Помöсдiн сикт (село Помоздино). Экскурсия.
классный час (2 класс)

Муниципальное образовательное учреждение Помоздинская СОШ им.В.Т.Чисталева

с. Помоздино

Экскурсия по селу Помоздино

 «Помöсдін сиктса историческöй да памятнöй инъясöн тöдмöдöм»

Лӧсьӧдἰс: 2 «А» класса велöдысь

Игнатова Н.В.

Помӧсдiн, 2020 во

Могъяс:

• Матыстны быдмысь войтырӧс коми культуралань, петкӧдлыны сылысь аслыспӧлӧслунсӧ, озырлунсӧ.
• Содтыны челядьын коми культура дорӧ пыдди пуктӧм.
• Сӧвмӧдны быдмысь войтырлысь вежӧрсӧ, кужӧм – сямсӧ, восьтыны йӧзкостса йитӧдъяс, велӧдны артмӧдчыны тшӧтшъяяскӧд, дасьтыны пырны верстьӧ олӧмӧ.
• Котыртны челядьӧс да налысь бать – мамӧс ӧтувъя уджӧ, чужтыны бать – мам сьӧлӧмын радлун, тӧждысьӧм аслас челядь вӧсна.

Экскурсия кежлӧ дасьтысьӧм:

• Чужан сикт йылысь челядькӧд сёрни нуӧдӧм.
• Челядькӧд  ас котыр йылысь сёрни нуӧдӧм.
• Челядькӧд Коми му йылысь сёрни нуӧдӧм.
• Челядькӧд  тӧдмасьны коми фольлорӧн, искусствоын сиӧм лӧсьӧдӧмторъясӧн.

Бать-мамкӧд  удж нуӧдӧм:

•  Бать-мамкӧд ӧтувъя сёрни экскурсия нуӧдӧм кузя. Помӧсдін сикт йылысь материал чукӧртӧм да презентация вӧчӧм.

Коланаторъяс: Видеоролик «Менам чужанінын»; презентация «Помоздино».

Экскурсия нуöдӧм:

Велӧдысь: Челядь, ми тіянкӧд ӧні видзӧдам видеоролик, а бӧрыннас ті висьталанныд, мый йылысь висьтавсис тайӧ видеороликас.

(Челядь висьталӧны ассьыныс мӧвпъяс)

Велӧдысь: Челядь, талун ми  сёрнитыштам миян сикт йылысь.

- Кыдзи шусьö миян сиктным?

-Мыйла миян сиктным тадзи шусьö? Кытысь артмöма нимыс?

(Челядь висьталöны ассьыныс мöвпъяс)

(Сы вöсна, мый сиктыс сулалö орччöн Помöс юкöд. Таысь и артмöма – Помöсдін. Дін – орччöн, Помöс – ю).

- А гашкö кодкö тöдö, кутшöм нимöн шулісны Помöс юсö медводдза локтысь йöз? Кодъясöн найö вöліны?

(Челядь висьталöны ассьыныс мöвпъяс)

(Лöпта, сы вöсна мый юас вöлі пöрöмаöсь пуяс и пыжаяс эз вермывлыны ветлыны. А медводдза йöзöн вöліны кыйсьысьяс, кодъяслы ёна кажитчис пожöма ягыс).

- Челядь, мый ті верманныд висьтавны миян Помöсдін сикт йылысь?

(Челядь висьталöны ассьыныс мöвпъяс)

1. Помöсдін сулалö сизим мыльк вылын.

2. Помöсдін гöгöр сулалöны ичöтик грездъяс: Сордйыв, Выльгорт, Мöдлапöв, Скöрöдум, Кырныша, Баддельыв.

3. Миян Помöсдін сиктын чужис да олiс Вениамин Тимофеевич Чисталев.

4. Эм кык парк.

5. Сикт дорті визувтöны кык ю – Эжва да Помöс.

- Челядь, ми öні тіянкöд нöшта видзöдлам историческöй да памятнöй инъяс миян Помöсдін сиктлысь. Ме лоа экскурсоводöн.

Велӧдысь петкöдлö слайдъяс да сеталö челядьлы юалöмъяс, висьталö слайдъяс кузя.

Медводдза слайд.

- Кодлы пуктöмаöсь тайö памятник – бюстсö?

- Кодöн вöлі Тима Вень?

- Мый бурсö вöчис Тима Вень миян сиктлы?

