Рождество
методическая разработка (11 класс) по теме

Вежадырся гаж.

Лöсьöдысь - Старцева Эльвира Александровна,

коми кыв да литература велöдысь,

Ыджыдвидз сиктса «Шöр школа»

Мунан  кад: 2011 вося тöв шöр 7 лун , квайт   час рыт.

Мунан ин: Ыджыдвидзса шöр школа, ыджыд жыр.

Нуöдысьяс: Алёна - коми серöн мичмöдöм мича сарапана ныв; Антон - коми серöн мичмöдöм мича  дöрöма зон.

Гаж нуöдан жыр: Коми керка пытшкöс: лабичьяс, пызан, пызанö вольсалöма сöстöм югыд дöра, пызан  вылын самöвар, пуысь да сюмöдысь быдсяма  важ дозмук, ыджыд блюдйын пöжалöм нянь,  сов доз, рудзöг няньысь вöчалöм фигуркаяс; пельöсын öшалö  öбраз;  стенын  серпасалöм  тöлысь, яръюгыд кодзувъяс.

Алёна: Бур рыт, дона войпукысьяс!

            Гажöдчыны радейтысьяс!

            Нимкодь ставöс аддзыны,

            Вежадырся гаж нуны!

Антон:   Йöктыштам да ворсыштам,

               Нöдыштам да сьылыштам,

               Важъя кадсö казьтыштам,

               Локтан восö туналам!

Алёна:  Войдöр Рöштвосяньыд да Ва Вежöдан лунöдз ок и ёна гажöдчылöмаöсь. Тайö лунъясас том йöз  вöзйысьлöмаöсь öткöн олысь пöль-пöч либö нывбаба ордö войпукны, либö медавлöмаöсь кодлыськö керкасö.

Антон:  Ми талун сідзжö тіянкöд войпукам, важсö казьтылам да пöттöдз ворсам- гажöдчам.

Алёна: А мед эз вöв кöдзыд ворсны-гажöдчыны, колö ломтыны пач, но миян, видзöдтö, пескыс пырттöм. Вай, нывъяс,  пыртöй  öти пескöн пес чипассьыс (пессö водзвыв дасьтöма).

Антон: Важöн пес отсöгöн гадайтчылiсны: войнас петавлісны  пес чипас дорö да син куньöмöн босьтлісны ки улас медводз сюрöм пес. А сэсся пес вылö видзöдöмöн висьтавлiсны, кутшöм лоö верöсныс.

Алёна: Нолтö, нывъяс, петкöдлöй, кутшöм пес тiянлы сюрис? (Нывъяс петкöдлöны бöрйöм песнысö):

            шыльыд кö – верöсыд лоас бур да мелi;   

            вывтi потласьöма кö – верöсыд лоас пöрысь да пыр кутас броткыны;        

          увъяса кö– ыджыд семья, кымын ув, сы мында и челядь;

           кыз пес кö  -  ён  да кыз верöс лоас;

           кырсьыс кö абу – жöникыд  гöль лоö;

           вöсни мича кырся кö –жöникыд лоас том;

           пескыс кö кыз кырся–верöсыд лоö  озыр;

           пескыс кö чукыля- мукыля да дзик пучöй розьöсь- верöсыд лоö либö пöрысь либö кутшöмкö нелючкияса.

Антон: Со и тöдмалiм, кутшöмöн лоöны нывъяслöн верöсъясныс. Пескыс эм, колö ломтыны пач. А медым пачыс ломзис бурджыка, корам сьывны гöсьтъясöс.    

                                  (Нывъяс йöктігмоз  сьылöны «Козйö, козйö» сьыланкыв)

Козйö, козйö, мый сулалан?  

Ме öд тэнö пöрöда,

Ме öд тэнö пöрöда да,

Пескö керала.

Пескö керкала да,

Пачö ломта.

Кыз öгырö уськöда да,

Сё блин пöжала.

Вöсни öгырö уськöда да,

Сё печенча пöжала.

Алёна: Ок,  кутшöм гажаа пачным ломзис.

Антон: Керканым югдic да шоналiс, позьö и гажöдчыны!

Алёна: Ва вежöдан лун пасйöны тöв шöр 19-öд лунö, буретш тайö  лунö  Иордан юлöн вежа ваын пыртiсны Иисус Христосöс.

Антон:  Медшöрыс тайö лунö - вичкоын да йöрданын ва вежöдöм. Юрбитöм бöрын  Енлы эскысьяс мыссьöны  вежа ваöн да  босьтöны сьöрсьыныс, повтöмджыкъяс весиг бузгысьлöны вежöдöм ваас. Тайö ваöн вежöдлöмаöсь керка-картанысö. Вежа ваыс дыр кад кутö  бурдöдчан вынъяссö, оз тшык. Сöмын ставсö колö вöчны эскöмöн.

