Урок внеклассного чтения
план-конспект урока на тему

Толонь пачк ютавтозь книга.

Уроконь цельтне:

Мельс ледстямс тиринь литературань уроксо ловнозь произведениятнень, маштомс эйстэст тешкстамо эрявиксэнть.

Содавтомс тонавтницятнень  эсенк енксонь сермадейтнень творчестваст марто

 тонавтомс эйкакштнень мельсэ кирдеме сетнень, кие прянь апак ванст  тюрсь паро эрямонок кис ;

тонавтомс  вечкеме  тиринь кельсэ сермадозь произведениятнень.

Уроконь молемась.

Эйкакшт, аволь покшке совавтома уроконтень. Вана курок прядсынк школасо тонавтнеманк, тень эйсэ прядови тиринь литературань тонавтнемаськак.  Кевейкее иень перть минь тынк марто ловнынек ламо произведеният кода рузонь, истя и тиринь кельсэ. Ловнынек и военной тематикань коряс. Течинь урокстонть монь мелем тынк ендо марямс сень, мезе талновтызе тынк седеенк,  кона мельс туиця произведениясто  тынь эстенк саиде кодамояк урок.

Презентация 1

Курок, панжиковонь 9 це чистэ,  минь  карматано тешкстамо Изнямонь чинть. Вана ютасть 68 иеть, кода прядовсь войнась. Но сонзэ вайгелезэ нейгак вастневи ламонь пилесэ.

       Великой Отечественной война - ине война…   Ине секс, мекс кадсь а стувтовиця тешкс весе народонть седейс. Минь содатано эйстэдензэ покштянок-бабанок ёвтнемасто, книгасто ды кинофильмасто. Ды Пазось илязо мере война неемс миненек, эйкакшонок туртов.

Неть кадратнесэ пурназь музеень материал, кона евтни  кие кодамо фронтсо ульнесь те войнасонть .

Презентация 2

  Монь мелем истямо: течинь уроконть коряс анокстамс  произведениянь пусмине, конань лемдьсынек «Толонь пачк ютавтозь книга»Сермадьсынек числанть ды теманть.

. Книгасонть кармить колмо  пелькст: «Мельс тиуця произведеният», косо карматадо евтнеме мельс туиця, седейс кадовиця произведениятнеде, конат алтазь те темантень.

Омбоце пельксэнть алтасынек минек земляконок Яков Слушкинэнь «Семья Кочкуровых» книгантень, косо кортави седе, кода минек веленек эрясь войнань шкасто, лиякс меремс, «Эрямось тылсэ».

Колмоце пельксэнтень совавтсынек сеть  произведениятнень, конатнень сермадызь минек енксонь кода содавикс, истя и од сермадыцятне.

Ушодтано. Панжсынек васенце пельксэнть. Ды лемензэ сермадьсынек

Васняяк эйкакшт ледстинк сеть произведениятненьть, конатнесэ евтневи Сталинград ало тюремадонть, секс мекс тедеде топодсть 70 иеть те тюремастонть саезь.

Илья  Сайгин Давол

Иван Прохоров Цидярдома, Стака изнямот

Прохоровонь ули эште вейке произведениязо, косо евтневи минек енксонь ломанде, кие ледстясы кие те ломанесь, ды кодамо те произведениясь

Прохоров Генералдо повесть

Никул Эркай Од родня

Монь ули мелем ёвтнемс «Од родня» повестенть  ланга, конанть  сёрмадызе Николай Лазаревич  Иркаев (Никул Эркай). Сонзэ сюжетсэ тевесь моли фронтонть эйстэ васоло-Курмыши эрзянь велесэ. Войнась пек стакалгавтызе тылсэ ломантнень эрямост. Велентень кадовсть  ансяк атят,бабат ды эйкакшт. Те стакачись кармавтынзе эйкакштнэнь теме покшонь тевть.

Курмыши велень эрицятне, кода лиятнеяк, лездасть войнасо тюрицянненень малавгавтомс Изнямонь Чинть. Войнань васенце иетнестэ Григорий Учайкин туи фронтов. Цёрынетне арсить тосо теемс подвиг. Сынст ули паролесткак: «Шкась моли, войнась а учи!».

