Урок – презентация « Свал палыця штатол»
методическая разработка (11 класс) по теме

   Урок – презентация « Свал палыця штатол»

                                            (А.В.Араповонь творчестванзо коряс)

 Сэтьме музыка. 

Тонавтыцянь валось: Шумбратадо! Течи,эйкакшт, минек кедьсэ инжеть,

      мон вешан жо вейке-  марямс эсь прянть  прок эсь малавикс ломань ютксо. Важодемс

     течи, кода свалонь уроксто.

     Мастор лангсо ули истямо меревкс, ёвтамо: келя ломанесь чачи  масторлангс эрямо,

     важодеде, ломаннень паронь теме, эсь важодемасо сюпавчинь , лезэвчинь кандомо.

     Улить ломанть, конатнень чачомстост Пазось казьсы башка ёрокчисэ (талантсо).

Вана течи уроксо карматано кортамо истямо ломанденть.

Уроконть путовксонзо:

келейгавтомс , домкалгавтомс поэтэнть творчествадонзо содамочинть;

кастомс вечкеманть эсь масторонтень, тиринь велентень, эсь келентень, пертьпельксэнтень, эсь раськень культурантень- койтненень-кирдатненень.

Оборудованиясь: компьютер, интерактивной доска.

 Урок- презентациясь алтазь  А.В.Араповонь эрямонь ды творчествань китнень ванноманть туртов.

 1-це слайд (музыка)   ШТАТОЛ…            

Тонавтыцясь: Эсь эрямонзо перть сон палсь теке штатол, валдонзо сравтсь моданть келес , кенярдовтсь ломантнень эсь стихсэнзэ , конат лиссть сонзэ потмаксстомо седейстэнзэ. Свал стакачистэ вешсь лезэ Пазонть пельде:

2-йе слайд (книга) Тонавтыцясь наизусть ловны:

Кирвазтян штатол-

палозо,

Алтазо монень чи,

Кирвазтян штатол-

валдозо

Штавтозо монень ки.

Чачинь мон теке ёмамо…

Косан? Аздан те шкас…

Макст монень шка ды оймамо,

Ванстомак, Верепаз!

Макст монень лембе-

кенеремс.

Макст монень  неже-

стямс.

Макст монень вий-

а певердемс

Ды эсень ким ютамс.

3-це слайд. Эрямосо, творчествань тёкшос пачкодемстэ тензэ савсь кирдемс ламо мезе, но Александр кортнесь , што сонзэ ули эсензэ вальмазо ды вайгелезэ, конась киненьгак а сельгеневи, а нельгеви, а чалгсеви, а ёртови.

4-це слайд. Александр Васильевич  зярдояк эзь шна пря, эзь чаво мокшнасо мештезэнзэ, эзь пижне верьга вайгельть, кодамо  сон пек паро ды содавикс  поэт ,сон яла пейдезь , седеймарязь кортась:

Эх,  эзь лисе эйстэнь стихень сёрмадыця,

Лиссь ансяк конёвонь вадниця…

 Тонавтыцясь: Неть стихстэ саезь кавто строчкатнень ловномсто, мезенть тынь чарькодтядо? Кодат поэтэнть  обуцянь ёнкссто кортави?

Тонавтницясь: –Сонзэ скромнойчидензэ, прянь а шнамодо, простой чиде, видечиде.

 5-це слайд.                                Эпиграфось: «Поэтэкс а лисснить,

                                                             Поэтэкс чачнить…»

Тонавтыцясь: Кода чарькодьсынек эпиграфокс саезь строчкатнень? Мезе вельдест невтеви?

 Тонавтницясь -Видеть валтнэ: «Поэтэкс а лисснить, поэтэкс чачнить».

- Бути вана минь сайтяно мель, озамс ды снартомс сёрмдомо стихть, - те а топавтови тенек, истя кода Пазось тенек эзь максо казне, ёрокчи - стихень сёрмадоманть, кода А.В.Араповнень.

