Разработки уроков мордовского языка
методическая разработка (5 класс)

МБОУ «Темниковская средняя общеобразовательная школа имени Героя Советского Союза А.И.Семикова»

Экологияти лемтьф ваймама илядь

          Природась и минь  

                                                               Етафтозе Уткина М.П.                                    

                                                                мокшень кялень

                                                                тонафтысь

                                              2017к.

     Цельсь: тонафтомс шабатнень природать картинанзон няема и природать ванфтома; няфтемс, кода поэттне и писательхне кельгозь няфнесазь природать.

    Урокти аноклама:  слайтт, картинат, фотографият, открыткат, книгат, валмуворкст: «Природать пефтома вийц, а ломанть ёнец». « Ся ломанць сембода вии, мес природать одкс тии». «Ломанць – природать азороц».

                              Природась и минь.

       Тонафтыть валоц: Шабат, кельгость шачема мастороньконь – ванфтость сонь мазы природанц.             Мекольце кизотнень пяк оцю мяль шарфневи природати. А мезенкса? Да сяс, мес природать эзда ащи ломанть эряфоц, шумбрашиц. Штоба ломанць улель шумбра, тейнза эряви ару кожф, ару ведь. Штоба улель ару кожф, перьфпяле мазыши, эрявихть ванфтомс вирьхнень. Шабат, тинь содасасть, конашка парсна сянгяря ялганьконь-шуфттнень? Вирьхне ляпофнесазь климатть, лездыхть кочкамс модати летькть, кирдьсазь ляйса оцю ведть, юрсна кемокснесазь модать, перьсесазь карафнень киснон, аралакшнесазь модать срадомда-каладомда, машфнесазь урмань срхкафты микробатнень. Шуфттне ноляйхть кислород, кона эряви ваймонь тарксемс мастор лангонь сембе эряйти. Сяс тейнек эряви сянгярьгофтомс эряма вастоньке, озафнемс вирнят пакся пева, ванфтомс и касфтомс ёмла вирьхнень. Тянкса тейнек маштома шуфтонянь озафнема, мельгаст якама.Шабат, тясть юксне шумбрашинь кази ялгантень. Кда кажнайсь эздонк озафты аньцек фкя шуфтоня, марстонь вийса кеподихть мастор лангса целай вирьхть. Перьфпяльть мазышинц ванфтомац ащи аньцек эсь эздонк.Вдь сембонь мяльсна эрямс лац, тарксемс ваймоснон ару кожфса, симондемс ару ведьта. А сянкса, штоба ламос эрямс, эряви ванфтомс природать тяниень и сай поколениятненди – тя минь васенце тевоньке.

       Тонафнихне морасазь М.И.Безбородовонь стихотворениянц « Вирь» (1-це слайдсь)

                               Кизонда, вирняй,

                               Пиже лопаняй,

                               Пси мани шиня

                               Шида кяшиняй.

                               Яксян потмоват,

                               Шуфттнень еткова,

                               А пингонь – пингонь

                               Ляйге, лоткова.

                               Кулхцондан эсот,

                               Кода тон увнат

                               Тифтень лопаня

                               Модати прафнят.

                               Мастору лопась

                               Либордезне прай:

                               «Вай, курок сексесь

                               Якшамть мархта сай»…

                               Тяфта кашторды

                               Прафкя лопанясь,

                               Алга шаштомста

                               Сединь токайнясь.

                               Седись токави

                               Марят пилеса,

                               Кода нармоттне

                               Морайхть келеса.

1 – це тонафнись:Эряфкшу ломаттне мяляфтсазь ся пинкнень, мзярда мокшэрзянь крайть пяк козяль природац : ведюфтольхть и калуфтольхть ляйхне , сянгярятольхть лугатне, вирьхне. Вирьхнень эса ламоль нармоньда и жуватада. Коса тяни тя мазышись и козяшись? Видеста азомс, сон юмси – арси. А кие эздонк аф кельгсы сянгяря щаф вирть! Ужяль, но республиканьконь виренза керсевихть аф азоркс. Сембе надияйхть, што вирсь аф ломань, киндивок аф пеняцяй. А вдь виртьке ули пец. Содасть, што странасонк эрь секунданя керови 5 гектархт вирь. А вирсь – природать оцюдонга оцю казнец. Сон ванфтома , кода и модась.Тоса , коса улихть шуфтт , модась аф пели коське вармада.

