Классный час

«Край, в котором я живу»

Пояснительная записка.

           Этот методический материал можно использовать как внеклассное мероприятие с учащимися средних классов, а также в качестве классного часа.

            Данный классный час предназначен для учащихся 5-8 классов. В основе лежат краеведческий материал, творческие работы учащихся, экспозиции школьного музея.

Цель:  

1. На основе знаний, полученных школьниками ранее, расширение  их представления о родном селе Большелуг, о малой  Родине.

2.  Воспитание гражданственности, патриотизма, любви к родному краю.

3. Формирование  понятия гражданина как человека, знающего, соблюдающего и уважающего закон, любящего свою Родину, способного встать на защиту своей Родины.

Задачи: 

Образовательная:

В ходе классного часа дать  знания о родном крае, изучить понятие «гражданин» и уметь его расшифровать; закрепить знания по теме «Моя малая Родина».

Развивающая:

Развивать мышление, творческие способности учащихся, умение обобщать, делать выводы, работать в группах; расширять кругозор,  познавательную активность,  коммуникативные способности.

Воспитательная:

Формировать  толерантное отношение к культуре коми народа.

 Форма:  час творчества.

Метод: словесный, наглядный, практический.

Подготовительная работа:  

Актив класса  совместно с классным руководителем выбирали тему, ответственных  и ведущих классного часа, разрабатывали содержание занятия, готовили костюмы и оформление, наглядный материал,  игру.

Оборудование:

Мультимедийный проектор,  аудиозапись  гимна Коми Республики,    выставка «Они защищали Родину», большой толковый словарь современного русского языка, национальные костюмы, костюмы защитного цвета, галстуки, творческие работы детей.

Содержание:

 Приложение № 1.

Коми Республикалöн государственнöй канпас (герб) йылысь.

Коми Республикалöн государственнöй канпас лоö Коми Республикалöн официальнöй государственнöй символöн.

Коми Республикалöн государственнöй канпас -пермскöй зверинöй стиль  серти серпасалöм веськыда видзöдысь зарни варыш, коді гöрд геральдическöй пöв вылын; лэбач морöсас - нывбабалöн чужöмбан, кодöс кытшалö квайт йöра юр (сюръястöг), быд боксянь куимöн; ставсö серпасалöма зарниöн.

Важысянь йöз вежöрын восьтыштöм бордъяса варыш öткодявсьö власьткöд, енэжвывса олöмкöд. Лэбач морöс вылын нывбаба чужöм - тайö Зарни Ань, олöм сетысь ен, став мирса мам. Йöра петкöдлö вын, шаньлун, авъялун.

Зарни да гöрд рöмъяс, кутшöмъясöн медсясö серпасалöма канпассö, коми фольклорын петкöдлöны асъя шонді, мамлун да кага чужтöм. Общественно- политическöй олöмын гöрдыс  гöгöрвосьö кыдзи войтырлöн  да власьтлöн удж- зільöм. Духовнöй да государстволöн власьт символöн позьö гöгöрвоны  и лэбачлысь  крест нога мыгöрсö.

Коми Республикалöн государственнöй дöрапас (флаг) йылысь.

Коми Республикалöн государственнöй дöрапас лоö Коми Республикалöн официальнöй государственнöй символöн.

Коми Республикалöн государственнöй дöрапас - веськыд пельöса дöра, кодöс кузьта ногас юкöма куим öтыджда визь вылö: выліас - лöз, шöрас - турунвиж да уліас - еджыд рöмъяс. Дöрапаслöн пасьтаыс кузьта серти – 2:3.

Дöрапас рöмъяс петкöдлöны Коми Республикалысь географическöй аслыспöлöслун да вöр-ва озырлун.

Лöз рöм петкöдлö помтöм енэж, войвывса эрдъяслысь мичсö да отсö.

