КВН мокшень кяльса
материал (9 класс)

Ётафтозе: мокшень кялень и литературань тонафтысь

Моисеева Л.М.

КВН мокшень кяльса

Илать целец: тонафтомс иттнень сяда кърхкаста содамс мокшень кяльть.

Илать молемац

        1-це вятись. Шумбратада инжихть, шабат! Тячи школасонк ётафттама ила-КВН, коса карматама корхтама шачема кяленьконь колга. Содаф сембонди, эрь ломанть ули шачема кялец, тядянь кялец: кинь рузонь, кинь немецонь, кинь татаронь, кинь эстононь и лама-лама лия кяль, конатнень лувомста сурхне аф сатыхть. Но мъзяра кяль ломанць афоль сода, сонь сяка мяляфтсы тядянь кяльть, шачема кяльть, кона тейнза инь малась и инь питнись. Тя стама кяльсь, конань вельде эрь ломанць азозе васенце валонц.

        2-це вятись. Ужяль эрь ломанти эсь тядянь-алянь кялец. Ужяльдьсазь сонь мариецсь, чукчась, финць, грузинць. Тонь лацот, мокша, аяш киньге, киньге мялец – аф марямс кяленц гайняй валонц, лямбонц-псинц!                 (М. Моисеев).

        1-це вятись. Содамошинь кельги шабатне, кинь оцюфт сатфкссна школьнай тя или тона предметть тонафнемаса, аф ляткшнихть апак приметак. Ламонь содайхне кирдевихть сельминголе, лездови сяда тов касомасост. И тя шарьхкодеви: въдь синь эздост ламода ащи экономикать виияфнемац, мастороньконь сай пингоц, шачема кяленьконь вандыень шиц.

        2-це вятись. Ванода! Куледа! Ушедсаськ эсь налхксеманьконь-пялькстоманьконь. Тячи тяса фкя кизефкс: кие сяда цебярьста содасы мокшень кяленьконь?

        Азсайне участникнень (азовихть пялькстомаса 5-6-7–це класса тонафнихнень лемсна). Аф кяшьсаськ и ся тонафнихнень лемснон, кит кармайхть «сярядема» эсь команданц инкса (азовихть тонафнихнень командасна).

        1-це вятись. Но инь строгайхне – тя жюрись (мокшень кялень и литературань вятись, рузонь кялень и литературань вятись, оцю класса тонафнись, кона ульсь пялькстомаса и сатсь призовой васта). Главнай судьясь – школань директорсь или сонь полафтыец.

        2-це вятись. Катк тячиень пялькстомаса сяськихть инь ёнюфне, виихне, смузюфне!

Жюрись кярьмоди эсь тевонзонды. Но васенда синь максыхть клятва. Клятвась: «Минь, КВН судьятне, карматама судендама честнайста. Макстама вал и кирдьсаськ валоньконь, што сембе очкатнень лувсаськ видеста-правильнайста. Минь принципоньке: «Улемс виикс – цебярь, ёнюкс – кафксть сяда цебярь».

1-це вятись. Жюрись и болельщикне «сярядихне» азфт. И тяни судьясь азсыне (лувсыне) вешфксонзон и мяленц.

Судьясь. Командатнень инкса «сярядихне»! Теенть эряви пичедемс-сярядемс эсь командантень инкса, сянкса аф эряви юватькшнемс, тюремс лия командатнень мархта. Теенть эряви пеедемс, къда кармай весяла; цяпамс, къда эряви кирдемс эсь командатнень, арьсемс-отвечамс командантень мархта эрь кодама заданияста кизефкснень лангс.

2-це вятись. А тяни лемдьсаськ командатнень (эрь командась азсы лемонц и девизонц).

1-це вятись. Васенце конкурссь – командать шумбракстомац (эрь командась аноконди арси аф оцю стихотворения, коса корхтави командать колга). Сяда тов максови вал судьяти.

2-це вятись. Макстама вал судьяти.

Судьясь. Заданиятне эрявихть тиемс вишкста, эльбятьксфтома. Мъзярда заданиять тисы 1-це командась, омбоцесь аф юватькшни.

