Укуда балага ничек ярдәм итәргә?
статья (1 класс) по теме

УКУДА БАЛАГА НИЧЕК ЯРДӘМ ИТӘРГӘ?

           Һәр сабый тумыштан килә торган үзенчәлекләргә ия, әмма аның нинди булып үсүе нигездә тәрбиягә бәйле. Баланың акыл үсеше, әхлакый сыйфатлары гаиләдә формалаша.

           Бала 11 ел мәктәптә йөри, белем, тәрбия ала. Бу вакыт аның гомерендә катлаулы, шуның белән күңелле чор.

          Тәрбия эшендә иң мөһиме – балага карата һәр эштә төгәл була белү. Баланың өлгерешенә тукталыйк. Бала “2” ле, “3” ле алып кайтса, күз яше түгелә. Кисәтүләр ясала, без бертуктаусыз: яхшырак укы, тырыш, игътибарлы бул! дип тукыйбыз.

           Моның файдасы аз бит. Һәрвакыт кисәтеп, үгетләп тору көткән нәтиҗәне бирми. Бала “3” ле алып кайта башласа – иң яхшысы – укытучы белән сөйләшү.

           Мәктәпкә йөри  башалагач, 1 нче айларда укучы дәресләрнең гомуми барышы белән кызыксына. Соңрак үзенә ошаган фәннәрне тырышыбрак өйрәнә башлый. Вакытында булышучы, күзәтүче булмаса, бала эшен ташлап, уйнарга да чыгып китә.

           Белем алу тырышлык, түземлек, киеренке эш тәлап итә. Шуңа балада ихтыяр көче тәрбияләү әһәмиятле. Андый тәрбия үз алдына максат куярга, аңа ирешергә, сәләтеңне игътибарыңны тупларга өйрәнүдән башлана. Шушы сыйфат булмаса, өстәвенә мәктәптән арып кайтса, баланың юк кына нәрсәгә дә ачуы чыга. Урамда уйнап керер иде, дәрес хәзерлисе бар. Балагызга башта эшнең бер өлешен башкарырга, аннары бераз уйнап алырга тәкъдим итегез. Эшнең күләме зур булса, аны берничә өлешкә бүлегез. Эш белән уенны чиратлаштырырга онытмагыз.

           Тырышлык тәрбияләүдә китапларның да әһәмияте зур. Уку баланың гомуми культурасын үстерә, кызыксынучанлыгын арттыра. Ә китап укырга яратмау баланы рухи яктан ярлы итә. Балаларыгызның  һәр эшендә өлкән ярдәмчеләре, киңәшчеләре  булыгыз!