"Мани шитненди - 75" ("75 лет Мира")
методическая разработка (4 класс)

ПУТФ ЦЕЛЬХНЕ:

-крхкалгофтомс шабатнень содамошиснон мокшэрзянь народть   культуранц, коензон  и устно-поэтическяй творчестванц коряс;

-воспитандамс шабатнень мялямса патриотическяй мяльхть-арьсемать Великай Отечественнай войнать колга;

-ванфтомс питнидонга-питни казнять - МИРТЬ, МАНИ ЭРЯФТЬ,  конат сатфт войнаса сяськомста.

ИЛЯДТЬ ЁТАФТОМСТА ЭРЯВКСТЫХТЬ:

плакатт мокшень кяльть колга (писателень цитатат), шабань кядьса рисаваф рисункат, конат лемтьфт Великай Отечественнай войнаса сяськомати, мокшень нардамат, скомнят; магнитофон, компьютер мультимедийнай проектор мархта, штатол (или керосиновай лампа); суронь пачат, поза.

СЦЕНАСА:

рисаваф пянакуд, вальмяня, путф шра; шрать лангса сёвонень кукшеньца поза,  суронь пачат.

Илась ётафтови 5-9 тонафнихнень мархта. Тевсь моли тялонда, Роштува ёткть, мзярда можналь якамс калядама и ст.тов. А кой-кона велетнень эса мярьгольхть «Кшнинь кудса ащема».

Тонафтысь (илань вятись, сон жа и Азоравась):

Шумбратада, кельгома ялгат! Ушедсаськ иланьконь, коса варжасаськ шарьхкодемс мокшэрзянь народть культуранц, историянц, козя коензон-иланзон, кялень козяшинц, сяка ёткть минь и цебярьста вайматама.

Сценав лисихть Азорсь и Азоравась. Азоравась шары шрать перьф – аноклай, учи инжихть. Азорсь пети тёплайхть. Корхнихть фкя-фкянь мархта.

Азорсь (9-це классонь тонафни, артистичнай, коммуникабельнай цёраня): Баба, месть шарат, озак. Ваймафтыть пилькнень. Эк, кодама тёплайхть тиян! Лятфтсак од пингцень… Синць саласазь пилькнень кштима.

Азоравась: Кодама кштима ни, атясь. Сиредеме, а ваймось сяка од. А мяляфтсак, кода пуромкшнеме марса, морсеме морот, кштикшнеме, ёфси бта исяк сембось ульсь. Мес-бди инжиеньке ламос ашет? …

(Няжяди вальмяти, ёрай варжакстомс вальмава. Тяса кулевихть стирень и цёрань вайгяльхть, конат рахазь сувайхть куду калядама).

1-це инжись: Каляда! Каляда! Цят, цят кептернят!

                                       Бац эзост цюкорнят!

                                          Тячи шись Каляда! Каляда!

                                       Ванды шись Роштува!

2-це инжись: Каляда! Каляда! Тувонь пряня пидеда,

                                     Орта лангу лиседа.

                                     Оцю шкайти озондода!

3-це инжись: Каляда! Каляда! Щакай, инжинь кельгиняй,

                                     Мазы марьхть тонь щёкатне.

                                      Минь инжикс тон нолдамасть.

4-це инжись: Каляда! Каляда! Кда виздят – панемасть.

                                       Сюре кштирдят стама,

                                      Кода цебярь уськоня.

5-це инжись: Каляда! Каляда! Котфкя кодат стама,

                                        Кода цебярь каготкя.

Азоравась: (казьсыне казнеса. Кептернязост каяй ламбама пярякат, конфетт).

Азорсь: Ётада, ётада. Озада кельгома инжихть. Азондость, кода эрятада-ащетяда? Кодама морот содатада? Кодама кулят тинь азонттада? Минь бабазень мархта сиредеме ни, козонга аф лисенттяма, мезевок аф кульхтяма.

Инжихне: Сюкпря, теенть азор и азорава пара валонкса, козя казненкса. А моратама мокшень мора, конань лемоц «Роман Аксясь».

Кайги морось «Роман Аксясь»

(Шумордазь мороснон. Тяда меле  Азоравась каванясыне инжихнень пачада и позада).

