"Чачома мастордом моран" ("Песнь о родном крае")
классный час (7 класс) на тему

ЧАЧОМА МАСТОРДОН МОРАН…

Эрзянь литературань панжадо урок

Бажамотне: 1) тонавтомс эйкакштнень чарькодеме, кодамо смусть путыть эрзянь поэттнэ Чачома Мастор валтнэс; 2) кирвазтемс эйкакштнень седейсэ тиринь ёнксонтень вечкемань толнэ; 3) келейгавтомс эрямонть лангс вановтост, кепедемс тиринь келенть ды литературанть тонавтнемантень мелест; 4) кастомс мельстуезь ловномань ёрокчист, сюпалгавтомс кель-валост.

Кедьёнкстнэ: компьютер, валмеревкс марто сёрмадовкст («Эрзянь велесь – раськень лавсь»; «Тиринь масторось – тиринь ава»; «Мастортнэде ламо, чачома таркась вейке»; «Ломань масторсо кизнаяк кельмат»), «Тиринь ёнксом» артовксонь вальма, «Мон сёрмадан тиринь ёнкстон», «Мордовиянь поэттнэ тиринь мастордост» выставкат-невтемат, штатолт, цецят, шумбракши.

УРОКОНЬ ЛУВОСЬ

Тонавтыцясь:

-- Шумбрачи, эйкакшт! Шумбрачи, вечкевикс инжеть! Мелем ушодомс течинь уроконть П.У. Гайнинь валсо.

Тонеть мораса те моронть,

Чачома край, келей ды валдо.

Вечкса мон тонь мазый тюсонть –

Сон авань вановтсо сиялды.

Вечксынь паксят, виреть, лугат,

Шольниця ведеть домка лейсэ.

Тон свал монь седейсэ гайгат

Морыця нармунень вайгельсэ.

Неть лембе валтнэнь вельде П.У. Гайни панжи тиринь масторонстэнь вечкеманзо ды терди весе ломантнень мартонзо вейсэ варштамо перьканок мазычинть лангс ды марямо эрямонть виензэ. Кодат мазычить-парочить аволь нее ломанесь эрямонзо перть, сехте малавиксэкс-вечкевиксэкс сонзэ туртов кадовить чачома велезэ-ошозо, чачома кудозо, тетянзо-аванзо, лелянзо-ялаксонзо, патянзо-сазоронзо -- весе тенень меритькак Чачома Мастор. Течи минек урокось алтави эрзянь сёрмадыцятненень, конат эсь шкинемасост шныть-гайгевтить минек ёнксонть мазычинзэ ды весе тиринсентень вечкеманть.

Маряви эрзянь моролув, кона аламонь-аламонь седе гайтевгады. Лиси эрзянь оршамосо тейтерь, кедьсэнзэ викшнезь нардамо лангсо кшить-салт. Каршонзо лиси рузонь оршамосо тейтерь, сюконить карадо-каршо ды инжетненень, тень вельде невтеви эрзянь ды рузонь раськетнень ютксо ялгаксчись. Моролувось састыне лепами. Лисить эрзянь оршамосо кавто ветицят.

1-це ветицясь:

Минек вейсэнь масторось Россиясь

Лезды монь Мордовиянтень свал.

Сонзэ ванькс мизолксонь эрексиясь

Эжди, кода тиринь авань вал.

2-це ветицясь:

Поздоровт тонеть, Мокшэрзянь Мастор!

Весе теветь вадрясто ветяк

Ды вечкевикс тейтерькс эрьва шкасто

Тон Россия авантень цветяк!

1-це ветицясь:

-- Чачома Масторось эрси покш ды вишкине. Минек туртов покшось – те Россиясь, вишкинесь – Мордовиясь, велесь, ошось, косо чачинек, косо ломантне кортыть тиринь кельсэ ды зярдояк а стувтнить эсь раськест ды коест. Ансяк а весе тень чарькодьсызь, сеедьстэ вастневить ютксонок истят ломанть, конат пек шождасто стувтнить весе тень.

