Без  -  Тукайлы халык!

               Максат: Тукай әсәрләренең геройлары белән очрашу, бөек шагыйрь шигырьләреннән өзекләр уку, шулар аша ул күтәргән фикерләрне ачыклау. Туган җир, туган тел, Тукай төшенчәләренең бәйләнешен күрсәтү.

               Җиһазлау: Тукайның тормышы һәм иҗаты турында слайдлар. “Г.Тукай”, “Халкыбызның күңел бизәкләре”, “Эш тәҗрибәсеннән” дигән темаларга күргәзмәләр оештыру.

                  Бәйрәмнең барышы:

I. Татар өе күренеше. Балалар,”әни”. “Әни “ балаларга  әкият сөйли.

1. Сәхнәгә бер малай йөгереп чыга, аның артыннан “Су анасы” куа:

- Качма, качма! Тукта, тукта, и карак! Ник аласың син аны, ул бит минем алтын тарак!

2. Сәхнәдә “ егет” утын кисә, “Шүрәле” килеп чыга:

- Әй, егет, әйдә бераз кети-кети уйныйк!

“Шүрәле” башка балалар белән дә уйнап ала.

3. Бала бик тырышып дәресен карап утыра. “Әни”:

- Син әле үс һәм  укы күп, шунда аңларсың барын,

  Мәгърифәт нуры ачар бар нәрсәләрнең ялганын.

“Сандугач” керә:

- И, сабый! Әйдә тышка, күңлең ач!

Җитте бит, бик күп тырыштың,

Кара, нинди һәйбәт. нинди шәп уйнар заман!

Бала:

-Юк, сөекле сандугачым, уйнасам дәрсем кала.

Чыкмамын тышка уенга, булмыйча дәрсем тәмам.

4. Г.Тукай “Бәхетле бала” шигыре:

Бәхетле шул баладыр, кайсы дәрсенә күңел бирсә,

Мөгаллимне олуг күрсә, белергә кушканны белсә;

Сабакка калмаса соңга, борылмый барса уң, сулга,

Уенга салмаса ихлас – менә бәхте аның шунда:

Кешеләргә итеп шәфкать, үзеннән зурга юл бирсә,

Бәхетсезләрне кимсетми, егылганнарга юл бирсә.

5. Татар халык биюе.

II. Сәхнә кырыенда “Тукай” язып утыра. Скрипкада “Әллүки” көе яңгырый. Балалар бер-бер артлы чыгып шигырьләрдән өзекләр укыйлар:

1 нче укучы. Укып барган һәрбер юлым, һәрбер сүзем

                      Була минем юл күрсәтүче йолдызым.

                      Сөйми башлыйм бу дөньяның ваклыкларын

                      Ачыладыр, нурланадыр күңлем, күзем...

2 нче укучы. Бу дөньяда, бәлки күп-күп эшләр күрем,

                      Билгесездер кая ташлар бу тәкъдирем,

                      Кая барсам, кайда торсам, нишләсәм дә

                      Хәтеремдә мәңге калыр туган җирем.

3 нче укучы. ...Мондадыр безнең бабайлар түрләре, почмаклары,

                      Мондадыр дәртле күңелнең хурлары, оҗмаһлары,

                      Монда хикмәт, мәгърифәт һәм монда гыйфран,

                      монда нур...

“Туган авыл” (Г.Тукай сүзләре, татар халык көе) җыры.

4 нче укучы. Бар уем кичен- көндезен сезнең хакта, милләтем,

                      Саулыгың – минем саулык, авыруың – минем авыруым!

5 нче укучы. Ул булганда адашмабыз –

                      Юлым туры, нурлы көнем

                      Күз карасы кебек саклыйм

                      Анам телен – татар телен!

6 нчы укучы.Туган телем, туган халкым , Тукай!

                      Бу өч сүз бергә, мәңгегә.

                      Без бәхетле,

                      Без - шагыйрьле халык ,

                      Без – Тукайлы халык мәңгегә!

III. Йомгаклау.

- Сөйик без халыкны,
Сөйик без халыкның  дөньясын,

                                                 телен,

                                                        милләтен!

“Туган тел” (Г.Тукай сүзләре, татар халык көе) җыры.