Н.Л. Иркаев мельга-мельцек ёвтни седее,кода эзь топавтово сынст арсемаст. Эрьва чистэ лиснесть кодаткак тевть. Писателесь чарькодевти ловныцянть: эйкакштнэ эзть понго фронтов сень кувалма,сынь пек эрявсть тескеяк. Пакшатнень чистэ учить тевть,конатне эсест смустест коряс малавикст фронтонь героень тевтненень. Теке шкастонть Н. Л. Иркаев обуцянь ёнкстнэнь коряс топавтсь апак капша: васня весементь арсесы педе-пев. Юка, мекевланг, весементь бажи теемс седее курок,весемеде икеле.

Домкасто ды видестэ авторось невти покш ломанень образтнэньгак. Весеме ёндо удалась сокор пограничникесь образось, кона сельмевтемеяк аламонь-аламонь тонадсь «нееме». Пичкамодонзо мейле карми важодеме шкодасо тонавтыцякс. Кемевиксстэ невтезь госпиталень прявт врачонь образось. Сон весе виензэ максы ранявозтнень пильге ланг стявтомантень. Парт Аким ды Евсей атянь образтнэ,конат лездыть стака шкастонть эсест мельсэст-превсэст. Повестсэнть неть образтнэ кортыть народонть вийдензэ, конась лездась цидярдомс те стака шкастонть.

Видестэ ды маштозь писателесь невти войнантькак,конань толонзо минь,несынек Григорий Учайкинэнь сёрматнестэ. Солдатось пачти,кода минек армиясь аламонь-аламонь кармась молеме икелев,ятонть эйстэ эрицятнень, кемевсть изнямонь курок сыця чинтень.

Мартынов Монь ялгам

Монь ялгам» поэмась алтазь мокшэрзянь народонть Великой Отечественной войнань иетнестэ трудовой ды воинской подвигензэ невтемань туртов. «Монь ялгам» поэмасонть вейсэндязь алкуксонь исторической событият художественной арсевкстнэнь марто.

    Поэмась ютавты истямо мель, што мокшэрзятне аштить эрямонь кис, но сынь, бути эряви , маштыть тюреме, штобу ваномс эзь масторонть олячинзэ ды тапамс врагонть. Войнадо мейле сынь кундасть мировой тевс. Самай секс поэмазь ушодовияк ды прядовияк коллективной трудовой картинасо. Ёвтнема лувсто неяви, ломантне роботыть седейшкава, эрить ялгаксчисэ.

   Но вана прок благой пель каявсь ломантнень лангс войнань раужо кулясь: немецко-фашистской полчищатне сезизь эрямонь мазычинть.

   Поэмань евтнема лувсо фронтовой событиятне ды тылэнь эрямось сюлмавозь а явовиксстэ. Весе тевтне-валтнэ молить главной героенть Радай Ванянь перька, кона сюлмазь народонзо марто ды теке марто канды эзензэ эрямо лув. Поэмасонть ламо ломанть, эрьванть ули тюсозо ды эрямо тарказо, но сынь кода а кода васодевить главной героенть марто, сынст вельде седе домкасто панжови главной героенть образозо.

    Радай Ваня кассь тетявтомо-ававтомо, но сон эзь маря прянзо урозокс. Колхозсо эрямось ды паро роботась маккссть тензэ виев селмот.

   Васняяк  сон бойс понгсь Московонть маласо, ульнесь истямо страшна, што марявсь тензэ, буто весе фашистэнь пушкатне леднесть ансяк сонзэ лангс ды снарядтнэяк сезневельть ансяк сонзэ окопонть велькссэ.

   Госпитальсэ Радай Ваня арзизе, мекс сон эзь талакадо, зярдо вастовсть врагонзо марто сельмеде сельмс, мекс эзь синдеве потмо виезэ танканеньгак, фашистэнь пушканеньгак .

  Пичкадомо мейле, зярдо Радай Ванянь нолдызь кудов отпускс, вастовомс Ольга вечкевиксэнзэ марто, седе курок пурнамс вийть ды таго фронтов -неень шкань главной тевенть топавтомо. Ды Ваня сонськак эзизе васто Ольгань, бажазь весе седейсэ. Тейтересь тусь фронтов. Ды Ваня эзь сода, мезе мартонзо теевсь. Отпускто мейле Ваня тусь фронто кепедезь мельспаросо ды седеяк покш кемема марто, што врагось ули тапазь. Зярдо сон сась фронтов, несь ламо полавтовскст : минек армиянть технической виезэ ков седе ламолгадсь, армияськак невтсь прянзо лангс.

