Яңы йыл сценарийы
классный час (8 класс) на тему

Кайбышева Альбина Хәсән ҡыҙы, башҡорт теле һәм әҙәбиәте уҡытыусыһы

Уҡыусылар өсөн Яңы йыл сценарийы

Маҡсат:

1.  Яңы йыл байрамына арналған сара аша уҡыусыларға өҫтәлмә мәғлүмәт биреү;
2. Уҡыусыларҙың фекерләү ҡеүәһен үҫтереү, тасуири һөйләргә, зал менән эшләргә өйрәтеү, образлы һөйләү аша уларҙың һәләттәрен асыу;
3. Уҡыусыларҙа тыуған ил менән ғорурланыу тойғоһо, рух тәрбиәләү.

Иң тәүҙә сәхнәлә бүре ҡуянды көтөп ята. Юлбарыҫ (урман хужаһы) бер мөйөштә йоҡлай. Ҡуян килеп сыға. Ул Ҡышбабай кейемендә.

Ҡуян: Мин-ҡуян, мин – ҡуян,

Мин түгел ҡурҡаҡ ҡуян.

Тик япраҡ ҡыштырлаһа да,

Ҡасып китәм дә ҡуям.

Бүре ятҡан еренән уға аяҡ сала. Үҙе хахылдап көлә.

Бүре: Ҡылый күҙ ҡуян, ҡурҡаҡ, ниндәй япраҡ булһын ти ҡыш көнө. Тупой!

Ҡуян: (ҡурҡа-ҡурҡа) Мин ҡуян түгел, Ҡышбабай!

Бүре: Ха-ха... Ә мин – Ҡарһылыу.

Музыка башлана. Йырлайҙар.

Ҡуян: Ҡайҙарҙа булдың һин, Ҡарһылыу?

Хәлдәр нисек, матурым Ҡарһылыу?

Бүре: Һинең арттан йүгерҙем, Ҡышбабай!

Күҙ йәшемде күп түктем, Ҡышбабай!

А ну-ка, әйҙәле, бейергә төш әле!

Бүре: Юҡ, Ҡышбабай! Юҡ, Ҡышбабай!

Юҡ, Ҡышбабай! Погоди!

Ҡуян: Бала- саға бүләк көтә минән,

Һиңә лә шәп өлөш тейер минән.

Бүре: Ниһайәт, теләгем ҡабул булһын!

Иң яҡшы бүләк миңә ул бит һин!!!

Ҡуян: А ну-ка, әйҙәле, бейергә төш әле!

Бүре: Юҡ, Ҡышбабай! Юҡ, Ҡышбабай!

Юҡ, Ҡышбабай! Погоди!

(Асыуланып) Ну, Ҡышбабай, погоди!!!

Ысын Ҡышбабай инә. Төлкө, Ҡуян, бүре инә.

Ҡышбабай: Һаумыһығыҙ, хайуандар! Һеҙҙе ҡотларға тип алыҫтарҙан киләм. Көттөгөҙмө мине?

Бөтәһе лә: Көттөк, көттөк.

(Бүре барып юлбарыҫты уята)

Төлкө: Бигерәк һағынып көттөк һине, Ҡышбабай!

Ҡышбабай: Рәхмәт, хайуандар! Ә хужағыҙ Юлбарыҫ ҡайҙа? Күрмәйем.

Юлбарыҫ: (йоҡонан уянып) Рәхим ит, Ҡышбабай! Һеҙ был яҡтан килгәнһегеҙ икән, ә мин һеҙҙе теге яҡтан көтөп, ҡаршыларға әҙерләнеп йөрөй инем.

Ҡышбабай: Күрҙем, күрҙем  көткәнегеҙҙе. Мин һеҙгә буш ҡул менән килмәнем. Бүләк, күстәнәстәр ҙә килтерҙем.

Бөтәһе лә: О! Күстәнәс! (бөтәһе лә бергә барып Ҡышбабайҙың тоғона ябырылалар)

Ҡышбабай (аптырап ҡарап тора): Ярар, бүләк алыр алдынан әйтегеҙ әле. Был йылда һеҙ ниндәй яҡшы эштәр эшләнегеҙ?

Ҡуян: Мин урманға килгән балаларҙы ҡыуандырҙым. Унда йүгерҙем, бында йүгерҙем. Улар мине баҫтырҙылар.

Бүре: Ә мин, балалар ҡуянды ҡурҡытмаһын тип, уны гел һаҡлап ҡына йөрөттөм. Эйеме, ҡуян?

Төлкө: Ә мин... Ә мин ошо күпереп торған ҡойроғом менән үләндәрҙе, сәскәләрҙе һыйпап массаж эшләнем.

Юлбарыҫ: Беҙ еще... Урманға ағас ҡырҡырға тип килгән кешеләрҙе ҡурҡыттыҡ.

Бөтәһе лә: Эйе! Эйе!

Ҡышбабай: Ярай,  бик шатмын. Һәр берегеҙ нимәлер эшләргә тырышҡан. (Бүләк тарата) Бына әле мин бик шәп бер гимназияла булдым. Рәми Ғарипов исемле башҡорт гимназияһы ул!