1-це вятись. Ушедсаськ разминкать. Мон карман макссема кизефкст мокшень кяльса. Эрь командась арьси 1 минута и азсы эсь мяленц. Къда 1-це командать ответоц аф виде, то можна отвечамс 2-це командати.

Омбоце конкурссь. Заданиясь:

1. Мезе тонафневи «Лингвиниянь» масторса? (Фонетикась, Морфемикась, Лексикась, Морфологиясь, Синтаксиссь).
2. Кода мярьгихть разделти, коса тонафневихть кяльса сембе валхне? (Лексика «Валлувкс»).
3. Наука, кона тонафнесы лексикать (Лексикология).
4. Мезе тонафневи «Фонетика» разделса? (Гласнай и согласнай вайгяльксне).
5. Кода мярьгихть валхненди, конат азондовихть тя или тонга вастса? (диалектнайхть).
6. Кода мярьгихть валбефтома и формань тии морфемафтома валть пяльксонцты? (валъюрхта).
7. Кода мярьгихть валть инь ёмла смузень канды пяльксонцты? (морфема)

Тяфтама кизефкст можна максомс нинге.

2-це вятись. Васень кафта конкурсне аделавсть. Вал макстама жюрити.

Жюрись азсы результатть.

1-це вятись. Васенце результаттне (сатфксне) содафт. Арьсетяма, што участникне кармайхть сяда старандама и няфтихть кеме и кърхка содамошит мокшень кяльса.

Колмоце конкурссь «Кие сяда курок?»

Заданиясь. Максф валть мархта сёрмадомс существительнайхть, азомс падежть.

(куду) – н.вн.                       (вирьгя) – перем.           (ялгафтома) – изъят.

↑                                                            ↑                               ↑

          ↓                                                    ↓                                       ↓

 (офтокс) – сравн.                    (враченди) – дат.               (кшинкса) – причин.

(Тяфтама заданият можна максомс эрь корхтама пяльксть мархта, къда тонафнихне ётазь тя тематнень).

2-це вятись. Колмоце конкурссь аделавсь. Вал макстама жюрити.

Жюрись азсы результатть.

Нилеце конкурссь «Кизефкс –  ответ».

1-це вятись. Мокшень кялень урокненди тинь тиентяда-аноклакшнетяда кудонь тев. И минь КВН-оньке аф ётай тянь вакска. Кудса эрь командась аноклась кизефкст мокшень кяльса. Тя кизефксне и весялат, и серьезнайхть, и стакат, и тёждят. Инь интереснай  (мялень салай) кизефкссь – инь интереснай (мялень салай) ответсь. Арьсеманди максови пяле минута.

Командатне максыхть фкя-фкянди  кизефкст. Мъзярс жюрись лувонды очкатнень эса, кизефкст максовихть и болельщикненди.

Кизефкст:

1. Кодама шуфта лангс озси нармонць пиземда меле? (начка)
2. Кона ошсь лиенди? (Орел)
3. Кодама государства канневи пряса? (Панама)
4. Кодама валти поладови буква, штоба лисель алянь лем? (ков - Яков)
5. Валть кона пяльксонц можна мумс модаса? (юронц)
6. Кодама модась аф соксеви? (щамонь)
7. Кодама пилетне аф кулихть? (ведарка)
8. Кодама седьге аф ётават? (пянакудонь)
9. Кодама тяште аш менельса? (сёрматф)
10. Коста валдти пес сай? (седяла).
11. Кие кафксть шачи, весть кулы? (нармонць)

2-це вятись. Нилеце конкурссь аделавсь. Вал макстама жюрити.

Жюрись азсы результатть.

Ветеце конкурссь «Кие сяда лама, кие сяда курок».

И командатненди, и болельщикнеди максови «Варжакстомс» валсь.

Заданиясь. Тя валть эса эряви букватнень полафнемс станя, штоба лисельхть од валхт (корхтама пялькст). Инь ламось – 50 вал. Къда кафцьке командань участникне азсазь фкя и сяка валть, то очкас коря фкя и сяка валсь аф лувови. Лувовихить аньцек ся валхне, конатнень ашезь аза лия командань участникне или болельщикне.