  Поэманть весе евтнема лувонзо пачк ютавтовить аволь ансяк патриотической мельтнень-превтнень, геройтнень трудовой ды  войнской подвигест шнамось, но парсте панжовить ломантнень мелест ды ежомарямост, ламо мелявкс путови мокш-эрзянь од ломантнень.

  «Монь ялгам» поэмась ашти васенцеде терявтомакс келейстэ невтемс народонть подвигензэ Великой Отечественной войнань иентестэ, сон канды сатышка художественной-познавательной вий ды течис зани неявикс тарка мордовской лирературасонть.

Панжсынек  омбоце пельксэнть « Эрямось тылсэ» , косо  карматано котрнеме Яков Сергеевич Слушкинэнь «Кочкуровонь семиязо», конань минь ловнынек зярыя уроконь перть аволь классо  ловномань уроктнесэ.

Сермадьсынек пельксэнть

Книгась сермадозь рузонь кельсэ. Нурькинестэ течи минь тейтяно анализ ловнозентень.  Ушодсынек котртамонок образной системанть коряс.

Евтни Кочеткова М.

Монь койсэ «Семья Кочкуровых» книгасонть авторось сех покш мель яви Сергей Кочкуровонь образонть невтемантень. Нама, авторось те образонть вельде невти весе неть ломантнень, конатнень стака войнань килангонть ютамсто рунгост лангс кадовсть войнань «кикст» ды пильге лангс стязь, сынь велявтыть эсь тиринь велев колхозонь кепедеме.

Сергей – Кочкуровтнень васень эйкакшост. Московонь сельскохозяйственной академияньпрядомадо мейле сон туи эсь мельсэнзэ войнав. Войнань китне-янтнэ стакат. Ансяк сермадыцясь Сергеень тюрематнесэ а невти. Минь сонзэ марто вастовтано, зярдо сон ранявозь, Свердловонь госпитальсэ аламодо лецямодо мейле велявты тиринь велев. Васенцеде авторось содавтсамизь мартонзо, зярдо церась валги Атяшева станциянтень. Уш истя сон тошнакадсь эсензетнень кис, кодашка сонзэ ульнесь мелезэ понгомс чачома-касома кудонтень, мик ашолгадомань апак учо, сырги кудов. Ансяк «кикстнэ» теить эсь тевест. Веньперть ялго молемась госпитальде мейле стяко эзь юта. Те шкастонть Сергей невти прянзо алкуксонь фронтовикекс. Сон теи истя, кода мерсь лецицясь ды эсензэяк ульнесь покш кемемазо, што пички. Эрямонть вечкемась церанть стявтсы пильге лангс.

Тетянзо кевкстемантькаршо, косо карми важодеме, сон мери, што карми важодеме эсь велесэ.

Вана Сергей Вальгеева велень «Од веле» колхозонь агроном. Се шкастонь важодицятнеде эзь сатокшно. Ды а косто сатомс, бути весе цератне войнасольть. Важодицятне ульнесть ансяк ават ды подросткат…… Вана истямо стака шкасто Сергей кармась агрономокс. Ансяк сон кедензэ стакачинть икеле эзинзе нолда. Тейсь весе, мезе эрявсь.

Сергей председатель. Мелезэнь тусь Сергеень видечись. Зярдо сон карми нееме, што тетязо – завхоз – сонзэ а кунсолы, кода эйкакшонь, церась правления икеле кепеди те кевкстеманть, важодемс ли тетянстэнь завхозокс. Теде мейле тетянть аравтсызь фермань заведующеекс.

Сергей пек ламо вий путы, штобу стявтомс пильге лангс колхозонть. Войнань шкасто, зярдо арасельть а важодицят, а ардомапельть, сон пурны аберянь урожай.

Сергей саи эстензэ никс Таня тейтеренть, ды сонзэ эрямозо ладяви лувс.

«Семья Кочкуровых» книгасонть главной героесь Сергей Кочкуров тейсь покш изнявкст эсензэ колхозсонть. Строявить севонень селт, ведьгевть, од кудот, пурнави бригада, конась урожаенть миеме яки мик Саранскоев.

Нама, авторось арсесь, што сы истямо шка, зярдо те весе сови минек эрямос. Те весе совась: алкукс Кочкурова велес путозь од кудот, косо эрить од семият.

