Масленича (внеклассное мероприятие)
методическая разработка по краеведению на тему

   Йŏввыв вежон.

                                                                             Удж вŏчысь:

                                                                             Луздор районса Мутнича школаын

                                                                             коми кыв да литература велŏдысь

                                                                             Иванова Валентина Федоровна

 Йŏввыв вежон.

Гаж нуŏдам ывлаын.Челядь да велŏдысьяс мича пасьтасьŏмаŏсь, кузь сыръя чышъянаŏсь.

Ворсысьяс: Гаж нуŏдысь

                     Тŏв

                     Тулыс

                      Велŏдысь

Гаж нуŏдысь:   Локтŏй татчŏ, пыдди пуктана войтыр! Кутам ворсны, сьывны! Йŏввыв      вежон коллявны.

Локтŏ Тŏв:    Видза оланныд, дона гŏсьтьяс! Кŏдзыд жŏ вŏлi таво тŏлыс. Меным ниŏти на                              абу окота мунны. А, гашкŏ, ме кольччывла на тiянŏ?

Челядь:   Эн, эн.

Тŏв:      Сiдзкŏ ворсыштŏй. Мыччŏдлŏй меным, кутшŏм тi енŏсь, вŏрасаŏсь.

Гаж нуŏдысь:   Вай, сiдзкŏ, ворсыштам.

1. « Пышкай»

Пудъясьŏмŏн бŏрйŏны ŏтиŏс – пышкайŏс. Синсŏ сылысь кŏрталŏны. Мукŏдыс сувталŏны сы гŏгŏр кытшŏн да сьылŏны:

Миян гажа сад йŏрŏ

Локтiс пышкай да сьылŏ:

- Пышкай, пышкай, эн вуграв,

Кодi нявŏстас, тŏдмав.

Сэсся ставыс ланьтасны, а кодкŏ ŏти сьылысьяс пиысь нявŏстас ассьыс гŏлŏссŏ вежны зiльŏмŏн. Пышкайлы колŏ тŏдмавны, кодi нявŏстiс. Тŏдмалас кŏ, нявŏстысьыс лоас пышкайнас, ŏнi сылысь нин кŏрталасны синъяссŏ. А оз кŏ тŏд, бŏр ачыс кольŏ пышкайнас. Ворсŏм кыссьŏ водзŏ.

2. « Ошкысь»

Юксясны-пудъясясны. Ŏти лоас ош, мукŏдыс- вотчысьяс. Ош джодж вылас пидзŏсчанясяс. Ошсŏ вевттясны пасьŏн. Вотчысьяс пырасны кытш пытшкŏ, кŏнi дзик кытш шŏрас узьŏ-вугралŏ ош. Вотчысьяс ветлŏдлŏны ош гŏгŏр, петкŏдлŏны, быттьŏ вотiсны  дозъяс чŏд либŏ пув. Асьныс сьылŏны:

Ошкŏ-бабŏ, ошкŏ-бабŏ,

Чŏдтŏ вотам, пувтŏ ŏктам,

Бур вотŏссŏ босьтам,

Лек вотŏссŏ чŏвтам...

Тайŏ кывъяс бŏрас ош чеччыштас да пондас кутавны вотчысьясŏс. Кодŏс удитас кутны кытш пытшысьыс, сiйŏ лоŏ ошкŏн. Оз кŏ кут, бŏр ачыс кольŏ ошнас.

3. « Сарŏн ворсŏм»

Пудъясьŏны. Код вылŏ усьŏ пуд, сiйŏ лоŏ сар. Сар быдŏнлы сетŏ ним. Тшŏкыджыка овлŏ, мый сiйŏ босьтŏ лэбачьяслысь либŏ пемŏсъяслысь нимъяс. Визьнитŏны кытш. Сар пуксьŏ кытш шŏрас, бокас му вылŏ пуктŏ мач. Мукŏдыс сувталŏны гŏгŏрыс, кытш саяс. Сулалŏны бок ногŏн, дасьŏсь сар кыв бŏрын либŏ котŏртны бокŏ, либŏ  уськŏдчыны мач дорŏ. Сар шуŏ кутшŏмкŏ выльŏн сетŏм ŏти ним. Мукŏдыс чепŏсйŏны бокŏ, а сiйŏ, кодлысь нимсŏ гарыштiс сар, босьтŏ мачсŏ да лыйŏ пышйысьяс кузя.  Кодлы веськалас, сылы ŏти очко штрап. Оз кŏ веськав, аслыс штрап. Сэсся кодлŏн медводз тырас урчитŏм штрап лыдыс ( кыдзи сернитчисны водзвыв – вит ли, дас ли), сiйŏс сар кутас накажитны-пŏжны. Сувтŏдас сiйŏс стенлань чужŏмнас, воськов вит-ŏ-квайт-сянь кутас сылы мышкас лыйлыны-пŏжны мачнас (кымын штрапнŏй очко мыжаыслŏн). Сэсся бŏрйŏны выль сарŏс, да ворсŏмыс мунŏ водзŏ.