Турунвиж рöм - лача  да озырлун пас гöгöрвоöдö помтöм-дортöм коми парма - коми войтырлысь медыджыд озырлун да олан-уджаланін.

Еджыд рöм петкöдлö Коми мулысь сöстöмлун, вöрзьöдлытöм мичлун, мый сійö Войвылын.

Коми Республикалöн государственнöй кып (гимн) йылысь.

Коми Республикалöн государственнöй кып лоö Коми Республикалöн официальнöй государственнöй символöн, кодлöн могыс - видзны национальнöй культуралысь традицияяс, Коми Республикаын олысь уна сикас  войтырлысь öтувъялун.

Коми Республикалöн государственнöй кып - музыкально-поэтическöй произведение, кодöс лöсьöдöма Виктор Савинлöн «Варыш поз» сьыланкыв подув серти.

 Приложение № 2.

Ыджыдвидз нюжöдчöма Висер ю пöлöн. Тайö сиктыслöн мичлуныс  вöрзьöдö уналысь сьöлöмсö. Коді кöть оз кежав Ыджыдвиддзö, сійö и нимкодясьö сиктгöгöрса серпасöн.

Паськыд видз, помтöм-дортöм вöр, лöня шывгысь Висер ю. Во гöгöр чöж татчöс вöр-ва  мича, статя, сьöлöм вöрзьöдана. Быд ар коръя пуяс  пасьтасьöны зарниö. Мича нывъяс моз видзöдчöны Висер юö. Дзирнясьöны тшапиника быд тöвру пöльыштöмысь, быттьö ошйысьöны озырлуннас да мичнас. Но оз тай дыр сюр красуйтчыны налы. Ыджыд тöв ныр чарсъяс – косявлас зарни платтьöяссö. И видзöдан да, коньöръяс моз тірзьöны- сулалöны ю пöлöн бадь пуяс.  

Пуксяс тöв,  и бара вежсяс серпасыс. Енэжысь еджыд бобувъяс моз лэбзяс  лым. Ньöжйöникöн пасьтöдас пуясöс  синтö ёрана еджыд пасьöн. Чöла сулалöны вöрзьывтöг. Сöмын пашляк лыйöмысь дрöгмунлö лыска пуяслöн дзормöм ус-тошныс да бöр унмовсьöны. Гажа тулыс воöм бöрын вöр-ваыс ловзьö. Тöлын кö пуяс  сулалöны лöня, олöма йöз  моз куткырвидзöны эшкын улын, то тулысын найö вильышмöны. Öта-мöд бöрся заводитöны пальöдчыны тöвся унмысь. Вашкöдчöны ас костаныс гож водзын.

А турун пуктігад кутшöм лöсьыд! Чеччан водз. Лысваыс усьтöдз мунан ытшкыны. Пöсьыд киссьö. Пель водзад зыньгöны номъяс. Сюрö тай налы розьыд нырсö чутктывны  да юыштны пöсь виртö. Видзöдан да, шондіыс вылö нин кайöма. Меліа нюмъялö, быттьö шуö, мун пö купайтчышт, а ме сэк кості турунтö косьтышта. Котöрöн лэччан вадорö да бузгысян юö. Ок и лöсьыд жö нин сялькöдчынытö.

Муса да мича жö тэ, чужан сиктöй!

Коми муöй.

Коми муöй – чужанiнöй,

Радейта ме тэнсьыд мич.

Дона Парма – кыйсянiнöй,

Менам муса Ыджыдвидз.

Висер юöй, Эжва дiнöй,

Сыктыв, Летка, Лымва ю.

Гулыд Парма – вотчанiнöй,

Тайö ставыс – Коми му.

Коми вöрöй – нюраинöй,

Яла ягöй, паськыд видз.

Муса Парма – шойччанiнöй,

Радейтана Ыджыдвидз.

Муна кöть ме кутшöм карö,

Аддзыла кöть кутшöм мич,

Медся донаöн мен кольö

Муса сиктöй – Ыджыдвидз!