Тонавтыцясь:  Те истя. Александр Арапов алкуксонь поэт. Ды тень минь весе содасынек. Сон а весть ульнесь минек школасо инжекс, зярдояк эзь ютне вакска, зярдо сыль Кобале велев. Сон минек, эсенек ульнесь ломанесь.

  6-25-це слайдтнэ.

Тонавтницясь:
   Александр Васильевич Арапов чачсь 1959 –це иень сундерьковонь1-це чистэ Дубёнкабуень Кенде велесэ, косо се порава важодсть тетянзо-аванзо тонавтыцякс. Но весе сонзэ эйкакшонь ды од поратне ютасть Кобалевелесэ, косо седе тов важодсть сонзэ тетязо ды авазо.  7-це классо тонавтнемстэ стихензэ печатавкшность райононь, республикань газетатнесэ, «Пионерэнь вайгель» журналсо, «Пионер» Россиянь журналсо. 1977-це иестэ Кобалень школань прядомадо мейле тонавтни Н.П.Огарёв  лемсэ МГУ-нь филологиянь факультетэнь журналистика отделениясо. Парсте тонавтнемань кисэ 3-це курсонь прядозь кучсызь тонавтнеме Москов ошов, М.В.Ломоносов лемсэ МГУ-нь журналистикань факультетэв, конань прядомадо мейле Алексанндр Васильевичень кадныть важодеме тоско, Московсо, но сон велявты эсензэ ёнксов. Мейле (1983-це иестэ) саезь  малав кавто иеть важодсь «Мордовский университет» газетань корреспондентэкс. 1985-це иестэ тердизь роботамо «Сятко» журналонь редакцияв. Ульнесь литсотрудникекс 1985-1989-цеиетнес, поэзиянь ды публицистикань отделэнь редакторокс 1989-2000-це иетнес.  2000-це иестэ саезь – «Сятко» журналонь главной редактор.

1994-це иестэ - Россиянь Писателень союзонь член. Мордкизэсь нолдынзе поэзиянь ниле книганзо: «Вайгель» (1990), «Вальма» (1992), «Взмах» (2001), «Мейле» (2006). Стихензэ совасть вейсэнь сборникс, конат лиссть Саранск, Челябинск, Самара,  С-Петербург, Москов, Хельсинки, Будапешт, Таллинн, Тарту оштнэсэ.

2000-це иестэ- «Литературная Россия» газетань лауреат. 2003-це иестэ- Мордовиянь заслуженный  поэт .

Тонавтницясь:  26-37-це слайдтнэ.

Александр Васильевич вечкизе эрямонть истямокс, кодамокс сон мольсь, кодамокс максозель тензэ. Вечкизе эсензэ веленть, кенериця паксятнень, кува вечксь кепе чийнеме: лембе тикшенть ланга, лембечинь марязь.

                                                                      Чачома веле…Тесэ тантей коштось.

                                                                       Истямо тантей: лексят- а лексеват.

                                                                       Ютан эсень ульцява- паксяпева,

                                                                       Маряви малавиксэкс эрьва чочкось.  

  
                                                                        Кудотне весе эсест лемсэ кадовсть-

                                                                        Васяень, Галань, Шипагань, Шаргаень…

                                                                        Сынст ютксо ансяк минекесь полавтовсь,

                                                                        Миинек…Эх…Аштеде, варштавкс каян.

           эли вана неть строчкатнесэ сёрмады:

                                                                         Эсь велевтеме мон сизян.

                                                                         Варштамо эсень велев сан-

                                                                         Вечкевикс таркава ютамо,

                                                                         Тикшетнень потмова лытамо.

                                                                         Талайс, талайс тува яксян,

                                                                         Ды ялатеке тень аламо.