Алёна:  Крещение дырйи аслыспöлöсöн лыддьысьö и лым. Шыбитны кö сiйöс юкмöсö, ваыс сэтысь оз косьмыв.

Антон: Важöн  кузь тöвся рытъясö нывъяс печкылiсны, кысьылiсны. Но вежадырся рытпукъяс – аслыспöлöсöсь. На вылö удж эз босьтлыны, а волiсны гажöдчыны да шойччыны. А содтöд - бöрйыны  аслыныс пöв во быд кежлö.

Алёна: Содтöд рытпук вылад ныв-зон вайлiсны аскöдныс нуръясянтор. И ми эгö вунöдöй та йылысь,  видзöдлöй,  мыйта быд пöлöс сёян-юаныс миян пызан вылын.

Алёна да Антон: Пызан вылын сёян-юан,

             Нуръясьыштны колö.

             Ёрта-ёртлы вайö шуам:

             - Няньöн-солöн!  

Антон: Тöлыс- кöдзыдлань, а йöзыс- гажъяслань, шулöмаöсь важöн. Январь 6-öд лунö, Рöштвоса сочельник бöрын, воссьыліс январса гажъяслöн сьöрсьöн- бöрсьöн мунöм.  Куття лунъяс. Рöштвосянь Вежалунöдз (январь 7-öд лунсянь январь 18-öд лунöдз) том да верстьö йöз заводитлiсны куттяасьны. Гугöн пасьтавлiсны ыж ку пась да ветлiсны керкаысь керкаö. Ветлывлісны ёнджыка сэтчö, кöні олісны озырджык да шаньджык йöз. Куттяясöс быть вöлi колö корны керкаö да гöститöдны, либö сетны мыйкö сёян пиысь. Кöзяеваыс кö оз лэдз найöс, куттяяс вермисны вöчны мыйкö лёктор: кисьтны пес чипас либö игнавны öдзöс, шыблавны гöлик.

(Ыджыд шумöн пырöны куттяяс, сьылöны):

Коляда - моляда,

Гильöда да мольöда,

Кодi мыччыштас нянь –

Лоö овмöсыс шань.

Пемöс посни и гырысь,

Мед гидняыс  тыр.

А кодi пыдди оз пукты –

Став öдзöссö тупкам!

Алёна:  Мый нö тайö, нöшта локтысьяс лоисны?

Куттяяс:  Ок, удал зонъяс!

Ок, шань нывъяс!

Паськыдджыка восьтöй öдзöс,

Керка жырйö лэдзöй гöстьöс! (Шыблалöны зöр)

Локтіс, локтіс коляда. Рöштволы паныда.

Чолöм! Зöр шыблалам, медым керкаын пыр вöлі шуд.

Коді сетас пирöг, сылы скöт да живöт.

Кöзяиныс керкаын, быттьö пан райын.

Кöзяйкаыс керкаын, быттьö мазі ма пиын.

Ичöт челядь керкаын, быттьö блинъяс ма пиын.

Локтіс, локтіс коляда.  Рöштволы паныда.

Алёна: Мунö, мунö бöр гортад, энö повзьöдчöй, гöститöдны нинöмöн, сідзи асьным унаöн.

Куттяяс: Ак, ті сідзи…на тіянлы…

(Гöликöн быттьö нöйтыштöны гöсьтъясöс)

Антон: Но и шызьöдiсны бур йöзсö.

Алёна: Тайкö ставныс оз пышъявны.

Антон: Локтiсны гажöдчыны да öд оз жö разöдчыны!

Локтöй пырöй, дона гöсьтъяс, гажöдыштöй миянöс. Чöсмасьыштöй миянкöд!

(Гöсьтъясöс чöсмöдлöм бöрын)

Антон:

А вайö ворсыштамöй!

Корам артмöдны 2 кытш. Пытшкöс кытшас – зонъяс, ортсыас – нывъяс. Сьыланкыв юргигöн тi йöктöй, ме коколюкаöн ветлöдла параяс дортi. Кор горöда «Коколюка!», корсьöй аслыныд пöв: нывъяс – зонъясöс, а зонъяс – нывъясöс. А ме сэк костi шыбита коколюкасö да босьта аслым пара.

        Кодi коли паратöм – босьтö коколюка да:

                    - сьылö радейтана сьыланкывйысь юкöн;

                 - висьталö радейтана кывбур;

                 - чолöмалö Вежадырся гажöн да  с. в.