2-це ветицясь:

-- Ванынк, вечкевикс инжеть, Александр Петайкинэнь «Ошонь цёрыне» налксеманть.

Невтеви налксемась.

1-це ветицясь:

-- Арсетяно, оят, тынк ютксо арасть Витя цёрыненть кондят. Кемтяно, тынь алкукс вечксынк эсь келенк ды чачома ёнксонк.

2-це ветицясь:

-- Эрзянь поэттнэ пек ламо сёрмадыть Чачома Мастордост. Эрьва буенть улить эсензэ сёрмадыцянзо. Течи минь алтасынек уроконок Дубёнка ёнксонтень, кона явовты мель ёроков сёрмадыцясо сюпавчисэнзэ. Арсетяно, весенень эйстэнк содавикст Александр Щегловонь, Анна Сульдинань, Александр Араповонь, Любовь Дергачёвань лемтне. Ды малав эрьва поэтэнть шкинемань паргосо ули Чачома Масторонтень, тиринь ёнксонтень алтазь валморо. Теевтяно неть сёрмадыцятнень марто седе малавиксэкс-содавиксэкс.

Лиси тонавтниця, ёвтни А. Щегловонь эрямодо ды шкинемадо. Ловнови А. Щегловонь «Монь чачома Кенде ёнксом» валморось.

МОНЬ ЧАЧОМА КЕНДЕ ЁНКСОМ

Тон сакшнат тень мазый онсо.

Тонь кондят таркань неезь,

Монь чачома Кенде ёнксом –

Ёнкс лёмонь ды инзеень, --

Свал седейсэнь сиянь лееть,

Веждеень келей поймат,

Пандопрятнева килеень

Ды укшторонь тошксемат.

Вечксынь тонь паксятнень келест,

Зярдо тосо гай июль.

Вечкевлия Поводеленть,

Бути Кендесь аволь уль.

Кенденть ледстнезь, свал од цёран,

Свал монь перька цвети май.

Шумбрат, монь авань од пора!

Шумбрат, чисэ валозь край!

1-це ветицясь:

-- Чачома ёнксось максы ломанентень эрямо вий. Ломамасторсо седеяк пштистэ маряви тиринь масторонтень вечкемась. Анна Сульдина поэтессась умок эри Литвасо, ансяк чачома ёнксонтень алтазь мазый валморонзо свалшкас кадовсть эрзянь литературас.

Лиси тонавтниця, ёвтни А. Сульдинадо. Ловнови «Содан, содан, улить лия ёнкст…» валморозо.

* * *

Содан, содан, улить лия ёнкст,

Косо пальмат ды лымбиця морят.

Но монень эсь ёнксось – теке ёвкс,

Эрьва чизэ кази валдо зорят.

Кази лисьмапринень валдо налт,

Тюжа розень каштордыця колозт.

Тесэ прасть кельпрястон васень валт,

Седеезэнь кенерсть васень морот.

Вишка лейненть велькссэ тошкить чейть,

Кузтемпезэнь лопат правты лепесь.

Мик кевензэ тиринь ёнксонть чевтть,

Нартемксэнзэ – ламбамот, а сэпейть.

2-це ветицясь:

-- Александр Араповонь лемезэ содавикс аволь ансяк эрзяньловныцятненень – рузонсетнененьгак. Дубёнка ёнксонь те поэтэсь сёрмадсь кавто кельсэ – эрзянь ды рузонь. Кунсолотано сондензэ.

Лиси тонавтниця, ёвтни А. Араповдо. Ловнови «Мезе кадынь мон тезэнь – а содан…» валморозо.

* * *

Мезе кадынь мон тезэнь – а содан,

Мезе ёмавтынь тезэнь – аздан…

Мельган лексти монь чачома модам, --

теке нецей кирашконтень стян.

Лоткан, амольдян ведне лисьмасто,

Ведесь – эсенек ёнксонь, вадря!

Велем ёнов варштан пандопрясто

Ды талакадан, баягапря.

Ней бу ахолдамс кедтнесэ, ливтямс

ды чарамс велем велькска, чарамс…

Аштян, чатьмонян… Седеесь витевсь,

Витевсь седеесь, шка уш сыргамс.

