Урок "Ялгаксшинь темать панжемац В.И.Мишанинань "Пингонь ортат"повестьса"
план-конспект урока (7 класс)

Темась: Ялгаксшинь темать панжемац

                  «Пингонь ортат» повестьса.

Цельсь: -касфтомс иттнень кельгомаснон Родинати,

                    ванфтомаснон природати,

                   -кемокстамс тяфтама чувствать, кода ялгаксшись.

Оборудованиясь: В.И.Мишанинань портретоц, таблицась  

                                        валмуворкс мархта.

                          Урокть молемац:

I Оргмоментсь

    Ушедсаськ уроконьконь, кода и фалу, сюконятама природати, сяс мес сон шачфтомазь и трясамазь. Природась козя, мазы, мезенцка аф ужяльдьсы тейнек. Сембе минь ащетяма природати идькс. Кда аф природать лезксоц ломанти, минь ба афолеме уле      тяса и афолеме корхне таколфтыть квалма.

  Кие тейнек луви стихотворения, коса корхтави природать колга?

Кепотьксонди, лувови П.У.Гайнинь  «Шачем край» стихотворенияц.

   Мон мазышинцты сюконян,

  И тянди сатомшка туфталда,

  Тонь тюстот мызы аф муян,

  Сон тядянь сельмованфта валда,

  Вай, кели паксят, вирьхт, лугат,

  И лихтибрят, и нармонь морот,

  И лаймарькс панчфонь порфт-юргат,

  Юрнай кумацень пизелкс порат.

  Тя  мазышифтома  аш   рай,

  Пря  шави  седись, кода эрьготьф,

  И мярьгат, акат-сазорхт, най,

  Сурась да Мокшесь макссихть эрьгат,

  Вай, шачем-касам уженя!

  Сяс шнате валнясон-зрнясон,

  Эрь мезне седи куцюнясон.

Кизефксне

- Кона строчкатнень вельде авторсь няфнесы природать мазышинц?

Мезь мархта сравнивает сон тя мазышить? (Тядянь сельмованфть, райть).

- Аньцек ли природать квалма тяса корхтави? 9Родинать).

- А кодама П.Гайнинь тага произведениянц тага лувоме аф кунара? (Поэманц «Таня»).

II. Кудонь тевть проверямац

Кизефксне.

- Кодама произведения лувоме мекольце урокнень?

- Кие сонь автороц?

- Мезе авторть колга содатада? ( Шачсь 1950 к. Инсарскяй районца Адаж Велеса, 8-це класса варжазе сермадомста виенц, кафта стихонзон печатлазь. Меле 1968 к. тердезь Саранскяи и кучезь тонафнема Горькайнь лемса Литературнай институту).

- Васенцеда ли минь васеттяма В.Мишанинать творчестванц мархта? Кодама азксонзон минь уже содасаськ?

- «Пингонь ортат» повестьса кие авторти лезды азондомс событиятнень колга?

- Васенце пяльксса кинь мархта минь васеттяма тага?

Кодама ломанць ульсь Татунять щавац? (Мудрай, ёню, корхтамац образнай, выразительнай, кошярясамазь арьсема азфонц колга).

- Коста тя няеви? Лувсаськ с. 199, 200.

- Кодама легенда азондсь Татунянди щавац?

- Кодама васта занцихть народнай азксне повестьса? (Тисазь сонь сяда интереснайкс).

Учительсь. Аф стак повестть лемоцка «Пингонь ортат» кода и легендать.

III. А тячиень урокста карматама корхтама ялгаксшить колга. Уроконьке тяфта и лемдеви «ялгаксшинь темать панжемац «Пингонь ортат» повестьса.

    Уроконьконь ули эпиграфоц

 «Шуфтсь кирди юронзон мархта, а ломанць – ялганзон.»

   Иттне сермадсазь тетрадезост темать, эпиграфть.

  - Ялгаксшить колга корхнеме тяда инголе? (И урокста, и класснай частста)

  Аф аньцек корхнеме, но и тиендеме вывотт, азондсаськ што ялгаксшись занци ломанть эряфса оцю васта. Тяфта? А мес? Тя кизефксть лангса минь отвечатама марс.

