Мои педагогические находки.
материал

«ШӦР ШКОЛА» ЧЕРЕМКОВА СИКТСА МУНИЦИПАЛЬНӦЙ ВЕЛӦДАН СЬӦМКУД УЧРЕЖДЕНИЕ

«КОМИ ВЕЛÖДЫСЬ» КОНКУРСÖ ПЫРÖДЧАН УДЖ

ЭССЕ

«УДЖЫН ШЕДÖДÖМТОРЪЯС»

УДЖ ГИЖЫСЬ:

КОМИ КЫВ ВЕЛÖДЫСЬ

ИВАНОВА АНТОНИНА НИКОЛАЕВНА

ЧЕРЁМУХОВКА СИКТ, 2019 ВО

Тыраöсь кö ті тöдöмлунъясöн,

 сетö мукöдлы öзтыны сысянь би.

Томас Фуллер

     Бöрвыв видзöдла да зэв окота видлавны-донъявны ассьым велöдны кужöмöс. Овлö, мый пукала да мöвпала: «Ме ас местаын? Колана-ö удж бöрйи?» Тувкнита асьлö да вочаала: «Мый абусö сöран! Быть öд колана, кык-куим пöв колана!» Школаын уджала 20 во. Гöгрöс пас! Позьö вöчны нин кутшöмкö неыджыд кывкöртöд. Тайö кузь туяс ни öти лун эз коль уджын пессьытöг, пыр мыйкö корся, гижа, лöсьöда… И ставсö тайö сы вылö, медым локны классö, заводитны сетны урок да аддзыны синъяс, челядь синъяс. Мыйта наын би öзйö! А бисö тайö колö кужны пестыны, вот сэк  мöвпъясыд нокны заводитöны: «Мый? Кöні? Кор? Кыдзи? Мый вöчны? Мый могысь?»

       Мый? Чужан кыв! Висьталан да сьöлöмтö чепöльтö. Мойвиис меным велöдчыны коми кыв велöдысьö. Пыри комиссия водзö, юалісны: «Коми кывсö кöсъян велöдны?»  Мый татчö висьталан, шуи, мый кöсъя. Со и велöда. И велöда абу кутшöмкö предмет, абу кутшöмкö дисциплина, а ассьым «небыд, мича, гора» чужан кыв – коми кыв.        

       Кöні? Черёмуховка сиктса шöр школаын. Вылыс тшупöда велöдчанін помалöм бöрын локті аслам  школаö. Тані ме помалі 11-öд  класс, школаыс вöлі роч, комиöн тані эз сёрнитны. Уджöс заводитігöн нин, школаыс вöлі джынвыйö коми, джынвыйö роч.  Сэк коліс босьтсьыны корсьны кутшöмкö методъяс, медым кокньöдны аслым удж. Велöдчи сетны уроксö сідз, медым велöдчысьлы вöлі гöгöрвоана, кокни, интереснö да и меным долыд, мöд ног кö шуны, киöс песі. Лöсьöдалі карточкаяс, кроссворд-ребусъяс, презентацияяс, видеофрагментъяс, чукöрті фольклорысь материал. Видлі лöсьöдны уна сикас урокъяс: урок-путешествие, урок-концерт, ворсöм, урок-погружение, бинарнöй  и интегрированнöй, трансляция… Кор мортлысь став сьöкыдлунсö венö тöдöмлунъяс босьтны зільöм, сэки сылöн öзйö сьöлöмыс. Школаын челядьöс велöдöм босьтö не сöмын став вын-эбöс, но, мый ёна тöдчанаджык, пöсь сьöлöм да ыджыд мывкыдлун. И öзйис биöй, сы вöсна мый пукті мог – велöдны сёрнитны мича коми кывйöн, мам кывйöн.

        Висьтавны кö кор, лун и вой. Тані «кор?» юалöмсö стöчджыка лоö сетны: «Кор тэ узьлан, дона велöдысьöй?» Да и воясыд мунöны. Оз прöста мунны, сідз шуны, пыр мыйкö майшасян, мöвпалан, тöдмасян, корсян-уджалан да вöчан. Овлöны сьöкыд лунъяс, сэтшöма быттьö мудзöмыд, öд велöдысьлöн уджыд ва борган моз пыр бузгö.  Но збыльвылысь татшöм шуда, сы вöсна мый менö виччысьöны челядь, ме налы кола, а тайö ыджыд дон.

