Фольклорное мероприятие "Моронь кужо"
план-конспект

«

Целесь: Невтемс эрзямокшонь моронть мазычинзэ велень эрицятненень, тонавтомс кунсоломо ды чарькодеме народной моронть, содамс эсь народонть историянзо ды сонзэ марто сюлмазь моротнень.

Оборудованиясь: магнитофон, книгань нупаль, икелень оршамопельть, таблицат, карта.

Эпиграфось: Кода эри народось, истят сонзэ моротне.

Мероприятиянть молемазо

(Маряви морось «Адядо, ялгат минек масторов»)

Ветицясь: Мекс минь течи карматано кортамо эрзямокшонь моротнеде?

   Морось – те народонть историязо. Моры народось, зярдо эрямозо паро. Моросо пингеде пингес ломантне кортасть эсест стака эрямодонтькак. Паряк, састь неть шкатне, зярдо эряви лецтямс минек историянть. А историясь эрзятнень ды мокшотнень кезэрень. Васенцеде кортави минденек «Повесть временных лет» летописенть эйсэ. Сюпав минек историясь, ламо моронок. Но ламо стувтовсть, ламодо минь а содатано.

   Саранскойсэ 1990-це иестэ августонь 3 чистэ саезь 5 чис роботась «Масторава» обществань васенце промксось. Кие бу аволь корта, сехте сэредьксэкс тештизь тиринь келень емамонзо. Минь карминек пелеме ды виздеме эсь кельсэ кортамо. Стувтынек моронок-коенек. Емасть эрзямокшонь моданть лангсто  940 велеть. А ведь минек народось а вишкине. Финно-угорской семиясо аштетяно венгратнень ды финтнэнь мельга. Нейгак эрзятнеде ды мокшотнеде милиондо ламо. Улить эрзянь велеть Армениясо, Пензасо, Самарасо, Оренбург ёнкссо, улить мик Канадасояк.

   Паро, што седе покш мель кармасть явомо эрзянь ды мокшонь кельтненень. Вана минек районсояк ульнесь конференция, кона алтазь эрзямокшонь народонть одс чачомантень. «Кода эри народось, истят моронзояк», - кортыть сыретне.

Кодамо минек веленть историязо?

   Минек тиринь Кочкур велесэнть  эрясть свал эрзят. А седе икеле минек эрицятне эрясть Алатырь береконть вакссо. А мекс сынь кадызь сеть таркатнень? 1647 иестэ инязорось миинзе сеть модатнень, 1671-1692 иетнень ютксто 15 семият састь неень

Кочкурова велень таркантень. Таркась ульнесь пек мазый: перть пельга вирть, лугат, пандот.

    Ветицясь: Мазый таркась, мазыйть ды парт тесэ моротнеяк.

    Кунсолосынек « Таня Кочкурка» моронть. Тесэ нетядо эрзянь авань оршамопельть. Свал мельстэнь а тукшны, кодамо моро морась авась, зярдо тейсь те пулаенть? Кодат моронзо тейтеренть, кона стась неть сельведьбацятнень? Лужанят бути мирденень макссть тейтеренть апак кевкстне. Веселат, бути лисиль вечкевикс церанень. Моросо эрзямокшонь велесь сюпав. Ламо морот народонть историядо.

    А. А. Шахматов кортась: « Эрзямокшонь моротнень содержанияст пек разнообразнойть. Эряви, ёвтамс, што те народонть улить ламо исторической моронзо. Пурнамс неть моротнень- те благородной тев.»

    Ветицясь: Эрзямокшонь раськесь_- олянь вечкиця. Исторической моротне видестэ лемдязь «Народонть поэтической историякс». Исторической моротне чачсть, зярдо кармасть кайсевеме раськенть лангс ногайть. Сынь свал невтить виде исторической тевть.