(Челядь висьталöны ассьыныс мöвпъяс)

- Молодечьяс, тайö памятник-бюстыс сулалö шöр улича вылын, школалöн стрöйбакöд орччöн. Тима Вень корöм вöсна вöлі сувтöдöма школа. Вениамин Тимофеевич Чисталев уна вöчис миян сиктлы: öтлаын сиктса олысьяскöд нырччис выль школа восьтöм кузя, веськöдліс драматическöй коллективöн, кодъяслы гижис ачыс петкöдчöмъяс, уджаліс коми небöгъяс да коми велöдчан небöгъяс лöсьöдöм вылын.

Велӧдысь: Онi,  челядь, кора лыддьыны Тима Веньлысь кывбуръяс.

 «Пышкай»                                                            

Пышкай миян керка лöскö                                                                                    Вöчö пияныслы поз:                                                                                        Коркö вомас изас кыскö                                                                                Коркö вайö вомас гöн.

Пышкай кöсйö керка вöчны!                                                                                 Оз и мудзлы. Уджыс тыр.                                                                              Лунтыр ноксьöмысь оз дугдыв,                                                                           Ноксигмозыс сьылö пыр.

 «Аръявыв»

Гудрасьö тай, кымрасьö                                                                                                            Мича енэжыс,                                                                                            Дзебсясьö нин, сайласьö                                                                                             Югыд шондіыс.                                                                                        Лöньöма тай, кушмöма                                                                                      Гажа расъясыс.                                                                                                           Бöрддзöма тай, бöрддзöма                                                                                     Гöгöр ывлаыс.                                                                                                 Кольöма тай, тыдалö,                                                                                    Шоныд гожöмыс.

Воöма тай, воöма                                                                                                Арся лунъясыс.                                                                                          Лунтыр зэр зэрö,                                                                                           Войбыд тöлалö.                                                                                                Лун-лун зэрласьö,                                                                                               Войяс пемыдöсь.

Мöд слайд.

- Кодлы сувтöдöма тайö памятник-барельефыс?

- Кодöн вöлі тайӧ повтӧм нылыс?

(Челядь висьталöны ассьыныс мöвпъяс)

- Молодечьяс, тайӧ памятник-барельефсö сувтӧдӧмаӧсь Домна Каликовалы. Орччӧн сулалӧ культура керка. Авторыс Владислав Мамченко. Домна Каликова вӧлі краснӧй партизанкаӧн. Белогвардеецъяс кӧсйисны перйыны Домналысь тӧдӧмлунъяс краснӧйяс йылысь, но збой ныв нинӧм эз висьтав налы. Сэки белогвардеецъяс нуисны додь вылын лыйлыны сійӧс. Лыйлӧмаӧсь Домнаӧс неылын «Зуд кум гӧра» местасянь, Эжва ю бокын.

Коймӧд слайд.

- Челядь, кыдзи шусьӧ тайӧ стрӧйбаыс?

- Коді лэптывліс сійӧс?

(Челядь висьталöны ассьыныс мöвпъяс)

- Молодечьяс, тайӧ зэв нин важ стрöйба, кодлы сё комын во нин -Езе керка.  Медводдза судтаас татӧн музей, а мӧдӧдас школа.  Тайӧ керкаыслӧн тшöтш зэв кузь история. Кыпöдлöма тайӧ керкасö Помӧсдінса купеч - Изекиль Порошкин. Медводдза этажас вӧлӧма  лавка, мӧдӧдас олӧма купечлӧн семьяыс. Тайӧ керкаас медводдза этажас 1919 воын вӧлӧма белогвардеецьяслӧн штаб (ӧнія кадӧ сэнi музейыс). Татӧн медбӧръяысь допрашивайтлӧмаӧсь-юасьӧмаӧсь миянлысь краснӧй  партизанка Домна Каликоваӧс.

Нёльӧд слайд.

- Челядь, мый ті аддзанныд?

(Челядь висьталöны ассьыныс мöвпъяс)

- Молодечьяс, миян сиктын эм кык пожӧма парк.  Оз быд сикт верми ошйысьны татшӧм бур паркъясӧн.  Помӧсдінсаяс да и гӧсьтьяс век восхищайтчӧны татшӧм мича да сӧстӧм природнӧй достопримечательностьнас. Тайӧ парксӧ В.Т. Чисталёв шуліс «Пушкинскӧй» челядьлӧн  паркӧн.

Тайӧ паркас ми тшӧкыда аддзывлам уръясӧс, кывзывлам лэбачьяслысь сьылӧмнысӧ.

- Ми тіянкӧд неуна шойччыштам, ворсыштам. Медводз ми кывнымӧс песыштам.