Приложение № 3.

Татьяна Андреевна Мишарина

Ыджыдвидзсаяс пиысь медся олöманас талунъя  лунö лоö Таттян тьöт, Татьяна Андреевна Мишарина. 2012 вося февраль öкмысöд лунö  пöрысь аньлы тыри 104 арöс.

Кыдз ачыс  Таттян тьöт казьтылö, сійö абу велöдчылöма, гижны ни лыддьысьны оз куж. Сэки пö нывъястö кысьыны да печкыны велöдлісны, а грамотанад тöдмасьлісны зонулов. Та вылö видзöдтöг зэв уна молитва тöдö.

- Кыдзи нö лыддьысьны кужтöгыс молитваяяссö велöдін ?- юаöламöсь коркö олöма аньлысь.

- Вичкоад миянöс новлöдлісны. Сулалам вöлі да попыскöд тшöтш молитваяссö вомгорулын шуалам. Тадзи и юрö пырис да öнöдз на эз вун. Енмыс и отсалö меным та дырасö овны, - висьталіс Таттян пöч.

Верстяммöм бöрын гозйöдчöма сійö чужан сиктса зонкöд. Водзынсö унаöс сетлöмаöсь мустöм сайö, но Таттянöс таысь Енмыс видзöма.

- Локтісны корасьны гудöкöн. Сідз-тадз сёрнитыштісны бать-мамкöд да, верöспуöй меным ассьыс гудöксö колис, а ме сылы воча шаль-чышъянöс сеті. Тайö  миян и лои сёрнитчöм да радейтчöм гöрддзалöмöн, - казьтывліс нывдырся шудсö Татьяна Андреевна.

Шуда семьясö пазöдöма война. Таттян тьöтлысь  муса верöссö нуöмаöсь фронт вылö медводдзаяс лыдын. 1942-öд  вося майын Öльöксаныс усьöма тыш  вылын.

Приложение № 4.

Великöй Отечественнöй война чöж  миян сиктысь  фронт вылö нуöмаöсь 541 мортöс. 308-öн пуктісны юрнысö Рöдина дорйигöн. 233-лы удайтчис кольны ловйöн.  Но талунъя лун кежлö  некод нин эз коль.

1967 воын сиктса активистъяс шуисны вöчны  обелиск да гижисны  сэтчö усьöм воинъяслысь нимъяссö. Обелиск некымынысь нин выльмöдлісны. 1995 –öд воын,  Победалöн 50-öд  во кежлö,  сельсöвет йöрö лöсьöдісны памятнöй стела.

Казьтывны кö геройясöс, ковмас  вывті уна кад. Öні казьтыштам  сöмын öти салдат йылысь, Ивашев Иван Васильевич йылысь - вöвлöм кадрöвöй военнöй йылысь. 18 арöсын, 1942 вося август тöлысьö Военкомат мöдöдіс Иван Васильевичöс военнöй училищеö. Тулысöдз велöдісны. Сетісны младшöй лейтенантлысь звание да мöдöдісны фронт вылö.  Кыті сöмын эн новлöдлы  Иван Васильевичöс фронтовöй туйыс: Калужскöй областьсянь заводитöмöн воюйтіс Витебскöйын, Смолненскöйын, Могилёвскöйын. 1944 восянь - Минск, Литва, Асыввыв Пруссия, Польша…

Тышъяс…Ёртъясöс гуавлöм…Аслас ранитчöмъяс… Вунас-ö татшöмыд? Победа лунсö Иван Васильевич вочаалöма госпитальын, сэки стöч сійö бурдöдчöма  выльысь  ранитчöм бöрын… Ставнас армиялы, Рöдиналы Иван Васильевич, отставкаын капитан,  сетіс 14 во. Гортас, ас чужан муö, локтіс война помасьöм бöрын дас во мысти.  