Тŏв:  Аттьŏ тiянлы, челядь. Ена жŏ нин тi збой войтыр.

Гаж нуŏдысь:   Аттьŏ тэныд, Тŏв, тэнад гажа тŏвся лунъясысь, джуджыд лымйысь, крут чойясысь. А ŏнi миянŏ Тулыс воŏ! ( Локтŏ Тулыс, а Тŏв мунŏ).

Тулыс: Видза оланныд, пыдди пуктана коми йŏз!

 Ылысянь ме вои. Шоныд лунъяс вайи, дзоридзьяс, бобувъяс, гажаа сьылысь лэбачьяс.                А ещŏ вайи Йŏввыв. Сьылŏй, йŏктŏй, пŏсь блин сейŏй!!!

( Зонъяс вайŏны идзасысь вŏчŏм Йŏввыв да сувтŏдŏны чой йылŏ).

Гаж нуŏдысь: А ŏнi ме татчŏ кора велŏдысьŏс висьталыштны Йŏввыв йылысь.

Велŏдысь:  Йŏввыв – тулысын медводдза ыджыд праздник, тŏв коллялан да тулыс паныдалан гаж. Кŏнсюрŏ сiйŏс шуŏны роч ног – Масленича, Масьленча. Роч  традицияын  Йŏввыв вежонся быд лунлŏн эм аслас ним, код серти вежсьŏны и ворсŏмъяс-гажŏдчŏмъяс: выльлун- тайŏ паныдалŏм, вторник – ворсŏдчŏм, середа – лакомка, гуляйтŏм, четверг шуŏны паськыдŏн, пекнича тьŏшша дорын рытпукŏны, субŏтаŏ монь ордын гŏститŏны, шойччан лунŏ прŏшша корŏны. Комиын енджыкасŏ гажыс заводитчŏ  середа-четвергын.

      Сиктъясын тайŏ вежонŏ  вŏчŏны исласян чойяс. Исласьŏны  и вŏла додьясŏн. Сикт сайтi нарошнŏ вŏчлiсны туй. Пуксясны том йŏз чукŏрŏн ŏти доддьŏ, « валяйтŏны», гудŏкасьŏны да сьылŏны йŏввыв сьыланкывъяс.

Гаж нуŏдысь: Тŏда, тŏда. Челядь, вай инŏ  « Валяй, валяй» сьылам. Тулыс, тулыс воŏ!

Гажа жŏ нин валяйыс,

Да валяй, валяй да гажа жŏ нин.

Дыр тай виччысим,  

Да регыд тай колин.

Дыр нин валяйсŏ эг сьылŏ,

Да валяй, да валяй да

Дыр жŏ эг сьылŏй.

Ена вед гажа вŏлi валяйыс,

Да валяй, валяй,ой,да гажа вŏлiс.

Миян тай нŏ талун доддьыс абы мича.

Да валяй, валяй да абы мича.

Вŏлъясыд вед тожŏ омŏльŏсь.

Да валяй, валяй, да омŏльŏсь,

Зонъясыс  тай талун абы миян,

Да валяй, валяй, ой да абы миян.

Велŏдысь: Ворсŏны Йŏввыв дырйи  и сiдз шусяна « Капусткаŏ».

Сьыланкыв дырйи нывъяс кутчысьŏны кытшŏ, а зонъяс ветлŏдлŏны кытшлы паныд. Тайŏ кывъяс сьылiгŏн зон орŏдŏ кытшсŏ, пырŏ сэтчŏ и сэнi бŏрйŏ нылŏс. Тайŏ кывъяс дырйи найŏ окасьŏны да сувтŏны кытшŏ. Ворсŏм мунŏ сэсся выльпŏв.

