И.И.Шишкинонь "Розь" ("Рожь") картинанц коряс сочинения.
план-конспект урока на тему

И. И. ШИШКИНОНЬ «РОЗЬ» («РОЖЬ») КАРТИНАНЦ КОРЯС СОЧИНЕНИЯ

                                                Аноклазе:  Зубово – Полянскяй муниципальнай  

                                                райононь МБОУ «Мордовско-Полянская СОШ»

                                                мокшень кялень и литературань тонафтысь

                                                          Людмила Михайловна Моисеевась    

Цельхне: - максомс иттненди содамошит И.И. шишкинонь эряфонц и

                    творчестванц колга;

                 - тонафтомс шабатнень картинать содержаниянц панжема,

                    цебярьшинц няема;

                 - касфтомс устнай и письменнай связнайста корхтамаснон

                   и кельгомаснон шачема масторти.

Урокть оформленияц: И.И.Шишкинонь картинань репродукциянза.

                         Урокть молемац:

1. Организационнай пялькссь.

1. Шумбракстомась.
2. Урокть теманц и цельхнень азомасна.

2. Основной пялькссь.

3. Анокламанди упражненият.

1. Лувость стихотворенияста пакшть. Лемдесть сонь. Мекольце валрисьмоти тиеда синтаксисонь разбор. Явф валхненди максода кизефкст.

Росне щафтозь тюжя щамснон,

Сюконязне синь люкайхть,

Прокс ни кадозь пиже лангснон,

Мярьгат, вели комсезь сайхть.

Розсь колхозонь – сельмот кайсесть,

Увнась, кода пиче вирсь.

Тюжять потмос розти вайсесь –

Сай колхозу мокшень стирь

                                                (И. Чумаков).

2.Лувость. Мусть прилагательнайхнень, азость разрядснон.

Од сёронь пулфть кядь нучксон кельксян,

Иднякс-од шачикс ктмордайне.

А менельсь ару-сенем вельхкссон,

И мяштьсон морось пайгокс гайняй.

Унай комбайназень мотороц,

Кораблькс уи паксять ланга,

Сюлмазе морозенди моронц;

 «Примака, Родинай, Монь эздон!

А тингса кеподсь сёронь панда.

Фкя сяка мяльне-валне кяльсон:

Тя казнесь тейть, мес касонь эльсот,

Мес васень аськолксть тиемс лездоть.

Инь мирнай тевс вий-эрьгя максоть:

Видян, нуян-урядан сёра…

Примак тя казнеть седи ваксстон!

Тонь идце парцень пандомс ёрай.    

                                                                                           (Н. Циликин)

               3. Сёрмадость. Текстть лемдесть. Азость существительнайхнень  склоненияснон и падежснон.

Маряк, паксять мазышиц васендакиге туста сёроса, мезсь и повонда минь сельминголенк тяза сашендомстонк. Сёрофтома паксясь – аф пакся, а сембоц-тяконяц шава мода, кодамкс сон улендсь сядонгольхнень, мзярс тяза изь шятя ломанць. Ломаньфтома паксясь кула. Целинась тёжятть киза лядондсь шава степкс, а мзярда тяза сась ломанць эсь содамошинзон и сокайнь-видинь асувонц мархта, сон и кармась лемневома сёронь касфни крайкс.

                                                                       (И. Кудашкин)

4. Морафтость текстть. Васенда сёрмадость аф определённай  склоненияса ащи существительнайхнень, а меле – определённай склоненияса.

        Паксянь культуратне максыхть ярхцамбяль ломанти, жувататненди и сырья минь промышленностеньконди.

Паксянь культуратне эряйхть зерновойхть, кормовойхть, техническяйхть.

        Сёронь касыксне: тозерсь, розсь, кукурузась, сурось, пинемсь, снавсь и лият. Ня культурнай растениятнень эзда ломаттне аноклакшнихть эстейст ярхцамбяль.

        Кормовой культуратнень эзда аноклакшневи корма жувататненди. Кормовой культуратне: якстеряпссь, викась, клеверсь, лугань и вирень тишетне.

        Техническяй растениятне: шиньжаромась, сахарнай якстеряпссь, иляназсь, модамарьсь, хлопчатниксь. Минь промышленностеньке тии шиньжаромаста вай, сахарнай якстеряпсста – сахар, модамарьста – крахмал и спирт, иляназста и хлопчатникста – котфт.

(Е. Ковалёвань коряс)

2. ХУДОЖНИКТЬ И СОНЬ КАРТИНАНЗОН КОЛГА АЗОНДОМАСЬ

И.И. Шишкин шачсь 25 январьста 1832 кизоня Елабугаса. Нинге ёмланяста Ванясь кельгозе рисовандаманц. Ванять аляц ёрась, штоба Ваня улель тонафнеф и максозе васенда тонафнема училищав, а 1844 кизоня ускозе Казанскяй гимназияв.