                                                                         Тов, косо чуди вишка лей,

                                                                         Тов, косо кассы пиже чей,

                                                                         Монь ули мелем сыргамс видьстэ,

                                                                         Тов, косо колмо эскелькст  кистэнть

                                                                         Каль ули вейке, каль сэрей-

                                                                         Ашти , чатьмони марявиксстэ.

                                                                         Те мон озавтыя каленть…

                                                                         Токавтсынь чувтонтень кедень-

                                                                         Маряви лембекс сэтьме чувтось.

                                                                         Монь эйкакшпингесь тезэнь стувтовсь.

                                                                         Ламо…ламо кадовсь тезэнь.

                                                                         Нурси… нурси седеенть увтось.

      Тонавтыцясь:   38-50- це слайдтнэ. Мон лован эсь прям  уцяскав ломанекс, монь эрямом весетнеде пек сюлмавозь те ломаненть марто. Тонавтнинек ве классо 11 ие., ды седе товгак лиссь истя, што минь эрямонь перть пек сеедьстэ вастневкшнинек мартонзо . Истят ломанть , кодамокс ульнесь Александр Васильевич, неень эрямонь ки лангсто вастат аламо, эли овсе арасть: те сэтьме, домка ойме, валдо мель ды валдо прев марто. Сон зярдояк эзь корта амазый валсо, вайгелень кепедстезь, киненьгак эзь арсе берянь, киньгак лангс сельме эзь сявадстне , ды ансяк кенярдсь вадрянть коряс. Зярдояк эзизе стувтне школанть, свал совсесь ды вакска эзь ютне, бути савкшнось тензэ улемс  Кобалесэ., эзинзе стувтне тонавтыцянзо, ялганзо-оянзо, шабранзо,роднянзо- раськензэ, сеетьстэ вастневсь мартост.  

       Поэттэ сехте паро ледстнематне – те сонзэ стихтне. Эсь творчествань смустенть весемеде парсте ёвты сонсь поэтэсь  строкатнесэ:

                 Эрзянь масторсо телетне рузонь,

                 Моротне –рузонь,

                 Сёрматне – рузонь,

                 Ансяк лайшемась – эсенек!

51-73-  це слайдтнэ

Тонавтницясь:  Мелезэ витевиль, бути савкшнось улемс тензэ велесэ, ютнемс эсензэ эйкакшпингень ульцяванзо:             

Велень ульця - пиже  килейть, кальть…    

Пирявкс потсто вальмат ёнон  ваныть.

Ойме ёжонь ёвтамс арасть валт -  

Чатьмонян… Сельведень туемс  анокт.

Мелесь — сэрьсэ, сэрьсэ тезэнь прамс —

  Луганть лангс, чачома кудом малас,

  Моданть, кона кольневтсь монь, токамс —

  Чевтьстэ-чевтьстэ кутмордамс ды паламс.

74 -78-  це слайдтнэ

        Тонавтницясь: Сэрей, чевте, пси чисэ эждязь тикшесь, лыкавты ашо пейделька пельтнесэ,овтонь баягинетнень  сэнелачист цидярдоманть.  Саша ледстниль: «Мон пек вечкинь тикше ланга чийнеме кепень пильгть, ды монень марявсь- ардан алаша лангсо певтепе пертьпельксканть, ливтян а содавикс арсематнес да кадан мельган кувака вайгельбеть.Монь лангс ваныть овто баягинетне эрьва ёндо, а велькскам уить пейделька пельтне…( «Ашо пельне уи, сонсь а соды ков…»).

79 -90 -це слайдтнэ           

   А.В. Араповоньморо : «Ашо пельне уи, сонсь а соды ков…» (кунсолови)

            Чевте таркинесэ,

Лембе лушминесэ

Мадезь аштян — велькскам

Ков-бути васов

Шожда, теке валнэ,

Ашо пельне уи,

Ашо пельне уи,

Сонсь а соды ков…

Косо–бути атякшт,

Атякшт эйсэнь кроить,

Косо-бути кискат

Онгить ды ирныть.