Алёна: Вежадыр кадö  ыджыд ин босьтö гадайтчöм. Вежадырся тунасьöмыд медся стöч. Олöма войтыр векджык зілис тöдмавны, бура- ö воас град выв пуктас, тшак- вотöс; том нывъяс кöсйисны тöдны, петасны- ö верöс сайö; том гозъя- лоöны – ö налöн челядь, да уна мкöдтор.

Гашкö, и ми тшöтш гадайтчыштам?  Но кöсъя ставлы висьтавны, мый гадайтчыны важöн вöлі ёна полöны. Сы вöсна, мый гадайтчöмкöд йтичöма уна лёктор: вермасны локны керкаö мутияс, вöрса да  васа. Либö мутиыс вермас войнас локны да узигад юрсиöдыд някравны. Но мый, энö повзьöй? Кöсъянныд  гадайтчынытö?

(Кöсъям)

Антон: Сідзкö, пукталöй ставныд тайö блюд вылас  ассьыныд чунькытшъяс, сикöтшъяс, мый кодлöн эм. Быдöнлы колö мыйкö сетны. Ставсö пуктам  нянь кусöкъяс сорöн. Вевттям ки чышкöдöн,  а сэсся гадайтчысьяс öта-мöд бöрсяыс кыскаласны (синсö тупкöмöн). Мый медводз сюрас ки улас, сійö и лоö. (Туналöны): Куття – войся, китруйт – мудруйт! (Гадайтчöны):

Нянь – бур олöм;

сунис – туй;

чунькытш- верöспу;

сьöм- озырлун;

сю – шуд;

сакар- юмов олöм;

да с.в.

Антон: Нылукъяс, кодi кöсйö тöдмавны, петас оз таво  верöс сайö, матыстчöй ме дорö.

 Чунькытшöн гадайтчöм:

Нывъяс, менам киын шыдöс тасьтi. Öнi ме кута матыстчыны тіян дорö, а ті  пукталöй тасьтiас ассьыныд чунькытшнытö. Ме  ставсö öтлаын гудрала!..

(Туналö): Куття – войся, китруйт – мудруйт!

Öнi видзöдлам, кодлы кутшöм чунькытш шедас? Быдöн гумовтöй  китыр шыдöс да видзöдлöй, кутшöм  чунькытш  шедiс:

дона изъя – зонмыс озыр;

зарни – петан озыр верöс сайö;

аслад чунькытшыд – мый кöсъян – сiйö збыльмас; 

кык чунькытш – кыкысь петан верöс сайö;

нинöм абу – верöс саяд таво он на пет;

ыргöн  – верöсыд лоö гöль; 

эзысь –радейтысь зон сайö петан.

Алёна: Чунькытш отсöгöн нöшта со тадзи позьö гадайтчыны:

Стöканö коймöд пайсö кисьтны ключысь ва. Сэтчö лэдзан зарни чунькытш да видзöдан кытш пытшкöсас. Недыр мысти вермас мыччысьны кутшöмкö мыгöр. Тайö мыгöрсö и колö сюся видзöдны. Шуöны, вермас пö верöсыд тыдовтчыны.

Антон: 

Чунькытшöн нöшта тадз вöрöжитлöны.

Чунькытшсö пысалан сунис вылö да лэптан сунистіыс, мед чунькытшыс вöлі стöкан васьыс вылынджык. Сэсся ньöжйöник лэдзыштан чунькытштö, мед ваöдзыс озджык судз, лöньöдан, мед оз катлась, да сетан кутшöмкö лыдпаса юалöм. Нывъяслы позьö юавны: «Кымын арöсын ме пета верöс сайö?» Недыр мысти сунис вылын öшалысь чунькытш кутас öтарö- мöдарö пыр ёнджыка и ёнджыка ветлöдлыны. Кымынысь сійö троньгысяс стöкан дорышас, сы мында арöсын и петан верöс сайö. Китö гадайтігад эн вöрöд.

Алёна: А медым тöдмавны, кутшöмöн лоас локтан во, неыджыд тасьтіö ва кисьтöны да шуöны: «Тэ, ваöй, эн шумит, эн блажит, а кыдз эм да мый водзö лоö, висьтав».

Ва тыра тасьтісö нуöны посводзö либö сувтöдöны восьса енэж улö кильчö помö. А асывнас видзöдöны:

йиыс кö гöра моз кыптöма - воыс лоö бур;

шыльыда кö йизьöма - сэтшöм шыльыд жö и олöмыд лоас;

мылькъяса кö йиыс - и шуд, и мытшöдъяс аддзылан;

а лоас кö гу - ускöттьöа во лоас.

Антон: Важöн  нывъяс нöшта кывзысьлісны.

Кымöртöм тöлыся войö найö вöлі мунöны вичко дорö да сулалöны  сылöн öдзöсъяс дорын. Кылöны кö кöлысьлысь сьылöм, сідзкö, регыд верöс сайö петасны.

