Доклад №3 "Уҡыу сифатын нисек арттырырға?"
учебно-методический материал

Доклад

Уҡыу сифатын нисек арттырырға?

   Математика фәне – иң ауыр фәндәрҙең береһе. Эйе, дөрөҫ, был фән бөтәһенә лә еңел бирелмәй. Ләкин ҡабатлау таблицаһын ятҡа белеү бөтәһенә лә кәрәк. Хәҙерге талаптар буйынса 2 кластан ҡабатлау таблицаһы өйрәнелә. Әле генә уҡырға, ҡушырға, алырға өйрәнгән балаға был бик ауыр эштәрҙән һанала. Мин уҡыусыны ҡыҙыҡһындырыу һәм тиҙ генә ятлатыу маҡсатында был эште йәнләндереп ебәрҙем. Бәләкәс балаларҙың әкиәттәрҙе яратып ҡарауҙарын беләм. Уларға бигерәк тә замана әкиәттәренең геройҙары бик оҡшай. Улар был геройҙарҙың һүрәттәрен йыйып маташалар. Шуға күрә мин, әкиәт геройҙары төшкән наклейкаларҙы һатып алып, уларҙың ҡабатлау таблицаһын ятҡа белгән уҡыусыларға ғына бирелеүен аңлатып, һәр бер уҡыусынан блокнот башлаттым. Таблицаны ятлаған һайын, наклейканы алып йәбештерә баралар. Иң күп наклейка йыйған уҡыусы еңеүсе була, өҫтәп уҡытыусынан бүләк ала, грамотаға лайыҡ була. Был эш менән мин аңһат ҡына ҡабатлау таблицаһын ятлатып алам.

Беренсенән, уҡыусы ҡабатлау таблицаһын тиҙ ятлай.

Икенсенән, эшенә яуаплылыҡ менән ҡарарға өйрәнә, аҙаҡҡа һуҙып йөрөмәй.

Өсөнсөнән, уҡытыусының бушағанын көтөп тороп, блокнотып тотоп, ҡабатлау таблицаһын һөйләп ишеттерергә уҡытыусының артынан йүгереп йөрөй. Сөнки наклейка кәрәк. Ул үҙен зачет биргән студент һымаҡ хис итә.

Дүртенсенән, бындай эш уҡыусы өсөн дә, уҡытыусы өсөн дә, ата-әсә өсөн дә ҡыҙыҡлы эш. Ата-әсәләр хатта өйгә шалтырата, бөгөн наклейка алырмы икән, беҙ бергә ятланыҡ, тип. Күреүебеҙсә, зыяны юҡ, был уҡыу сифатын арттырыуға ғына булышлыҡ итә.