1-це вятись. Ветеце конкурссь аделавсь. Вал макстама жюрити.

Жюрись лувсыне очкатнень и азсы результатть.

Сяда тов ётафтови «Капитанонь конкурс».

2-це вятись. Конешна, минь капитаноньке – инь содайхне, инь ёнюфне. Синь пяк лац маштыхть арьсема, лувома, морафтома. Тянь минь тячи кульсаськ-марясаськ.

Заданиясь. Сёрмадода скобкав вал, конань мархта аделави васенце валсь и ушеды омбоцесь.

Вар (…) фтемс (си, варси, сифтем)

Пен (…) тюжя (ал, пенал, алтюжя)

Пен (…) пача (ал, пенал, алпача)

Пен (…) кедь (ал, пенал алкедь)

Во (…) га (кал, вокал, калга)

Са (…) аткс (кал, сакал, калгаткс)

Бо (…) аця (кал, бокал, калаця)

Ине (…) гор (куй, инекуй, куйгор)

Ине (…) мак (куй, инекуй, куймак)

Пек (…) паця, баця (кедь, пеккедь, кедьпаця, кедьбаця)

Шал (…) ка (аш, шалаш, ашка)

Ка (…) пе, бе (вал, кавал, валпе, валбе)

Ська (…) гол (мон, ськамон, монгол)

Ман (…) фтем  (си, манси, сифтем)

(Тяфтама валхт можна максомс и болельщикненди).

1-це вятись. Капитанонь конкурссь аделавсь. Вал макстама жюрити.

Жюрись лувсыне очкатнень и азсы результатть.

2-це вятись. Тяни ётафттама  конкурс «Сяда тов, сяда тов». Эрь командаста лисихть кафтонь участник (эрь заданиять тиемста участникне полафнихть). Тя конкурсти аноклави аф фкя лацонь заданият.

1-це заданиясь. Эряви «В» буквать мархта арьсемс качественнай и относительнай прилагательнайхть. 1-це участниксь азы прилагательнай, омбоцесь – лемдьсы, кодама разрядонь тя прилагательнайсь.

Кепотьксонди: вазу, валазя, валда, вармав, варяв, ведю, ведень, вашу, велень, верозу, верок, веронь, веры, весяла, виде, вии, вирень, вирю, вишке, вишнянь и стак тов.

2-це заданиясь. Вяре максф прилагательнайхнень ётафтость рузкс.

3-це заданиясь. Максф валхненди арьсемс антонипт. Васенце командань участниксь азы вал, омбоце командань участниксь кочкай антоним. Кепотьксонди: оцю – ёмла, лама – кържа, весяла – пичефксу (ризфу), цебярь – кальдяв, ушеткс – пе, валда – шобда, кувака – нюрьхкяня, кърхка – маця, ингольдень – фталдонь, васенцесь – мекольцесь, вярце – алце, шапама – ламбама, оржа – ношка, акша – равжа, начка – коське, питни – уцез, авардема – пеедема, кенярдема – пичедема, эждемс – кельмофтемс и стак тов.

4-це заданиясь. Эрявихть мумс тя пакшста антонипне, кевонзаф валзюлмотне. Эрь командати максови печатлаф текст или аф лама валрисьме. Кепотьксонди сявови тяфтама.

«… И колендемс валхнень мархта аф эряви. Валсь – аф налхкш. Валсь – и тол, и эй, кона и эжттянза, и кельмофттянза; валсь – уленди и калгода, и ляпе; сон и сялктанза, и эрьхтянза: сон и ляпотьсы седицень и петьсы ваймоцень. Валсь тя стама вий, кона сърхкафты эряф и машфты эряф, и, мезсь главнайсь, тя вийсь мезьсовок аф унксневи…».

 (Антонипне: тол – эй, эжттянза – кельмофттянза, калгода – ляпе, Кевонзаф валзюлмотне: сърхкафты эряф – машфты эряф).

Тя конкурсста меле жюрись лувсыне очкатнень и азсы результатть.