Воысь во чиніс лыдыс налöн, кодъяс дорисны Победа. Таво кежлö эз коль ловйöн ни öти салдат…

Школаö пыранінын орччöн кык памятной  казьтылан пöв - Евгений Игушевлöн да Виктор Изъюровлöн. Школаса музейын стенд вылын тайö геройясыс  орччöнöсь жö.

Женя Игушев чужліс 1976 вося июнь 6 лунö. Велöдчис шöркодя, ёна радейтіс вöр-ва.

Муніс служитны 1994 вося июньын. Веськаліс  мотострелковöй войскаö. Самараын, учебнöй пунктын велöдчöм бöрын, лоис БМП-2- са оператор- наводчикöн. Чечняö веськаліс 1994 вося декабрын.

Ведено дорын, кор налöн коллонна веськаліс засадаö, Женя пöгибнитіс.

Тайö вöлі 1995 вося сентябрь 4-öд  лун.

Виктор Изъюров чужліс 1980 вося октябрь 27 лунö. 1988 воын, школа помалöм бöрын, велöдчис СПТУ-20-ын, сэсся служитіс торъя Арктическöй погранотрядын Воркутаын.

Армияысь локтöм бöрын водзö служитіс ОМОН-ын.

Андрей Каневлöн да Александ Сурковлöн «Нам выпала судьба служить в ОМОНЕ» книгалöн 112-öд  лист бокö гижöма: «За время службы, будучи милиционером-бойцом, он дважды выезжал в Северо-Кавказский регион для выполнения служебно-боевых задач. В сложных ситуациях не прятался за спины товарищей, прявлял стойкость и мужество, тем самым завоевал авторитет сослуживцев…

23 октября 2003 года, не приходя в сознание, Виктор скончался в военном госпитале Владикавказа после тяжелого ранения, полученного 4 октября в Ставропромыслывском районе Грозного. Он прожил короткую, но яркую жизнь. Вечная память о нем остнается в наших сердцах».

Президент Указöн Евгений Игушевöс да Виктор Изъюровöс  наградитісны Мужество орденöн, посмертнö.

Приложение № 5.

Чужліс Алексей Мишарин Макарсиктын. Ичöтсяньыс Алексей велаліс вöчны став крестьянскöй  уджсö. Но сюсь детинкалы усис шуд велöдчыны церковно-приходскöй училищеын. А сэсся рытъя школа  да Северо- Двинскöй рафбак помалöм бöрын Алексей Мишарин пырö велöдчыны Московскöй Государственнöй университетса медицинскöй факультетö. Луннас велöдчис, а рытъяснас уджаліс -öд колö вöлі  и мыйкö сёны-юны. МГУ-ын велöдчöм помалöм бöрын содтіс тöдöмлунъяс нималана Боткинскöй больничаын - помаліс ординатура. Тайö кадö Алексей Мишаринлы  чина йöз кыкысь вöзйылісны кольччыны  уджавны Москваö.  Но Алексей Иванович став сьöлöмсянь радейтіс ас му, сиктса йöзöс, та вöсна бöр бергöдчис гортлань. Бöрсö Алексей Мишарин локтіс гöтырыскöд, Александра Ефимовнакöд, коми нывкöд жö, кодкöд тöдмасисны öтлаын велöдчигас. Сыкöд кыкöн и уджалісны, бурдöдісны Кулöмдін да Шойнаты районса йöзöс.

1932 воын заводитіс уджавны хирургöн Сыктывкарын республиканскöй больничаын. Великöй Отечественнöй война дырйи Алексей Мишарин  уджалö фронтовöй гопитальын. Война бöрын Мишарин, медицинскöй службаса майор, 20 сайö во веськöдлö республиканскöй больничаса хирургичекöй отделениеöн. Бöрынджык сійö Коми Минздравса главной хирург.

