Тема Һөнәрләр. Профессии
план-конспект

Тема.   «Һөнәрләр»

Бурычлар:

1. Хезмәт кешесенә хөрмәт тәрбияләү.

2. Укучыларның фикер йөртә белү сәләтен, диалогик сөйләмен үстерү.

3. Өлкәннәр хезмәте, аларның һөнәрләре турында укучыларның  белемнәрен киңәйтү, алар хезмәтенең мөһимлеген аңлату.

Сүзлек: янгын сүндерүчеләр, табиб, хезмәт иясе, һөнәр.

Җиһазлар: һөнәр ияләре күрсәтелгән рәсемнәр: «Төзүче»,

«Сатучы» һ.б., аудиоязмада «Кәрия-Зәкәрия» көе.

Эшчәнлек барышы

1. Мәкаль: Эш – кешенең көзгесе.

Эчтәлеге буенча фикер алышу.

2. Әңгәмә:

- Сез нинди һөнәрләрне беләсез?

- Әти-әниләрегез нинди һөнәр ияләре?

- Эшчән кешегә нинди сыйфатлар хас?

- Хезмәт яратмаган кешене нинди диләр?

- Нинди һөнәр иң кирәклесе дип уйлыйсыз, ни өчен?

- Зур үскәч, синең кем буласың килә?

- Сез һөнәрләр турында нинди мәкальләр беләсез?

- Сез ничек уйлыйсыз, үз һөнәренең остасы булу өчен

нишләргә кирәк?

3. «Тапкырларга – табышмак» (табышмакларга туры килгән рәсемнәр күрсәтелә).

а) Шәһәр, авыл йоклый әле.

Без бик иртә торабыз.

Иләк биетеп, он илибез,

Һәм мичне кыздырабыз.

Ипекәй һәр иртәдә

Килсен өчен өстәлгә. (Ипи пешерүче)

б) Ул сала биек йортлар.

Ул салган биек йортларда

Балкып кабына утлар.

Кем икән ул, балалар? (Төзүче)

4. Бармак уены «Һөнәрләр».

Баш бармагым – биюче,

Имән бармак – тегүче,

Урта бармак – төзүче.

Атсыз бармагым – укытучы,

Чәнти бармак кем була?

Читек чигүче була.

5. Дидактик уен «Парын тап».

Һөнәр ияләре төшерелгән рәсемнәр һәм эш кораллары төшерелгән вак рәсемнәр бирелә. Укучылар дөрес итеп эш коралларын урнаштыралар.

6. Җырлы уен. «Кәрия-Зәкәрия» көенә.

Бу бик яхшы тегүче,

Бу бик яхшы тегүче.

Аның күлмәге матур,

Аннан үрнәк алыгыз.

Бу бик яхшы очучы,

Бу бик яхшы очучы.

Ул бик булган һәм кыю,

Аннан үрнәк алыгыз һ.б.