Косо-бути пеель

Оймень кисэ човить,

Косо-бути кисэнь

Варакат сорныть.

Нардасынь сельведень

Панар ожа песэ:

Ютыть стака шкатне,

Ютыть зярдояк…

Ансяк бу уцяскавт

Улевельть эйкакшон,

Ансяк бу уцяскавт…

Монсь уш кодаяк.

91 - це слайд.

Тонавтыцясь:  Вана кода корты А.Араповдо Россиянь журналистэнь Союзонь , Россиянь Союз  писателень членэсь Тамара Баргова.

  Бути те стихотворениядонть-мородонть башка Александр Арапов мезеяк лия а сёрмадовольгак, арсеви, сестэяк улевельть сонзэ поэзиянть ламо содыцянзо-вечкицянзо. Пек уш оймень содазь, ноцк-ноцк седеень тантейстэ чавомас, невти неть зярыя строчкатнесэ эрямонть питнейчинзэ, мазычинзэ, моданть лангсо эрьвантень явозь марявикс-неявикс тарканть. Койсэнь, сонсь поэтэськак эсь творчествасонзо те стихенть лови тёкшокс, а стякояк од книгазонзо сон путозь васенцекс.

 Тонавтницясь:         Эрямось нурька- кивчкади , прок ёндол.

                                      Ламбамо- сэпей-питнезэ арась.

                                      Шкась палы…Мейле абунгадат- тонол.

                                      Варштат: менстязесь-менстязь,

                                      Празесь- празь.

                                      Седеесь теке соды- талны, ризны..

                                      Одксчись ютась, а саеви одов.

                                      Исяк марявсь- а прядови те кизэсь,

                                      Течи неят- ушосонть сёксень ков.

                                      Минь сравтнетяно шканок апак жаля,

                                      Мейленень сонзэ каднотано яла.

                                      Аютко яла…Стувтнетяно свал:

                                      Пазонть икеле сави кирдемс вал.              

92-9 3-це слайдтнэ

   Тонавтницясь:   Весемесь ушодови эйкакшпингстэ. Александорнэнь прась покш уцяска: чачсь ды кассь кеме ды ояксчинь семиясо, косо ульнесь ансяк вечкема, чарькодема. Хоть эрясть аволь сюпавсто, но покш кенярксчисэ.

94-97 -це слайдтнэ

       Тонавтницясь:        Тетязо- Василий Павлович  ютызе весе Великой Отечественной войнанть, 1963 –це иестэ саезь важодсь  Кобалень школасо историянь ды географиянь тонавтыцякс, ды аволь ансяк. Сон истя жо сёрмадсь ёвтнемат эрзянь кельсэ, конатне лисснесть Саранск ошсо.  Стихень ды литературань слогонь ладсемань васень уроктнень А.В. максынзе тетязо.

              Тонавтомак, тетяй, тонавтомак,

              Кода эрямс монень ломань ютксо!

              Кода улемс монень, превс путомак,-

              Седей куншкас эрьва валонть путса.  

              Тонавтомак, тетяй,прянь кандомо,

              Тонавтомак, тетяй, чатьмонеме.

              Тонавтомак, тетяй, цидярдома,

              Кунсоломо, тетяй, ды кемеме.

               Ёвтак, тетяй, кода монень лексемс,

               Кода ванстомс ойменть, а ёмавтомс,

               Кода шканть ды эрямонть а менстямс,

               Кода монень муезенть а правтомс.

«Цёрань моро»

         Тонавтницясь:  Пазось казизе Александр Араповонь ёрокчисэ, кона вешсь эсь лангсо покш важодема. Книгась ульнесь тензэ свалонь ялгакс, мартонзо сон маднесь, мартонзо ярснесь, мартонзо оймсесь, мартонзо важодсь.

