Аволь классо ловнома урок - семинар И. Калинкинэнь "Пиче вирь" повестензэ коряс
план-конспект урока (11 класс) на тему

               МБОУ «Посёлкань омбоце 2-це № школась»

Отяжбуе ёнксось

Аволь классо ловномань урок  11- це классо

«Пертьпельксэнь мазычинть ванстомадо мельтне - превтне И. А. Калинкинэнь « Пиче вирь » стихсэ повестьсэнть».

Анокстызе ды ютавтызе:

эрзянь келень ды тиринь литературань тонавтыцясь

Сигимова Надежда Геннадьевна

Аволь классо ловнома урок – семинар 11- це классо

  Темась:  Пертьпельксэнь мазычинть ванстомадо мельтне - превтне И. А. Калинкинэнь « Пиче вирь » стихсэ повестьсэнть.

 Бажамотне : 1) анокстамс тонавтницятнень максозь произведениянть смустензэ седе домкасто чарькодеме;

 2) невтемс, кодамо певтеме, мазый ды сюпав минек тиринь ёнксось; тешкстамс, кода ды кить кармить ванстомо неть сюпавчитнень;

 3) маштомс геройтнень тевест - валост коряс обуцянь башка ёнкстнэнь панжомо ды карадо - каршо путозь характеристикань максомо;

 4) кастомс тонавтницятнень кель - валонь сюпавчист.

 Тевс нолдазь кедьёнкстнэ: Поэтэнть портретзэ, книгань  невтелма , компьютер, магнитофон, эйкакшонь артовкст, тест, сёрмадовкст.

• Уцяскась - те улемс пертьпельксэнть марто, неемс сонзэ, кортамс мартонзо.

                                                  Л. Н. Толстой.

• Ломанесь, кона чарькодьсы пертьпельксэнть - лембе ойме, ванькс.

                                                                          Л. М. Леонов.

• Весе, мезе перькат тон неят:

Цецят, лугат, пиже вирть, лейть-

Лагмолгавт сынст - ине тев теят,

Эрьва таркасо истя тейть.

                                                  А. Моро.

                      Уроконь молема лувось.

 1. Уроконь пурнамонь – теемань шка..

 2. Ютазенть мельс ледстямось.

• Тестэнь коряс важодема.
• Кодамо произведениясто саезь неть саевкстнэ?

1) …Седеесь свал  велявтсь ды тердсь Бездна лей чирев, косо аштесь сынст кудост,

 секс сон кадызе Алтыш веленть апак ризнэ, апак тално.Мельспаросо эскелясь вирень кияванть ды састынькине  вешксь турвасо.Вирьсэнть экше, сундерькс - чопода, чувтонь тусто тарадтнэнь юткова шкань - шкань менькшни маней чинть валдозо ды сырнень цитниця покольнекс певерькшни кичирень сэрей тикшенть потс.

  а) «Эрзянь цёра»,     б) «Лажныця Сура»,    в) «Покш  ки лангсо умарина».

2)     Моли Паша атя вирьганть нуцьканзо марто. Вечксы сон виренть. Чувтнэнь марто арси, сынст марто корты. Варшты нувара тумонть лангс, карми эйсэнзэ позорямо: «Станот покш - лезэ эйсэнзэ арась. Ков истя нуварьгадыть? Виздевлить бу шабрадот: ванта,  струнакс венстявсь менелентень!»

   а) «Виренть велькссэ шум»,     б) «Вирязонь нуцьказо »,    в) «Кавонст кудат»

 3)  Варма синсть арась вирьсэнть, ялатеке чувтотне аламодо лыкить, маряви аволь покш талнома. Те истя тундось сыргась

      а) «Галё»,          б) «Килей ведь»,       в) «Идем галат».

• Кинь неть валтнэ ?

                      Сон арси:

                      «Природантень молемс панжозь ойме марто свал , эряви  азоркс ды оякс тензэ улемс»

   а) Митяй атянь ,      б) Стёпа атянь,     в) Михалонь.

Тонавтыцясь: - Эйкакшт, нама, тынь чарькодиде, тесттнэсэ весе кармавтоматне сюлмазь сеть произведениятнень марто, конатнесэ ванстови, кепедеви пек покш, эрявикс проблемась - пертьпельксэнть ванстомась « Эряви вечкемс ды ванстомс пертьпельксэнть» Неть валтнэ минек эрямосонть марявить яла сеедьстэ ды сеедьстэ. Ванстомс виртнень, лейтнень, эрькетнень, сёлттнэнь, ракшатнень, нармунтнень - те ванстомс масторлангонть  сюпавчинзэ, мазычинзэ. Зяро  сёрмадозь тень кувалма!

