Внеклассное мероприятие "IуэрыIуатэ - дыщэ пхъуантэ"
материал (7 класс) на тему

IуэрыIуатэ –

дыщэ пхъуантэ

(джэгу – зэпеуэ)

Зыгъэхьэзырар

егъэджакIуэ Тхьэщыгъуей А.А.

Налшык къалэ

 I Езыгъ.  Псалъэ дахэ зэхэпхым-

                Мы дунейр сыту щIалэ,

                Псалъэ гуауэ зэхэпхым-

                Мы дунейр сыту жьы.

                Адыгэбзэм и къупхъэм

                Си гупсысэр ирокъур,

                СиIэм ар- гъуэгу икIупхъэм

                Псэр щыхъунукъым жьы.

II  Езыгъ. Анэдэлъхубзэм иIэ къару лъэщымрэ абы и IукIэм псэм кърит гукъыдэжымрэ къызыхэщ джэгу- зэпеуэм фыкъыдогъэблагъэ.

I  Езыгъ. Дэтхэнэ бзэми и IэфIагъыр зыхозыгъащIэр ар къызыдэгъуэгурыкIуэ лъэпкъым и тхыдэрщ, IуэрыIуатэрщ, лъахэрщ, абы шэрыуэу ирипсэлъэф цIыхурщ. Зи гугъу тщIы Iуэхугъуэхэр нэрылъагъу тщащIыну утыку къихьахэщ «Сосрыкъуэ» гупымрэ

II  Езыгъ. «Бэдынокъуэ» гупымрэ.

II  Езыгъ. Нарт пшыналъэхэр адыгэ лъэпкъым

                И налъкъутхэм я нэхъ ин дыдэщ.

                Зыхуагъадэ щымыIэжыххэу

                Абы хэтыр нарт Сосрыкъуэщ.

                Сосрыкъуэу ди лIы икъугъэрщ,

                ЛIыгъэ нэсым и щапхъэ пажэрщ.

                ИIэт, маржэ,- зэхэдывгъэхыт

                ЛIыхъужь хахуэм и хъуэхъу!

 « Сосрыкъуэ» гупым щыщ хъуэхъу жеIэ.

II  Езыгъ. « АдыгэлIым сытыр и фащэ?»

                 « АдыгэлIым хэт нэхъ и щапхъэ?»

                 ЖаIэу дауэ къыщырагъэкIкIэ,

                 Уи гум къэкIыр нарт Бэдынокъуэщ.

                 Тхыдэ къуагъыр зи мыхэщIапIэу

                 ЯгъэлъапIэр джатэрыхахуэрщ.

                 Зи хахуагъэм даущ и куэду

                 Зи уэрэдыр лъэпкъым иIэтырщ.

                ЗыщеIэтыр Адыгэ лъахэм

                Бэдынокъуэ и хъуэхъу дахэм!

«Бэдынокъуэ» гупым щыщ хъуэхъу жеIэ.

I  Езыгъ. «Адыгэбзэр дахэщ, лантIэщ, купщIафIэщ, гугъэпсэхущ. Ар къарууншэу, гупсысэ инхэр кърипIуэтэным хуэмыщIауэ къыщытщыхъум хуабжьу дыщоуэ»,- жиIащ тхакIуэ IутIыж Борис.

II  Езыгъ.  ТхакIуэ цIэрыIуэм и псалъэхэм я пэжагъым щыхьэт          техъуэфыну пIэрэ ди зэпеуэм хэтхэр?!

I  Езыгъ. Ар зэхэдгъэкIынщ тхакIуэ ныбжьыщIэхэм я зэпеуэмкIэ.Фэ унэ лэжьыгъэу фиIащ къыхэфха лIыхъужьым теухуа тхыгъэ вгъэхьэзырыну.

II  Езыгъ.  Сосрыкъуэ лIыхъужь хахуэщ,

                   Зыми шэч къытыримыхьэ.

                   ХужыфIэну псалъэ дахэ

                   Гупым щыщ утыку фыкъихьэ!

«Сосрыкъуэ» гупым щыщ тхыгъэм къоджэ.

I  Езыгъ. Ди IуэрыIуатэм дыпхырыплъыжым

                Къыщыдолъагъур зы зауэлI хъыжьэ.

                Ар Бэдынокъуэу ди лIы икъугъэрщ

                ХужыфIэфыну псалъэ догугъэ!

«Бэдынокъуэ» гупым щыщ тхыгъэм къоджэ.