А.В.Арапов: стих …

Как птица от боли 

Сорвётся строка впопыхах,

Но тут же остынет,

Как только забрезжит на гранках.

Опустятся крылья,

Замрёт мой отчаянный взмах

Над миром из масок,

С которым душа не в ладах.

Так хочется, чтобы

Хотя бы на треть- наизнанку.

 …А думалось –бал,

Оказалось же – просто гулянка.

98-102 - це слайдтнэ

Тонавтницясь: Весемева неяви, што А.В.Араповонь стихень сёрмадома лувось

                            пек малавикс  Сергей Есениннэнь.

Одиноки и печальны

На закате купола.

Расставаться, удивляться,

Изумляться- жизнь была…

На пороге у безмолвья

Задыхаться от бессилья.

А за окнами- молчанье,

В белом саване Россия.

Вслед себе смотреть и плакать,

Отвернуться и уснуть.

…Снег в России грустный, грустный,

Тихий, как последний путь.

А вана кода сёрмады С.Есенин:

Потонула деревня в ухабинах,
Заслонили избенки леса.
Только видно, на кочках и впадинах,
Как синеют кругом небеса.

Но люблю тебя, родина кроткая!
А за что - разгадать не могу.
Весела твоя радость короткая
С громкой песней весной на лугу.

Тонавтыцясь. Неть кавто поэттнэнь стихест пачк сотазь Россиянь оймесэ, сынь сэредстить седеест эсь масторост, пертьпельксэст, ломантнень – эрицятнень кисэ. Сынь- Россиядо морыцят, эсь келест вечкицят ды эсь масторонь ломантнень оймест чарькодицят- содыцят.Секскак лововить сынь сехте вадрякс, питнеекс, малавиксэкс ды шождасто чарькодевить эрьва ловныцянтень.

Тонавтницясь: Ютко шкасто седи гитарасо, ладси морот эсь стихензэ лангс, ютавтни эрзянь стихть, поэмат, ёвкст рузонь ды финнэнь кельс ды мекевланк.

103-108 - це слайдтнэ

 Тонавтницясь:Эсь творчествасонзо яви тарка  ВО ды Афганонь войнатнесэ чавозьтнень

                      туртовгак:

Моро «И поставит пуля точку»…(кунсолови)

Тонавтницясь:

Пейдсь ды авардсь народось веленек,

Баягатнень гайтесь куля кандсь.

Куля, конань учнесть чинек- венек,

Куля, конань эйсэ салонь тансть.

Ванька, Мишка, вишкинесь Олодя

Аштесть ды эзть мереве валгак.

Чатьмонсть, ды сельведест петнясть модас-

Сынь а несызь тетяст зярдояк.

                    Моро «Иван».

109-114 -це слайдтнэ

Тонавтницясь:

Эрямонь сех кувака пельксэнть Александр Арапов ютавтызе Саранск ошсо.Но седеезэ свал тердсь сонзэ тиринь велев, тошначись эзизе кадно поэтэнть меельце читнес.  Эрямонь меельце читнестэ , чиде икеле сон сакшнось инжекс роднянстэнь-раськенстэнь, ютынзе весень, якась покштянзо-бабанзо , лелянзо, сыре патянзо калмост лангс, ютась велеванть. Сакшнось остаткадо, мерят простнеме.

Кортыль, што стихензэ лисить модасто , секс сынь истят виевть, эдь сынь молить, чудить ютазь эйкакшпингстэнть, од порастонть, эрийкс стильть икелензэ малавикс  тензэ ломантне: тетязо, авазо, лелянзо, патязо, конатне умок уш юткстонок тусть се эрямов, косо арась сэредькс, кувсема, косо ансяк кеняркс. Ды свал ульнесь мелезэ велявтомс се шкантень, конастонть зярдо-бути арсекшнесь седе курок туемс ливтязь… Эсь тиринь велев!!!