1852 кизоня Ваня тусь Москуву, кармась тонафнема художественнай училищаса. Тя пингть Ванясь содась тяфтама художниконь мархта: В.Г. Перовонь, И.М. Прянишниковонь.

И.Шишкин 1860 кизоти самс тонафнесь Петербургса художественнай Академияса. Ингольдень работац «Вид в окрестностях Петербурга» (1856).

1860 кизоня И. Шишкин казьфоль золотань медальса «Вид на острове Валааме» картинанц инкса.

И.И. Шишкин лама пинге эрясь Германияса, Францияса. Россияв мрдась 1865 кизоня. Академиконь лем Шишкинонди макссть «Вид в окрестностях Дюссельдорфа» (1864) картинанц инкса. Тяда меле сон эряй Петербургса. «Лесная глушь» (1872) картинанц инкса Шишкин получась профессоронь лем.

70-це кизотнень Шишкин перьфпяльть содаманцты шарфты башка мяль. 1878 кизоня YI Передвижной выставкаса ульсь няфтьф «Рожь» картинац. Вага мезе сёрмады тя картинать колга В.В. Стасов. «Минь пейзажистоньке няфтсть пяк лама цебярь картина. Васенце вастть занцесы И.И. Шишкинонь «Розь» картинац. Тя розсь цебярьдонга цебярь, зрьнянь тюсса».

Художникть инь содавикс картинац «Утро в сосновом бору» (1889). Тя картинаса няфтевихть вирень эряйхне: офта тядясь эсь лефксонзон мархта. Тя васттненди нинге ашезь шятне ломанень пильге.

Кулось художниксь 20 мартста 1898 кизоня.

3. КАРТИНАТЬ КОРЯС КОРХТАМА

- Инголент рузонь содаф художникть – пейзажистть И.И.Шишкинонь «Розь» («Рожь») картинастонза репродукциясь. Художниксь пяк кельгозе природать, эсь родинанц, и тя кельгомать няфтезе эсь картинасонза.

- Шабат, варжакстода картинать ланг и азость мезе тинь няйхтяда?

 (Картинать лангса няфтеви розень пакся, тоса касыхть  пичет, паксять кучкава моли ки).

- Кода тинь арьсетяда, курок или аф кармайхть урядамонза паксять? (Паксять курок урядасазь, сяс мес розсь кенерсь. Розсь сери и туста. Сон алтюжянь тюсса. Мъзярда вармась якай роснень ёткова, то сембе ширде маряви кенерьф сёронь таньф и шужярень шиненя).

- Азондость, кода урядави сёрось. Кода и мезьса урятсевсь сёрось инголи и тяни? (Шабатне азондсазь тянь семботь).

- Ваность нинге весть картинать. Паксяса няйхтяда сери пичет. Кода арьсетяда, мес художниксь няфтезень синь. (Пичетне пяк мазыхть. Синь прокс ёфксонь богатырьхть ащихть паксять кучкаса).

- Азость, а пичетне фкат или аф? (Фкя пичесь седа сери, а омбоцесь алняня).

- Мес аф фкакс няфтьфт пичетне? (Тя тиевсь сянкса, штоба шарьхкодеволь, кода келиста няфтеви паксясь. Маластонь шуфттне няфтевихть оцюста, а конат ащихть фталдонь планца, сяда ёмланяста).

- Мезе нинге няйхтяда тя картинаса? (Ингольдень планца пиже луга, коса касыхть панчфт: колокольчик, василек (розьбанчф), лугань клевер. Паксять кучкава моли ки, кона шарфты кержи шири. Кить ланга молихть ават. Синь няевихть аньцек прясна. Фкять пряса якстерь руця.

- Шабат, содави или аф картинать эзда, кодама ушесь? (Содави. Тяса няфтеви кизонь мани ши).

- Мезень коряс тя няеви? (Картинаса минь няйхтяма мани ши, менельсь валда-сенем. И.И. Шишкин картинаса нолдась тяфтама тюст: акша, тюжя, якстерь, сенем).

- Кодама тюст няфтевихть фталда планца? (Фталда планца няфтеви шобдаза тюссь.

-Кода тинь арьсетяда, кодама кожфсь? (Кожфсь пси, опана. Улема, кармай пизем. Мзярда пиземда меле лиси шись, паксясь цифторгоды ёмла–ёмла тяштеняса. Паксясь шачи одкс, кармай лия тюсса).

4.  ВАЛОНЬ И СТИЛЕНЬ КОРЯС ТЕВСЬ

1. Кочкада эпитетт максф валхненди:

розсь – жойняй, кенерьф, коське, сери, туста; пичесь – мазы, вии, виде, сери;

кожфсь – пси, опана, сетьме.

2. Лувостть текстть. Азость, мезьса урятсезь розть инголи и урятсесазь тяни.