Кизефксне

- «Пингонь ортат» повестьса кона пялькснень эса пяк цебярьста корхтави ялгаксшить колга? («Монь ялгазе Сятявнясь», «Кись сенем менельти», «Ялгась аф каттанза кальдявс»).

- Кие кучкань геройсь повестьса?

- Кие стамсь Сятявня? Кода сонь афкуксонь лемоц? Мес тейнза мярьгондсть Сятявня?

- Уважандакшнезь ялганза сонь?

- Можна ли лувомс Татунянь и Сятявнять ялгакс? Мес?

- Кода синь ушедсть ялгафтома?

- Улихть ли валмуворкст ялгаксшить колга?

- Лама од вал васьфтеме тячи уроксонк. Сермадсаськ синь тетрадезонк. (Валхне анокс сермадовихть доскать омбоце шири )

Таколфты – волнует

Наголь – всегда

Туфтал – причина

Кумаць – ярко-красный

Порф-юрга - пурга, вьюга  

-Итак,кона ялгать можна лувомс афкуксоннекс?

-А мезе тинь,шабат,сермадоде кудса ялгаксшить колга?(Иттне лувсазь сочиненияснон)

А кода тинь арьсетяда,кона  ломанть аш ялганза эряфса?

-А тинь улихть ялганте? Класса ялгафттада фкя- фкянь мархта?

-А тяни кулхцондость Алексей Громыхинонь стихотворениянц, арьседа и азость, киньге колга етксонт сон аф азонды?(Луви ученик)

          Ули пиненязе

           Монь!

          Катозевок ули!

          Аньцек ва

          Аф сявса еньц,

          Мес синь наголь

          Тюрихть?

          Мес синь якайхть

          Стяда понат?

          Мувору синь эздост

          Конац?

          Мезе мархтост

          Мон тиян?

          Кода мумс тейст

          Ялгань ян?

-Катонять и пиненять образснон вельде кодама ломанень характерхт  няфтевихть, ладяйкс или аф?

-Етксонт аш тяфтапт?

-Кодама валмуворкс вельде можна азомс тя стихотворениять  смузенц?(«Эряйхть кода катось и пинесь»)

-Шабанят, а кинь образоц ашезь ту мялезонт тя повестьста? Мес?

-Можна ли рамамс ялгат налхкш или ярмак лангс?

А ялгаксшись уленди аньцек кафта ломанень еткса?(Ломанть и животнайхнень, ломанть и природать, странатнень еткса)

-Кулхцондость Н. Циликинонь стихотворениянц.Кодама ялгаксши колга корхтави тяса?

         Ломатть!

         Мяляфтость и содасть:

         Марстонь кудоньке минь –

         Модась,

         Марстонь валдоньке минь-

         Шись.

         Кудстонк коцай васттнень матсаськ.

         Шитьке валдоц,лямбоц саты,

         Штоба касоль серось –

         Кшись.

         Мезень кальдяв ульсь-юкстасаськ,

         Ялгаксшиса семботь сотсаськ.

         Кие лезды?

         Аньцек минць.

         Марстонь вийса ванфтсаськ Эряфть!

         Срафтсаськ еткстонк кяжень перяфксть-

          Тянь минь эздонк веши пингсь.

(Нароттнень еткса ялгаксшить колга,кона лездсь сяськомс фашизматьВеликай Отечественнай войнать пингста.)

А мъзярда ульсь тя войнась?

-Кодама притча содатада ялгаксшить колга?(Тяльмоть колга)

Сермадомс вете туфталхт,мес эряви ялгась.

1.Лездомс стакаста

2.Штоба налхксемс

3.Кулемс видеть колгат

4.Штоба улемс сяда виикс

IV. Обобщениясь.Виде эпиграфоньке,конань сявоськ тячиень урокти?(Лувови эпиграфсь).Кодама васта занци ломанть эряфса ялгаксшись?

V. Кудонь тев. Анокламс сочиненияти «Кинь мон сяволине ялгакс «Пингонь ортат» повестьста?».

МБОУ «Тарханско-Потьминская СОШ» Зубово-Полянский район

Ялгаксшинь темать панжемац

«Пингонь ортат повестьса».

Аноклазе

МБОУ «Тарханско-Потьминскяй средняй общеобразовательнай школа» тонафтысь

Кирдяпина Е.С.