Курок таго мон тезэнь пачкодян,

Эсень велева ютамо сан…

Мезе стувтынь мон тезэнь – а содан,

Мезе ёмавтынь тезэнь – аздан.

1-це ветицясь:

-- Алкукскак, кода стувтомс моданть, кона ланга савкшнось чийнемс кепе пиземе алга, косо савкшнось вастнемс чилисемат-чивалгомат, кунсоломс цёковонь морот… Тиринь ёнксонтень вечкемась а стувтови, а нардави иесэ-шкасо, сон свал эри ломаненть седейсэ. Седеяк кеме чачома кудонтень вечкемась. Те парсте редяви Любовь Дергачёвань шкинемасто.

Лиси тонавтниця, ёвтни Л. Дергачёвадо. Ловнови «Велень кудо» валморозо.

ВЕЛЕНЬ КУДО

Косо-бути мондень пек васоло

Тонь седееть лембестэ чави.

Косо-бути чокшне ланга толось

Каштом эжди, качамо нолды.

Косо-бути… Вайгельпетне срадыть –

Те мон тонеть седейга капшан.

Тон монь эйсэ учат, тон тонадыть,

Теке содат: зярдо-бути сан.

Содавикс киуло, янось сезевсь…

Аламнес вальматнень ваксс озан.

Столенть песэ сорны авань кедесь…

Тиринь кудом… Кода мон талнан!

Карксамос комавтыя прям тонеть,

Мелят сёксня тон монь ков ильтить.

Нать, седеесь мариця, нать, содыть,

Кодат эрьванть икелев стить кить.

2-це ветицясь:

-- Ней, вечкевикс инжеть, аламодо оймсетяно. Кунсолотано нурька морынеть сеть аволь пек превей эрзятнеде, конат а чарькодьсызь тиринь келест питнензэ ды бажить полавтомонзо лия раськень кельсэ.

Моравить нурька морот.

* * *

Ванят-Манят – эрзянь ломанть,

Тиринь кельсэ а кортыть.

Рузонсентькак а содасызь,

Келест кода понгсь менчить.

* * *

Ашо кшинь рамамо Маня

Якси лавкав яла.

-- Течи хлеба не возьму –

Ярмаком пек мала!

* * *

Манянь кармавты авазо:

Модарькат таргак, Маня!

-- Мамкай, каськав совак азё,

Мон теперь культурная!

* * *

Через речку – леень трокс

Кепе проходила.

Не успела чалгануть,

Пильги намочила.

* * *

Ваня кундсесь кувать калт,

Вейкеяк эзь нее.

Ёвтни: -- Почему-то калт

Нету в чинев лее!

* * *

-- Ваня, школав мекс а молят?

-- Я сэредивакаю.

-- Ваня, эрзякс мекс а кортат?

-- Рузокс кортывакаю!

* * *

Ванянь кевкстизе рузава:

-- Где, Иван, корова?

Ваня талакадсь: -- Мезе?

Наш корова в кардазе!

* * *

Аволь ансяк Ванят-Манят

Тиринь келест ёртыть,

Аволь ансяк Ванят-Манят

Истя рузокс кортыть.

Тонавтыцясь:

-- Видеть морынетнесэ валтнэ. Улить, улить ютксонок истяткак, конат весе вийсэ бажить явомо эсь кельдест. Сынь а чарькодить: чачома ёнксонть, чачома келенть вечкемась – те васняяк тиринь авать вечкема. Стувтомс тиринь авать – покштояк покш пежеть.

Вечкеде эсь масторонок ды келенк! Вечкеде малавиксэнк ды ялганк! Кандодо эрямонтень валдо! Топавтодо Тиринь Масторонк лезэс паро тевть! Теньсэ – эрямонок смустезэ.

1-це ветицясь:

-- Течинь вастовоманок прядовсь. Сюкпря весенень!

2-це ветицясь:

-- Уледе шумбрат ды уцяскавт! Вастомазонок!

Галина ГЕРАСИМОВА,

Саранск ошонь 12-це гимназиянь

эрзянь келень тонавтыця