Арбан табан үринэрые альган дээрээ үргэһэн
статья

   Декабриин 24-дэ Υндэһэтэнэй номой санда «Буряад үнэн» Хэблэлэй байшангай «Буряадай түрүү хүнүүд» гэһэн заншалта урилдаанай дүнгүүд соносхогдобо.

   Энэ жэлэй 25-дахи ойн баярта урилдаан долоон сэдэбэй тусхай янзаһаа бүридэһэн.

  «Эхэ Герой» гэжэ номинацида манай эжы шагнагдаа. Хүндэтэ хайрата абатаймнай Михаил Будаевич Евреевтэй 15 үхибүүдые түрэжэ, гарыемнай ганзагада, хүлыемнай дүрѳѳдэ хүргэһэн. Мүнѳѳ бидэ үхибүүдынь, аша зээнэрынь гүрэн түрын ажал хэжэ, эжы абынгаа нангин уялга дүргэжэ ябанабди.

   Жэгжэма Дугаровна Евреева – аяар 15 үхибүүдые алтан дэлхэй дээрэ  мүндэлүүлжэ, хүнэй зэргэдэ хүргэһэн ашата һайхан эжы. «Эхэ Герой» гэһэн орденоор, «Алдартай эхэ» гэһэн медаляар шагнагдаһан. Мүнѳѳ бидэ арбан табан хүүгэдэйнгээ хажуугаар 33 аша зээнэртэй, 26 гушанартай, үри һадаһадайнь тоо дүн хамта 99 халуун ами болоод байнабди.