Янышева Рәүзилә Рәвис кызы

О себе

Минем әти - физик-математик,

Әни - чит ил теле белгече,

Әти - татар, әнием - башкорт, үзем -

Шул ике дус милләт җимеше.

Әти-әни укытучы булгач,

Киләчәгем, димәк, билгеле.

"Укытучы!"- дигән бөек исем

Биләп алды минем күңелне.

Бу һөнәрнең җиңел түгеллеген

Кечкенәдән белдем, аңладым.

Тик хыялым көчле булды минем

Үз юлымны үзем сайладым.

Мәктәпне тәмамлагач, Стәрлетамак педагогия институтына укырга кердем. Тик язмыш юлларым ике елдан соң яңадан туган авылыма кайтырга мәҗбүр иттеләр. Күрше авыл мәктәбенә йөреп эшли башладым. Иң элек әйдаман вазифасын башкардым, соңыннан башлангыч сыйныфларда, аннары рус теле һәм әдәбияты укыттым. 2000 елда институтны тәмамладым, ә мәктәп бусагасына 2006 елның салкын кыш айларында гына атладым.

Егерме икенче мәктәп барын элек

Мин ишетеп кенә белә идем.

Тик язмыштан узмыш булмый диләр,

Аякларым шунда китерде.

Монда мине ачык йөзләр белән

Хөрмәт итеп каршы алдылар.

“Эшлә генә, кулдан килә икән,”-

Дип күңелемә өмет салдылар.

Менә шулай педагогик эшчәнлегем яңадан башланып китте. Татар теле укытучысы булып эшли башладым, аннары янә әйдаман, сыйныф җитәкчесе вазифаларын башкардым. 2011 елда 2нче гимназиягә килгәч, белемемне арттыру нияте белән Башкорт дәүләт университетының Стәрлетамак филиалына укырга кереп, 2015 елда филология факультетын тәмамладым.

Кеше ике очракта бәхетле була диләр. Әгәр ул эшенә барганда һәм йортына кайтканда бәйрәмгә барган сыман йөри икән. Шушы сүз дөрес булса, мин үземне бәхетлемен дип әйтә алам. Мәктәп белән йортны кечкенәдән аера белмәдем. Өйгә кайтсам да әтием белән әнием, мәктәпкә барсам да алар. Әлбәттә, бу шаярту гына, чыныннан исә, һөнәрем – минем бар яшәешем. Гиназиягә килеп керү белән: “Исәнмесез”,- дигән балалар, аларның туган телгә булган мөнәсәбәтләре күңелемә дәрт өсти, яңа үрләргә менәргә өнди, белемемне арттырырга этәргеч бирә. Укытучы үз өстендә эшли икән, укучылары да алга омтыла. Без бер-беребезгә терәк булып, ярдәм кулы сузып, белем арттырабыз, яңа ачышлар ясыйбыз.

Бүген бездә татар теле, яратам сине, телем!

Рәхмәт сиңа, синең аша алам мин яхшы белем, - дип башлана татар теле һәм әдәбияты дәресләре. Елдан ел, көннән көн әйтелгән бу сүзләр балаларның күңелләренә бер хакыйкать булып үтеп кергән.

Укучыларым белән һәрчак бәйләнештә торам. Олимпиадага әзерләнәбезме, фәнни-гамәли конференцияләрдә яисә берәр бәйгедә катнашабызмы, алар өчен минем утым гел яна, телефоным эшли. Башкача булу мөмкин түгел, чөнки бердәм эш кенә нәтиҗә китерә, ә укучыларым мине сынатмыйлар, тырышып эшлиләр. Шәһәр күләмендә үткәрелгән бәйгеләрдә әүдәм катнашалар, эзләнү-тикшеренү эшләре алып баралар. Мин дә алар өчен көчемне җәлләмим, белгәнемне әйтәм, белмәгәнне белергә чара табам. Камилләштерүнең чиге юк, диләр. Шуңа күрә төрле һөнәри осталыкны үстерүче курсларда укыйм, семинарларда катнашам, заман таләпләренә туры килергә омтылам.