         Вирсь аф аньцек козяши,  сон казенди тейнек шумбраши. Ученайхне лувозь,  што шиньберьф гектар вирсь сиви кожфса 220 – 280 килограмма углекислай газ , а вастозонза максы 180 -220 килограмма кислород. Ведьгемонь квадратнай километра вирень площадть вельхксса пуромкшни 50 тонна пуль. А вирьфтома вастса 400 -700 тонна. Азф цифратне корхтайхть,  што сянгяря ялганьке ванфнесамазь лама кальдявонь эзда. Содаф,  што гектар вирсь аруяфнесы и летьголгофнесы кожфть кемоньксть. Шуфттне и кусторксне станя жа машфнесазь кожфса бактериятнень.

        Цебярьгофнесы вирсь и ломанть прянь маряманц,  кепсесы сонь мяленц.

2 – це тонафнись лувсы М.Моисеевонь стихотворениянц « Кда керови келуня».(2-це слайдсь)

             Онцтон бта арань акша келунякс.

             Шуфтонясь перьфпяле улень тяконя.

             Сашендсть алон кельгондема кельгихне,

             Эшксозон пси шитнень кяшендсть якайхне.

             Тушендсь пизем – алон кяшендсть пиземда.

             Коське – шяти варматненьге кирнине

             Шуфтонялень- ашень пеле сиземда

             Шуфтонять вдь моцец – эрьгац виренне.

             Сяльде састь пиласа ломатть – керомазь.

             И кудрятне лаподсть пульти – сокорти.

             Шудесь эздон келуведнясь – верозе.

             Вастозон илядсь круг мархта мокорня.

             Ся ульсь ни … А тяни арьсян лажназне:

             Кальдяв,  кда шуфта коса керови,

             Шуфттнень эзда ули пароц кажнайнять

             Аф эрь ломанць ломаттненди эряви.

3 – це тонафнись: «Тясть аварьфне келуфнень».

     Улема, ламотненди сашендовсь васьфнемс тундань вирьса аварди келуфт. Кой – коста шабатне, а сидеста и оцюфне, керсесазь – гаснесазь шуфттнень ронгснон, симихть танцти ведьтост и кадсазь синь сярядема. Керф вастти курокста эвондайхть унжат, келусь ушеды юмама – арама. Кда мяльце симомс келуведьта – тик пеельса аф оцю керфкя, ладяк тоза почконя, келусь пяшкодьсы кядьгоняцень. Сипть топодемс. Тяда меле тяк юкста вадемс керф вастть севоньца или модаса.) (3-це слайдсь

 Тонафнихне морасазь «Луганяса келунясь» мороть.

4 – це тонафнись лувсы С.Самошкинонь «Акша келу» стихотворениянц. (4-це слайдсь)

                         Акша келу.

              Веле песон пиче вирсь,

              Тоса акша келу кассь,

              Мазы, кода мокшень стирь,  

              Од нарядонц коста щась.

              Ляпе сянгяря руцяц,

              Щамоц акша ловонь лаца,

              Мярьгат,  шобда вень кучкать,

              Палы штатол оцю садса.

5 – це тонафнись:

             Кда шуфттнень улель кяльсна

             Пади, тяфта азольхть мяльснон:

             -Улихть шабанятка стапт,

             Хоть и эздост афи лама:

            Синдихть байдек, синдихть или.

            Налхксезь штафнесазь судняньконь.

            Синнесазь тарад – сурняньконь,

            Шуфттьке шуди сельмоведец,

            Кда ваткаф судоц – кедец.

                                            М Бычков.

6 – це тонафнись:Ванфтость перьфпяльть!

      Природань кельги ломанць аф ердай ведти жестень и клянцеконь банка, кодамовок оржа веща, васендакиге, сяс, мес эшелямста, калонь кундамста керови пильгце. Омбоце кальдявсь. Жестень вещатне гастясазь ведть, а гастяф ведть аф кельгсазь калхне.

     А кие эздонт, шабат, аф кельгсы калонь кундамать?!Вдь калонь кундамась мазопнесы идькс пингонтень, лядонды пародонга пара лятфнембялькс.

     А конашкава пара эшелямс ару ведьса! Мяляфтость:

ляйхнень арушисна – минь шумбрашиньке. (5-це слайдсь)

7 – це тонафнись: »Ванфтость ведть».

      Ведь ули сембе вастса: океанца, моряса,  ляйса , эрьхкса,  эрь растенияса и жуватаса , модать потмоса и кожфса. Ведсь эряви ломанти симомс, штамс, паксянь,  садонь и перень валондомс. Лама ведь тушенды производствав.