Медицинаö  зэв ыджыд пай пуктöмысь Алексей Ивановичлы сетісны уджалысь мортлысь медыджыд награда - Социалистическöй Уджвывса Геройлысь Зöлöтöй Звезда да Почётнöй ним. Сылöн вöліны  и мукöд наградаяс. На лыдын Ленин орден, Гöрд звезда орден, «Знак Почета» орден, Отечественнöй война орден и медальяс. А.И Мишаринлöн эм и «Коми АССР-са да Российскöй Федерацияса заслуженной врач» почётнöй нимъяс.

Кувсьыліс А.И. Мишарин 1977-öд вося август 18 лунö.

Приложение № 6.

Мöд Эсамбаев.

Квайтымын гöгöр во сайын Ыджыдвидз сиктсянь  мусюр вöлöкöд мöдöдчис пода морт,  томиник детинка, важиник  купайкаа, дöмаса гача, кирза сапöга, купайка зептас некымын руб.

Тадзи Владимир Никифоров заводитіс артистлысь сьöкыд, но сьöлöм вöрзьöдана  ыджыд   туй.

Медводдза гастрольяс  заводитчисны 1951 воын, кор Володялы вöлі сöмын на 16 арöс. Газетъясын сэки  уна гижисны Коми АССР-ысь сьылан– йöктан ансамбль йылысь. Казялісны и Владимир Никифорвлысь ыджыд сямсö. Журналист Н. Степанов сійö воясас гижліс: «Владимир Никифоров торъялö мукöдсьыс аслас кужöмлунöн. Тöдчö, мый том артист оз пов сьöкыдлунысь, пöсь петмöныс зіль - уджалö…»

Владимир Никифоровлы ыджыд славасö вайисны «Кöр кыйöм», «Индийскöй ритуальнöй» да «Шаманлöн кöлдуйтöм» йöктöмъяс. Владимир Никифоров кужис петкöдлыны йöктöмлысь пытшкöсса мöвпсö. Сійöс öткодявлісны Махмуд Эсамбаевкöд. Сэтшöм жö  вöсни мыгöра, статя, зэв бура вöлі кылö музыкалысь мыла шысö… Владимирлöн сідз шусяна короннöй номерöн лои Хачатурянлöн «Сабляясöн йöктöм». Артист кужис аслысног восьтыны национальнöй öбича.

 1961 воö, 26 арöсöн, Владимир Никифоровлы сетöны «Коми АССР-са заслуженнöй артист» ним.

Владимир Корнилович пенсия вылö петтöдзыс 8 во уджаліс нöшта Украинаын. Йöктіс Сумы карса  «Орфей» ансамбльын. Украинаын вылö донъялісны да нимöдісны Владимир Никифоровöс, сэні сылы сетісны Украинаса заслуженнöй ним.

Кöть Владимир Корнилович кытшовтіс уна страна, но асьсö некор вылö эз пуктыв. Вöлі рам мортöн. Сёрнитіс пыр комиöн, ыджыдвидзса моз нюжйöдліс. Чужан кывйысь эз яндысьлы. Пенсия вылö петöм бöрын дзикöдз локтіс чужан сиктö, Ыджыдвиддзö. Но пыр  вöлі радейтана уджын. Ыджыдвидзса школаын велöдіс йöктыны челядьöс. Дасьтіс сиктсаяскöд концертъяс. Да и ачыс тшöкыда петавліс культура сцена вылö.

Тавося октябрь тöлысьö тыри комын  во, кыдзи муніс таладор югыдсьыс Владимир Коринлович Никифоров. Олöмыс помасис трагическöя. Кайöма вöравны,  но бöрсö эз и лок. Мый сыкöд лои, кытчö воши - öнöдз некод нинöм оз тöд. А зумыш пармаыд чöв олö!

Приложение № 7.

Миян Ыджыдвидзса школа озыр енбиа велöдысьясöн. Но талун казьтыштам  сöмын некымынöс.

