Внеклассное мероприятие
материал (7 класс) на тему

Тема:  Әнием -  кадерлем. Әниләр көненә багышланган кичә.

Максат:  1) укучыларның  әниләре, дәү әниләре турында мәгълүмат туплау;

                 2) әниләрнең тормыштагы ролен, урынын күрсәтү;

                 3) әниләргә хөрмәт, мәхәббәт тәрбияләү.

Җиһазлау: зал бәйрәмчә бизәлгән, плакатлар һәм шарлар, әниләрнең фотосурәтләреннән     күргәзмә. Залда әниләр, дәү әниләр, укучы кызлар.

                                                 Барышы.

   Музыка яңгырый. Залга укытучы һәм укучылар чыга.

   Укытучы:  Әни, ана, мама, мать , мази, мамми... Нинди телдә,  ничек кенә яңгырамасын,  дөньяда иң кадерле, иң газиз, иң ягымлы алар.  Бүген -  Әниләр бәйрәме. Бәйрәмнәрнең бәйрәме дияр идем мин аны. Хөрмәтле әниләр, дәү әниләр, кызлар, сезнең барыгызны да бу күркәм бәйрәм белән чын күңелдән котлыйм . Сезгә нык сәламәтлек, эшегездә, укуыгызда зур уңышлар телим. Сез тәрбияләп үстергән балалар беркайчан да кайгы – хәсрәт күрсәтмәсен, бары тик куаныч – шатлыклар гына китерсеннәр иде.

1 бала:    Кем ап – ак биләүгә биләп,

                 Төн йокыларын калдырып ,

                  Сине бәү иткән.

                  Гөл шикелле назлап, сөеп,

                  Керфек очларыннан үбеп,

                  Балам дип әйткән, балам дип әйткән.

2 бала:     Тора калсаң әниең янында,

                   Һич оныта күрмә әниең кадерен.

                   Тупас, начар сүзләр әйтеп,

                   Күз укларың белән чәнчеп,

                   Телмә бәгырен, телмә бәгырен.

3 бала:      Китә калсаң әниең яныннан

                    Сирәк кайта калсаң, әниең янына.

                    Хатларыңны ешрак яз,

                    Кайгы,  хисләреңне тупап,

                    Әниеңне зурлап, әниеңне зурлап.

1 нче алып баручы:    Ана –

                                         Бөек исем!

                                         Нәрсә җитә Ана булуга;

                                         Хатын – кызның бөтен матурлыгы,

                                         Күрке ана булуда.

2 нче алып баручы: Әниләр турында сүз башлаганда, иң элек хәтергә туып – үскән йорт, бәбкә үләнле ишегалды, бакчада ап – ак чәчәк атып утыручы җимеш агачлары, күз явын алырлык кып – кызыл яранлы тәрәз төбе – күз алдына килеп баса. Туган йорт, туган туфрак, әни – берни белән дә тиңли алмаслык газиз, кадерле.

1 нче алып баручы:   Безнең әниләребез, апаларыбыз тырыш хезмәтләре белән илебезне ныгытуга зур өлеш кертәләр. Кайда гына эшләми алар: кырларда, фермаларда, мәктәпләрдә, шифаханәләрдә, завод – фабрикаларда...

4 нче бала:   Әни теккән күлмәкне

                        Бик яратып киямен.

                        Шундый матур тегелгән,

                        Күбәләктәй күрәмен.

                                  Мин дә беркөн курчакка

                                   Күлмәк тегеп кигердем.

                                   Моны күреп дусларым

                                   Яраткач бик сөендем.

                         Әнием мине мактап,

                         Кызым, уңган син , диде.

                         Үзең өчен дә күлмәк

                         Тегеп киярсең инде.              

5 нче бала:     Әнием -  сыер савучы.

                           Иртән китә, кич кайта.

                           Сыерлары бигрәк яхшы,

                            Ул аларны ярата.

                                       Әниемә булышам мин,

                                       Сукмаклардан кар көрим.

                                        Әни миңа рәхмәт әйтә,

                                        Ә мин шатланып йөрим.    

“Оекбашлар”  ( З. Хәйретдинов көе) башкарыла.

1 нче алып баручы: Сабый дөньяга аваз сала. Бу – могҗиза. Төн йокыларын калдырып безне үстергән , баккан  әнкәйләрне без онытмыйк; олыгайган көннәрендә терәк булыйк.

1 нче бала:   Кем дөньяга кеше бүләк итә,

                        Ә кешегә – якты дөньяны?

                         Тойгылары кояш кебек кайнар

                         Эретерлек гранит кыяны.

2 нче бала:      Кем күңеле тулган айдай серле,

                            Язлар сыман назлы, ягымлы?

                            Шатлыкларын башкаларга бүлеп,

                           Кайгыларга түзем, сабырлы.

3 нче бала:      Кем куллары өйне, җирне ямьли,

                           Изгелеге үлчәү тапкысыз?

                           Ул , әлбәттә, яшәү чыганагы

Бергә:                Тормыш яме – әнкәй, хатын – кыз!

1 нче алып баручы:  Күмәкләшеп без дә, дуслар,

                                       Җырлап алыйк, әйдәле!