Дәресләрне төрле формаларда үткәрергә тырышам, яңадан яңа метод һәм алымнар эзлим, мәгълүмати-коммуникатив технологияләрне кулланам. Хәзерге заман балаларында туган телне өйрәнүгә кызыксыну уяту өчен иң нәтиҗәле чара дип уйлыйм. Ул укучыларны компьютер белән эшли белергә, текст процессоры ярдәмендә төрле документлар әзерләргә өйрәтә. Укучылар аерым темаларга презентацияләр төзеп чыгыш ясыйлар. Бүгенге көндә Интернет челтәрендә дәрестә куллану өчен электрон белем бирү ресурслары шактый. Шулай ук мәктәпләрдә укыту-тәрбия эшен камилләштерү максаты белән халык педагогикасы хәзинәләрен файдалану кирәклеге дә көн тәртибенә килеп басты. Чөнки яшь буынны үз туган телендә сөйләшүче, халкын сөюче, аның чын тарихын өйрәнүче, иҗатка сәләтле буын итеп тәрбияләү эшен халык педагогикасыннан башка күз алдына китерүе дә кыен. Димәк, яшь буынны тәрбияләүдә, ирекле шәхес үстерүдә гаять зур урын тоткан милли үзенчәлекләрне, сыйфатларны, милли психологияне, гореф-гадәтләрне, йолаларны, бәйрәмнәрне, тарихны торгызу, яңарту чоры җитте. Халкыбызның иксез-чиксез бай сүзле авыз иҗаты балаларда аеруча кызыксыну уята. Дәрестә куллланылган тизәйткечләр, тел төзәткечләр, табышмаклар, мәкальләр укучыларга якын һәм аңлаешлы.

Хәзерге заман укытучысы гыйлем нурын сибүдән башка, күптөрле бурычлар үти. Ул бурычларның иң мөһиме – балаларны аңлау, үз предметыңны өйрәнүгә кызыксыну уяту. Аларны заманча чаралар ярдәмендәме, дәрестән тыш эшчәнлеккә җәлеп итепме – барысы да туган телне яратуга, аңа карата горурлык хисе уятуга, милләт язмышына битараф булмаган шәхес тәрбияләүгә юнәлтелгән.

Гади генә бер укытучымын.

Күпме язмыш безнең кулларда?

Туган телнең, илнең киләчәге

Без укыткан ул һәм кызларда.

Книги, которые сформировали мой внутренний мир

М.А. Булгаков "Мастер белән Маргарита" - чын мәхәббәтнең иң серле тарихы.

Ф.А. Абрамов "Йорт" - гади авыл кешеләренең тормышы, Бөек Ватан сугышы һәм сугыштан соңгы вакыйгалар, йорт-нигезнең әһәмияте, бертуганнарның ачы язмышы.

 Г. Әпсәләмов "Ак чәчәкләр" - профессияләренә тугры, намуслы, шәфкатьле кешеләр - ак халатлы врачлар турында. Алар тән ярасын дәваласа, безгә кайчак җан җәрәхәтен дәваларга туры килә. Гөлшаһидә образы - әдәби әсәрләрдә булган минем иң яраткан хатын-кыз образы. Аның җырын җырлыйм, аңа охшарга тырышам, аның иң күркәм сыйфатлары мине илһамлый.

Мой взгляд на мир

Ышаныгыз, бу гомер бер генә, 
Бу гомернең кадерен бел генә.
Син яхшылык чәчсәң әгәр, 
Меңе белән кайтыр үзеңә!
Адым саен елмаю, адым саен матурлык, 
Бу дөньяга сокланып, таңга калырлык.
Дөрес төсләр табу җитә, 
Матурлыкны тану җитә, 
Кеше булырга кирәк!..

Мои достижения

Моё портфолио

Адәм баласы үзен-үзе тәрбияләргә һәм камилләштерергә тиеш, буй җиткән hәp кеше үзен-үзе тәрбияли ала. Ризаэтдин Фәхретдин

Портфолио: