Саннар илендә
план-конспект урока (5 класс)

Саннар илендә.

(4 нче сыйныфта саннар темасын кабатлау. Рус төркеме)

Укытучы. Исәнмесез укучылар.

Укучы. Исәнмесез.

Укытучы. Хәлләрегез ничек?

Укучы. Рәхмәт, яхшы. Ә сезнең хәлләрегез ничек?

Укытучы. Рәхмәт, укучылар, яхшы. Бер-беребезгә карыйбыз, елмаябыз, уңышлар телибез. Укучылар бер-берсенә хәерле көн телиләр.

Укытучы. Укучылар, Кыш бабай безгә бүләкләр җибәргән. Әлеге бүләкләрне алыр өчен безгә бүгенге дәрес биремнәрен чишәргә кирәк. Әйдәгез, бергәләп беренче биремне карап үтик. (Беренче биремне үтәү өчен өй эшенә мөрәҗәгать итәргә кирәк.). Өй эшен барыгыз да эшли алдыгызмы?

Укучы. Әйе.

Укытучы. Өй эше нәрсә иде укучылар. Кем әйтә?

Укучы. Табышмакларны чишәргә.

Укытучы. Әйе, дөрес. (Табышмыкларны укыйлар, җавабын әйтәләр).

Укучы. Мәскәүдә бер дә юк, Казанда икәү. “А” хәрефе.

Укытучы. Укучылар, дөресме?

Укучы. Әйе.

Укытучы. Әйе, дөрес.

 Укучы. Саматта бар, атта юк. Сәгатьтә бар, иттә юк. “С” хәрефе.

Укытучы. Укучылар, ә сез ничек уйлыйсыз?

Укучы. “С” хәрефе.

Укытучы. Өченче төркем укучылары, сездәге табышмакны тыңлап үтик.

Укучы. Синдә бар, миндә бар – кешедә юк. Казанда бар, илдә юк. Урманда бар – бер генә, җирдә-суда бер дә юк.  “Н” хәрефе.

Укытучы. Шулаймы укучылар?

Укучы.  Әйе.

Укытучы. Бик дөрес, укучылар. Димәк безнең җаваплар: А, С, Н хәрефләре. Балалар, әлеге хәрефләрдән нинди сүз төзеп була?

Укучы. САН.

Укытучы. Нәрсә соң ул САН?

Укучы. Числительное.

Укытучы. Димәк, без бүген нәрсә турында сөйләшәчәкбез? Дәреснең темасын ничек билгеләргә мөмкин? 

Укучы. Саннарны кабатлау, саннар, саннар илендә...

Укытучы. Сан нинди сорауларга җавап бирә?

Укучы. Ничә? Ничәнче? Ничәү? Күпме? сорауларына җавап бирә.

Укытучы. Дөрес укучылар. Без бүген саннар турында сөйләшәбез. Безнең карточкаларда диоганаль һәм вертикаль буенча саннар яшеренгән. (Вакыт бирелә, саннарны фломастерлар белән билгелиләр).

Укытучы. Өченче төркемдәге иң озын чәчле кыз җавапларны укый.

Укучы. Җитмеш, мең, дүрт...

Укытучы. Башка төркем укучылары, сез нинди саннар өстәп әйтә аласыз? 

(Башка төркем укучылары әйтеп бетерелмәгән саннарны укый. Башкалар язып бара).

Укытучы. Укучылар, ә хәзер әлеге саннарны нинди дә булса билгеләре буенча төркемнәргә аерып, баганаларга бүлеп языгыз.

Укытучы. Беренче төркемдәге иң озын буйлы малай беренче баганадагы җавапларны укый.

Укучы. Алтмыш, җитмеш, мең, унтугыз, дүрт, йөз.

Укытучы. Икенче төркемдәге иң кыска чәчле кыз икенче баганадагы җавапларны укый.

Укучы. Алтынчы, сигезенче, унҗиденче, икенче, бишенче.

Укытучы. Өченче төркемдәге иң зур озын чәчле кыз өченче баганадагы җавапларны укый.

Укучы. Икәү, алтау, җидәү, унау.

Укытучы. Укучылар нинди билгеләре буенча саннарны аерганнарын аңлаталар.

Микъдар саннары (количественные числительные).

Тәртип саннары (порядковые числительные).

Җыю саннары (собирательные числительные).

Укытучы. Микъдар саны нинди сорауга җавап бирә?

Укучы. Ничә? Күпме? Никадәр?

Укытучы. Тәртип саннары нинди сорауга җавап бирә?

Укучы. Ничәнче?        

Укытучы. Җыю саннары нинди сорауларга җавап бирә?

Укучы. Ничәү?

Укытучы. Ә хәзер бергәләп үткәннәрне ныгыту өчен күнегү эшләп алыйк.

Күпнокталар урнына тиешле саннарны куеп языгыз. (Вместо многоточий поставьте нужные числительные).

Үзем турында.

Минем исемем ... .  Миңа ... яшь. Мин ... лицейда, … сыйныфта укыйм. Мин Казанда, ... урамында, ... йортта, ... катта, ... фатирда яшим.

Гаиләбездә без ... . Әниемнең исеме ... . Аңа ... яшь. Әтиемнең исеме ... . Аңа ... яшь.

 (Укучылар карточкалар белән алмашалар, бер-берсенең җавапларын тикшерәләр. Бер укучы текстны укый).

ЯЛ ВАКЫТЫ. Җыр туктый, мисал чишелә. Балалар килеп чыккан җавап буенча төркемләшеп басалар.

Саннар кулланып җөмләләр төзү. Дәреслек белән эш. 74 нче бит, 2 нче күнегү.

Ситуатив күнегүләр. Диалоглар төзү. Парларда эш. Темалар: тукталышта; кибеттә; танышу. Диалогларда саннар кулланылырга тиеш.

Мисал өчен диалоглар.

Өй эше бирү.

* Скажите, сколько часов в сутках,дней в неделе,месяцев в году,дней в месяце,используя разные разряды числительных;

* саннар белән 3-5 җөмлә төзеп язарга;

* саннар кергән 2-4 мәкаль язып килергә.

Укытучы. Укучылар, без бүген нәрсәләр эшләдек?

Укучылар:  

• кыш бабайның биремнәрен эшләдек;
• диалоглар төзедек;
• сораулар бирдек;
• саннарны кабатладык һ.б.

Укытучы. Нәрсәләр эшләргә өйрәндек?

Укучылар:  

• кибеттә әйберләрнең бәяләрен сорарга;
• тукталышта кирәкле транспортны сорарга.

Укытучы. Ә хәзер белемнәребезне тикшерәбез. Аның өчен безгә перфокарталар кирәк була. Мин саннар әйтәм, ә сез перфокарталарда билгеләп барасыз.

Укытучы. Биремне дөрес үтәгән булсагыз, сезнең “5”ле билгесе килеп чыгарга тиеш.

Укытучы. Сезнең дәрестә алган билгегез дә “5” ле укучылар. Сау булыгыз.

Укучылар. Сау булыгыз.