Эссе Мин - Уҡытыусы
материал (3 класс)

Эссе «Мин-уҡытыусы»

        2021 йыл        

Мин, Ғәйнуллина Рита Наил ҡыҙы, уҙған ғүмеремдең сал түбәһенән 49 йыл артҡа ҡайырылып ҡарайым һәм...

Һиҫкәнеп үк китәм,таныш күҙҙәр                                                                                Миңә ниҙер һөйләй шикелле:                                                                                               – Таныйһыңмы? – ти ул, –был мин, был мин,                                                                                                Тәүге уҡытыусың бит инде!

    Эйе, тәүге уҡытыусым Хөснуллина Нурбикә Әсғәт ҡыҙы тәү күреүҙән үк арбаны, әсир итте.Уның яғымлы тауышы, күҙҙәренән нурҙар бөркөп йылмайыуы, гәлсәр шишмәләй, сылтыратып көлөүҙәре,һомғол буй-һыны, атлап йөрөүҙәре, кейгән кейемдәре, прическаһы – бөтәһе лә килешле ине.Уҡытыусымды яратып, уға һоҡланып,һәр һүҙен иғтибар менән тыңлап ултыра инем.Тик ошондай мөләйем, матур апай ғына уҡытыусы булырға тейеш, тип уйлай, уҡытыусыны башҡаса күҙ алдына ла килтерә алмай инем. Уҡытыусымдан өлгө алыуым,һәр яҡлап уға оҡшарға тырышыуым һөҙөмтәһендә:”Үҫкәс, кем булырға теләйһең? “ – тип һораһалар:”Аҡ яғалы көрән пальтолы уҡытыусы апай булғым килә“,–ти торғайным.

    Бала саҡ хыялым мине Белорет педагогия училищеһына алып килде.Бында ла уҡытыусыларымдан уңдым, тип әйтә алам.Класс етәксебеҙ Хәтимә Хәжи ҡыҙы Вәлиева беҙҙең өсөн ысын мәғәнәһендә кәңәшсе лә, дуҫ та, терәк тә булды.Ул белем биреү менән генә сикләнмәне,киләсәктә һайлаған һөнәр буйынса эшкә дөрөҫ ҡараш тәрбиәләне.”Мәктәп ҡапҡаһын асып кергәндә, донъя мәшәҡәттәрен ҡапҡа төбөндә ҡалдырып инергә тейешһегеҙ, “– тип өйрәтте ул.                                                                                                          Педагогия училищеһын уңышлы тамамлап, ҡулыма диплом алып ҡайтҡас, быға барыһынан да нығыраҡ һөйөнгәне ҡайным булды.”Матур һөнәр һайлағанһың.Ябай бул, уҡыусыларыңды тиң күр.Төрлө әсәнән тыуһалар ҙа, сабыйҙар күңеле бер төрлө ул.Балаларға тауыш күтәрмә, был һинең абруйыңды арттырмаҫ, киреһенсә, төшөрөр генә,“ –тине ул.Сикһеҙ ғорурлыҡ менән:”Һин минең эшемде дауам итеүсе,“–  тип өҫтәне ҡайным һәм аҡ ҡулъяулығын сығарып, йәшләнгән күҙҙәрен һөртөп ҡуйғайны.Был һуғыштан һуң 39 йыл ғүмерен йәш быуынға белем,тәрбиә биреүгә арнаған тәжрибәле педагогтың һүҙҙәре, хеҙмәт юлын башларға торған йәш уҡытыусыға фатихаһы ине.Мин был һүҙҙәрҙе һәр саҡ иҫтә тоттом. Ә уларҙың мәғәнәһен бөтә тулылығында күп йылдар үткәс кенә аңланым.Инде үҙем 35 йыл тәжрибә туплаған уҡытыусы булараҡ,мышнай-мышнай, танау тарта-тарта хәреф таныған аҡ күңелле кескәй сабыйҙарҙың һәр береһен шәхес итеп күрергә, уларға тигеҙ ҡарарға өйрәткән ҡайныма мең рәхмәтлемен.Ошо сифаттарҙың башланғыс класс уҡытыусыһы өсөн бик мөһим икәнен ябай ғына итеп төшөндөрә алған ул.                                                                                            Тормош юлымда осраған, яҙмышымда, һөнәр һайлауҙа, артабанғы педагогик эшмәкәрлегемдә ҙур роль уйнаған өс шәхес, өс уҡытыусы, мине    ” әсир алған өс мөғжизә “...Мин уларҙың береһен дә онотманым,  изге теләктәрен һәр саҡ иҫтә тоттом, аҡыллы кәңәштәренә таяндым.Улар минең хыялдарыма ҡанат ҡуйҙы, рухымдың Ватаны булды.

Уҡытыусы ! Ниндәй бөйөк исем !                                                                         Хыялдарға ҡанат ҡуйыусы !                                                                                                 Һәр сабыйҙың күңел нескәлеген                                                                                             Үҙ йөрәге менән тойоусы !

Бер ҡасан да ошо һүҙҙәрҙең хаҡлығына шикләнгәнем, уҡытыусы һөнәрен һайлағаныма үкенгәнем булманы.Уҡытыусы һөнөрен һайлағанһың икән, һин үҙ эшмәкәрлегеңдең дәрес биреү, хәрефтәр, һандар өйрәтеү менән генә сикләнмәгәнлеген аңларға тейешһең.Бәпкәләрҙәй эркелешеп, гөр килешеп мәктәп ҡанаты аҫтына килеп кергән балаларҙың һәр береһенең күңеленә асҡыс таба алырға,кәрәк саҡта талапсан да, мөләйем дә, сабыр ҙа булырға, – ҡыҫҡаһы, ҡырҡ төрлө сүрәткә керә белергә тейешһең.                                           Уҡытыусы тигән изге һөнәр эйәһенә кемдәр генә ниндәй генә маҡтау, рәхмәт һүҙҙәре яуҙырмаған да, ниндәй генә шиғырҙар, йырҙар бағышламаған!

Уҡытыусы – һәр кем мейеһенә                                                                                                     Аҡыл, белем ебен туҡыусы.                                                                                                        Үҙе һаман тормош алдында                                                                                                                   Беҙҙең кеүек ябай уҡыусы.

Эйе, балаларҙы уҡытҡан ваҡытта үҙең дә уҡырға,үҫеш юлында булырға тейешһең.Башланғыс кластарҙа эшләүе  күңелле лә,ҡыҙыҡ та, мауыҡтырғыс та, шул уҡ ваҡытта ихласлыҡ, бөтә күңелеңде һалыуҙы талап итә.Үҙеңде бала һымаҡ хис итеп,балалар менән бергә шатланаһың, көләһең,бергәләшеп илап  алған саҡтар ҙа  була.

Тик уҡытыусы барыбер үҙ иңдәрендә һәр саҡ яуаплылыҡ тоя,бала яҙмышына йоғонто яһай, һәр саҡ балаларҙың күҙ алдында, иғибар үҙәгендә.Шуға күрә һәр һүҙен үлсәп һөйләргә,һәр ҡылығын, хәрәкәтен, хатта ҡул, йөҙ ишараһын уйлап эшләргә бурыслы.