Яков Слушкинэнь книгасонть героесь Сергей Кочкуров сестэ уш арсесь строямс вишка ош. Ды вана ней минек Кочкуровас стявтозь истямо ошке.

Евтни Галя Кочеткова

Танянь образоськак  невтеви «Семья Кочкуровых» романсонть. Таня, сазорозо Маша, тетязо Михаил Данилович ды авазо Аграфена Александровна эрясть Псковсо. Таня тонавтнесь Ленинградсо.

Зярдо ушодовсь войнась, тетязо кадовсь Псковс, авазо ды сарозо понгить Средней Азияв, а Танядо кодаткак кулят арасть.

Авазо Танянь ульнесь Саранскойсэ, зярдо Маша сазорозо тусь таркань вешнеме, козонь бу улевель лоткамс.

Таня пачкоди Вальгеева велев. Якси варштамо сэредиця Сергеень. Весть Сергей токи Ломаты велентень, штобу вастовомс тейтеренть марто. Танянь мельс тукшнось Сергей, ансяк сонзэ ульнесь лия церазо, Гена,кона туекшнесь войнав. Танянь аванзо мельс эзь туекшне те эрзянь церась.

Войнань прядомадо мейле Таня аванзо марто туи Ленинградов. Сон карми сармалеме Сергейнень сермат се шкас, зярс а велявты Танянень Гена. Сергей сырги тейтеренть мельга ды туить одов Вальгеевав.

«Семья Кочкуровых» романсонть тейтерь-аватнень ютксоТанянень явови сех покш мель.

Монь мельс Таня тусь тень кувалт, што сан сась васолдо, а прянзо вети, кода алкуксонь эрзянь тейтерь. Войнасо сон лезды чувомс окопт.

Евтни Илья Кочетков

Яков Слушкин истя жо покш мель яви церань образтнэнь невтемантень, конат эзть понго фронтов. Неть сыретне Игнатыч, ванстыцясь Софрон, Петра Васильевич Кочкуров, Александр Константинович Бакланов, конань военной врачебной комиссиясь ловизе а маштовиксэкс молемс войнав. Ансяк сыненсткак истя жо ульнесь стака тылсэ.

Петр Васильевичень содасызь кода вадря важодицянь. Сон тейсь весе колхозонь роботатнень: и паксят види, и вирь кери. Эрицятне ловить сонзэ честной ломанекс.

Александр Константинович Баклановонь образонть невтемантень авторось яви истя жо покш мель. Сон войнань перть важодсь парторгокс «Од веле» колхозсонть. Велесэнть арасельть радиот, ансяк сонзэ ды Петр Васильевичень. Эрьва валске сон чийсь правленияв ды евтнесь войнань кулятнеде, а неть кулятне велень эрицятненень ульнесть ярсамодо питнейть.

Софрон ды Игнаты чистя жо ламо роботакшность колхозсо, усксесть паксясто сюро.

Кона эрямонтень бажасть геройтне войнанть шкасто, те эрямось сась ней. Ульцятнень ней валдомтыть электрической лампочкат, оршамонок ды ярсамонок вадрят.

Кода илязо уле стака войнань ютавтомась, сынь те стакачинть изнизь.

Евтни Ирина Дырина

Зярдо ловныя «Семья Кочкуровых» книганть, монь мельс тусь видестэ сермадовксозо, Кочкурвелень эрицятнень, сех пек Кочкуровонь семиянть, чевте седеест невтемась, лия веленень лездамось. Сергей Петрович меельцензэ  максы, ансяк лездамс лиянень. Сынськак сыре Кочкуровтне Петр Васильевич ды Анна Кузьминична зярдояк эзть ОТКАЗА киненьгак.

Монь мельс пек тусь Кочкуровтнень ды Кочкуровецтнень те енксось. Миненекак эряви сынст кедьсэ ламо мейсэ тонавтемс.

Евтни Ирина Наумкина

 «Семья Кочкуровых» книгасонть Яков Сергеевич Слушкин пек парсте невтизе Великой Отечественной войнань шкасто аволь ансяк тейтерь-аватнень ды сыре ломантнень стака эрямост тылсэ, но и эйкакштненьгак.

