кызы татар теле һәм әдәбият укытучы, Әлмәт шәһәре 2 нче лицее

Тема: Ө хәрефе. (1 нче слайд)

Максат: 1. [ө] авазының әйтелешенә һәм язылышына өйрәтү.

2. Ө хәрефләре кергән сүзләрне уку һәм язу күнекмәләрен камилләштерү.

3. Активлык хисен тәрбияләү. (2 нче слайд)

Җиһазлау: компьютер, карточкалар, перфокарталар.

Дәрес барышы.

I. Оештыру.

1. Исәнләшү.

2. Һава торышы.

— Бүген көн матурмы?

— Бүген кояш бармы?

— Бүген җил бармы?

— Бүген яңгыр явамы? (3 нче слайд)

• Ә хәзер, балалар, күрсәтегез миңа:

— Җил ничек исә?

— Кояш ничек чыга?

— Яңгыр ничек ява?

— Укучылар ничек матур итеп утыралар?

II. Актуальләштерү.

1. [а], [о] авазларының әйтелешен, язылышын һәм [йө], [йо] кушылмаларының язылышын кабатлау. (4 нче слайд)

Төлке шариклар тоткан. Шарикларда түбәндәге авазлар языла. Алар аша үткән материал кабатланыла. (5 нче слайд)

- Татар сүзләрендә беренче һәм бүгенге көндә икенче иҗектә дә [а] авазы [о] авазына якын әйтелә.

- [о] авазы татар телендә тар әйтелә. О хәрефе сүзнең беренче иҗегендә генә языла. Рус сүзләрендә [о] авазы киң әйтелә. О хәрефе төрле иҗекләрдә языла. Мәсәлән, кино.

- [йө], [йо] кушылмалары сүз башында гына языла. [йо] – калын сүзләрдә, [йө] – нечкә сүзләрдә языла һәм әйтелә.

2. Карточкалар белән эшләү яки сүзләрне слайдта күрсәтеп бару. Ә укучылар сүзләрне кычкырып укыйлар һәм карточкалар аша сүзләрнең авазларын күрсәтеп баралар. Мәсәлән, кош сүзен бер укучы кычкырып укый һәм [ о ] авазы язылган карточканы күрсәтергә тиеш була. 6 нчы слайдта түбәндәге сүзләр: матур, герой, кош, йөз, йолдыз.

III. Уку мәсьәләсен кую.

1. Дәреслек белән эшләү.

- Укучылар, 49 нчы битне ачыйк. 68 нче күнегүнең биреме белән танышыйк. Сүзләрне һәм иҗекләрне дөрес итеп укыгыз диелгән.

- Бүгенге дәреснең темасын (уку мәсьәләсен) билгеләгез. (Ө хәрефе кергән сүзләрнең язылышын өйрәнү.) (7 нче слайд)

- Димәк, [ө] авазы кергән сүзләр ничек әйтелүен һәм язылуын бүгенге дәрестә өйрәнербез.

Дәфтәрләргә число, көн, тема язу (8 нче слайд)

IV. Ял минуты. (9 нчы слайд)

Күп утырдым, аркам арыды (басалар),

Аягым, кулым талды(урында атлыйлар).

Гәүдәм оеп, катып калды (уңга, сулга иеләләр),

Билем бөгелмәс булды (алга, артка иеләләр).

V. Уку мәсьәләсен чишү.

1. 71 нче күнегү, 51 нче бит. Кагыйдә белән бәйләп, [ө] авазының язылышын һәм әйтелешен өйрәнү. (10 нчы слайд)

2. Перфокарталар белән эшләү. “Ачык тәрәзәләр” дип атала. Перфокарталар укучыларга таратыла. Астына чиста дәфтәр бите куела. Укучы кисеп алынган тәрәзә эченә бирелгән сүзләрнең транскрипциясен яза. Үрнәге 11 нче слайдта тәкъдим ителә.

3. 69 нчы күнегү, 49 нчы бит. Иң беренче, сүзлек өстендә эш. (12 нче слайд)

Көрәк – лопата, көрәк тоткан – держать лопату, җир казый – копает землю, тырма – грабля, җир тырмалый – граблят землю, яфраклар җыялар – собирают листья, Рөстәм, Зөлфәт, Гөлназ һәм Гөлнур.

Бирелгән сүзләрдән рәсем буенча җөмләләр төзү. (13 нче слайд)

VI. Модельләштерү. 14 нче слайдта күрсәтелә.

[ө] авазының язылышын һәм әйтелешен күрсәтү.

VII.Рефлексив кабатлау. Үзбәя. 15 нче слайд.

- Нәрсә эшләдек? Ничек эшләдек? (Ө хәрефенең әйтелешен һәм язылышын ныгыттык.)

Нәтиҗәләр: Ө хәрефе о хәрефе кебек сүзнең беренче иҗегендә языла.

VIII. Өй эше. Сайлап алу. 16 нчы слайд.

1. 74 нче күнегү, 53 нче бит. Бирелгән сүзләр белән рәсем буенча “Көз” темасына хикәя төзү.

2. Фонетик анализ: йөзек, көзге.