II  Езыгъ.  Жыжьэ къыщожьэ

                   адыгэм ди лъапсэр

                   Жыжьэ дыдэ.

                   Ди уэрэдыжьхэри щIобжьахъуэ,

                   Пасэрей усакIуэм и жыIауэ,

                   Мо уэгур щымыджэмыпцIэу

                   Мы щIылъэр щызэпцIагъащIэм,

                   Дунеижьыр хъыкIэ щаухуэу

                   Мы ди щIыгур мэлкIэ щаубэм,

                   Индылыжьым щIалэм щебакъуэу

                   Бещтоужьыр къандзэгу щыхуэдэм

                   А зэманыр ди нэгу къыщIэвгъэхьэу

                   Пасэрейхэм дахэвгъэплъэну

                   Утыкур хуит фхудощI.

I  Езыгъ. «Бэдынокъуэ и пшыналъэм» щыщ теплъэгъуэ.

«Сосрыкъуэ нарт хасэм япэу зэрыкIуауэ щытар» хъыбарым щыщ теплъэгъуэ.

II Езыгъ.  Шекспир зэгуэрым жиIэгъащ:

                  «Дунейр театырщ зэрыщыту»

                   Ар нобэ нэхъри хьэкъ тщыфщIащ

                   Нэжэгужагъэ къыхэтхащ.

I Езыгъ. Нэхъыжьхэм къытхуагъэна фIыгъуэ мылъытэхэм  щыщ псалъэжьхэр.

II Езыгъ.  Лъэпкъым и гупсысэр, и дуней еплъыкIэр, и акъылыр наIуэу къыхощ псалъэжьхэм.

I  Езыгъ.  Ди гуапэу дедэIуэнщ гупхэм я чэнджэщ пэжхэм. Япэу «Сосрыкъуэ» и гупым къыщIадзэнщ.

II Езыгъ. Дахэщ, шэрыуэщ ди адыгэбзэр.Ди анэдэлъхубзэр зыгъэдахэ, зыгъэбжьыфIэ псалъэжь куэд къыджефIащ.

I Езыгъ. Ей, усэу зэхэлъ си адыгэщI,

                ЗыпщызмыгъэнщI,

                Уи бзэр сIурылъщ,

                Уэрэду къысIуролъэлъ.

II Езыгъ. Уэ си лъэпкъ дыщэм и макъамэ дахэ,

                  Си гум мафIэшхуэ щызэщIыбогъэст.

                  ЩызэхэсхыхукIэ уи уэрэд си лъахэм,

                  Уафэм сыщIэуэу абы сыкъеIэт.

I Езыгъ. Ди гуапэу утыкум къыдогъэблагъэ уэрэджыIакIуэ ныбжьыщIэхэр. Япэу псалъэ еттынщ «Бэдынокъуэ» гупым.

Псалъэ идот «Сосрыкъуэ» гупым я уэрэд жыIакIуэм.

II Езыгъ. Тетыху адыгэ мы дунейм

                  Птеуэнкъым, Хэку, уэ зеиншафэ!

                  Бзэрабзэ, ди бзэ дахэкIей!

                  Узэпымыу адыгэ къафэ!

I Езыгъ. Аращи ди уэрэдыр къафэм хуок1уэ. «Сосрыкъуэ» гупым я къэфак1уэхэр утыкум къохьэ.

«Бэдынокъуэ» гупым я къэфакIуэхэр утыкум къыдогъэблагъэ.

II Езыгъ. Езыр акъылыфIэрэ и гур жыжьэ плъэуэ, адыгэ лъэпкъым        

и гъащIэр щефIэкIуэну лъэхъэнэм хуэпабгъэу,             захуагъэмрэ цIыхугъэмрэ хабзэ щыхъуну махуэм и                                                                   дыгъэпсыр къыщыттепсэнум щIэхъуэпсу псэуа, ди тхыдэм   щыцIэрыIуэ лIы Iущ Къэзанокъуэ Жэбагъы «ФифI фымыгъэпуд, фи  Iей фымыгъэпщкIу» жи1эгъат. Мы псалъэхэм дыхуеущий ижькIэрэ адыгэм къыдекIуэкI хабзэфIхэр зетхьэну. Псом нэхъыщхьэр илъэс минхэм я уэсят лъэпкъыбзэращи,     дыхуэвгъэсакъ, дывгъэхъумэ!

(ЕзыгъэкIуэкIхэм я псалъэхэм къыщыхьащ IутIыж Борис и

« Iуэдыщэ» пьесэм щыщ пычыгъуэхэр.)