   Минек эрямось а явови пертьпельксэнть эйстэ. Сон анды, симди, орши минек эйсэ. Сон пек сюпав ды максы эрьва мезе. Пертьпельксэнь мазычись кенярдовты эрьва ломаненть. Ламо стихотвореният, артовкст, музыкальной произведеният чачсть сонзэ вечкемадонть.

• Уроконь теманть коряс важодема.

   Тонавтыцясь: Течинь уроксонть минек кортамось карми молеме И. Калинкинэнь      «Пиче вирь» стихсэ повестензэ коряс.

   Мокшэрзянь литературоведэсь ды критикесь М. Г. Имяреков тешксты: - Иван Алексеевичень творчествасо сехте неявикс таркасо ашти « Пиче вирь »  стихсэ повестесь. Сон алтазь течинь пек эрявикс кевкстемантень - кода ванстомс пертьпельксэнть. Поэтэсь седейшкава ёвтни Чукало веледенть, конань перька касы пиче виресь. Сонзэ кастызе Степан атя ды ней вансты эйсэнзэ. Те тевентень тонавты Федянь, Колянь. Авторось седейшкавань валсо ёвтни Нинань ды Колянь ютксо пси вечкемадонть. Поэтэсь невтизе сыре ды од ломантнень ютксо сюлмавкстнэнь, од ломантнень касомань кист - яност, сынст обуцянь ёнксост. Художественной образсо, тешкссэ Иван Калинкин панжинзе прявт геройтнень ойме виест.

   Седеяк пштилгады сюжетной киксэсь, зярдо поэтэсь панжи конфликттнэнь юрост. Сон жо вана мейсэ: колхозонь прявтось Фёдор Бовин кармавты чувтотнень эйстэ чудевтеме пиче ой ды керямс пиче виренть. Бути топавтомс прявтонь мельтнень, весе те канды зыян ломантненень ды паксятненень. Колхозонь прявтонть каршо сти видечинь кис аштицясь, Степан атя.

  -  Кунсолови тонавтницянь ёвтамо: «Виресь - раськень сюпавчи» (зярдо тонавтницясь ёвтни , компьютерга невтевить картинат, косо невтеви виресь)

              Виресь - те эрямо, сюпавчи, эрямо тарка, кекшема тарка, мазычи, ванстыця …Ломанесь а эряви виртеме. Виресь - те минек Мода планетанть тевелявонзо. Виресь лезды ванстомс летькенть модасонть, сонстемензэ коськевельть бу лейнетне ды эрькетне, авольть максо урожаенть паксятне. Сонзэ марто ломанесь сюлми весе эрямонзо. эдь а стяко минек покштянок - бабанок бажасть путомс кудот виренть малас эли овсе вирьс. Цецясо, пиже тикшесэ ацазь  кужосо ютавтневсть озкст, оймсесть. Виресь ванстылинзе кайсевиця яттнэде, даволтнэде ды лия апаро, аучовикс тевтнеде,  андылинзе ды оршилинзе, казсь ды нейгак кази аёвтавикс мазычи эрьва кодамо иень шкасто.

    Васов а эряви якамс: моньгак чачома велем сравтовсь пек мазый таркасо.Пандо прява таргавсь човор виресь, кона кази тенек мазычи, кеняркс.Мон пек вечкан варьга якамо. Вирев совамсто мон прок ёвксос понган:чувтотне, буто ломанть, састыне чаравтыть прясост, лиясто эшкеват тарадтнэс- кедезэст, а лиясто , прок вечкиця авань кедь, чевтестэ вадяшатадызь пря ланга. Пильге алов понгонить эрьва кодат вишка мазый цецинеть, лопинеть.А зяро вирьсэнть эрьва  кодат сееремат каятыть пилезэть! Ве ёно нармунтне ушодсызь то весёла, то соланя морост, омбоце ёндо эли овсе маласто маряви куконь  кукордома, косо - бути васоло марявить човине вайгельнеть. Кодамо паро , ванькс вирьсэ коштось! Лексят, прок вий пурнат, одс чачат. Шождасто кепсеви мештеть…

  Пек паро ды весёла вирень эрямось! Эряви ансяк сонзэ неемс, марямс , ванстомс свал.

     Тонавтыцясь: Ванстомс! Теде ламо кортазь и промкссо, и инекужотнесэ. Сёрмадозь ламо статьят, нолдазь законт. Бути эрьванть оймесэ а карми тарка вечкема      пертьпельксэнтень, сестэ кортамскак  а мезть.

   - Тонавтниця ёвтни стихотворения: (паро ули, бути сонсь  арсизе . (ёвтнемстэ стамбарнэ маряви музыка)

 -   Морави моро «Вирь» (валтнэ М. Безбородовонь  ж. «Чилисема»)

 -  Ёвтневи нурькинестэ произведениянть содержаниязо.

             Ваннови «Пиче вирь» стихсэ сёрмадозь повестенть образной      

                                   системазо.