Алёна:

Чипан – петуктö кö видзанныд, позьö весиг петукöн гадайтчыны.

Джоджö шыбитöны урчитöм лыда тусьяс, а сэсся 12 час  войын вайöны петукöс да лэдзöны сійöс джоджö. А сэсся лэбачöн вöчöмтор серти тöдмалöны аскиа лунсö. Став тусьыс кö лоö кокалöма, тайö воын тэныд вичмас шудлун, и сійö, коді вердіс петуксö, петас верöс сайö. Петукыс кö сёяс сöмын некымын тусь, позяс тöдмавны, кор лоас кöлысьыс либö кутшöм  ныв петас верöс сайö. Сідз, 3 тусь кокалöмыс петкöдлö коймöд ныв вылас. А петукыд кö нинöм  эз сёй - суасны сьöкыдлунъяс.

Антон:

А тайö гадайтчöмыс медся повтöмъяслы! Колö öтнадлы вой шöр кадö мунны пывсянö да пуксьыны пызан сайö. Медводз колö öзтыны кык сись, а сэсся пуктыны воча кык рöмпöштан, сідзи, медым артмис коридор кодь туй. Сюся видзöдiгöн «коридор» помас петкöдчас мусукыд.

Алёна: Эм  нöшта кöм отсöгöн гадайтчöм, кор  нывъяс  петöны сикт сайö да шыбитöны ас водзаныс шуйга коксьыс  кöмсö. Сы серти, кытчö петкöдлас кöмыслöн нырыс, тöдмалöны, кытысь лоас верöсыс.  А кöмыс кö бергöдчас бöр керкалань, таво вылö нывлы пукавны на гортас.

Антон: Но, бурмис сьöлöмныд?

Мича нывъяс да удал зонъяс, мед став вöвлöм лёкыс бöрö кольö, а бурыс збыльмас, сы вылö и вежа рытъяс, сы вылö и Рöштво гаж!

Алёна: Гадайтчыштiм! А öнi позьö и ворсыштны!

                             Ворсöм  «Пидзöсъяс эмöсь, а пуксьыны некытчö»

Корам став зонуловлы корсьны аслыныс пöв – нывъясöс. Кодi аддзис аслыс пöвсö, матыстчöй ме дорö. Зонъяс сувтöны öти пидзöс вылас. Нывъяс сулалöны асланыс зонъяс  дорын. А öти нывлöн параыс абу, лишнöй. Сöмын заводитас кывны шылад, нывъяс йöктöны кытш гöгöрыс. Кыдз сöмын шыладыс дугдö кывны, нывъяслы колö аддзыны зэв öдйö любöй зонлысь пидзöссö. Ныв, кодi эз удит пуксьыны  зон пидзöс вылö, бöрйö сьöлöм вылö воысь  зонмöс. Найö кутлысьöны, окасьöны да мунöны пельöсö. (Ворсöм)

Антон: А öні ворсыштам «Лентаысь». (Корö зонъясöс) Со менам киын уна сикас лента, ставыс мича да яръюгыд. Быдöн бöрйö, кутшöм сылы сьöлöм вылас воис. А öнi вочавидзöй, кодъястöг ми огö вермöй овны? Дерт жö, нывъястöг! Мича аканьяс, корам татчö. Босьтöй тшöтш лентаяссö. Со и артмис миян уна рöма кытш. Шылад улö йöктамöй, а кор сьыланкывйыс помасяс, лента помъяссö гартöй и аддзöй ассьыныд пöвнытö. (Ворсöм)

Ворсöм «Гын сапöг»

Алёна: Со кымын пöв аддзисны öта-мöднысö! А öнi видзöдламöй, кутшöм паралöн ёртасьöмыс лоö крепыдджык! Тiян водзын сулалö гын сапöг. Колö чеччыштны сы вомöн, бипур вывтi моз. Оз кö усь – öтмоза мöвпаланныд и восьлаланныд, усяс кö – коднытö кö тiян пиысь кыскö шуйга вылö.

Антон: Мудзинныд? Позьö  шойччыштны да сьылыштны- йöктыштны. (Гöсьтъяс йöктöны- гажöдчöны. Пöттöдз гажöдчöм бöрын).

Алёна: Дона гöсьтъяс! Ми радöсь, мый волінныд миян ордö. А öні корам ставнытö пызан дорö: юны пöсь тшай,  чöсмасьыштны коми пöжасöн.

(Тшай юöм)

Алёна: Ставныдлы кыпыд удж да чöскыд сёян – юан во чöж!

Алёна да Антон: Быд бурсö! Аддзысьлытöдз!

(Ставöн разöдчöны)