Литературно-музыкальная композиция "Бамб цецгин частр"
классный час

          «БАМБ ЦЕЦГИН ЧАСТР»

                                                                Хальмг келнә багш:

                                                                    Мутрена И.С.

                                    Баh- Тугтна с.

                                         2016 җ.

Күслмүд:

- келлһ өргҗүлһн;

- сурһульчнрт экологическ сурһмҗ кех:

- өргҗлт кеҗ чадлһн.

Дөӊцл: компьютер, презентац.

                                          Нәәрин йовуд.

Залач: Мендвт, күүндтә үүрмүд!

Күн болн йиртмҗ- ни-негн гиҗ келх кергтә. Бидн- әмтн йиртмҗин зокалар бәәх зөвтәвидн. Терүг геехлә, ни-негн бәәдл уга болҗ одх. Мана теегин экологическ бәәдл җил ирвәс муурад бәәнә. Иргч буйслһна һашута темдгүднь улм тодрхаһар медгдәд бәәнә. Тегәд мана Хальмг Таӊһчд Теегин өдр темдглҗәнә.

Деерм өндр көк Теӊгр,

Дорм- өглһнә эзн һазр,

Эдн хоорнд- би-күн,

Эн мөӊк йиртмҗин үрн.

ϴндр көк теӊгр-Эцкм,

ϴглнә эзн һазр- Экм,

Теӊгр, һазр, йиртмҗ, күн-

Тегәд нег киистә үнн.

Залач: Бидн цугтан йиртмҗин олн үрн болҗанавидн. Тегәд энүг харҗ хәләҗ, өөрхн ээҗ- аавнь мет күндлх зөвтәвидн.

Залач: Тег мана оньдин сәәхн. Хаврин цагт болхла улм сәәхрнә. Энүг кеерүлҗәх олн-зүсн урһлмудас бамб цецг йилһрнә. Бамб цецг- теегин кеерүл, теегин зөөр гиҗ келнәвидн.

Мини төрскн теегм

Хаврар улм сәәхрнә.

Бамб цецг улаһад,

Мана зүрк байсана.

                              («Бамб цецг» гидг дун)

Залач: Бамб цецгин тууҗас. Әмтин өмн деед үзгин Европд авч ирсн бамб цецгиг түргин цецг гиҗ нерәдлә. Тернь мана теегт урһҗасн бамб цецгәс ул авчана, эн тоотар маднд бахмҗ кеҗ болҗана. Эн цецгин нернь Шренк. Түрүн бамб цецг дөрвн зун җил хооран Голландин Лейден гидг ботаническ садт цецглсн болҗана. Голланьд 1994 җилд ик нәр болла, эн нәр бамб цецгт нерәдгдсн билә.

Залач: Бамб цецг дүрсәрн дорд үзгин келн-улсин толһа деерән зүүдг тюрбанла әдл, терүнә ул деер түрг «телибан» гидг үг үүдәсмн, орс келнд тернь «тюльпан» болҗ оч.

(«Альвн харадас»гидг дун)

Залач: Кесг җилин туршт номтнр хар өӊгтә бамб цецг урһахар бәәсмн. Одахн тиим өӊгтә цецг урһаҗ авч. Болв ноһан бамб цецг уга. Номтнр цецгин зүсн болһнд алдр улсин нерд өгнә. Үлгүрнь: «Берлиоз», «Вивальди», «Иоганн Штраус», «Галина Уланова» б.н.ч.

Залач: Хальмг аһар күүг амрана, теегин ноһан байсана. Шовудын байрта дууһар дүүрсн, әмтә цуг тоотын күчиг бийдән шиӊгәҗ авсн тег күн болһнд бахмҗ үүдәнә, омг өгнә.

Хаврин дуунла наласн

Хәәртә теегн хәләхнь-

Йиртмҗин өршәӊгү күӊклнь

Йир сәәнәр медгднә.

(«Харада» гидг дун)

Залач: Японьд сакура модн цецгәлхлә, цуг әмтн нәр-наад кецхәнә. Мана бамб цецгт нерәдсн нәр- наадн бас ик, сәәхн болтха.

Бамб улан цецгиг

Байсч ширтәд хәләнәв.

Үнндән тер нанла

Үгән мендлхинь күләнәв.

Агчмд цецг оӊдарад,

Арагнин дүрс зүүнә.

Мишәҗ нанур өкәһәд

Мини зүрк шүүнә.

Җирһл җиләс түүҗ,

Җилвтә сәәһинь хурала.

Судцарм хавр гүүҗ,

Седклдм нар урһала.

(«Теремок» гидг наадн)

Деерән тиньгр теӊгртә бәәтн,

Дала кишгтә байн болтн,

Хаврин нарншӊ ээлтә болтн,

Хун шовуншӊ итклтә болтн,

Булгин усншӊ цевр болтн,

Бамб цецгәшӊ ке болтн,

Келсн үгдән тов болтн,

Кесн көдлмштн уралһ болтн!

(«Иньг мини» гидг дун)

Залач: мана хальмг теегин йиртмҗ соньн, сәәхн. Сәәхн бамб цецгәһән, теегн харх зөвтәвидн. Теегт таслад авч ирсн цецг үрнә, ормднь дарук җилд цецг урһшго. Тегәд, таслхин өмн күн болһн түрүн ухалх зөвтә.