Шүлүк дугайында билиг (7-ги класска чогаал теориязын ѳѳредириниӊ кичээли)
план-конспект урока (7 класс) на тему

Темазы :     Шүлүк дугайында билиг (7-ги класска  чогаал теориязын ѳѳредириниӊ кичээли)

Сорулгалары: 1)Ѳѳреникчилерге шүлүк тургузуунуӊ онзагайын   ѳѳредири.

2)хайгааракчы, шинчилекчи шынарларны хевирлээри, шүлүктерни дамчыштыр тѳрээн дылын үнелээри болгаш орус дылга сонуургалын бедидери.

                 3) аас болгаш бижимел чугаазын сайзырадыры

Дерилгези:  шүлүк номнары, проектор, Power Point программага тургускан слайдылар, карточкалар, сюжеттиг чурук « Часкы чурумал».

Ажыглаан методтар: чогаадыкчы хамаарылганыӊ методу, дилеп тыварыныӊ, шинчилел методтары.

Ажыл-чорудулганың хевирлери: 

Истеп-тывар ажыл -   салдынган айтырыгларга  харыылар дилеп тывар

Аянныг номчулга

Уругларның  бот ажылдары

Шинчилел – деңнелге аргазын ажыглап, сайгарылгалар кылыры

    Кичээлдиң планы:

I.Организастыг кезээ.

II.Онаалга хыналдазы.Мотивация: Ю.Кюнзегештиӊ «Арат оглу ужуп үнген» деп шүлүүнден уран-чечен аргаларны (эпитет, деӊнелге, метафора) илередип сайгарганын хынаар.

III.  Чаа тема тайылбыры:

        1. Киирилде сѳс.

         2. Башкыныӊ тайылбыры

        3.Словарь-биле ажыл.

IV.Быжыглаашкын:

        1.Ном-биле ажыл.

        2.Коллективтиг сайгарылга.

        3. Бот-тускайлаӊ  сайгарылгалар .

        4.  Чурук-биле ажыл «Часкы чурумал»

V.Онаалга бээри: дыӊнадыг-сайгарылга «Бойдус темазынга хамаарышкан шүлүктерниӊ тургузуу».

VI.Рефлексия.Демдектер салыры.

Кичээлдин чорудуу:

I.Организастыг кезээ.

- Экии! Бо кичээлдиң канчаар эртери, кандыг түңнелдиг доостуру -  бистиң аравыста харылзаавыстан, бот-боттарывысты кайы хире билип, деткижеривистен дыка хамааржыр.

II.Онаалга хыналдазы.Мотивация: Ю.Кюнзегештиӊ «Арат оглу ужуп үнген» деп шүлүүнден уран-чечен аргаларны (эпитет, деӊнелге, метафора) илередип сайгарганын хынаар. Ук чогаалдыӊ жанрын илеретпишаан, шүлүк деп темага келгенин сагындырар

III.  Чаа теманыӊ тайылбыры:

1.Башкыныӊ киирилде сѳзү: Бо үнүп келген 2015 чыл Россия Федерациязында Чогаал чылы кылдыр чарлаттынган болгай, уруглар. Ынчангаш бис бо чогаалывыста чүгле тыва эвес, орус чогаалчыларныӊ шүлүктеринге даянып ажылдаар бис.

А.Үержааныӊ «Ие дылым» деп шүлүүн аянныг номчааш,уруглардан айтырар:

-Силерге ам чаа чүнү чугаалап бердим, уруглар?

-Шүлүк чогаалы деп канчап билип алдыӊар?

-Анаа чугаадан ылгалы кандыг деп бодаар силер?- дээн чижектиг киирилде айтырыглар-биле чоорту чаа теманыӊ материалынче кирер бис.

2. Башкыныӊ тайылбыры  (слайдыга кѳргүзер):

 -Ынчангаш бо кичээливистиӊ темазы  «Шүлүк дугайында билиг» (кыдырааштарынга ай-хүнүн, темазын  бижидер).  Чогаалда  3 аймак бар: калбак чогаал ( проза), шүлүк база  шии  чогаалдары ( слайдыда схеманыӊ дузазы-биле тайылбырны чорудар)

Шүлүк дээрге тускай хемчээлдиг, аянныг кылдыр организастаттынган системалыг чугаа болур. Ында кижиниӊ сагыш-сеткилиниӊ илерээшкинин (муӊгаралын, хѳлзээшкинин, ѳѳрүшкүзүн…) тодаргай чырыткан болур. Ооӊ ѳске чогаалдардан ылгалы болза ол чугааны тус-тус одуругларга таарыштыр аяннаштырганы болгаш одуругларныӊ хемчээлиниӊ деӊи болур. Шүлүк чогаалында одуруг, строфа, стопа, аллитерация база рифма деп билиишкиннер бар.

Строфа- шүлүкте утка талазы-биле бѳлүглешкен одуруглар, ырга куплет дээр Тыва шүлүк чогаалында ийи-ийи,  дѳрт-дѳрт, алды-алды одуруглар хѳй бооп турар. Чижээ,  дараазында тыва, орус дылдар дугайында аӊгы-аӊгы авторларныӊ шүлүктериниӊ одуругларын кѳрүптээлиӊер.

 2 одуруглуг  шүлүк:

Орус дылды номчу, бижип, сѳглээр кылдыр билир болза,

Ораннарга салгын ышкаш, хостуг ужар эзир боор сен.

( М.Кенин-Лопсан «Орус дылды ѳѳрениӊер»)

4 одуруглуг:

Орус дылда кожаӊ ырга ынаам аажок,

Ол дыл дээрге чуртталгамныӊ чамдыы дээр мен.

Бижип, номчуп, сактып, дыӊнап боданганым,

Билип алган орус дылым үнелээр мен.

(Игорь Иргит «Тыва дылым»)

8 одуруглуг:

Кандыг-даа дыл меӊээ дѳмей,

Кандыызын-даа хүндүлээр мен.

Ынчалза-даа тѳрээн дылым-

Ыдыкшылдыг кызыл тыным,

Ийи харлыг чажымдан-на

Ием меӊээ айтып берген

Игил ыры сагындырар

Ие дылым ындыг кончуг.

Аллитерация- шүлүкте одуругларныӊ эге аяннажылгазы.

Аллитерация 5 аӊгы хевирлиг болур: долу, кожаланчак, аралашкак, кажааланчак, саарзык. Ам дараазында чижектерден аллитерацияныӊ хевирлерин кѳрүптээлиӊер.

1)Долу аллитерация:

Орай кежээ Нева хемниӊ эриин дургаар

Ооргамда сумкам чүктээш, чанып ор мен.

Орус сѳстүӊ чырыткызы маӊаа база

Орай кежээ чораан боор деп бодап келдим

                        (М.Кенин-Лопсан)

2)Кожаланчак аллитерация:

Орус дылда кожаӊ ырга ынаам аажок,

Ол дыл дээрге чуртталгамныӊ чамдыы дээр мен.

Бижип, номчуп, сактып, дыӊнап боданганым,

Билип алган орус дылым үнелээр мен.

(Игорь Иргит «Тыва дылым»)

3)кажааланчак аллитерация:

Ынак-тыр мен…ѳртемчейде

Чүрээмге чоок, эргим тѳрел

Чүү-ле бар-дыр, сувуразын

Ырлап чор мен-ынак-тыр мен

( А.Үержаа «Ынак-тыр мен»)

4)Аралашкак аллитерация:

К ……………

А……………

К…………..

А…………….

5)Саарзык аллитерация:

К……………….

К……………….

Ч……………..

Х………………..

Рифма-шулукте сөөлгү аяннажылга.Сѳѳлгү аяннажылга орус дылда шыӊгыы сагыттынып турар, а тыва дылда колдуунда эге аяннажылга бар. Ындыг-даа болза рифма сагыттынып турар шүлүктер база бар. Чижээ,Мария Күжүгеттиӊ «Ѳттүнчек шүлүүн» кѳрүптээлиӊер:

Салгын-сырын сыг-сыг,

Сайлык кушкаш сыйт-сыйт,

Торлаалар торр-торр,

Торгажыктар ток-ток.

Каарганнар карк-карк,

Кээргеннер кээрк-кээрк,

Хаважыктар хар-хар,

Хаванчыгаш хрык-хрык.

3.Словарь-биле ажыл ( слайдыдан кѳргүзүп тайылбырлавышаан, уругларга бижидер):

        Лирика-шүлүк чогаалы

Строфа- шүлүкте утка талазы-биле бѳлүглешкен одуруглар, ырга куплет дээр

Аллитерация- шүлүкте одуругларныӊ эге аяннажылгазы

Рифма- шүлүкте одуругларныӊ тѳнчү аяннажылгазы

Стопа- строфада одуругларныӊ слогтар аайы-биле деӊ болуру

IV. Быжыглаашкын

1.Ном-биле ажыл: 144-кү арында «Шүлүк дугайында билиг» деп эгени номчааш,кол чүүлдерни ,билиглерни тодарадып сайгарары.

2.Коллективтиг сайгарылга   А.Үержааның «Ие дылым» деп шүлүүнге  аас-биле   сайгарылганы чорудар.