Болельщикнень ёткса ётафтови конкурс, конань лемоц  «Мук пяльксонц (паранц)»

Конкурсса   валмуворксонь пялькссь сёрматф 14 карточкас:

1. Тят эряскода кяльса-
2. Сельмотне пелихть-
3. Ёрат лама содамс-
4. Кодама шуфтсь-
5. Кяльса козя-
6. Покамста – кирьхкс,
7. Улель мезе мимс,
8. Сура аф видят,
9. Алашать арфтк аф локшеса,
10. Кие вешенди,
11. Стака тонафнемась,
12. Васенда ункстак,
13. Кяжи валсь,
14. Лама содак,

        Валмуворкснень омбоце пяльксссна  – сяда товолдонь 14 карточкаса:

1. Кържа корхтак
2. Кода сельмос салсь
3. Меле керк
4. Тёждя эрямась
5. Ся фалу мушенды
6. А пинемса
7. А рамай муви
8. Ярхцамста кавал
9. Ашу тевса
10. Стамот тарадонза
11. Эряви кържа удомс
12. Пачат аф пидят
13. Кяттне тисазь
14. Эряскотт тевса

Иттне мумок парать, маладыхть вятихненди. Сят валмуворксть лангс максыхть призовой тяштеня (эрь конкурсть инкса аф фкя тюсонь). Казевихть васенце кота паратне.

Меле вятихне ётафтыхть аукцион залть кафцьке ширесонза. Фкя вятись «мишенди» валхт: ёнь, ведь, пря, фкя. Омбоцесь мишенди валхт: тев, сельме, кядь, кода. Сяськи ся «рамайсь», кона мекольцекс азсы тя валхнень мархта кевонзаф валзюлмоть.

«Ёнь» валть мархта шабатне азсть тяфтама фразеологизмат:

Кярьмодемс ёнц, эсь ёньцонза, лисемс ёньда,

«Ведь» валть мархта:

Кода ведьс ваясь, кода мациста ведсь, кода калсь ведьса, лама ведь шудесь,

«Пря» валть мархта:

Пряста сявомс пильгти молемс

Синнемс пря

Ёрдамс пряста

Шаракофтомс пря

 Шава пря уча

Тяк шна пряцень кяльса – шнак тевса.

Ортась ащи кафта свайса, кудсь – кафта пряса.

«Фкя» валть мархта

Фкясь сембонь инкса, а сембе фканкса.

Фкя нумолста кафта кетть аф ваткат.

Фкя пилеват сувай, омбоцева лиси.

Фкя лаца ваттама, да аф фкя лаца пеке анттама.

Кафта нумол мельге панят, фкявок аф кундат.

Фкя мешкяти ськамонза лама медь аф кандови.

Фкя кядец аф содасы, мезе тии омбоцесь.

Фкя сельмонц мархта ризнай, омбоцеть мархта пееди.

«Тев» валть мархта 

Кяльса инголе, а тевса фтала.

Фкя кальдяв тевсь, вяти омбоцети.

 «Кяль» валть мархта

Кувака кяльце, да нюрьхкяня мяльце.

Родной кяльса корхтат – седи (мяль) петят.

Кяльсь пеельдонга оржа.

Мезе мяльсот, ся и кяльсот.

Кяльсь Питери (Москуву) пачфттянза.

Корхтамста вал мельге зепс аф сувай.

Кие аф машты кяленц кирдема, ся аф машты корхтама.

Парьхциень кялец, да куень мялец.

«Курга» валть мархта

Кальдяв ломанень кургста цебярь вал аф кулят.

«Тол» валть мархта

Кафта тол ёткса толфтомонга палат.

«Мор» валть мархта

Кодама крандазс озат, стама мора морат.

Аукционца сяськихне казевихть казнеса (тяштеняса).

Мекольце конкурссь кармай улема творческяй. Эрь командати максови рисунка, коса тяфта жа улихть и валхт, или слокт. Эряви арьсемс тя рисункать коряс текст, нолямок тевс валхнень, Кепотьксонди сявови тяфтама рисунка.

Илать ётафтомда меле азовихть  сяськихне и казевихть казнеса.