Неважöн, кык тöлысь сайын, кувсис Коми Республикаса пыдди пуктана велöдысь, Ыджыдвидз школаса вöвлöм директор - Мишарина Нина Петровна. Чужліс  сійö 1931 вося октябрь 21-öд лунö Выльыб грездын. Мамыс, Александра Григорьевна, велöдіс школаын,   батьыс уджаліс колхозын. Семьяын вöлі 9 челядь.

              Войналöн да войнабöрся  сьöкыд кадö Нина Петровна тöдліс тшыгсö, и кынмöмсö, и уджсö, но велöдчис бура:  помаліс Выльыбын  начальнöй, Ыджыдвиддзын семилетньöй да Шойнатыын шöр школаяс, а сэсся 1952 воöдз велöдчис Новгород обласьтса Боровичи карса пединститутын.

40 во сетіс школалы Нина Петровна, на лыдысь 30 восö вöлі директорöн, велöдіс роч кыв да литература. Вöлі стрöг, но справедливöй мортöн, кужис котыртны и уджсö, и гажсö. Сійö директоралігöн вöлі стрöитöма куим судтаа  кирпичысь  школа. И, дерт, таын зэв ыджыд пай  школаса директор Нина Петровна Мишариналöн.

               Уна вося бур уджысь Н.П. Мишаринаöс пасйылісны Почёт грамотаясöн да Почёт пасъясöн, а 1976 воын сетісны «Коми АССР-са пыдди пуктана велöдысь» ыджыд ним.

Нина Петровнакöд öтув Ыджыдвидзса школаын уна во уджаліс Агния Васильевна Габова, коми кыв да литература велöдысь, школаса музей котыртысь.

         Агния Васильевна Габовалöн казьтылöмысь: «Ме чужи 1927 вося октябр 23-öд лунö Богородскöй с/сöветса Сюзяиб деревняын. Мамö – Габова Евдокия Никитьевна, 40 во уджаліс колхозын. Батьö – Габов Василий Деомидович ветеринарнöй  фельдшер, обслуживайтіс дзоньöн Висер вожсö, гортö омöля воліс. Семьяын олім дружнöя. Бать– мам удж вылынöсь, а ми, мый вермам, локтігкежланыс вöчам гортса уджъяс. Школа помалöм бöрын велöдчыны эз удайтчы: 1941 вося июнь 22-öд  лунö пансис Великöй Отечественнöй война. Батьöс и вокöс нуисны фронт вылö. Меным вöлі 14 арöс война заводитчигöн…»

Но сьöкыд кад вылö видзöдтöг Агния Васильевна пыр водзö и водзö шедöдіс  тöдöмлунъяс. Медводз велöдчис Шойнатыса школаын. А война   помасьöм бöрын помаліс Коми Пединститут. Удж вылö ыстісны Шойнатыса шöр  школаö.              

Мишарина Ольга Ивановна, Агния Васильевналöн нылыс, казьтылöмысь:    «1949 воын Агния Васильевна кутіс уджавны Шойнатыса шöр школаын. А 1958 восянь пенсия вылö петтöдз 1981 воöдз уджаліс Ыджыдвидзса школаын, велöдіс челядьöс тöдны да радейтны чужан кыв  да литература. Ме бöрйи  велöдысьлысь  удж мам ради жö: сійö пыр вöлі меным примерöн, ме тшöтш, кыдзи и сійö, кöсйи и кöсъя велöдны челядьöс тöдны да  радейтны коми  кыв. Кыдзи мам, сійö вöлі стрöг, но справедливöй. Сетіс миянлы вок Васякöд мам сьöлöм шоныдсö, тöждысис миян олöм-вылöм вöсна кувтöдзыс, век вöлі дась отсавны: асьсö удзöдас, а  миянöс  доръяс… Век кöсйис лоны коланаöн, пöлезнöйöн.