         Кыдзи да мый вöча? Тайö медся сьöлöм вöрзьöдана юалöмъяс, öд тайö кывъяс сайö дзебсьöма став велöдан уджöй. Кыдзи лöсьöдны урокъяс? Да медым найö вочавидзисны öнiя кадся стандартъяслы. Коми кыв велöдöм сетö меным позянлун пырöдчыны чужан мулöн историяö, культураö, тöдмöдны обычайясöн, обрядъясöн, традицияясöн, йöзкостса вомгора фольклорöн да оласногöн, петкöдлыны коми йöзлысь аслыспöлöслунсö  финн-йöгра кывъя йöзкöд йитöдын.  Урокъяс вылын челядькöд пырöдчам туялан уджö, лöсьöдам проектъяс, творчествоа уджъяс. Уджын лои видлöма уна технология, велöдан методъяс да приёмъяс, тайö и проблемно-поисковöй методъяс, критическöя мöвпалöм сöвмöдöм, кейс-технология, ворсан, дзоньвидзалун видзан, но бöръя кадö ёнджыкасö мыджся Л.Г. Петерсон серти деятельностнöй метод  технология вылö. Любö видзöдны, кор аддзан, мый велöдчысь ачыс корсьö колана тöдöмлунъяс, зільö аддзыны сьöкыдлунысь петан туйяс. Кöть кутшöм велöданног серти ог босьтсьы лöсьöдны урок, юрвемын век кута ыджыд мог – челядьлысь сёрни сöвмöдöм. Кыв да сёрни сöвмöдан уджъяс подулöн лоöны текстъяс, неыджыд висьтъяс, мойдъяс, кывбуръяс. Текстъяс пыр медводз зіля паськöдны челядьлысь тöдöмлунъяссö, отсала аддзыны да казявны найöс кытшалысь  олöмысь сьöлöмö йиджанторъяссö, тöдчöда налысь олöмын коланлунсö. Тайö чуйдöдö челядьöс асшöр удж вылö, сöвмöдö налысь аскеж мöвпъяссö, найö кутöны корсьны небöгъясысь, энциклопедияясысь, Öтуввезысь колана материал, видлавны сійöс гöгöрбок, тöдмавны выльысь-выль кывъяс. Текстъяс подулын велöдчысьяс лöсьöдöны неыджыд проекта уджъяс, мый паськöдö да озырмöдö налысь кывворсö, тöдмöдö йöзкостса творчествоöн, коми поэзиялöн озырлунöн, культураöн, традицияясöн. Урокысь кындзи, челядьлöн эм позянлун босьтны содтöд донпас. Та вылö «Прошколу» сайт вылын лöсьöдöма дидактическöй уджъяс чукöр. Тайö 5-9 классъяслы лöсьöдöм дистанционнöй уджъяс.  Тшöктöмъяс пöвстын – гижны письмö, неыджыд гижöд, серпас серти гижöд, доклад, туявны ышöдан мукöд пöлöс удж. Позьö уджавны аскежысь, ёртъяскöд öтув, велöдысь веськöдлöм улын. Текстъяс подулын лöсьöдöма сідзжö коми кывйысь КИМъяс, вöзъя коми кывйысь диктантъяс гижöм вылö текстъяс чукöр. Чайта, мый текстъясöн кужöма удж лöсьöдöм и лоö менам велöдан уджын тöдчанаторйöн. Аддза ассьым вöчöмторъясöс, сьöлöм вылын долыд, и челядьлы колана уджъяс. 

    Велöдчысьяс оз сöмын окотапырысь уджавны урокъяс вылын, но и урокъяс бöрын. Радпырысь пырöдчöны конкурсъясö, ордйысьöны тöдöмлунъясöн олимпиадаясын, коми кыв вежонын, дасьтысьöны сдайтны экзамен. И бара ме аддза вöчöм уджлысь колана кывкöртöдъяс, мый ышöдö уджавны водзö, корсьны уджын выльтор, нуöдны колана удж челядьлысь тöдöмлунъяс да кужöмлунъяс вынсьöдöм вылын.

     Ог сöмын челядьöс вöйпöд   босьтны ыджыд мывкыдлун, но и ачым перъя сійöс, пырöдча методическöй уджö.   Выль велöданногъяс отсöгöн лöсьöдöма уна урок да шедöдöмторъясöс, мöд велöдысьяскöд аслам уджöн юксьöм могысь, йöзöдöма Öтуввез сайтъяс вылын либö петкöдчöма конференцияяс, форумъяс, коми кыв велöдысьяслöн öтувтчанінъяс вылын.

     Уна удж вöчöма. Но мый могысь тайö ставсö? Öти-кö, медым петкöдлыны чужан кывлысь мичлунсö да коланлунсö, мöд-кö, медым öзтыны челядь сьöлöмъясын кыв дорö куслытöм муслун, коймöд-кö,  медым миян кывным дыр на оліс.

     Быд лун тырöма уна сикас вöвлöмторъясöн -  сьöлöм серти, а мукöдсьыс и шогмана, - лов вöрзьöдана аддзысьлöмъясöн, бур вöзйöмъясöн, мöрччана кывъясöн, сёрни-басниясöн, серамöн, чуймöмöн, гора переменаясöн, велöдысьяслöн чукöртчöмъясöн, кыпыд урокъясöн… Некор пукавны!. Уна нин тöда, но век колö водзö велöдчыны, унатор гöгöрвоны.  И ме дась, сы вöсна мый радейта ассьым уджöс. Мöд ног овны ог куж да и ог кöсйы. А ме водзын мед век тыдалас биыс, медым югзьöдас туйсö кузь велöдан уджын.