Урок мокшанского языка в 4 классе "Сочинениянь сермадомати анокламась "Монь шачема масторозе - Жуку велесь"
план-конспект урока (4 класс) на тему

Темась: Сочинениянь сермадомати анокламась «Монь шачема масторозе – Жуку велесь».

Урокть целенза: видекстоптомс шарьхкодема  валти  «шачема мастор»;

Касфтомс тонафнихнень корхтамань маштомашиснон;

виияфтомс кельгомаснон веленьконди.

Урокть оборудованияц: презентация веленьконь колга, компьютер, телевизор.

Урокть молемац.

1. Организационнай пялькстсь.

Музыка. Учительть валоц.

- Шумбратада, кельгома инжихть!

- Шумбратада, шабат!

- Озада. Тячи тейнек састь пяк лама инжида. Синь ерайхть ваномс, кода тинь содасасть и кода тинь кельгсасть мокшень кяльть. Озада лацкас. Ушедсаськ урокть.  

Шачема велезти.

Веле, веле, мокша веле,

Шачем-касом юрхтоняй!

Якань-шяянь масторть келес –

Корязт цебярь ашень няй.

Кельгса порать, коса марят

Панжи пяше медень таньф,

Коса палондсть золот-зарят

И стирнянь пси сельмованфт.

Веле, веле, шачем веле,

Мокшень юром – Жукуняй.

Якань-шяянь масторть келес –

Корязт цебярь ашень няй!

В. Волков

- Шабат, кода арьсетяда, мезень колга минь мархтонт карматама корхтама урокса?

(шачема масторть)

- Тячи минь урокстонк аноклатама сочинениянь сермадомати «Монь шачема масторозе – Жуку велесь».

Сермадость тетрадезонт числать, темать.

2. Кудонь заданиять проверямац.

Коста мумс мондейне стама валхт,

Штоба морамс мархтост шачем крайть?

Седизе кучи: «Вели архт,

И ня валхнень велеса мусайть»

Кудса «Якстерь тяштеня» журналста сермадоде стихотвореният велеть колга. Проверясаськ.

Тяса павазу эрь шись.

Кельгса веленязень, кельгса,

Тяса павазу эрь шись.

Тя – Россиять емла пялькскац,

Тяза вяти эсон кись.

Кельган вирьхнень и лугатнень,

Пяше панчфонь ару таньфть,

Сия ведень лихтибрятнень,

Тядянь лямбе сельмованфть.

Шачем вастозе инь мазысь,

Тяса кулень васень ефксть.

Тяса моронянзон казендсь

Тейне кайги вайгяль цефкссь.

Адресозень мон аф сепса,

Катк кинь мялец инжикс сай,

Вакска кудоньконь аф етай,

Пялонк ваймама сувай.

Теенть морня мон  морань,

Петемс мялентень пяк ерань.

Кда мялезонт сон тусь,

Веленязень вешесть-мусть.

 Монь велезе.

Шачем велезе коль касы,

Пара мяльса эрян тяса.

Вакска шуди кельме ляйня,

Сон аф маця и аф тяйня.

А лугадонза, ватт, мзяра!

Ашень няенде мон тняра.

А ульцядонза мяк вете,

Афи пачкодят мянь пети…

Кельгса, кельгса шачем велезень.

Кельгса, кельгса  шачем велезень,

Кельгса  фталонза вирнять.

Кельгса  ляйнять, кели паксятнень,

Панжи садонь шиненять.

Пара ломатть эряйхть велесон,

Ванфтсазь тястонь мазышить.

Азса сембонди – мзярдонга

Аф юкстаса тяза кить.

Велеса мон эрян.

Велеса мон эрян,

Тяса шачень – касонь,

Ефксонь уженязень

Кода маштан шнаса

Ласькан кели паксяв,

Тоста панчфкат сязян,

Каштаз эздост кодан

И путса эсь прязон.

Сединязе шави,

Потмозон аф тяльги,

Сяс мес нинге одан,

Сяс мес эряфть кельган.

3. Валксонь тев.

- Мзярошка цебярь и мазы вал кулень тинь корхтамастонт. Сермадсаськ кой-конатнень, азсаськ синь смузьснон.

Россиять емла пялькскац, шачем вастозе инь мазысь, шачем велезе,  пара ломатть эряйхть велесон, ефксонь уженязе.

4. Од материалть лангса работась.

- Мезьста ушеды Родинась? Аф сразу отвечат тя кизефксть лангс. Кажнай ломанть мезьста-бди сонценнеста. Кажнай тишенять мастор лангса сонцень вастоняц, коста сон сявонди эряфонди вий. Тяфта жа и ломанць. Кажнайть сонцень юронза. Конат максыхть тейнза эряф. Но сембонь минь марс кочкасамазь фкя – шачема-касома вастоньке.