                     Зярдо истя, седе уш а ков-

                     Ули монень стака, вейке мелем:

                     Саемс кептерь ды пачкодемс тов,

                     Косо ашти лей чиресэ велем.

                     Стамбаро автобусось сырги,

                     Ды вальмантень вановксом лепштяви.

                     Макст оймамо, лездак монень ки!

                     Кадык оймесь тошначиденть яви.

                     Ошонть, кона кельме, теке кев,

                     Сонзэ мон умок арсинь кадомо..

                     Ансяк содан: велявтан мекев

                     Таго прянть муцямо ды сюдомо.

115-116-це слайдтнэ

Физминутка (оймсема шка).  Нолдави музыка (нармунтнень цёледемаст)

Тонавтыцясь:

А.Арапов эсь пертьпелькстэ морыця: вечксь кунсоломо нармушкатнень морамост.  Вечкинзе весе иень шкатнень. Ды кода а вечкемс те весе мазычинть! Варштадо вальмава… Тундо… Зяро мазычи! Зяро лаки вий! Мерят, весе пертьпельксэсь вельмесь,одс чачсь!

Явтано миньгак оймсема ютконь шка: озатано видьстэ, кувакасто таргасынек ойменэк, лавшомгавтсынек прянок , конясынек сельменэк ды кунсолозевтяно:

   Лембе, маней чись кази тенек валдо эрямо, шумбрачи, ламо кеняркс , алты паро ялгат,. Нармушкатнеяк тердить минек мартост ливтямо маней чинтень, мазыйстэ ды видечисэ эрямонтень. Либордозевить , токнозевить минек седейтне, ды миньгак мартост вейсэ анокт ливтямо верев, верев, верев… Таргасынек ойменэк кувакасто, панжсынек сельменэк.  

ПАРЯК ,миньгак арсинек стихень коряс зярыя строчкат, рифмат?

  Таго кундатано эсь тевентень.

117-118-це слайдтнэ

    Тонавтницясь:  Кода сон маштсь морамо! Сезнесь аволь ансяк эсензэ седеенть, но и кунсолыцятненьгак. Сон зярдояк эзизе кекшне потмоёжонзо,эзь арсе ды эзь пеле-, а кода вастсызь моронть?   Содась вейке –сынь лисить вечкезь ,седейстэ.

119-120 - це слайдтнэ

   Тонавтыцясь:

 Араповонь стихтнесэ маряви ламо ризкс, но сон корты теде апак кекше, апак визде. Те ризксэсь валдо, ванькс, секс што сон автор-лирик(морыця) весе седейсэ.

Виздезь ладсо бажи ёвтамо , што сонзэ эрямова ютась вейке  вечкема- козяйканстэнь:              

                                   Жена моя- вселенная моя!

                                   В ней кружится ребёнок, как планета.

                                   А вкруг неё

                                   С рассвета до рассвета

                                    Ещё один кружится,

                                    Это- Я.                              

 « РОМАНС» (кунсолови)

Тонавтыцясь:Пек вечксь ваномо менеленть лангс, кевкстематнень лангc мериль, што тештетне явовить эсест юткова 88 (кавксонькемень кавксо)  пельксэв(созвездияв), Ды эрьва ломаненть ули эсензэ тештезэ. Вейкесь  сонзэ, кона вансты , эжди, лезды…

121-122-це слайдтнэ.

Моро «Кельме теште»

 Кельме теште, мазый теште,

Эйсэнь вансты, эйсэнь эжди…

Тонавтницясь:

 Творчествань эрьва ёнкссо Александр Арапов нейсь  «Ломаньстэ ломань»,сонзэ ушодксонзо. А эрямонь лувось истямоль:                                      

                                                                              Я пою как живу.

                                                                              Извините, выходит нескладно.

                                                                              Можно голос сорвать,

                                                                              Но помилуй меня, чтоб соврать…

   Алкукскак , пек видеть неть строкатне:  сон эсь нурька пингензэ эризе видечисэ, апак манче, берянень апак арсе , берянень апак тее .