       1978–öд воын мам шедöдіс «Российскöй Федерацияса Заслуженнöй велöдысьлысь» ним. Сійö вöлі зэв скромнöй мортöн, весиг шулывліс, мый сійö оз заслуживайт татшöм ыджыд званиесö».

         Агния Васильевна  вöлі школьнöй музей чужтысьöн-котыртысьöн.        Со мый гижö Агния Васильевна музей артмöм йылысь:

        «Ми, дерт, первойсö эг думайтöй музей йылысь. Шуим тöдмавны пионерскöй дружинаöн, кымынöн усисны Великöй Отечкственнöй война воясö Ыджыдвидз сельсöветувса сикт–грездысь. Тайö корсьöмъясас участвуйтісны 6–8 класса велöдчысьяс. Веськöдлім уджнас пионервожатöй Габова Елизавета Михайловнакöд. Тöдмалім, мый усьöма 194 морт. Челядь ветлöдлісны анкетаöн керкаысь-керкаö ловъя фронтовикъяс дорö… СССР –лы 50 во тыригкежлö стöчмöдім списоксö. Öні нин усьöмыслöн лыдыс лои 204 морт.

                     Ыджыд удж тайö корсьысьöмас и велöдысьяслöн, кодъяс тшöкыда ветлöдлісны челядькöд тшöтш да отсалісны оформляйтны корсьöм материал: Анна Александровна Попова, Нина Петровна Мишарина, Нина Кирилловна Мишарина, Алексей Александрович Удоратин, Александра Мелентьевна Игушева…»

      Игушева Александра Мелентьевна  чужліс 1927– öд вося ноябр 18 лунö, Ыджыдвидз сельсöветувса Джиянын, крестьянскöй семьяын. Овліс сьöкыда. Кöть сійö вöлі и нёльöдöн, но уна удж на сюрліс. Кор тыри 7 арöс,  пырис велöдчыны Ивановскöй начальнöй школаö. Помаліс школасö 1939–öд воын. Тайö жö воас пырис велöдчыны Ыджыдвидзса семилетньöй школаö, а сэсся велöдчис  Сторожевскса шöр школаын. 1944–öд воын помаліс 9 класс, но 10–öд классö велöдчыны пырны эз вермы. Батьыс эз лэдз, сы вöсна мый нинöм вылö велöднысö вöлі. Öтчыд Александра Мелентьевна паныдасис школаса директоркöд, и сійö корис, медым Мелентьевна локтіс велöдны начальнöй классъясö. Сідз Александра Мелентьевна лои велöдысьöн.             1964–öд  воын А.М. Игушевалы вöлі  сетöма «Коми АССР–са Заслуженнöй учительлысь» ним.

«Первой во уджалігöн меным ёна отсалісны Нина Петровна, Агния Васильевна. Öні на меным кажитчö, мый ме налöн ныв. Ёна кокньыд вöлі уджавны Александра Мелентьевнакöд. Сійö и ачыс ёна уджаліс, кужис и менö тшöтш уджöдны…»

Тайö кывъясыс Попова Анна Александровналöн, коді  чужліс  Кöрткерöс районса Одыб сиктын, но лои пыдди пуктана Ыд.

     Анна Александровна ачыс казьтылö: «Чужлі 1946 вося август 27 лунö Одыб сиктын Тист деревняын. Мамö Мария Григорьевна Габова и бать Габов Александр Петрович быдтісны 10 челядь. Ме вöлі медыджыдöн. 7 класс помалöм бöрын муні велöдчыны педучилищеö. Велöдчи 4 во. Кöрткерöсскöй РОНО мöдöдіс Ыджыдвиддзö. Туй эз вöв, и менö батьö август тöлысьын вайис ю кузя мотора пыжöн, пыртіс Нина Петровнаясö. И ме сійö лунсяньыс лои ыджыдвидзса олысьöн. Меным сэки вöлі 18 арöс. Учительскöй коллектив примитіс зэв бура ас мортöс моз. Сетісны 4 класс.  Первой во уджалігöн меным ёна отсалісны Нина Петровна, Агния Васильевна. Öні на меным кажитчö, мый ме налöн ныв. Ёна кокньыд вöлі уджавны Александра Мелентьевнакöд. Сійö и ачыс ёна уджаліс, кужис и менö тшöтш уджöдны.