Кывпесанъяс:

- Татшӧм вӧрад тшакыд эм,

  Татшӧм вӧрад тшакыд тшем.

- Пуыс сісь.

  Пуас сизь.

  Пусӧ сизьдӧ,

  Розьыс письтӧ.

Подвижнӧй ворсӧм «Кыйсьысь пон да ур».

Ворсöм нуöдöм.

Челядь сувтöны кытшö. Пудъясянкывъясöн бöрйöны кутасьысьöс – кыйсьысь понйöс  да урöс, кодi дзебсясьö понйысь пуяс вылын (сайын).

Мукöд челядь лоöны пуясöн. Пасьталöны юр выланыс маскаяс (пуяс), кутчысьöны кияснас. Пон ветлöдлö кытш пиын, а ур -  кытш сайöд. Пон мунö веськыдвылö, а ур шуйгавылö. Челядь (пуяс) öтлаöн шуалöны кывбурлысь кывъяссö:

- Вöрын уна пу сулалö,                                                                                                               Пуяс вывтi ур котралö.                                                                                               Кыйсьысь мортлöн понйыс бур.                                                                                    Дуксö кылö урлысь ныр.                                                                                            Понйöй, понйöй, висьтав пыр,                                                                                          Кутшöм пуын дзебсясьö ур?

Бöръя кыв бöрас пон и ур сувтöны. Быд  морт  костын кольсьö неыджыд кост.

Пон медводз висьталö, кутшöм пу сайын дзебсьöма ур, тöдмалас кö пусö, вöлисти петö кытшсьыс и суöдö урöс.  Ур вöчö пуяс гöгöр öти кытш и кодлыкö сувтö водзвылас.

Пон кö сувöдö урöс, водзö кольö кыйсьыны понйöн, а пудъясьöмöн вежöны сöмын урöс.  Оз кö су, пудъясьöмöн вежöны кыкнансö.

Витӧд слайд.

- Парккӧд орччӧн сулалӧ война вылын пӧгибнитӧм салдатьяслы обелиск.  

Квайтӧд слайд.

- Челядь, кодлӧн тайӧ мича керкаыс?

(Челядь висьталöны ассьыныс мöвпъяс)

- Молодечьяс, тайö керкаас овлӧмаӧсь кык  зэв бур гижысь- Вениамин Тимофеевич Чисталев (Тима Вень) и Иона Тимофеевич Чисталев (Жан Морöс).

Велöдысь: Тима Веньлöн кывбур «Тувсовъя».

Лöсьыд, гажа зэв                                                                                                

Öні му вылын.                                                                                          

Долыд сьöлöмлы

Овны тулысын!...

Сідзи мунам да

Сэсся сувтлыштан,

Гажа ывланас

Нимкодясьыштан.

Кыдзи бузгöны

Тувсов шоръясыс,

Кыдзи сьылöны

Лэблысь пöткаяс,-

Пельнад кывзыштан.

Мунан-мунан да,

Бара сувтыштлан.

Кутшöм видзьясыс

Нюдза вежöдö,

Кыдзи вöр-пуыс

Синтö гажöдö.

Эськö дугдывтöг

Пыр сідз видзöдан,

Чöла ланьтöмöн

Помтöг кывзысян.

Сідзи сулалан,

Пыді лолалан:

Кокньыд морöслы,

Кыпыд сьöлöмлы!....

Сизимӧд слайд.

- А орччӧн сулалысь стрöйбаыс водзын вӧвлӧм зонъяслы медводдза начальнӧй школа. А ӧні татӧн  меститчӧма челядьлӧн «Патриот» творчество керка.

Кӧкъямысӧд слайд.

- А кыдзи шусьӧ тайӧ мича стрӧйбаыс?

(Челядь висьталöны ассьыныс мöвпъяс)

- Успенскӧй вичко. Коркӧ, ёна-ёна важӧн мичасьыс мича, величественнӧй стрöйба, кодӧс вӧчлӧмаӧсь 1824 воын, и, нинӧм вылӧ видзӧдтӧг ( гражданскöй война, ВОВ, сöветской власть) сійö ӧнӧдз шензьӧдӧ миянӧс аслас кыпыдлунӧн да мичлунӧн.

Велöдысь:

- Та вылын ми тіянкӧд помалам экскурсия Помӧсдін сиктын. Аттьӧала тiянӧс, челядь, бура уджалӧмысь. Видзӧй юрвежӧраныд став юӧрсӧ асланыд сикт йылысь, висьталӧй ичӧтджык чой-вокныдлы.

Литература:

• Архивысь материал видзöдöм.