Төлкө: Шунан? (ҡойроғо менән Ҡышбабайҙы һыйпап тора)

Ҡышбабай: Был гимназияла иң яҡшы балалар уҡый икән, үҙҙәре гел башҡортса ғына һөйләшә, рухлылар, һөнәрлеләр, матур кейенәләр. Унда иң шәп етәкселәр, уҡытыусылар, тәрбиәселәр, хеҙмәткәрҙәр эшләй. Бигерәк  күңелем булды. Ә бына һеҙ ... талашып та алаһығыҙ икән?

Бөтәһе лә: Эйе... (ҡыйыуһыҙ ғына)

Ҡышбабай: Йәмһеҙ һүҙҙәр менән һөйләшәһегеҙ икән?..

Бөтәһе лә: Эйе... (ҡыйыуһыҙ ғына)

Ҡышбабай: Кейемдәрегеҙ, тундарығыҙ ҙа бик тәртиптә түгел икән?...

(өндәшмәйҙәр) Бына һеҙгә шундай ҡарар килтерҙем. Мә, Юлбарыҫ, һиңә тапшырам. Уҡып ишеттер!

Юлбарыҫ (ҡарарҙы уҡый):

- Бөгөндән башлап бөтә урманда тәртип урынлаштырырға!

- Өҫ-кейемдәрҙе тәртипкә килтерергә!

- Башҡорт еренең башҡорт урманында тик башҡортса һөйләшергә, йәмһеҙ һүҙҙәр ҡулланмаҫҡа!

Ҡышбабай: Һеҙ ризамы? Һеҙ әҙерме, хайуандар?

Бөтәһе: Беҙ әҙер!

Юлбарыҫ: Тик... ни, Ҡышбабай, бына Яңы йылда бөтә теләктәр ҙә тормошҡа аша тиҙәр. Минең шундай теләгем бар: зинһар өсөн, таныштырығыҙ беҙҙе һеҙ әйткән гимназия менән!

Бөтәһе: Эйе, эйе. Уның етәксеһе, уҡыусылары менән танышҡыбыҙ килә.

Ҡышбабай: Ярай, улайһа. Мин һеҙҙең теләгегеҙҙе үтәргә ризамын.

Ниндәйҙер хәрәкәттәр эшләй.

Һәм бөтәһе лә залға ҡарайҙар. “О-о-о!” тип һоҡланалар.

Ҡыҙ-йәнлектәр бантик, бүре, арыҫлан бабочка тағып алалар, кейенә башлайҙар.

Ҡышбабай: Был ғына ла түгел, улар һеҙгә үҙҙәренең һөнәрҙәрен дә күрһәтәсәктәр. Ҡарап ҡына тормағыҙ, һеҙ ҙә ҡушылығыҙ! Әйҙәгеҙ, гимназистар!

Музыка яңғырай.

Беренсе уҡыусы: Яңы йыл килә, дуҫтар! Теләктәр ҡабул булһын!

Икенсе уҡыусы: Донъялар имен торһон!

Өсөнсө уҡыусы: Күңел шатлыҡҡа туйһын!

Дүртенсе уҡыусы: Һәр кем бәхетле булһын!

Бишенсе уҡыусы: Гимназия гөрләп торһон!

Алтынсы уҡыусы: Рухыбыҙ ташып торһон!

(Башҡортса бейеү бейейҙәр. Хайуандар һоҡланып ҡарап тора)

Башҡортостан – гүзәл илем,

Беҙ уның киләсәге!

Йәшә, һин, тыуған илем,

Йәшә һин, гимназиям!

(Заманса бейеү)

Ҡышбабай: Афариндар, афариндар! Күңелегеҙ булдымы, хайуандар?

Бөтәһе: Эйе, эйе. Рәхмәт, гимназистар!

Ҡышбабай: Ярай, минең эшләйһе эштәрем, бараһы ерҙәрем күп, китәйем инде. Яңы йылда һеҙҙең изге теләктәрегеҙ тормошҡа ашһын. Яңы уңыштар, яңы бәхеттәр һеҙгә, һау булығыҙ!

Бөтәһе: Рәхмәт, Ҡышбабай!

Беренсе уҡыусы: Эйе. Яңы йыл төнөндә бетә теләктәр ҙә тормошҡа аша тиҙәр. Ә беҙ (Юлбарыҫ: “беҙ ҙә”) бөтәбеҙгә лә иҫәнлек-һаулыҡ!

Икенсе уҡыусы: ...гимназябыҙҙың юбилейын лайыҡлы ҡаршыларға!

Өсөнсө уҡыусы: уңыштарға өлгәшергә!

Дүртенсе уҡыусы: имтихандарҙы яҡшы бирергә!

Бишенсе уҡыусы: юғары уҡыу йорттарына инергә!

Алтынсы уҡыусы: уҡытыусы, тәрбиәселәргә, етәкселәребеҙгә түҙемлек, сабырлыҡ теләйбеҙ!

Бөтәһе : Хыялдарыбыҙ тормошҡа ашһын! Яңы йыл менән, дуҫтар!