Анай-атаен шара вераськон
статья на тему

                                  Анай- атайёсын шара вераськон

Ас шаердэ гажан пичи дырысен пыча. Нырысь ик, анайлэн кылыныз, кырзан гуръёсыныз, песянайлэн выжыкылъёсыныз, атайлэн улыны но ужаны дышетэменыз. Нош берло аръёсы улон воштиськемен, тросэз йылолъёс ышо-быро. Адями ас выжыезлэсь ишскалскыны кутскиз. Нош выжытэм писпу, со писпу овол ни.

Сое кемалась валазы 1-ти дышетсконниын. Та дышетсконниын гинэ анай кылэз дышето 1-ти классысен 9-ти классозь Вера Григорьевналэн тыршеменыз луыса. Нош озьы ке но дышетсконниын удмурт кылэз уд кылы.  

Котькуд дышетскон ар азьын портэм юанъёс сюлмаськыто: кыче пиналъёс мон доры 5-ти классэ лыктозы шуыса? Верасько-а анай кылынызы? Яке чылкак зучомемын-а ни? Кыче семьяосысь соос луо? Семья куспазы кыче кылын верасько- удмурт яке зуч? Тачегес юанъёсын пыриськод нырысети уроке. Ас азям пуктэм юанъёслы валэктонъёс шедьтон понна портэм темаосъя: семья, гурт пудоос но тылобурдоос, пойшуръёс, буёлъёс, действиез но инкуазь явлениосты возьматись кылъёс но мукет та выллем темаослы уж дэмласько.  Та дышетскон аре 5-ти классам вань 22 пиналъёс пушкысь умой валало анай кылзэс но пичияк ке но вераны быгато удмурт кылын 6 нылпи гинэ, нош мукетъёсыз шугъясько.

   Анай кылэз дышетон секытэн сетиське, малы ке шуоно тросаз удмурт семьяосын зуч сямен верасько. Бен, зучомем пиналъёсын урокъёс ортчыло кунгожсьор кылэз дышетон выллем:

кылзэмез валаны дышетыны;

вераськыны дышетыны;

лыдзиськыны дышетыны;

гожъяськыны дышетыны.

  Малпаськод ини, кызьы пиналъёслэсь сюлэмзэс ас палад кароно, берыктоно. Кызьы урокъёсты нуоно, соосты мед витезы, мултэсэн медаз лыдъялэ шуыса. Котькуд урок мур тодон сетэм сяна, мед жутоз нылпиослэсь огъя лулчеберлыксэс, мед пычатоз зеч сямъёс.

Кутисько чем гинэ урокам  шудон амалэз. Пиналъёслэн улоназы уго шудон бадзым инты басьтэ. Со сярысь аслаз «Психология игры» книгаяз вера тодмо педагог Д.Б.Эльконин но. Со шуэ, вашкала дырысен шудон визьнод басьтон амал луэ, юрттэ коллектив кылдытыны, выль тодон валан басьтыны, со тодонъёсын ог-огеныд люкиськыны.

Таче урокъёсты чемысь ортчытисько классэз группалы люкыса. Сое микрогруппаос шуыны луоз на. Одигез нылпи «дышетись» луыны быгатоз, нош мукетъёсыз – «дышетскисьёс». Шудонэз нуись (со луэ дышетись)- «эксперт». Уроклэн луыны быгатозы таче люкетъёсыз: «дышетисен» пуктэм ужпумез быдэстон, ог-огенызы кенешон, йылпумъян лэсьтон, куд-ог дыръя «экспертлэн» дунъет сетэмез.

Та амалъя ортчыло «Лексика» темая огъясь урок-шудон, Урок –практикум «Корректор», «Зечбур!» но «Выль даур» газетъёслы сизем урокъёс (заметка но репортаж сярысь валан),урок –малпаськон, урок-серекъян, урок-суредан. Мынам малпамея, группаосын ужан туж пайдае. Пиналъёс ваньзы чош кылбур но, текст но, суред но кылдыто.

Урокын огшоры (традиционной) амалэн ужаку, быдэс класслы огкадь уж сетиськомы, соизлэсь яке таизлэсь дышетскисьлэсь предметъя огъя тодон-валанзэ лыдэ басьтытэк. Кыче ке янгыш лэсьтэ ке оценказэ кулэстиськомы. Дифференциация амалэн ортчытъяськись урокъёсын котькуд быдэстэм ужлы нимаз оценка пуктисько. Собере вань оценкаосты огинэ карыса, шоро-куспо лыдпус поттисько. Сое ик пуктисько журналэ. Пиналъёслэсь тодон-валанзэс чакласа, классэз 3-4 уровеньлы люкисько. Таче урокъёслэн туж бадзым пайдазы: ужало ваньзы, тэк пукисез овол; ог- огзылэсь тодон-валанзэс дунъяны дышетско: зол анай кылзэс тодись нылпиослы выли шуглыкен уж сетъяны дыр тырме.

Зуч кыл тодэмзэс но кутыса ужасько на (яке интегрированной урок шуиське). Чошатыса сетисько куд-ог зуч но удмурт грамматикалэсь темаоссэ. Та амал юрттэ зуч кылын материалэз тодазы вайыны, нош удмурт кылын выльзэ тодыны, аспортэмлыксэ валаны..

Шумпотисько,школаямы вань суредъёсын кылсузьет, но со тырмыт овол. Пиналъёслы удмурт кылэз валаны капчигес мед луоз шуыса , тематической урокъёс ортчытъясько. Выль амалэз дышетонам пычатыны мыным бадзым юрттэт сето «Вордскем кыл», «Кизили» журналъёс но «Зечбур!» газет.