Сувайхть нинге инжихть. Дивандазь ваныхть сяда инголе сафнень лангс: Вай, кода мазыста моратада. Вайгяленте марявихть, мянь ульцяв, салайхть седи. Деряй, кирдят апак сувак? Мяленьке мархтонт морамс. Содасасть ли тинь мороть «Вай, луга»?

Сяда инголе саф инжихне: А кода мле?  Эрьда морасаськ.

6-це инжись: Эсон тердят, шачем крайняй,

                    Молян – ётка макста, Шкайняй.

                    Учи эсон мазы лаймось,

                     Сонга моньфтемон изь ваймя.

7-це инжись: Тяса моданязе ляпе,

                    Ётан расанява кяпе,

                    Тишебряста кочкан ведня,

                    Штаян – лангсот сельмоведне.

8-це инжись: Тоста нормальнявок сязян,

                    Цёфксонь мороняти эжан,

                    Кда сатсайне шумбраста –

                    Сире бабанятне казихть

                    Морот, азомс виденяста,

                    Ашень марьсе стама мазыхть.

(Инжихне азорхнень мархта марса морайхть «Вай, луга» мороть эса. Кие-бди эздост вятьсы мороть).

Азоравась: Шачем мастороньке ётась эряфонь кувака ки – конань кувалмоц 75 киза. Тя аф лама, но и аф кржа. А вов кода колганза тядянь-алянь кяльса корхтайхть иденза.

(Азорть мархта лувихть мокшень поэттнень произведенияста пакшт. Инжихне кулхцондыхть).

       9-це инжись: Шачем крайняй, сазор-ака,

                Молян пялот валда мяльса,

                Кандан панчфт лугатннет эльсон,

                Моран колгат мокшень кяльса, -

                Шачем крайняй, кулемака.

    10-це инжись: Шачем крайняй, ётан эзгат,

                Озаф седихть вайме тарган,

                Паваз сельмоведнень нардан.

                Ваннят эсон, ваннят, кардат…

                Крайняй, кеман, тейне лездат.

     Азоравась: Шачем крайняй, няйхте мазы ломанькс.

            Ару ваймозт ашезь педь рдаз.

            Шачем шистот идькс тонь пильгозт коман,

            Кельги цёракс ашкордан кргазт.

Азорсь: 75 кизонь потмоста мастороньконь прява ётась лама цебярьда и кальдявда. Инь оцю кальдявсь-зиянць – Великай Отечественнай войнась. Коса лама од ломань максозь седи ваймоснон минь валда и павазу эряфоньконь инкса.

Минь республикастонк фронту тусь аф кржа од цёра и стирь. Кинди савсь мрдамс куду, а ламотненди ашезь сав, лиякс мярьгомс, тя мяльсь илядсь апак топафтт.  Мордовия республикань ломаттненди максфоль 108 Советскяй Союзонь героень лем. Синь ётксост лётчикне: М.П. Девятаев (Эряфонь и творческяй кинц лангс можна лоткамс сяда крхкаста, нолдамс тевс компьютерса аноклаф слайдат), А.Г. Котов, Т.С. Горячкин, С.А. Полежаев, Б.М. Зайцев; артиллеристтне:         В.Б. Миронов, М.М. Коняшкин; танкисттне И.П. Адушкин, В.И. Чудайкин, А.Г. Махров; радистсь Е.В. Тягушев; пехотинецне Е.Г. Акиняев, М.Т. Антясов, В.М. Михеев; пулемётчиксь А.А. Баляев; разведчиксь С.И. Полежайкин и ламоц лиятне.

Сембе масторти содаф минь земляконьконь армиянь генералть Максим Алексеевич Пуркаевонь лемоц, кона шачсь Дубёнскяй райононь Налитова  (тяни Пуркаево) велеса. Сон войнань  васенце шистокиге ульсь фронтса. Инголи кядалонза ульсь армия, а сяльде сембе – Калининскяй фронтсь. Тя фронтть воинонза кирдезь и ашезь нолда Москуву фашисттнень (Нюрьхкяняста ваномс эряфонь и творческяй кинц, нолдамс тевс компьютерса аноклаф слайдат (портретонц, эряфстонза фотографият)).