Кода эрян, содан монсь.

Эрян истя- кода понгсь.

Ансяк кода бу а прамс…

Пельдень а мезе лутамс.

Телесь токи –учан лов,

Кекшсынь  майсеман васов,

Киненьгак а невтнян

Эсень лангсо пейдян.

Мейле сорнан пелеветь,

Урнан-цийнян, яжан кедть:

«Кадомизь...моткодян,-

Мезеяк а содан..».        

 Тонавтыцясь: 123-це слайд.

 Эрямосонть эрси истя: аволь свал арсетяно чарькодемс сёрмадыцятнень, ды эрьвась арси лангаст кода машты. Ды  сёрмадыцятне лиясто кадовкшныть ськамост эсест арсемаст, мелест, ризксэст марто.

                                               Зярдо ськамот, Пазось мартот корты,

                                               Сон оймезэть кежей вал а ёрты.

                                               Зярдо ськамот, мезекс валтнэнь ёртнемс?-

                                               Ононтькак, сеньгак а кинень ёвтнемс.

                                               Зярдо ськамот, вийть седеесь ташты…

                                               Ансяк оймесь оймсеме а машты.

                                               Зярдо ськамот, менелесь маласо,

                                              Гулькантькак чарькодьсак лато прясо.

Эрямсто, кода сёрмады поэтэсь , ульнесь весе: ульнесть вармат, даволт ды пурьгинеть, но сон весе седейсэ видькстнесь , янксесь эсь манявкстнэнь коряс.

 124-125-це слайдтнэ

Тонавтницясь:

 Аштемковонь 14- це чистэ  куломась нельгизе Александр Араповонь, сезевсь сонзэ сёрмадомань рисьмесь. Лоткась чавомодо седеезэ, конась панжадоль ломантнень туртов. Пертьпельксэськак, конань вечкелизе, ломань ладсо ризнэсь.  Икеле читнестэ ульнесь 30 (колоньгемень) градусст пси, калмамо чистэ тусь виев пиземе. Седе товгак ковонь перть мольсть пиземеть. Те корты, што пертьпельксэсь ризнэсь , авардсь те покш , аёвтавикшка ёмавксстонть А ломантненень лияды вейке- ванстомс валдо ды  лембе ледстнематнень сондензэ, сонзэ творчестванть. Сон сёрмадсь ломанень кис и покш мелезэ ульнесь, штобу марявлизь сонзэ.

 А.В.Арапов : моро «Монь седеем».

125-132- це слайдтнэ

     Тонавтыцясь:

  Сёрмадомань коряс сонзэ оянзо-ялганзо пек ризнэсть , стакасто кандсть те покш ёмавксонть ды алтызь тензэ нолдазь электронной книганть : «Александр Арапов».

Те книгантень совавтовсть весе валдо ледстнематне те Ине ломанденть.

А минек Дубёнкань буень Кочкур велень од сёрмадыцясь Любовь Дергачёва алтызе         А. Араповнень эсь стихензэ:

                 Мы все грешны, но суть сейчас не в этом..

                Одна из звёзд померкла в небесах.

                Но он остался истинным поэтом

                С незатарённой нежностью в глазах.

                Его стихов струится грусть святая

                Из недр земных прозрачных ручейком.

                И откровенья Сашины читая,

                Я неустанно думаю о том,

                 Как дальше жить в расхристанной России,

                 Дышать и петь, когда под дых нас бьют

                 Те, у кого продажной власти сила?

                 Они ни в грош поэта ставят труд.

                 Недуг зловещий музой усыпляя,

                 Страшась извилин Млечного пути,

                 Поэт просил святого Николая

                 Помочь ему все мытарства пройти.

                 Свой путь земной нельзя начать сначала.

                 Сникают вспышки пламени в золе.