    Луннас вöлі велöда, а рытнас вöлі олам том йöзкöд клубын. Том йöзыс вöлі олöны зэв дружнöя. Быд праздник öтлаын. А кымын концерт вылын выступайтлім. Ветлывлім выступайтны и Шудöгö, и Висерö, и Типöсиктö, и Сюзяибö. Шудöгö кайлім трактор доддьын. Зонъяс и нывъяс олісны чоя-вока моз. А кымын субботник вылын выступайтлім. Зэв гажаа вöлі прöйдитöны комсомольскöй вечеръяс.

        1975–öд воын заочнö помалі Коми пединститут географическöй факультет. Сійö восяньыс жö индісны завучö. Завучöн уджалі 1985 воöдз

         1985 восянь индісны школаса директорöн».

А кыдз велöдысь Анна Александровна уджаліс 2011 воöдз. Сöмын  таво арсянь кутіс новлöдлыны пенсинерлысь ним.  

Приложение № 8.  

           Кывбур гижысьыд талун зэв уна. Сöмын тай кызвын йывсьыс этша мый тöдам. Но эмöсь на пöвстын сэтшöмъяс, кодъяслöн ним-овыс топыда йитчöма коми войтырлöн быд лунъя олöм-вылöмкöд. Татшöмъяс лыдын миян  сиктын чужлöм-быдмылöм Александра Петровна Мишарина, кодöс ми öшым тöлысь 19 лунö став сьöлöмсянь чолöмалiм-нимöдiм 65 во тырöмöн.
Кыдзи унаысь висьтавлiс ачыс Александра Петровна, сiйö ёна радейтö челядьöс да на йылысь гижö аслас кывбурьясын. Со кöть босьтам

«Сиктса челядьлы» кывбур.

Сиктса челядь котырöй.

Пармаса ныв-пиянöй.

Видзвывса яр дзоридзьяс,

Радейта ме тіянöс.

Кöмтöм кока войтырöй,

Зорöд дорö вöрзьöмöн

Турун юръяс ваялад,

Панласьöмöн, вензьöмöн.

Пажын кадö лöзöдтöдз

Ваысь онö петалöй.

Сёйны пуксяд - вöвъяслы

Няньтö джынсö сеталад.

Урлысь сиктöд вуджöмсö

Ті жö медводз казялад.

Вöтлысяд да вöтлысяд,

Дöрöмныд тшöтш вазьылас.

Öти здук он весь олöй,

Век нин мыйкö керанныд:

Дышöдас кö  ворснытö,

Йöлöгаöс неранныд.

Сэтшöм ті мен мусаöсь,

Пармаса ныв-пиянöй.

Сійöн гажöй бырлывлö

Медся ёна тіянысь.

Ми тшöтш жö радетам Александра Мишаринаöс да тшöкыда ветлывлам сы дорö гöсьтитны. Со неважöн  Полина Старцевакöд  ветлім  гижысь дорö, юмов тшай  стöканöн пасйим сылысь Ыджыдвиддзö бöр воöмлы   6 вося олöм- вылöмсö да юасьыштім öнія олöм йылысь.  

Кора кывзыштны.

(Видзöдöм бöрын)

Аттьö сёрниысь, пыдди пуктана Алесандра Петоровна. Ми став сьöлöмсянь сиам Тіянлы  дзоньвидзалун, медым уна мича  кывбур чукöр на петас Тіян перö улысь. Быд бурсö. (Сетö неыджыд козин).