      Шабат! Ванфтость ведть! (6-це слайдсь)

8 – це тонафнись:»Ванфтсаськ Мокша ляйть».

     Мокшесь – фкя инь оцю ляйсь минь республикасонк. Сон шуди вете райононь модава: Ковылкинскяй, Краснослободскяй, Ельниковскяй, Темниковскяй и Теньгушевскяй. 598 вайгяльбе тя ляйсь кандсыне ведензон Мордовиять территориява.

     А конашкава мазыхть васттне, куване шуди Мокшесь! Ляйть фкя берякоц крута.Тяса пантт и пандонят, конатнеь алга мельцек – мельцек таргавихть велетнень ульцясна. Омбоцесь – лугат и лугат, коса кизонда вановихть жувататне и аноклакшневи аф кржа тише.

     А мзяра ульсь ляйса калда! Мокшеста кунцесть лещат, судакт, ершат, сазатт, щукат, налипт. Ведсь ляйса аруволь.

     Мекольдень кизотнень рдаскофнесазь Мокшеть эсь пяндра ведьснон мархта республикань ошне, велетне, прмышленнай предприятиятне. Пяк гаснесазь ляйть веденц минеральнай удобрениятне, конат шудихть ведь мархта паксятнень лангста.

     Ученайхне корхтайхть, кда тяфта жа карматама рдаскофнемост Мокшеть ведензон, то 20 – 30 кизода меле Мокша ляйсь юмай – арай. Тячи Мокшеста можна нинге симомс, хоть и кой – кона вастова пелькс. Катк  аф ули пелькс и ванды, и 20 - 30 кизода меле.

     Паронь канды и сембодонга мазы Мокша ляйть эряви сембонди ванфтомс! (7-це слайдсь)

9- це тонафнись: «Шачем крайняй».

                  Шачем крайняй, панжат оцю садса

                  Масторсонок эрь шиня.

                  Мазы ронга акша марлю лаца,

                  Вельхкссот валдоня шинясь.

                  Тяни валда тяштю тонь судьбаце,

                  Сядонголе анцинь край!

                  Келептеть орелонь пацят,

                  Кона лиема срхкай.

                                                М.Бебан. (8-це слайдсь)

Тонафнихне морасазь « Марлю» мороть .

9 – це тонафнись: « Коста мумс стама валхт».

                 Коста мумс мондейне стама валхт,

                 Штоба морамс мархтост шачем крайть?

                 Седизе кучи: «Вели архт,

                 И ня валхнень велеса мусайть».

                 Коста мумс мондейне стама валхт,

                 Штоба морамс мархтост таньфонц

                 кшить?

                 Седизе кучи: «Паксяв архт,

                 И трудязь тон етафтк сембе шить.

                 Ару ведьса ливоськятнень штайть

                 И ня валхнень паксяста мусайть».

                                               В.Родькин.(9-це слайдсь)

10 –це тонафнись: «Емашевскяй рощась».

        Темниковскяй районца фкя инь мазы вастокс лувондови Емашевскяй рощась. Кунара – кунара Темниковть перьф ульсть туста вирьхть. Етась лама киза, вирьхнень керозь. Емашевскяй рощась лядсь кода вирень аф оцю остров кели лугатнень ваксса. Рощаса касыхть сери пичет, кудрявай келуфт, паргана кузнят.Пяк мазы рощась кизонда. Ичкози – ичкози таргавихть пиже лугатне. Лугатнень лангса пиндолды клянцекокс цифтордыхть крхка эрьхкне. (10-це слайдсь)

11- це тонафнись: Темниковскяй заповедникть

                                             колга.

     Мордовскяй заповедниксь ульсь тиф 1935 кизоня 16 – це мартста.Сон тифоль сянкса, штоба ванфтомс хвойнай вирьхнень. Заповедникть территорияц занци 32 тежянь гектар. Тяни заповедникса сембе работникне лувондсазь главнай задачакс – кирдемс природать стамкс, кодамкс сон ащи, мезевок эздонза аф токсемс.

     Мекольднень пингть пяк оцю мяль шарфневи

 природати. Экологияти сяс, што тянь эзда ащи ломанть шумбрашиц, эряфоц. (11-це слайдсь)

12 – тонафнись: «Кода араламс панжапнень».

