Стихи на мокшанском яз.
материал по теме

Стихи по учебнику: Василий Родькин, Ф.Костяйкин, В.Кочерганов «Коза кяшенди шинясь?» - Куда прячется солнышко. Саранск, 1986 год.

ВАРЯГАТ

Лиенди ушеса ловня,

Тавады акшеса модать.

Эняльди щаванцты Фролня:

- Варягат тейне кодак.

Ялганза сембе ульцясот,

Колендихть, ласькондихть, курькснихть.

И аньцек Фролне аш тоса,

Кудса ськамонза нюрькси.

Щавац сась уноконц малас,

Акшана шяярнянц палась:

- Саты, тят пичеде, Фролня,-

Аф солай вындыти ловнясь.

Лацкас катк вельхтясы модать,

Вандыс тейть варягат кодан.

ТЯФТАМКС УЛЕДА, ИДНЯТ

Чак-чак-чак- вальмяти снавнят

Кие еряй шиньгучкать?

Да тя вачеда ситявнясь,

Ярхцамбяльня анай, нать.

Коста якшафнезе ушенц,

Аера вармась пицесь толкс,

Тяста видьмонят сон мушендсь.

А тячи форточкаське селкф.

Вальмять панжезе Лариса,

Да и ердась видьмонят.

Эх и цебярьста вдь тись сон!

Тяфтамкс уледа, иднят!

КОЗА КЯШЕНДИ ШИНЯСЬ?

Ши-шишка ульцяса пси,

Илядь пяли эшенди.

- Тядяй, ков юмафни шись?

Азка, коза кяшенди.

- Няйсак, стирняй, кши ичан,,

Ванды панян калацят.

Инжихть жирезонк учан,

Кизефтьк лучи аляцень.

…И аф пичеди стирнясь,

Аляц стяфтсы заря еткть.

Синь мусазь ся сери лоткть,

Коза кяшенди шинясь.

МОРОЗ АТЯСЬ

Мороз Атя канды кяскав,

Кяскавсь акша оронц эшка.

Лятфтазь иттне – ванды праздник,

Кяскавсонза тейст казнет.

Шуфтнень еткова, няк якай,

Эрь кузнять сон мандса чакай.

Шукии най лофнень эса;

Мазы елка тяфта веши.

КИЗОНЬ ПИЗЕМНЯ

Кизонь сетьме пиземнясь

Ожнакс срады келес.

Сяда одкстомсь тишенясь,

Одкстомсь марнек велесь.

Канды шудеркссь пайгонят,

Нява, губор прява,

Бта ардыхть айгорнят

Комболфса ульцява.

МОН АФ НОЛАН

Тячи мон аф молян школав,

Тячи вайматама минь.

Но мон церокшкясь аф нолан,

Аф юмафнеса стак пингть.

Сявонь пеельня, картон

И ракета тиень мон.

Но аф стама, кона ляци,

Шави ломатть, ошт плхтай,

А туй менелень киняти,

Муй планета и мрдай.

ПИЗЕМНЯ

Моли вяшкозь пиземнясь.

Алянц кизефни иднясь:

- Кие веднять тяфта кучсы?

- Морять лангста шинясь куцфтьсы,

Шиньфокс вармась кандсы вярьге,

Ванат, и туцятне тярьгодсть.

Валы пиземсь – сембось касы,

Модать пиже щамса щасы.

ПАРОНЬ ПАНДЫ

Бабай, тон ни сиренят.

Сяка ваймама аф содат:

Етнят байдекса кинят,

Мондейне цюлканят кодат.

Пирьфонь тефт тият шиньберьф,

Улема, сизсят тон вельф?

Ожка, ведня тейть мон кандан,

Парьцень инкса парьцень пандан.

Эряк, бабай, лама киза.

Полафтте тонь, кда сизеть.

ШКОЛАВ САЙХТЬ

Етасть кизонь пси шинятне,

Но аф няят скучендайхть:

Пяшксет китне и кинятне –

Иттне тонафнема сайхть.

Тейст, нява, венептсь кяденц

Школать малас стяф Ильичсь.

Анок иттненди пшкядемс:

- Инголент тинь валда кись!