Пуви виев варма, сельме чама а неят, а Вальгеева велестэ лиссть обозсо Атяшевав фронтнэнь туртов сюронь ускомо. Неть алашатнень ветицятне, пештицятне сыре атят ды эйкакшт. Вейкесь эйстэст Федька. Сон лездась алашатнень ванстомо. Вана и Нюра Кочкуровова. 16 иесэ прядсь трактористэнь курсат ды сась эсензэ велев роботамо тракторсо.  Сынст ютксо Митяй Кочкуров. Церынекс роботы кузницясо, лезды колхозонтень эрьва мейсэ. Кузнецень роботась се шкане ульнесь ответственной, ламот колхозонь тевтне ютасть сынст кедьга, Митяй тейсь эйсэст, кода эрявсь.

Эряви евтамс сеньгак, кода эзь ульне стака эрямось, роботась, вейкеньгак те стакачись эзизе синде. Федька кармась алкуксонь тракторист, Нюра – зоотехник, Митяй – механик, конат покш вий путыть эсест роботантень ды теить од эрямонть.

Колмоце пельксэсь  сермадьсынек пельксэнть.

Эйкакшт, кинь совавтовлиде бу тынь те пельксэнтень? Нама, те А.С. Щегловонь.

А.С.Щеглов «Гайкстак, бандура»

«Гайкстак, бандура!» балладась сермадозь 1941 иень декабрясто. Те ковстонть Москов ало бойтнесэ комськавксово геройтне-панфиловецтнэ теизь эсест подвигест: малав весе маштовсть, но эзизь нолда столицантень фашистэнь танкатнень. Панфиловицтнэнь подвигест кармась улеме балладанть смустензэ юрокс.

Поэтэсь буто эсензэ сельмсэ неизе те боенть, секскак истямо драматизма марто максы событиятнень ды панжи советской геройтнень характерэст. Диев комиссаронть примерэнзэ коряс панфиловецтнэ примить решения: а нолдамс врагонть столицантень. Удалов потамонь ки арасель – тосо Московось. Аволь вейкеть  ульнесть вийтне: ве пеле – комськавксово боецт, омбоце пеле – ведьгемень танкат. Панфиловецтнэ изнизь азаргадозь фашистнэнь.

«Гайкстак, бандура!» балладасонть башка боецэнь образт арасть, авторось а лотказеви боень эрьва енксонть лангс: невтеви обобщенной картина, конань вельде панжови советской ломаненть а изнявиця виезэ.

Балладанть поэтической келезэ ванькс ды образной, сонзэ эйс совавтозь устной поэзиясто истят выраженият, конат артыть евтнема лувонть («раужо зверькс», «азаргадозь враг», «тусто вирь»). Действиянь кемекстамонть туртов сайневить сравненият («прок евксонь богатырть», « пурьгинекс зэрькстась сынст вайгелест»), башка восклицаният («Кирвази модась пильгест ало!», «Ялгат»!, «А ютыть, гадт, хоть рядост тустт!»).Поэтэсь саи эрявикс валонть. Ловномсто маряви, лия вал тезэнь а лади.Эрьва валось, эрьва строчкась пек образнойстэ чарькодевтить событиятнень смустест. Ёвтнема лувонть виевгавтоманзо кис сеетьстэ вейке-вейке мельга молиця глаголтнэ максыть цела картина.

Александр Васильевич Арапов чачсь 1959 –це иень сундерьковонь1-це чистэ Дубёнской райононь Кенде велесэ. 1977-це иестэ прядызе Кобалень школанть..

Россиянь Писателень союзонь член (1994. Мордкизэсь нолдынзе поэзиянь ниле книганзо: «Вайгель» (1990), «Вальма» (1992), «Взмах» (2001), «Мейле» (2006). Стихензэ совасть вейсэнь сборникс, конат лиссть Саранск, Челябинск, Самара,  С-Петербург, Москов, Хельсинки, Будапешт, Таллинн, Тарту оштнесэ.

«Литературная Россия» газетань лауреат (2000). Мордовиянь заслуженный поэт (2003).

А ней ловнысынек  Александр Араповонь стихотворениянзо. Кодат талновтыцят сонзэ стихензэ, косо кортамось моли войнадо, армиясо служиця минек цератнеде, сетнеде, кить ютызь Афганонть

Стихотворениясь  Изнямонь чи.

ИЗНЯМО ЧИ

Пейдсь ды авардсь народось веленек,

Баягатнень гайтесь куля кандсь.

