Методическая мастерская
материал

Методическая мастерская

     Тиринь келенть тонавтомась минек Республикасонть топавтови аволь ансяк кода келенть чарькодема, истя жо мартонзо келейстэ ладязь и трямонь-кастомань пельксэзэ. Эряви тонавтомс эйкакштнень аволь ансяк тиринь келенть вечкеме, но и содамо сонзэ историянзо,  теке марто и домкалгавтомс мелест-превест вечкеме  тиринь енксонтькак.

      Икелень путынь истят бажамот: Тиринь келентень, тиринь велентень вечкезь -кастомс алкуксонь ломанть, тонавтнемантень мелень-превень кепедемастонть – парсте тонавтнемантень.

Монь икеле, кода тиринь келень тонавтыцянть ашти истямо кевкстема: кода тонавтомс, штобу тонавтнемась улевель лезэв? Кодат методт нолдамс тевс, штобу эйкакштне паро мельсэ тонавтовольть тиринь келенть, вечкевельть ды ванстовольть сонзэ. Эряви пачтямс эрьва эйдентень те арсеманть:бути еми келесь, еми народоськак. Секскак тестэ лиси  проблема: «Келейгавтомс содамочинь муемань китнень тиринь келень уроксто». Тонавтомань лувонть эряви путомс истя, штобу тонавтницясь сонсь вешневель неть китнень-янтнэнь, ды тонавтнемась тензэ улевель кенярксовокс.

Эрямонь чарось кевери икелев, теке марто шкась веши од информационно-коммуникативной технологият. Монь коряс, берянь се тонавтыцясь, конась а бажи паролгавтомс эсь тонавтомань ды трямонь-кастомань тевензэ, конась а вешни од технологият эйкакшонь тонавтомасо ды мелест кастомасо.

Кодат од технологият веши неень шкась? Васняяк, нама, личностно-ориентированной тонавтомась, омбоцекс, мон лован, исследовательской ды проектной деятельностенть, колмоцекс – те налксемань технологиятне, конатне истя жо кандыть покш лезэ од материалонть тонавтнемстэ.

1. Личностно-ориентированной тонавтнемась эсь лувсонзо кирди эрьва эйкакшонтень  башка кинь муеманть, секс мекс  эрьва тонавтницянть эсензэ способностензэ, ды сынст эряви кепедстемс.
2. Исследовательской ды проектной деятельностенть кармавты ды тонавты важодеме книга, газета, журнал, музейной экспонат марто. Тонавтницясь вешни эрявикс материал, конась домкалгавты содамочитнень аволь ансяк келенть коряс, но и мартонзо сюлмазь истят предметнэнь, кода рузонь келесь ды литературась, историясь, географиясь, ды натой математикаськак.
3. Налксемань технологиятне покш лезэ кандыть кода од материалонь тонавтнемстэ, истя и сонзэ кемекстамсто.
4. Шумбрачинь ванстомань технологиятне – тевс нолдавить эйкакштнень тонавтнемстэ шумбрачинь ванстомга. Те урок куншкасто оймсемань шкась, конась лезды витемс рунгонь, кедень, прянь ловажатнень,  шождалгавты прянть, оймсевтьсынзе сельмтнень.

Нама, од технологиятнень тевс нолдамсто, а эрявить стувтнемс таштотненьгак, конатнень коряс тонавтнесть икелеяк.

Снартнинь ды нейгак снартнян тонавтнемс  лия тонавтыцятнень пельдеяк, ансяк зярдояк а бажан весе теемс сынст коряс. Мельсэ кирдян ансяк сень, мезе малавикс монень ды те тевенть кастан, домкалгавтан, теян лезэвекс. Арсян, важодемась моли а стяко. Те неяви эрзянь келень ды литературань коряс иеде иес динамикастонть, олимпиадатнень результатнэнь коряс. Вана уш зярыя иень перть тонавтницян лиснить призерокс тиринь келень ды литературань олимпиадатнесэ. Ёвтама, аволь ансяк келень ды литературань, истя жо творческой пелькстамотнесэяк.

Теде кортыть минек результатонок

Тонавтницятнень динамикась

Проектно-исследовательская деятельностесь

Олимпиадань результатнэ

Конкурстнэ

Теде башка, эряви тешкстамс тень, што минек тонавтницятне ламо иень перть кочкить максомс экзамен 9-це классто мейле тиринь келень ды литературанть. Кирдить эйсэнзэ парсте.

Школань прядомадо мейле зярыя тонавтницят тукшныть тонавтыцянь киява – поладыть тонавтнемаст педагогической факультетсэ.

Эрзянь ды рузонь кельтнень ды литературатнень тонавтыцятнень марто анокстазель «Национальной школа» программась, конасонть панжовить национальной школань коряс весе эрявикс кевкстематне.

  Те программанть коряс теезь покш важодевкс. Тонавтницятне ды сынст тетяст-аваст покш мельспаросо лездыть  тенек ютавтомс мероприятият, конат кастыть велень койтнень-кирдатнень. Теде кортыть «Адядо, ялгат, минек масторов», «Садо, садо, моронь кужов»  ды лият ютавтозь фольклорной кенярксчитне. Эрьва иене ютавтневи Тиринь келень чись, тердевить тонавтыцят эсь райононь ды весе республикастонок.

Вечкемс эсь раськеть, келеть, тонавтомс тенень эйкакштнэнь – те пек покш ды лезэв тевесь. Секс мекс миненек эряви вельмевтемс эрьва эйкакшонть седейс истямо толнэ, конась карми ванстомо, домкалгавтомо ды кепедстеме раськень койтнень-кирдатнень. Истямо ладсо, эрьва тонавтницясь свал карми аштеме покш каштанчисэ эсь тиринь келензэ кис.  Ды свал покш мельспаросо, апак визде, кортаволь бу: «Мон эрзян, прясто пильгс эрзян. Ды уцяскаван сень кувалма, мекс чачинь эрзянь масторс, конась весе масторонтень макссь ламо превей ды ёроков ломанть»