Гаж нуŏдысь: Сiдзкŏ ворсам « Капуста»

1. Весалiс капуста ныв,

    Сьылiс татшŏм сьыланкыв.

    Ай люли, ай люли,

   Сьылiс татшŏм сьыланкыв.

2. Ньŏбŏй капустасŏ тась,

Вузавны ме сiйŏс дась.

    Ай люли, ай люли,

   Сьылiс татшŏм сьыланкыв.

3. Капустаыс мича,ен,

Град йŏрŏ со пырис зон.

    Ай люли, ай люли,

   Сьылiс татшŏм сьыланкыв.

4. Град йŏрŏ со пырис зон,

Вŏчис нылыслы поклон.

    Ай люли, ай люли,

   Сьылiс татшŏм сьыланкыв.

5. Вŏчис нылыслы поклон

Босьтiс веськыд киŏдыс.

    Ай люли, ай люли,

   Сьылiс татшŏм сьыланкыв.

6. Босьтiс веськыд киŏдыс.

Круг шŏрас пŏ сувтŏдiс.

    Ай люли, ай люли,

   Сьылiс татшŏм сьыланкыв.

Велŏдысь:   Йŏввыв вежонын нывбабаяс керкаысь керкаŏ ветлiгŏн  сьылiсны, йŏктiсны, тешитчывлiсны паныдасьысь мужичŏйяс вылын: вачкалiсны мыш кузяыс, тыртлiсны лымйŏн, мырддьылiсны шапкаяс да кепысьяс. Та дырйи мужичŏйяслы эз позь петкŏдлыны дŏзмŏм.

Гаж нуŏдысь:  Гŏсьтьяс! Чой йылын со чучело ( пŏлŏкалŏ) сулалŏ. Челядь, кайлŏй, гŏглялŏй колькъястŏ, а ми ставŏн сылам «Гŏгыль пŏ, гŏгыль»

Гŏгыль кŏ пŏ вŏд, гŏгыль, ой,

Шондiбанŏй да.

Шондiбанŏй гŏгыльŏй да,

Татшŏм ŏмŏй гŏгыльыс овлŏ да,

Гŏгыль пŏ вŏд, гŏгыль, ой,

Шондiбанŏй.

Гаж нуŏдысь: А ŏнi водзŏ ворсыштам. Ордйысьŏмъяс: ( чой йывсянь кодi ылŏджык исковтас, кодi ваŏн тыра ведраŏн ŏдйŏджык лэччас да этшаджык кисьталас васŏ, кодi ŏдйŏджык каяс чой йылŏ).

Велŏдысь: Ок и ворсыштiм. А ŏнi водзŏ кывзŏй.

    Праздниклŏн медшŏр сеянŏн лоŏ блин. Медводдза блинсŏ пырджык пуктŏны ŏшинь вылŏ кулŏмаяслы, мŏдсŏ сетŏны гŏль мортлы кулŏмъяс казьтывлŏм вылŏ. Блин лоŏ олŏм вынлŏн символŏн да йитчŏ кулŏмакŏд да «мŏд» мирса олŏмкŏд. Йŏввыв вежонŏ ена сейŏны, сы вŏсна мый локтŏ Ыджыд видз, кор оз позь сейны яй, йŏв, чери, кольк, сŏмын лук да картупель.

Челядь йŏктŏны роч сьыланкыв « Ой, блины, блины» улŏ.

Гаж нуŏдысь: Вай ещŏ ордйысьны: кодi ŏти минутаŏн сеяс унджык блин, кодлŏн медыджыд либŏ медкыз блин, кодi унджык юас чай кружка?!

Велŏдысь: Гажŏдчŏм помасьлiс шойччан лунŏ. Сэки сотŏны чучело, сьылŏны-йŏктŏны да шуалŏны ŏта-мŏдлы : « Прŏшша кора», и быть колŏ ставŏс прŏститны.

Гаж нуŏдысь: А ŏнi сотам Йŏввыв  пŏлŏкалŏ. Сьылам да йŏктам! Блин сеям да чай юам! Тулыс воис! Тулыс!