Генерал-полковникть Иван Васильевич Болдинонь лемоц тяфта жа аф юкстави. Сон шачсь Инсарскяй районца Высокое велеса. Генералсь няфтезе прянц Моску ошть араламста. Немецкяй войскатне ёразь шаромс минь столицаньконь шинь мадома и шинь стяма ширде, сявомс сонь окруженияс, но тянди шорясть Болдинонь кядяла вятеви войскатне, конат Юг ширде аралазь столицать. Тя геройсь няфтезе полководческяй талантонц и 1943-це кизоня  Курскяй дугать видеса пяк кяжи тюремаса.

Сембе геройхнень лятфтамс, кельгома инжиеньке, аф саты пингоньке, сяс мес синь эздост миллиотт… и пароль ба мяляфтомс кодама питне теест савсь кадомс минь тячиень валда и мани шиньконь инкса.

Тя ёткть инжихнень ёткста 2-3 ломань лисихть И.М. Девинонь «Шинель» стихотворениянц лувома. Тяса тонафтысь инголькиге арьсесы сянь, кода лувфтома тя стихотворениясь: марнек или эздонза пакш. А, сяс мес сон пяк оцю, то можна тиемс тяфта: залста матомс светть, крьвястемс штатол или, кда ули, керосиннай лампа. Васенце инжись ушедсы лувома стихотворенияста пакшть и пачкоди «…Пиндолды пунянц…» валхненди нолдавихть тевс компьютернай (мультимедийнай) слайдат войнань кадра мархта. Тя фонть эшксса поладсазь корхтамаснон ляды лувихне.

11, 12, и 13-це инжихне: Минь ули мяленьке лувомс И.М. Девинонь «Шинель» стихотворениянц

Казяма и ляпе.        Ацасы шинеленц

Якшама и пси.        Вастонцты солдатсь.

Вельхтясы сон даволть,        Прялонза шинелец,

Комачасы шить.        И солдатсь ни мадсь…

Пизепне аф начфтсазь        Ваймяй виень кочкамс,

Фкявок сюренянц.        Кельмода аф пелькс.

Шямонць весть аф керсы        Эх, шинель солдатонь

Пиндолды пунянц.         Кельгома шинель!

Толса сон аф палы,        Эжнесы солдатть сон,

Хоть толмарсь увнай.        Хоть и мороз,

Вармась полхнень эзга

Лиси и увнай.        Эсонза мес лямбонц

Цят морозсь ульцяса        Максозе народсь.

Лешасы шинельть.        Араласы псида

А солдатти лямбе,         Ливозьса сувафсь,

Хоть уфай буран.        Мес народонь кядьса

Ловонь фальхнень пачка         Аноклаф сон, стаф…

Смелста кели ян.        Эх, шинель-надежда,

А мзярда азы

Командирсь привал,        Воинонь одёжа!

14-це инжись:         Солдаттне сёрмадсть куду сёрмат, мзярда модась люмбакшнесь снарядонь сязендемать эзда, мзярда войнась макссесь ваймамс ёмла ётконя.

А тылса учстть… Учстть кулят. Сембонди содаф ся пефтома кенярдемась эрь ёмля треугольниконять эзда. А кодамот войнать сёрманза?..

15-це инжись: Сёрматне ульсть сёрматфт аф аньцек рузонь кяльса, но и тядянь кяльса. Вагот синь: Зубово-Полянскяй райононь Каргаша велень эряйть, 745 стрелковай полконь красноармеецть И.П. Волковонь фронтста куду сёрмац.

Сиредема пяли колмоцеда повонь толти и качамти. Атямсь торай шинек и венек, аш стама минута, штоба атямсь ваймяль. Торай, ёндолсь налхки, лядолень шиса – улель мезе лятфнемс… ащетяма Дон ляйть тейса.

Мон сёрмать эса сёрмадан, а сельмоне ливоськодсть, путькяй ливозсь… Аф содаса, кати местема шачень мон светть лангс.

Аляце И.П. Волков

16-це инжись: Ульсть сёрматфт сёрмат и кельги ломаненди. Кода синь учфт?!