Куля, конань учнесть чинек-венек,

Куля, конань эйсэ салонь тансть.

Ванька, Мишка, вишкинесь Олодя

Аштесть ды эзть мереве валгак.

Чатьмонсть, ды сельведест петнясть модас —

Сынь а несызь тетяст зярдояк.

 ВЕЛЯВТОМА (САЕВКС)

Афганистансто

Ардыть цёратне,

Афганистансто…

Вагонсонть кецнить

Кисэст ломантне:

Эзть ёма, ванстовсть…

Мезе нейсть тосо,

Т о с о, войнасо, –

А ёвтамс валсо.

Часияст —

Сынь аволь кандолазсо

Кудов сыть валске…

Паряк, те он ульнесь —

Сэпей, стака, —

Ливтить пулятне,

Конатне — велькска,

Конатне — вакска,

Седейс конатне?

Паряк, те аволь

Сынст марто ульнесь:

А иди Пазось —

Кукорнясь ялгась,

Сэредькстэнть пульзясь,

Палы КАМАЗ-ось?

Леднема. Вайгельть.

Чикордыть пейтне.

Тулкадть, пехота!!!

Учи колоннась:

Кись ансяк вейке,

Ковгак а потат.

Верь потсо ялгась —

Шинеленть лангсо

Тошки вийтеме:

«Арази, цёрат,

Мон карман калмсо?»

Сон од, а кеми.

А он те овсе…

Те ульнесь мартост —

Сеть читне, ветне…

Те весе — а л к у к с!

Сынст верьсэ артозь

Гератонь кевтне.

Те сынст пеельсэ,

Пулясо пельнесть —

Седейсэ киксэсь.

Зяро цёрынеть маштовсть…

Кинь кевкстемс:

«Мекс? Мезень кисэ?!»

«Мекс? Мезень кисэ?!» —

Авань сельведтнень

А онкстамс сталмост.

Кувакат, тарьксэвть,

Певтеметь ветне –

Цёразо калмазь.

Бакич Видяй истя жо те теманть панжизе эсь  « Война» моросонзо, конань минь аламодо кунсолынек уроконь ушодксто.

Эйкакшт,  а оште монь ули мелем явомс мель эсенек  тонавтницятнень творчестваст туртов.

Ловносынек Д.Александровонь стихотворениянзо «Сон тусь тестэ колазь седейсэ»

Тынк классояк ули тештине – Маша Кочеткова. Мон арсян сонзэ пьесанзо тукшныть мельс ламонень. А умок  Маша сермадсь  седей талновтыця пьеса. Вал макстано Машанень

 Монь пьесам лемезэ Алкуксонь кеняркс

Пьесань налксицятне:

Маря, Миколь- церазо, Даря – тейтерезэ. Монь мелем ули налксемс эйстэнзэвейке тевдеема.

Васенце тевдеемась.

Январь ков. 1945-це иесь. Велень  кудо . Авась котьми каштом икеле. Эйкакштнэ ,кие косо:каштом лангсо, полок лангсо, коник лангсо.

Даря. Авай, нать течи кодамояк покшчи, прякань чине качады. Меельцеде те чиненть марсинек ансяк Инечистэ.

Маря. Кенярксчи, ансяк вана кенярксось арась. Течи тетять чачомачизэ. Вана колмоце ков арась пельдензэ  куля.

Те шкане вальмас маряви стукадема. Весе чатьмонезевсть. Варштась Маря вальмава. Озяка левкске озадо вальма раманть лангсо.

Маря вал марто лайшезевсь.

Вай, озякине-нармунне,

Иля стука вальминес,

Вай, озякине-покольне,

Иля чаво вальминес.

Вай, тетянок васоло,

Вай , трицянок, ойнасо.

Кадык, кадык вишкинят,

Пелян-пелян эйстэдеть.

Кадык, кадык покольнят,

Тандадтано тонть эйстэ.

Яла мерить, ох, а парс нармунь стуки вальмазот.

Яла мерить берянес озяз валги кудозот.

Вай, азека, азека, муикая мирдинем,

Вай, азека, азека, муикая полынем,

Пачтяяк тензэ куля: учотано эйсэнзэ.

Пачтяка миненек куля: шумбра паро тетянок.

Озякась, прок кунсолось эйсэнзэ ды аламос аштезь, тусь вальмастонть.