                                      Котлы булсын, гөрләп торсын,

                                      Әниләрнең бәйрәме!

Җыр “Җырлыйм әнием турында”

2 нче алып баручы: Үсеп, буйга җиткәч балалар туган ояларын калдырып төрле якларга тарала. Ә әниләр, газиз әнкәйләр: “Балам кайтыр,”-  дип тәрәзәдән күзен алмый . Дөнья куып, әниләрне онытмыйк, яннарына кайтып йөрик. Мөмкин булмаса, шалтыратып хәлләрен белик. Аларга бер җылы сүз җитә бит.

4 нче бала:    Ашыгабыз ерак юлларга без,

                          Яулар өчен күбрәк җиңү –дан.

                           Юлда безне бәлалардан саклый,

                            Әни, синең хәер – фатыйхаң.

                                         Баш очында кайчак кояш сүнә,

                                         Атмас кебек була якты таң.

                                          Караңгыда безгә юл күрсәтә,

                                          Әни, синең  хәер – фатыйхаң.

5 нче бала:       Киңәшләргә янда дус югында,

                             Бәргәләнгән чакта ялгыз җан.

                             Иң акыллы бер киңәшче була,

                             Әни, синең хәер – фатыйхаң.

                                            Шунсыз җирдә яшәү мөмкин түгел,

                                             Шунсыз булмас иде безгә сан.

                                             Туган көннән үлгәнчегә кадәр,

                                             Кирәк, әни, хәер – фатыйхаң.

Җыр: “ Балаларга фатыйха” ( Р. Хәкимов көе)

1 нче алып баручы: Ватан – ана, ана теле әни кебек кадерле сүзләр. Туган илсез һәм туган телсез кеше - ике канаты каерылган кош. Газиз әниләрне, туган илне, туган телне саклыйк, онытмыйк, кадерлик. Балалаларыбыз гына түгел, оныкларыбыз да үз телебездә матур итеп сөйләшсеннәр иде. Без татарлар һәм татар булуыбыз белән горурланабыз. Безнең  аһәңле телебез, бар милләтләр сокланырлык матур йолаларыбыз, гореф – гадәтләребез, бәйрәмнәребез,  ничә гасырлар үтсә дә, дөньяны шаулатсын.

1 нче бала:   Дөньяда иң – иң матур ил,

                        Ул минем туган илем.

                        Дөньяда иң – иң матур тел,

                        Ул минем туган телем.

2 нче бала:   “Балам,”-  диеп туган телдә,

                         Эндәшә миңа әнкәм.

                         “ Әнием,” – диеп әнкәмә,

                         Мин туган телдә дәшәм.

3 нче бала:    Туган телемдә сөйләшеп,

                          Яшим мин туган илдә.

                          Туган ил дигән сүзне дә,

                           Әйтәм мин туган телдә.

4 нче бала:       Иң изге хисләремне мин,

                            Туган телдә аңлатам,

                              Шуңа күрә туган телне,

                              Хөрмәтлим, мин, яратам.

5 нче бала:        “ И туган тел” –

                               Иң әйбәт шигырь!

                               “Туган тел” –

                                 Иң әйбәт җыр!

                                 “ Туган тел” –

                                  Иң әйбәт китап!

                                  “ Туган тел” –

                                  Иң әйбәт тел!

                                  Туган тел әйбәт булганга,

                                   Шигыре дә,

                                   Китабы да,

                                   Җыры да

                                                         иң әйбәттер!      

2 нче алып баручы: Хөрмәтле дәү әниләр, әниләр, әйдәгез, бергәләшеп, татар халкының гимны булган “ Туган тел” җырын җырлыйк. ( Җыр башкарыла.)

1 нче бала:   Әйтәсебез килә бүген

                        Кадерле әниләргә –

                        Бу бәйрәм  дөньяга килгән,

                        Кояш нурын сибәргә.

2 нче бала:   Бу бәйрәмдәге җылылык,

                        Гасырларга җитәрлек.

                         Сезнең назлы кулларыгыз

                         Әкиятне чын итәрлек.

3 нче бала:     Читкә китми, әниләрне

                           Һаман саклап йөрербез.

                           Әни кушса, әти белән,

                           Тауларны күчерербез.

4 нче бала:   Яратам әбиемне,

                        Сөйли ул көлә – көлә.

                         Ап – ак чәчләрен сыйпап,

                        “ Рәхмәт!”- диясем килә.

5 нче бала:    Яңгырлы көзнең якты бәйрәме –

                          “Әниләр көне” – диләр.

Бергә:               Бәйрәмегез котлы булсын

                           Кызлар, апа – җиңгиләр!

Җыр: “Әнкәйгә” ( И. Закиров көе)

Укытучы:  Хөрмәтле әниләр! Балаларыгызның  теләк – хыяллары тормышка ашсын, бер – берегезгә кирәк булып, терәк булып тормыш итегез!  Күңел җылысын салып, сезгә дип атап ясалган бүләкләрен кабул итеп алыгыз! Шуның белән бәйрәмебез тәмам, игътибарыгыз өчен зур рәхмәт!  Сау  булыгыз! ( Музыка яңгырый. Укучылар бүләкләрен тапшыралар.)