                 Ещё одной ромашкой меньше стало

                 На нашей грешной и живой земле.

133-це слайд.

   Тонавтницясь:

   Зярдо поэтэсь пек а шкастонзо туи минек эйстэ,сонзэ эрямозо седе товгак карми молеме, чудеме валдо лейнекс книгань лопатнень ланга, сонзэ моротнесэ, ловныцятнень –кунсолыцятнень мельсэ.  Ютыть иеть. Лия ломанть кармить панжтнеме сынст книгатнесэ. Ды сестэ лопатнень ланга  чийнезевить  вечкемасо чачтозь, уцяскасо пештязь :сорнома, тарнома, либордома, токнома, ды сынь кортазевить авторонь вайгельсэ.

  Тесэ, мертяно истя аштияк:

А всё ж душа его жива-

Среди хранителей Природы

Нежна, как первая трава,

Чиста, как блещущие воды.

А всё ж душа его жива

И, не утратив в мир сей веры,

Питает мудростью слова

Стихов привычного размера.

Вглядись в неё, познай себя.

На грани сумерек и света

В кругу земного бытия

Жива,

Жива душа поэта.

    Тонавтыцясь:

 Ламо бу теевель те потмаксстомо седей ломанесь, бути аволизе сезе эрямонзо куломась, конась апак учо, апак терде, салава ладсо  ды нельгезь нельгизе  эрямостонть.

Остатакапелев , монь мелем велявтомс уроконь темантень «Свал палыця штатол» ды прядсынек уроконть кемемасо, што седе товгак А.Арапов свал карми ютксонок, теке «палыця штатол» :

Течинь творчестванзо ваннозь  пратано ве мельс:  

А.В. Арапов алкуксонь поэт, конань стихензэ лиссть седей потмонь лисьмапрясто, панжадот, валдот, оймес токицят.

Уроконь коряс итогтне:

Мезес тонавты  , кармавты А.В.Араповонь поэзиясь, стихтне?

 -Пертьпельксэнь вечкеме, ванстомо, сюпалгавтомо.

- Вечкеме эсь тиринь ёнксонть, перьканок ломантнень.

- Кандомо кеняркс вейкенек- вейкенек туртов.

- Ванстомо эсь культуранть, койтнень, кирдатнень.

 А оштё мезенть стувтынек  ёвтазденть башка?

 Вечкемс эсь келенть, а виздемс, што минь ЭРЗЯТ.

Кудосо: Анокстамс реферат: А.В.Араповонь эрямонь ды творчествань кинзэ коряс.

Уроксо важодемань кисэ путовить оценкатне:

Уроконть жо прядсынекак минь  Игорь Тальковонь «Поэты не рождаются случайно…» моросонть.

Нолдавить икельце слайдтнэ   (135-149-це слайдтнэ).    

Тальковонь морось «Поэты не рождаются случайно»

Поэты не рождаются случайно, 
Они летят на землю с высоты, 
Их жизнь окружена глубокой тайной, 
Хотя они открыты и просты.

Глаза таких божественных посланцев 
Всегда открыты и верны мечте, 
И в хаосе проблем их души вечно светят  
Мирам, что заблудились в темноте.

Они уходят, выполнив заданье, 
Их отзывают высшие миры, 
Неведомые нашему сознанью, 
По правилам космической игры.

Они уходят, не допев куплета, 
Когда в их честь оркестр играет туш: 
Актеры, музыканты и поэты –
Целители уставших наших душ.

В лесах их песни птицы допевают, 
В полях для них цветы венки совьют, 
Они уходят вдаль, но никогда не умирают 
И в песнях и в стихах своих живут.

Вастомазонок. Весенень ёвтан пасиба, седе тов алтан шумбрачи, вечкема, лембечи, паронь арсема, ломаньксчинь а ёмавтома, конаньтеме неень эрямосонь  пек стака эрямс.