3.Бот-тускайлаӊ сайгарылгалар.  Шүлүк номнарын, шүлүктер бижээн карточкаларны ѳѳреникчилерге үлеп бергеш, шүлүктүң кол утказын, тургузуунуӊ онзагайларын  дараазында чурум-биле сайгартыр (слайд-биле ажыл):

            1)Шүлүктүң  кол темазы,  идеязы.

        2)Каш строфадан тургустунганыл? Строфаларда одуруглар саны.

3) Одуругларда слогтар саны.

        4)Строфа бурузунун эге аяннажылгазы, ооӊ хевирлери (долу, кожаланчак, аралашкак, кажааданчак, саарзык).

        5)Рифма (сѳѳлгү аяннажылга) бар, чогун тодарадыры

        6) Чурумалдыг аргаларныӊ ажыглалы.

        4) Чурук-биле ажыл «Часкы чурумал»  Чурукту кѳргеш, 1-2 строфалыг шүлүк чогааттырар.

Самбырага бижиир

1. Чуве аттары кылдыр адаптар:час, хүн караа, дамырак, куштар

2. Кылыг сѳстери-биле илередир:

Эрип чыдар,агып чыдар, чылып келген, ужуп турар.

Слайд 10.

Шулук чогаадыптывыс, уруглар. Ону, шак бо мындыг хевирлиг чогаалды, Синквейн деп адаар. Бо сѳс фр. cinquains, англ. Cinquain уктуг, очулдурарга 5 одуруглуг шүлүк хевири. Чогум-на угу – япон шүлүк чогаалы.

Ооң негелдези: 5 одуруг. 1-ги одуруг: чүве аттары, 2-ги одуруг: демдек аттары, 3-кү одуруг: кылыг сѳстери,4-кү одуруг – домак, 5-ки одуруг: түңнел чуве ады.

Найырал деп сѳске СИНКВЕЙН чогаадыр.

V.Онаалга: Дыннадыг-сайгарылга «Бойдус темазынга хамаарышкан шүлүктерниӊ тургузуу».

VI.Рефлексия. Демдектер салыры.

Ажыглаан литература:

1.Введение в литературоведение: Учеб. для филол. спец. ун-тов / Г. Н. Поспелов, П. А. Николаев, И. Ф. Волков и др.; Под ред. Г. Н. Поспелова. М., 1988.

2.Волков И. Ф. Теория литературы. М., 1995.

3.Тыва чогаалчыларныӊ шүлүктер номнары.

4.Оргу К.Х., Ойдан-оол Х.М.Тѳрээн чогаал:7-ги класска ѳѳредилге ному.-Кызыл:2005.

5.Үержаа А. Ынак-тыр мен: шүлүктер чыындызы.-Кызыл:ТНҮЧ,1997.

6.Хализев В. Е. Теория литературы. М., 1999.

Интернет  четкизинден:

1.Festival.1september/

2.school-collection edu.ru

Кичээлге бот-сайгарылга (самоанализ урока):

7-ги класска чогаал теориязынга хамаарышкан кичээлге хамаарыштыр шилип алган темам: «Шүлүк дугайында билиг».  Бо теманы шилип алган чылдагааным – ѳѳреникчилерге шүлүк теориязынга хамаарыштыр билиглерни чогумчалыг бээри.  Сорулгаларывыс: 1)Ѳѳреникчилерге шүлүк тургузуунуӊ онзагайын   ѳѳредири.

        2)хайгааракчы, шинчилекчи шынарларны хевирлээри, шүлүктерни дамчыштыр тѳрээн дылын үнелээри болгаш орус дылга сонуургалын бедидери.

         3) аас болгаш бижимел чугаазын сайзырадыры.

Ук сорулгаларны чедип алырда, янзы- бүрү технологияларны ( критиктиг боданыышкынныӊ технологиязы, мѳзү-бүдүш хевирлээриниӊ технологиязы…), методтарны  (чогаадыкчы хамаарылганыӊ методу, дилеп тыварыныӊ, шинчилел методтары), ажылдыӊ янзы-бүрү хевирлерин ( коллективтиг, бот-тускайлаӊ сайгарылгалар) ажыглаттынган. 2014 чыл- орус дыл чылы кылдыр чарлаттынган тѳлээде,  кол нургулайында  орус дылга тураскааткан шүлүктерни шилип алган мен. Шүлүктерни номчаан соонда орус дылдыӊ ажык-дузазыныӊ дугайында билигни база тайылбырлап бээри чугула. Кичээлдиӊ дерилгезинге  шүлүк номнарын, проектор, Power Point программага тургускан слайдылар, карточкалар,  « Часкы чурумал» деп сюжеттиг чурукту ажыглаан бис. Кичээлдиӊ түӊнелинде уруглар боттары шүлүктүӊ тургузуун сайгарарыныӊ эге билиглерин алган турар ужурлуг.