    Ветицясь: Монь кедьсэ моронь сборник. Тезэ совавтозь морот, конатнень морсесть ды нейгак морсить эрзянь велетнева.Улить морот минек райононь Кенде, Повадьвелень,Орданбуень веленьгак. Но арасть тесэ минек велень морот. Секскак эряви  течи ваномс, кодат морот морасть тиринь велесэ. Мон арсян, зярдояк лисить башка сборниксэ, бути минь тынк марто путтано мель сынст пурнамс. Эрзямокшонь исторической моротне жанрань коряс явовить зярыя группас.

    Минек фольклорсо полондо моротне арыть малав васенце таркас.

Неть моротне тематиканть коряс кандовить балладас:ули сюжет, кортави народонть стака эрямодо. Мик нурсема моротнесэяк те неяви.

    Ветицясь:Сюжетэнь основакс неть моротнесэ сеетьстэ эри апак фатя зыянонь самось. Ногайтне раужо пелькс каявильть эрзянь

велетнень лангс ды сайнильть полонс тейтерь-ават, од церат, эйкакшт. Ломанесь саеви полонс важодема таркасто, вирь куншкасто.

    Ветицясь: А ней кунсолосыник моронть «Вирь чиресэ»

    Полонс саезенть кармавтылизь важодеме чинек- венек. Чить- паксясо, веть- вансь ногаень эйкакш.

     Ногаень авась наказыль:

     Иля евта, эрзярь цера, берянь вал.

     Иля мере,туень вардо,берянь вал.

     Те тякинесь, эрзянь цера,вейкине.

     Те тякинесь, эрзянь аля, ськамонзо.        

     Но церась нурсемстэ моры:

     Утю-балю,ногай левкс,

     Ногай ававнь тяказо ,

     Башкир авань тяказо.

     Сэрень пелев люкштядтян-

                       Сэрень пелев сивезэ,

                       Пирянь пелев люкштядтян-

                       Превень пелев маштозо.

      Те нурсема моросонть невтеви эрзянь церанть урексчинть каршо молемась. Моронть валсо сон сюды полонс саицянзо, сюды

эйденть, кона поладсы ногаень родонть.

      Лия моротнесэ кортави, кода од алясь арси оргодеме. Оргоди, но сонзэ кундасызь мекев. Улить морот, косо сазорось лезды алянтень оргодемс полонсто, или жо кавонест туить.

      «Вирява» моронть эйсэ кортави, што Виртява тейтересь пек мазый, ламо якасть кудат тензэ, но тетязо миизе сонзэ сюпав

кирьгизнэнь, кона макссь покш калым. Полондо эрзямокшонь поэзиясь седейризнэмань. Минек велесэ морыть вейке истямо моро «Вирь чиресэ», конань минь кунсолынек.

       Ветицясь: Эрзятнень ды мокшотнень улить морост, конат токить эрьвейкень седейс. Те мокшэрзянь авань стака эрямодо морот. Минек велесэ морыть «Кавто цёрат тикше ледить», «Од килнй», «Луганясо келуня».

     Кунсолосынек вейке моронть, конань морасы минек велень фольклорной ансамблясь «Цёковне».

       Ветицясь:Миненек састь ават, конат  вадрясто содасызь Кочкурвелень фольклоронть. Те Кияйкина Лидия Ивановна, Кочеткова Просковья Андреевна, Афонькина Татьяна Ивановна, Наумкина Лидия Ивановна. Сынь морыть минек фольклорной ансамблясо. Тынь, эйкакшт, содасынк сынст, марсинк, кода сынь морыть. Но тынь а содатадо седе, што неть аватне сынсь сермадыть

пельде.

     А ней мон евтан теде, мезде содыть а весе. Неть аватне вишка пингстэ важодсть трактористэкс. Сокасть чить ды веть, но морось ульнесь тенст ялгакс. Лидия Ивановна, тыненк вал.

     Морави морось «Эрзянь Полюня».

    Ветицясь: Сюкпря весе ваныцятненень. Мон арсян, што минек велесэ морось зярдояк а еми, кармить морамо минек эйкакшонок, нуцьканок ды нуцьканок эйкакшост.

       Вастомазонок!