34-це армиянь 117 дивизияста 275-це полконь штабть начальниконц Г.Я. Меркушкинонь сёрмац Рыбкина вели рьванцты. 1943 кизонь 10 мартста.

Шуранязе, шумбранят!

…Эряфозе шашты военнай киге. Эх, мзяра вайгяльбе ялга ётасть солдатоньке… Шураняй, тяни ётнян ся васттнень ланга, коса тяда инголе азорондасть оцю ки лангста немецонь бандиттне. Мезе синь, аерксне, тисть ошеньконь и веленьконь мархта. Азондомс семботь – коськи кяльце и санцот шуфтоми верце. Кулофтыть – калмос! Вов кодама мялец эрь боецть…

Сембе цебярнять и паронять тейть, кельгомнязе. Тяшнек!

17-це инжись: 6-це истребительнай авиационнай отрядонь механикть П.Я. Машканцевонь сёрмац алянцты Омскяй областень Ворсиха вели. 1944-це кизонь 20-це апрельсь.

Шумбранят, аляй!

Служан. Войнась вдь война! Но тяндивок эряви тонадомс, лиякс врагсь аф тапави…

Войнась – война, а стихт стаки тяшнян. Ули мезень колга азондомс иттненди.

18-це инжись: А кодама седиса ульсть синь сёрматф тядяти? Поэтсь И.В. Чигодайкин «Сёрма тядязти» стихотворениясонза сёрмады тяфта:

Тон шумбрат,

Монь кельгом тядяй-авай,

Кучи сёрма цёраняце тонь;

Пади тячи удомаце явай

Рана, заряньшовор,

Кода монь?

Тон лисят ки лангс

И арьсят тага,

Потмоняце лажатфть

Эзда шяйсь.

Тондейть-арам,

Саян вага-вага,

Пован тядень

        Кеняртьф сельме няйфс.

Мяльхнень эса

Стяй од пингокс ётафсь,

Ляди мялезт, кода тунь…

Тят ризна тон,

Ёрдайть кальдяв мяльхнень,

Ётафтк войнань

Кевда стака пингть.

Сай ся шись,

Тон няйсамак монь тага,

Кода няйсак

Марстонь кизонь тингть.

19-це инжись:    Да, нюрьхкянят синь, аф ламонь эсост вал,

Но седи потмаксти сувай эрь валнясь.

И улихть лувонфт сёрматне нят свал,

Мзярс эряфсь аф аделави шить ала.

20-це инжись:  А кудса учихть. Учихть стирьхне, а сембода пяк тядясь. Ну кода тяса аф лятфтамс И.М.Девинонь «Геройть учемац» стихотворенияста пакшть:

Курок ли, иднязе, саят куду, -

Содасак тейть кода скучендаме?

Аньцек тонь учтядязь апак удок –

Симомс-ярхцамс анокламе самозт…

Азорсь: (Куфкстозь) Да-а-а, эряфсь, содаф, моли инголи. И бта ёфси исяк масторть лангса ульсь сембе тя равжа урмась – войнась. Ломаттненди савсь варжамс аф кржа сталмода. Кеподемс сембе перьфпяльть оду-ряд. Работасть трудодень лангс – шава палканя и сяка ломаттнень пяк козяльхть ваймосна, ашельхть фкя-фкянди кальдявонь арьсемасна. Ваймосост эрясь Оцю вера: вера цебярти, вера вандыень шити, седистост ашезь тушенда Шкайти верондамась…

Азоравась: Кельгома инжихть, тянь лангса шумордавсь минь ваймама иланьке. Тячи кулеме мархтонтт лама мокшень мора, стихотворения, сёрмаста пакшт. Тинь няесть, кода  козя мокшэрзянь ломантть ваймоц, мокшень поэттнень творчествасна. Минь мархтонтт ваноськ кодама стака киге савсь ётамс минь ломаненьконди войнань кизотнень пингста. И аф ваномок сембе сталмотнень лангс казямсь ашезе сува ломаттнень седиснон и ваймоснон, сяс мес мархтост фалу ульсь Шкайти кельгомась и верань кандомась.