      Панжапнень аф стак лемнесазь вирень санитаркс. Ученайхне лувозь, што фкя панжам

 маронь эряйхне машфтыхть кизоньберьф кафта миллионда лама насекомай. Но санитархнень синценьге улихть врагсна.Сембода  пельксне – вирень тувотне.Кабаттне аф пелихть панжапнень сускомада и сидеста керсесазь марснон и ярхцайхть панжамда. Зиянць сатнесыне панжапнень сексень якшамста и тялонда.Тя еткть тувотне срафнесазь панжам марть и мадыхть кода понацам лангс. Калафтф панжам марсь эйндай педа – пес.

      Кода ина идемс панжапнень? Эрявихть персемс мархнень колма – ниле олгса. 120 сантиметрань сереса перяфксть пачк тувотне аф етавихть.

     Шабат, лездода араламс панжапнень! (12-це слайдсь)

                                           Викторина.

1. Мордовиять кона вастсонза улихть вирьхть и кодама синь парсна?

2. Кодама шуфтть миньцонк лемнесазь якшама ширдень виноградка?

3. Азк, мзярс эряйхть модать лангса пяшесь, тумось, пичесь, кузсь, келусь и ушторсь?

4. Лятфтак. Миньцонк кодама шуфта ноляй вии антибиотифитонцид, кона машфнесыне микробатнень и анцяй насекомайхнень. ( Тя шуфтть панчфонзон лангс аф озси мешсь).

5. Кие содасы, мес сяда сидеста пчкафтомань и ваймамань куттнень строясазь пиче вирьге?

6. Азк, мезень парсна ульцява касы шуфттнень?

                          Содасть содама ефкснень.

1.Састь инжикс, азорхнень сявозь мархтост, а кудснон лихтезь вальмава.

                      (Бредникса калонь кунцихне).

2.Крандазсь арды, ажиянза фкя вастса ащихть.

                      (Ляйсь и беряконза).

3. Стяян – кеподи,  мадан – валги.

                    (Шись).

4. Шить уды, веть ломатть эвфни.

                     (Корожсь).

5.Тялонда ороц уле, а кизонда рыжай.

                      (Урсь).

6.  Кинь пиленза сяда оцюфт прянц коряс.

                       (Нумолсь).

13 – це тонафнись: Природать козяшиц.

         Природать инь оцю козяшиц и мазышиц -  вирсь и ведсь. И тейст аш кода фкя – фкафтома. Ведсь араласы куломда вирть. А вирсь ванфтсыне ляйхнень, эрьхкнень. И аф аньцек синь. Сон перьсесыне китнень коське варматненди, шуваронь шаштомати, карафонь и лашмонь шачемати. Вирсь – народть козяшиц.  А козяшись эряви касфтомс и ванфтомс. (13-це слайдсь)

14 – це тонафнись: «Пиченя».

                             Зорькин Ванясь озафтсь пери

                             Пичень емла шуфтоня.

                             Перьфканц тарадкаса перясь,

                             Вирьса валондсь эрь шиня.

                             Пелендсь, коськи: вирьса лама

                             Керовсь таргамста унксац.

                             Сась тунданясь, арась шнамакс

                             Тихтедсь аф фкя путьконяц.

                                           (Н. Учватов).

            Азомс валмуворкст природать колга.

1.Нармонць азорондай кожфса, калсь ведьса, а       ломанць  сембе вастса.

2.Аф фкат ломаттне мирса, кода шуфттне вирьса.

3.Кизось кельгсы серонь касфтомать, а тялось ванфтомать.

4.Цебярь азоронди кизоть аш кальдяв пингонза.

5.Кизось работай тялоти, тялось – кизоти.

6.Тялонда лама лешу шида – кизонда лама кшида.

7.Кизось сероть кочкай да види, а тялось аньцек ярхцамс пиди.

8. Азыть мокшекс нармоттнень лемснон (14-це слайдсь)

9.Азыть мокшекс шуфттнень лемснон ( 15-це слайдсь).

Тонафтыть валоц: Эрямс и аф арьсемс сай пингонь поколениять колга – преступления. Афкукс, минь эряме и мзярс эрятама кода колониальнай страна, мишендеме и мишенттяма вирень козяшиньконь эса. Эрь кизоня республикасонк керсеви вельф лама вирьда. И кда аф примамс кодамовок мерат, то 50 -60 кизода меле виреньконь эзда мезевок аф ляды. Синь мархтост коськихть, юмайхть ляйхне, эрьхкне и лихтибрятне.

                А кода панжи марлюсь!

                Мяльцень эса касфни!

                Эрь, нинге сяда мазопт, виензак!

                Тон мяляфтк, ялгай, эряфсонок тяфта

                Минь мазышить эсь кядьсонк тиендьсак!(16-це слайдсь)