Ульсь пинге (и аф пяк кунароль), мзярда сёронь урядамать перьф урондость тарвазса, грабляса, цянгса, кядь вельдень сортировка-веелкань шарфтозь…

Тяни мастерскойхнень маласа няеви вастс и фкя рядняс тарксефт кенерьф пяштень тюсонди шарфты комбайнатне. Ширде ванозь синь кабаконашка нармонь лацот, кит келептезь пацяснон-жаткаснон и анокт кеподемс паксянь пефтома менельти.

Тинголангу ардыхть сёронь уски машинатне, тинголангса покодихть зёрнань аропты агрегаттне.

(И. Кудашкин)

3. Лувость выразительнайста. Мезень колга корхтави текстса? Сёрмадость лия шрифтса няфтьф валзюлмотнень, мусть главнай валть, алганза таргада китькскя.

Сянгяря вирти молемс келемсть козя сёротне. Волнань-волнань комболды золотакс ащи розсь. Пижелготкшни од пинемсь, акшелготкшни панжи люкшясь. Кить эзда аф ичкози кяшсь кудрявай снавсь.

Розть вельхксса морайхть жаворонкат, а оржа паця карьхциганць ваны вярде. Няйсы сон туста розть потмоста юватькшни кочколдыть, няйсы и паксянь шеерть.

5. И. И. ШИШКИНОНЬ «РОЗЬ» КАРТИНАНЦ КОРЯС СОЧИНЕНИЯ

- Шабат, ваность нинге весть картинать и арьсесаськ планть.

ПЛАНЦЬ

1. И.И. Шишкин – рузонь содавикс художник, вирень и перьфпялень пейзажонь няфти.

2. Розень пакся.

3. Пичесь – ёфксонь богатырь.

4. Картинать тюсонза.

5. Мяльхне, конат шачендыхть картинать ваномста.

Кепотьксонди сочинениясь.

И.И. Шишкин – рузонь содавикс художник, вирень и перьфпялень пейзажонь няфти. Минь инголенк сонь «Розь» картинац, кона ульсь рисовандаф 1878 кизоня. Минь няйхтяма сетьме пейзаж: пакся, пичет, ки. Сембось няфтеви сединь пети тюсса.

Сонць ушесь сетьме. Аньцек кой-коста кулевихть аф фкя кялень нармоттнень вайгяльсна, конат прашендыхть марняс шовордафста и тиенкшнихть ару и фкя кабаконашка лихтибрянь циньф. Пиже тюсне, паксянь и перьфпяльге таргави луганянь шалхконь котьфти шиненятне станя жа шоворькшнихть марс и съняра вийнь касфты эрьгя эсост – сяконь ватт, ваймонь ламос тарксемда меле кеподят и лиезь туят розь паксять вельхкска шить каршес. И сявок бта аф сонць сни, а жаворонкатне сиянь цинзерня вельде кепсесазь. Шити кенертьфт росневок. Али, шять, тяфтамкс тиендьсыне синь пряваст ласьконди варманясь, конань ала росне комсихть сяка тев, бта сюконякшнихть шити и цютькада кулевиста жойнязь кевордихть тюжаза волнат.

Монь койсон, павазу ся ломанць, кона илештьф ожат трудендась тяфтама паксяса сединь токай мелодиятнень коряс!

Паксять кучкаса касыхть пичет. Синь пижедонга пиже тюссот. Пичетне пяк мазыхть. Синь прокс ёфксонь богатырьхть ащихть паксять кучкаса. Фкя пичесь сяда сери, а омбоцесь алняня.

Ингольдень планца пиже луга, коса касыхть панчфт: колокольчик, василек (розьбанчф), лугань клевер. Паксять кучкава моли ки, кона шарфты кержи шири. Кить ланга молихть ават. Синь няевихть аньцек прясна. Фкять пряса якстерь руця.

Ширде ванозь розень паксясь шоворькшни сери и сенем менельть мархта, но сяка пингть няеви, што ушесь учи вии пизем.

И.И. Шишкин пяк цебярьста няфтезе перьфпяльть, сонь мазышинц, козяшинц, кельгомать шачема модати, шачема ширти.

6. Сочинениять планть коряс азондомац.

III. Итогсь

 - Вов знакомондаде И.И. Шишкинонь творчестванц мархта, ваноськ сонь лама картинанзон. «Розь» картинастонза репродукциять  коряс тиеме заданият, конат лездыхть тейнт сочинениянь сермадомаста.

   - Тусь ли мялезонт картинась?

   - Кодама потмоёжет эвондасть сонь ваномстонза?

- Мон арьсян, што тинь машттада азондома эсь мялентень сочинениять коряс

IV. Кудонь тевсь

Сай урокти сермадомс тя картинать коряс сочинения.  

V. Отметкань путомась.