 Коня ке аръёс чоже ни урокъёсын мон А.Н.Журавлёвалэсь «Анай кыл» учебниксэ кутисько. 9-ти класслы дышетос (учебник) потымтэ на бере , трос шугъяськонъёс кылдо: кызьы ужано, ма вылэ пыкиськоно.Текстъёс уроклы дасяно, утчано луэ, малы ке шуоно та учебник (дышетос) овол гожтэмын удмурт кылэз ляб тодись нылпиослы. Шумпоттэ со, туэ вуиз Боталоваен гожтэм дышетос но гожъяськон тетрадь 5-ти класслы.

Урокъёсын тодон-валан басьтон сяна, ортчытъяськом тунсыко адямиосын пумиськонъёс но. Кемалась ик овол Римма Ивановна Данилова вал куноын. Тупатэмын кусыпъёсмы ерос но нылпи лыдзиськонниосын ужасьёсын. (Елена Геннадьевна,      Яковлева Т.Ф.) Тунсыко веранъёсын лыктэмзэс нылпиос возьмаса гинэ уло. Нош Алешкина Г.М. вераз, кызьы кисьма удмурт кылын потись газетмы. Собере вуылимы Можгакарысь  типографие но. Ма  та ужрадъёсмы сярысь нылпиос асьсэос ик газет баме  мылкыдзэс вераса заметка гожто.

5-ти классын луисько на классной руководитель но. Классэн ужанам  удмурт шомен пычам ужрадъёс ортчытылисько: И.Гавриловлэн но Михаил П-Петровлэн вордскем гуртазы ветлимы, отын удмурт калыклэсь сиенъёссэ веръям, шудонъёсын тодмаскимы, пиналъёсын чош родительской собрание ортчытимы, нош кылем кос нуналэ вал мукетыз ужрадмы, кудзэ нимамы тазьы «Удмурт кылэз гажасько, удмурт кылын верасько». Татчы лыктизы отем куноосмы Семенова Анна Ивановна- дышетон удысысь методист, Алешкина Галина Михайловна- «Выль даур» газет понна кыл кутись но трос гинэ  анай-атайёсмы. Нылпиос возьматизы урокын ужамзэс, ортчиз Можгакарысь но ёросысь гожъяськисьёслэсь но кылбурчиослэсь улон сюрессэс, творчествозэс тодонзэс эскерон нылпиослэн но анайёслэн командаоссы вискын. Вормизы дышетскисьёс. Вераськонмы азьланьтиськиз жок котырын, удмурт сиёнъёсын чай юыса.  

Удмурт кылэз дышетись пиналъёс уг палэнско карын ортчылись ужрадъёслэсь. «Воршуд» яке читательской конференция,олимпиадае, нош али нылпиос пыриськыны дасясько Н.С.Байтеряковлы сизем ужрадэ.

Элькунын ортчись ужрадъёсын но 1-ти дышетсконниысь пиналъёс вормисьёс пушкын.

Мар сетэ  анай кылэз дышетон?

1-тиез :  

Тодосчиослэн верамзыя, нылпиос кык яке солэсь ятыргес кылъёсыз тодыса луо дисьтисесь, амалоесь, быгатисесь,уг шугъясько ваче вераськон кусып кылдытыны. Соос ваньмон дыръязы удмурт возьматонъёсы, радио вераськонъёсы, викторинаосы, удмурт кылын герзаськем проектъёсы пыриськыны быгатозы. Огъя вераса, туала улон сюрести соослы вамышъяны капчигес но тунсыкогес луоз.

2-тиез:

«Анай кыл тодэм песьтэр уг куры»-шуоз вал анае аслам нылпиосы пичи дыръязы.. Трос гинэ вераськон мынэ, удмурт кыл урокъёс , пе, дырез быдто шуыса. Трос кыл тодэм пиналлэсь визьзэ узырмытэ, малпанзэ со быгатэ вераны соиныз но таиныз кылын. Озьы бере, со юнме дыр быдтэм овол ни. Асьмеос дышетыны кулэ анай кылмылы, нош собере пинал, бадзым будыса, ачиз быръёз кулэ-а овол-а солы анай кылыз. Дышетсконниос, анай-атайёс, кудъёсыз нылпиоссэз уг дышето удмурт кыллы, уг сето пиналлы быръён сюрес.

3-тиез муг:

Вань адямиослэн туж дуноез- ожтэк улон. Тодосчиослэн чакламзыя, анай кылэз дышетон со удмуртлыкез гинэ утен овол, со портэм нациослэн куспазы тупаса улон но. Аслэсьтыд калыкедлэсь йылолъёссэ, лулчеберетсэ тодыса гинэ, адями валалоз, сюлэм пыртиз поттоз мукет нацилэсь чеберлыксэ.

Вераны кулэ на: туэ уноез семья бордысь кылдэ. Нылпиос удмурт семьяын пичиисен анай кылынызы вераськыса будизы ке , кыкетиез (зуч) кыл туж чаляк пычалоз школаын, малы ке шуоно дышетон зуч кылын радъяське уго. Анай –атайёс медаз вунэтэ вылэм, лулпушсы нылпиослэн удмурт шуыса. Сое нокытчы уд ваты. Нылпиослэсь асваланзэс (самосознанизэс) пичиысен будэтоно- «Удмурт мон!» шуыны мед быгатозы .

Ибрагим Кунанбаев, казах калыклэн тодосчиез, аслаз вераназ, кудиз нимаське «Назиданиях» шуиз:»Обучать детей хорошо, но, чтобы они служили своему народу, надо учить их родному языку».