АНЕЛЬКА

Стяй, аф шаманц рдазуть штасы

И аф прянянц сеенди:

Веши-анай боком васта-

Макст конфеткат тейнза,

А аф максат – вайгяль нолдай,

Пешкоды – хоть кудтьке катк!

Катосновок, кода толда

Пели эздонза аф стак.

Пелихть сазорняц и брадоц.

Мяленц ванцазь оцюфне,

А сон, ванат, тага мады:

«Кадомасть, аш моцезе!»

КАЛНЯ

Ляйнять крайса касы кальня,

Ару ведьге уи калня,

- Калня, ялганязе, калня,

Аста тейне хоть фкя валня.

Эрь, а сон аф кушт, аф кашт.

Маряк, валонза сонь аш.

Стихи по уч.Михаила Герасимовича Имярекова «Толонь кяльхть»

ИТТЬ

Итть!..

- тя валсь

Миндейнек седишкава мала,

Сембе вастса

Ляпоняста сонь кульсак:

Родинаньконь

Якстерь знамянц ала

Касыхть иттне,

Кода мазы макт.

Катк синь тяни

Школань парта ваксса,

Книгань коряс

Якайхть векнень пачк,

Мзярда касыхть –

Эста масторть лангса

Кармайхть озафнема

Павазонь од панчфт.

Касыхть – стяйхть синь

Трудонь славнай вахтас:

Сокайхть степт

И шувихть од каналхт,

Пачкодихть тайгавга

И Донбассонь шахтас,

И крьвястьсазь

Коммунизмань заря валдть.

Итть!..

Тя валсь

Миндейнек седишкава питни.

Кяжи врагта

Ванфнесаськ сонь лац.

Иттнень эзда няйсаськ

Сай пингонь шитнень,

Видь синь кядьсост

Од эряфть судьбац.

АРУ ЛОВНЯ

Ару ловня коволня,

Сяда курок сак,

Масторть ланга саворне

Ляпе ацамс прак.

Ацазень луганятнень,

Паксятнень и вирть,

Акшептозе-вельхтязе

Шачем-касом ширть.

Тялонясь сась азорнякс,

Фатни шалхка пес.

Сембе корхтайхть: «Кяжиясь

Якшамсь кати-мес».

ПРЯНЬ ШНАФТЫ

Ванясь корхтась ялга еткса:

- Кочкань эстейне ки-ян,

Нурдонят и лии сокстка,

Кда мялезе, тиян.

Од ракета? Макста пинге,

Да тиса ков потмоста,

Мяляфтость, мон тейнть нинге

Тяштян серма космосста.

Сембе пирьфса корхтайхть-торайхть,

Шнайхть и нльне абонкшнихть:

- Ну и Ваня! Ну и цера…-

Фкя-фкянь етазь азонкшнихть:-

Мярьги, космосу лийхстай,

Мярьги, тяза сафтсы!

Эрь, а меки козк мрдай,

Ули васень шнафсь сон!

Кати-кода весть илять

Ванять шири сась Илья,

Корхтай: - Эняльдян пяк, тик

Шабань налхкшкя – грузовик.

Етась неделя и кафта,

Тиемс налхкшкясь – ашезь сафтов.

Шарьхкодсть: кяленц шовась зря,

Тяфта аньцек шнафнесь пря.

СЁРМА – ПИСЬМО

- Кие, кие тя стирнясь,

Кие тяшти серма?

- Тейнза аф тяштеви,

Сон нинге пяк емла!..

- Нинась емла!.. Кие мярьгсь?..

Кадозе ни няканц.

Тядяц Нинать шнасы пяк:

Кудонь тевса лезни най,

Куцюфт штай нардай,

Кие тии кальдяв тефт,

Сятнень эса кардай!..

Содасть сембе тя стирнять,

Тяни сон аф емла,

Ваность вели бабанцты

Нина тяшти серма.

УШЕСЬ ПАРА

Ушесь пара. Валдта мзяра!

Етась сетьме пиземня.

Панчфонь пусмот нолдась лаймарькссь,

Перьфьке – танцти шиненя.

Тяса-тоса гайняйхть морот.

Кеняртьфт седиеньке фланкс.

Тячи пуромоме марса

Налхксеме луганять лангс.

Кельгсаськ мани, лямбе ушеть,

Рахай-пееди шинять,

Пиже парьхциень лугатнень,

Шачем-касом ширенять.