"Татар кызы" бәйгесенә визитка
материал (9, 10, 11 класс)

“Татар кызы” бәйгесенә сценарий (визитка)

(2 егет сөйләшеп утыра)

1 нче егет:  Безнең  күрше Сания апага шәһәрдән кунак кызы кайтты бит. Күрдеңме әле?

2 нче егет: Әй, чебен тими чер итә торган елак  Мәрьямме ул?

1 нче егет: Елак булыр ди сиңа, бар. Минем, аны күргәч, күз маңгайга менде. Вот чибәрләнгән ул. Аның матурлыгын күреп, исәнләшергә дип ачкан авызымны ябарга онытканмын.

2 нче егет: Әй, бер дә хараптыр инде. Шәһәр кызларын күргән бар.  Әле русчалап сөйләшкән буладыр?

1 нче малай: Булыр бар. Әбисенең бакчасында, карлыган җыйганда, татарча җырлап җибәрә, малай, Венера Ганиеваң бер кырыйда торсын!

2 нче малай: Чынлап әйтәсеңме?

1 нче малай: Әйдә, ышанмасаң койма кырыенарак. Әнә үзе монда килә түгелме соң?

     (“Туган авылым”  җырын җырлый-җырлый кыз килеп керә.)

Кыз: Исәнмесез, егетләр! (пауза)  Ник дәшмисез?  Әллә танымыйсызмы?

1 нче егет: Менә синең җырлаганыңны  тыңлап, телсез калдык әле.

2 нче егет: Инде без сине татарчаны бөтенләй  оныткансыңдыр дип уйлаган идек. Шәһәр кызлары бит алар....

Кыз: Сез нәрсә инде, егетләр? Нинди шәһәр кызы булыйм инде мин. Шушы авылда бергә уйнап үстек бит инде без сезнең белән. Үткән ел гына мәктәпне бетерү, укырга керү мәшәкатьләре белән кайта алмадым.

2 нче егет:  Әйтәм юкка чыктың син,  Казан кызы чибәр Гөлмәрьям. Укырга кереп йөргәнсең икән әле.

Кыз: Әйе,ничәмә-ничә төннәр авылыбызның  чишмәләре, әбиемнең  яшел ишегалды, хәтта усал ата казы да төшләремә кереп йөдәтте. Үлеп яратам бит мин шушы әти-әнием туган авылны. Нәсел җепләрем  гел  үзенә тартып тора.

1 нче егет: Молодец, Мәрьям. Кайбер шәһәр кызлары шикелле авыл турында борын җыерып сөйләшмисең син. Әле ничек матур итеп татарча җырлый да беләсең икән , ә?!

Кыз: Авылга кайттым исә, бер хыялыйга әйләнәм дә куям инде мин. Хыялга бирелеп, шигырьләр дә язгалыйм. Берсен сезгә дә укыйсым килә.

Егетләр: Яле, яле!!!

Кыз (шигырь сөйли):

Күңелләрем әллә нишләп китә,

Авыл туфрагына басуга.

Күпме шатлык, күпме илһам бирә

Азга гына сиңа кайту да.

Бәхетем арта, авылыма кайтсам,

Очар коштай тоям үземне.

Оныта алмам, мәңге яратырмын,

Әби-бабам туган бу җирне.

2 нче егет: Чыннан да үзең яздыңмы, Мәрьям?

Кыз: Үзем инде, үзем.

2 нче егет: Айрат, син өеңә ашыга идең түгелме? Син бар, мин Мәрьямне үзем озатып куям.

1нче егет: Юк, Илдар, мин түгел, син ашыга идең бит.

Кыз: Сез нәрсә инде егетләр, минем өем монда гына бит!

2нче егет: Әйдә, шәһәр кызларын ялгыз йөртү килешмәс, бергә киттек, алайса. (Чыгалар)