Миколь. Авай, иля мелявто. Нармуннесь кельмесь ды вачо, маризе тантей чиненть, секскак валгсь вальмантень.

Маря (нардтнинзе сельведензэ). Истя , нать, церынем. Ансяк вана седей ризксэсь а кельги потмозон. Пулты эйсэнзэ раужо толсо.

Миколь. Але лелям исяк ток лангсо кортась, што немецтнень пек потавтыть минексетне. Ней виест фашистнэнь кармась маштомо. Рузонь солдатнэ виевть, евтнесь атясь, оно зяро ойнат кирдсь, эрьвасто изницякс лиссть. Вана нейгак изнятано.

Маря. Паро бу улевель, церынем, ды вана ветеце ие масторонок сорны бомбатнеде, леднемкатнеде. Минексетненьгак виест маштсть, оно зяроце уш калмамонь конев сась велентень. Зяро семия кадовсть тетявтомо, церавтомо… (варштась церанзо лангс ды чарькодсь, што зыянось курок теизе сонзэ покшокс). Ванан , церынем, тонть лангс, кода тон те стака шкастонть а иень коряс виемить, превиить. Мезть бу тейневлинь тонтеметь? Адядо, эйкакшт, тешкстасынек тетять чачома чинзэ. Пасиба скалось,  хоть ловсыненек ули.

Те шкане кудыкельга маряви совиця. Весе варштавсть кенкшенть енов. Совицясь – почтальонкась.

Даря. Тетянь серма! Тетянь серма!

Почтальонкась прок кевензась порок лангс. Кодамо тантей чинесь, мик ушосто маряви. Мезе истя тешкстатадо?

Ванё: теце тетям си, цяцема цизе.

Тень марязь совицясь седеяк чувтомсь, лавтов ланга мешоккесэнть сон кандсь калмамонь конев. Те паро тевесь. Паряк, моньгак каванясамизь.

Маря. Кода эно, ютак, ютак. Кирдтяно эйсэть поровтт лангсо. Арась а кандат тенек кулине.

Почтальонкась. Арась. Монь тынк прякань чинесь совавтымим.

Маря пурнась каванямо инженть, таргась столь лангс раужо почтонь топонь прякат, ловсо кринка. Почтальонкась жо друк пурнась туеме.

Вай, инеськеть, допрок стувтыя, монень велень прявтось кармавтсь совамс. А прякадо ярсамо  мейле сован. (Кудыкельга лисемстэ нилинзе сельведензэ, конатне тулокс сялгокшность кирьгапарентень.) Арась, те монень а евтави. А коласа эйкакштнэнь кенярксост, кадык учить тетяст живстэ. (Кортась эськанзо. Лотказевсь.) Ну, ялатеке, сави евтамс. Молянгак Але лелянень, сон атясь седе превей, сон седе маштозь евтасы кулянть.

Маша евтни мейсэ прядови пьесазо.

Пьесась прядови теньсэ, кода  вейсэ роботыця ялгазо евтасы тензэ те кулянть. Пек стака авантень, покш нежекс тензэ ульнесь сонзэ церазо – Миколь. Пьесась жо прядови сеньсэ, Илька мирдезэ велявты кудов.

 Уроконок прядовиця. Течи тынь парсте евтниде . монь коряс, икеленек путовкстнэ  панжозь. Тейтяно прядовома книгантень. Кода арсетядо,  кодамо прядовкс тейтяно?

Эйкакштнэ кортыть седее, кодамо стака ульнесь войнань шкасто. Илязо  савт миненек неемс те зыянонть.

Монь ули мелем прядомс уроконть А.Араповонь  стихотворениясо

Кадык апак мелявто ды пейдезь,

Мазый цецят тейтерькась пурны. 

Кадык минек модась пурьгинеде, 

Ансяк аволь бомбадо сорны. 

Ды вейкеде мельтне арсематне , 

Эрьва чине – течи, вандыяк: 

Войнынесэ налксиця эйкакштнэ

Иляст сода война зярдояк. 

Кадык лисни паломо эждямо 

Эрьва валске пандонть экшстэ чись, 

Маней менель тонеть, вишка ломань, 

Кадык валдо ули свал тонь кись.

                                А.Арапов 

Кудов тевесь : книгань структурась теевсь, тыненк истямо тев: пештямс сонзэ потмонзо ды панжиковонь 25 – це чистэ каземс сонзэ 4 –це классонь тонавтницятненень