Сценарий внеклассного мероприятия «Эңкр өрк-бүлм – оньдин мини шивə»
классный час (4 класс) на тему

Хальмг Таңһчин сурһуль- эрдмин болн номин Министерств

МКОУ «Ачнра дундын олна сурһулин школ»

Кичəлин хɵɵн кɵдлмш

«Эңкр өрк-бүлм – оньдин мини шивə»

                                                     Кичәл белдснь: МКОУ «Ачнра дундын  

                                                                олна сурһулин школ»

                                                           эклц классин болн хальмг келнә багш

                                                                                Бистəн В.А.

Ачнр селəн, 2015 җил.

Кичəлин хɵɵн кɵдлмш «Эңкр өрк-бүлм – оньдин мини шивə»

Күсл: Өрк – бүл болһн ни-негн бəəдг, нег -негндəн дурта,дөң – түшг болдг, күндлдҗ, килмҗтə, тевчңгү болдг, гисн сурһмҗ күүкдт өгх.

Белдвр: Һəəхүл белдх: бүл болһн һарин кегдлмүдəн авч ирх, альбомс, зургуд олзлх. Уңг – тохминнь тускар салата мод зурх, өрк-бүлин газет белдх.Магнитофон, караоке, компьютер белдх.

(«Ээҗин дун», дууна айс соңсгдна)

Багш: Мендвт, күндтə ээҗ- аавнр, эк-эцкнр, ирсн гиичнр! Мана класст  ирснтн икəр байрлҗанавидн. Эндр бидн цуһар эврəннь төрскн келəрн күүндхмн. Юңгад гихлə, өдгə цагин бичкдүд,баһчуд хальмг келəн дасч авх зөвтə. Кемр эдн эс медҗ авхла, хальмг гисн нерəн геехвидн. Тегəд чигн өрк – бүл болһн гертəн хальмгаһар күүндх зөвтə. Ода төрскн келəн сəəнəр меддг медəтнр җил болһн баһрад йовна. Дунд наста улс гертəн, һаза, көдлмштəн, үрн – саднлаһан,  үүрмүдтəһəн орсар күүнднə. Тегəд өдгə цагин баһчудт эврə келəн медхд күнд болҗана. Келəн дасч авлһн – олна күчəр күцəгдх төр. Хальмг келн – мана өвкнрин үлдəсн хамгин ик зөөр. Эн зөөриг өрк – бүл болһн хадһлад, делгрүлəд йовх зөвтə. Өрк – бүлин чинр йир ик.

Сурһульч:           Өрк- бүл болһн эрүл- менд,

                             Ни –негн, байрта- бахта бəəҗ,

                             Үрн- садан өскəд, көлинь дөрəд күргəд,

                             Һаринь һанзһд күргəд, мууһинь болвчн,

                              Сəəнинь болвчн дааһад, эндрк цагин

                              Орчлңгин өргн аһуд  багтҗ,

                              Гем –шалтг уга, зовх зовлң  уга,

                              Цаһан  хаалһар йовҗ,

                               Амулң – менд җирһтн!

Багш: Мана күүкд таднд сергмҗтə наад белдв.Эк – эцкнр бас орлцҗ чадҗана (жюри шүүҗ авх)

Күн болһнд төрскн һазр – усн, төрскн келн бəəдмн. Мана   төрскн һазр – Хальмг Таңһч. Мана   төрскн келн – хальмг келн. Ачнр селəн – мана  бичкн  төрскн. Соста нуурин көвəһəр нигтəр хулсн урһна. Сазн,шөрəкə,цурх, уланҗ, цаяха – нуурин көрң. Ачнр селəнə тууҗ байн. Күч- көлснə героймуд Бурила Илья болн Лукшана Егор .(«Ачнрахн» ду  дуулцхана ).

(Классин эрст өрк- бүлин болһна газет өлгəтə бəəнə, эврə уңг- тохминнь тускар зурсн зургуд һəəхүлд бəəнə )

1-гч марһан: Сурһульчнр уңг-тохминнь тускар келҗ  өгнə. Жюри шүүһəд  үнлнə.Сурһульчнр хальмг би биилнə.

2-гч марһан: «Илвтə  цецгə»  гидг наадн. Делв болһнднь даалһвр  бəəнə. 6өрк-бүлин команд делв болһна даалһвр күцəһəд, самбрт цецгə тогтаһад кех.

1-гч делвнь:  саатулын дун

2-гч делвнь: би биилх

3-гч делвнь: ээҗин туск үлгүрмүд  келх

4-гч делвнь:ду дуулх

5-гч делвнь: йөрəл келх

6-гч делвнь: тəəлвртə тууль келх

(Командмуд белдвр кенə, көгҗмин айс соңсгдна, тавн минут болад , даалһвран үзүлнə, жюри үнлнə)

Сурһульчнр «Хальмг келн  - мана зөөр» гидг төрəр шүлгүд умшна

3-гч марһан: эврəннь уңг – тохминнь тускар газетарн дамҗад келнə.

Көгҗмин завср- «Экин заясн келн» ду дуулх.

4-гч марһан: Өрк – бүл болһн күүкдтəһəн хошад сурврт хəрү өгх.

Жюри үнлнə. Цуһар хамдан  «Ээҗин дун» дуулцхана.

Багш: Бидн йир байрта бəəнəвидн, юнгад гихлə мана сурһульчнр эк-эцктəһəн, аав-ээҗтəһəн өрк- бүлдəн йоста сəн - сəəхн, ни –негн бəəдгинь медвидн. Мана күүкд уул хальмг келəн дасх, əрвлх, харсх, чинринь өөдлүлх гиҗ бидн санҗанавидн. Цаг сольгдад, əмтнə җирһл - бəəдл сольгдад йовна, болв күүнə келн- мөңк, кезəчн буйсхш.Тегəд мана келн- мана келн – улсин алтн зөөр.

(Жюри ашлвр кеһəд, бүл болһнд белг өгв).

Цуһар хамдан «Хар Һазр» ду дуулцхана. (Гиичнриг цə - боорцгар тооһад, нəəрəн давулна).       Байрта харһий.