Тонавтыцясь   -«Пиче вирь» повестенть образной системазо теезь педе - пес арсезь, сонзэ эйсэ  арась мезеяк аэрявикс. Эрьва образось ашти таркасонзо ды канды содержаниянь панжоманть туртов эсензэ сталмо.

   Степан атянь образось.

  Ломанесь , кона чарькодьсы пертьпельксэнть - лембе ойме, ванькс. Неть валтнэ пек ладить вирьваныентень, Степан атянень.( кунсолови тонавтыцянь ёвтамо)

 Тонавтыцясь Ломантне - а ярмакт, коморо потс а сювордасыть. Обуцяст содамга эряви пондо сал сэвемс. Иетне кеверить эряза киринекс. Кассть - кепететсть Федя Бовин, Николай Рюмин ды Нина.Эрьвась эйстэст кочкась эрямосонть ки. И. Калинкин видестэ панжинзе сынст ёжомарямост. оймень бажамост. Лоаномсто редяви, кода эрямонть лангс а вейкеть вановтост коряс сынь ушодыть а вечкеме вейкест - вейкест эйсэ, мезесь канды ансяк зыян тевест топовтомсто.

     Паро мельть арсят - паро валт  марсят. Кодат мельтне - истят превтне. (тонавтницятне тетрадезэст  сёрмадыть оштё зярыя валмеревкст, конат панжить ломантнень обуцянь ёнкстнэнь)

Николай Рюминэнь образось. (кунсолови тонавтницянь ёвтамо)

Тонавтыцясь Николайнень каршо аравтови эйкакшпорань ялгазо , Федя. Сонзэ обуцясо неявить берянь ёнкст: эсь прядонзо арсемась, манчемась, прявтокс улемстэ каштансто     прянь кандомась…

 Федя Бовинэнь образось. (кунсолови тонавтницянь ёвтамо)

 Тонавтыцясь.Эйкакшчись кадовсь удалов.Учить Нинаньгак од кить - янт. Кодат полавтовкст теевсть те сэтьме ды мелень ваныця тейтерьканть эрямосо? (кунсолови тонавтницянь ёвтамо)

 Нинань образось (кунсолови кортамо) Мейле эсь арсемаст ёвтасызь лиятне.

 -  Повестенть художественной башка ёнксонзо: 

пейзажонть тарказо , лезэзэ весе произведениянть содержаниянзо кеме сюлмавомасонть. (кунсолови ёвтамо, ванновить тонавтницятнень артовксост).

  - Произведениянть кель - валозо.

Тонавтыцясь:   Повестенть художественной виев ёнксокс эряви ловомс  пек мазый ды виев келенть. Художественна -выразительной средстватне тевс нолдавить образтнэнь, обуцятнень панжомаст кис.(кунсолови анокстазь кортамо)

   4.Меельце валось. (обобщениясь)

     Тонавтыцясь: Терявтодо, эйкакшт,  ёвтамо меельце валонк.

    - «Пиче вирь» стихсэ сёрмадозь повестесь ашти покш изнявксокс аволь ансяк И. Калин-

 кинэнь творчествасо, но и весе ютазь пингень мокшэрзянь литературасонть. Сон а ёмавтсы зярдояк эсь питнензэ неень шкастояк. Поэтэсь саезь произведениясонть домкасто невтизе тиринь моданть ды ломантнень ютксо кеме сюлмавкстнэнь, пертьпельксэнь мазычинть ды природань кольстицятнень каршо бороцямонть. положительной геройтнень невти кода паро ды превей ломанекс.

- И.Калинкин колсто ливтинзе лангс пертьпельксэнь ванстомань тевсэнть асатыкстнэнь,

 сёвны азортомочинть, ответственностень амарямонть. Капшамось, тевень педе - пев паро ладсо апак арсемась шкань ютазь канды зыян.

- Те теманть коряс произведениянзо аволь ансяк ёвтнить, истя жо домкасто невтить эрямонть, кармавтыть арсезевеме ломантнень те эли тона проблемадонть, вандынь чиденть.

Тонавтыцясь:  Авторось свал бажи тешкстамо , што  пертьпельксэнть (природанть) эряви ванстомс, сон а кирди лангсонзо нарьгамонь кор.Ули мелем прядомс уроконь теманть коряс важодеманть истямо энялдомасо  ды стихотворениясто саевкссэ:

Эрядо Моданть лангсо тынь, ломанть, Ломанькс!

             Весе, мезе перькат тон неят:

             Цецят, лугат. пиже вирть. лейть-

            Ламолгавт сынст - ине тев теят,

            Эрьва таркасо истя тейть. (А. Моро)  

  5. Уроконь цётамось (ётавить уроксо важодеманть кис питнесь)            

  6. Кудонь тевесь. Сёрмадомс сочинения, кинь ули мелезэ  арсемс стихотворения. Темась «Мекс эряви ванстомс пертьпельксэнть?»