- Шабат, азость, а кода лемнесазь тя емла уженять, коса минь мархтонт эрятама?

(Жуку веле)

- Кеподесть кядентень, кие тяса шачсь?

-  А костонь  тинь алянте-тядянте?

- Кунара ли синь тяса эряйхть?

- Морафтсаськ валрисьмоть.

Шачема вастсот шиняське сяда лац эжди, нармоннятневок сяда мазыста морайхть, модаське сяда ляпоня и лямбоня,  нъльня раса ведь путькскясь эшентьфтянза и штасы сиземацень.

- Кода шарьхкодьсасть валрисьмоть смузенц?

(Шачема уженясонза ломаньц содасы эрь тишенять, эрь кинять-яннять, эрь панчфкять, эрь шуфтонять. Синь касыхть и лажнайхть эрь велеса, но миньцонк синь сяда мазыхть и сяда серихть.)

- Арьседа валрисьме шачема вастть колга.

(Аф муят сяда цебярь васта шачема вастцень коряс.

Шачема веледа питни мезевок аш.

Кельгса эсь велезень)

5. Ванондома тев.

Эрь велеть, веленять да и кодамовок эряма вастть ули сонцень историяц. Аф кунара минь мархтонт ушедоме ванондома Жуку веленьконь историянц. Тячи урокста азондсаськ мезе анокламе.

Модать лангса улихть мазыдонга мазы вастт. Но тейне инь мазысь и кельговикссь – тя Жуку велезе, кона сувси Зубово-Полянскяй районти, а райононьке республика Мордовияти. Велеть фтала шуди Вад ляйсь, кона сявсы ушетксонц  Вадинскяй районцта Пензенскяй областьста. А ведензон кандсыне Мокша ляйти. Велезе ашкордаф вирьса, коса касыхть разнай породань шуфтт. Велесонга лама шуфтта. Пцтай эрь кудть каршеса касыхть келуфт, топольхть,  исат, тумот. Но велезе эряй сядонга мазы тунда, мзярда ушедыхть панжема саттне. Сон бта ваяй тя мазы шить потмос.

Эряфкшу ломаттнень азондомаснон коряс миндейнек пачкодсь ся, што васенце эряйсь сась Пичпанда велеста. Тя ульсь Юдин. Велеть лемдезь Юдовкакс. Тя лемсь изь ту ломаттнень мяльс и валом сонь кармасть лемнемонза Жукукс, сяс мес омбоце сайсь ульсь Жуков.

Васень сайхне ламос эрясть землянкаса. А мзярда эвондась велети кемоньшка семья, алятне кармасть куднянь строяма. Васенда фкяти, тоса омбоцети, колмоцети. Тевснон тиендезь мяль вельде, сяс мес пяк оцю мяльсна ульсь лисемс землянкатнень эзда. Шобдась, летьксь,кельмось сявсь лама ломанень эряф. И мзярда эвондакшнесть од эряйхть,  синь старандасть тиемс кутт, а землянкат ни ашесть шувонда.

Кизотне мольсть, велесь кассь, эвондасть ульцянь лепт: Од Куроня, Запонь Эрьхке, Алда Кура, Вирень Куроня.

Чуднойхть лемсна. А мес синь лемтьфт тяфта? А кати-мес. А тя вдь тожа история.

 Эряфсь аф ащи фкя вастса,   а пингсь вятьсамазь и вятьсамазь инголи.

 Мекольдень кизотнень Жуку велезе пяк полафтсь. Строявсть од кутт, конат вельхтяфт шиферса и жестьса. Ширингужста Жуку велезонк кись асфальтированнай. Автобусне сашендыхть мяк велети. Пцтай эрь кудти моли газ и ведь, конат ламода теждялгофтозь ломаттнень эряфснон.

Шнама вастокс велесонк ащи школась.

Тежянь вейхкса сятт вейхксоце кизоня Жуку велесонк панжевсь школа. Ефси емла кудня. Тя куднясь ульсь Сафаева Акулина Федоровнать. Сонць ульсь васенце учительницась, хоть маштсь цють-цють морафтома и сермадома. И тя кудняти эрь шобдава сашендсть стирнят и церанят.

Сяда меле велети строяфоль од школа, конанц пинге етазь касфнезь класснай комнатанзон. Ну, а тяни тинц няйсасть, велеть кучкаса ащи бта дворец. И ваность кодама сон пара: и валда, и лямбе, и улихть сембе условиятне, штоба тонафнемс.

Кельгса эсь велезень. Сонь аш кода аф кельгомс. Ащи панда шаманяса. Вирь потмоса. Куднянза покракс срафтфт Вад ляйть трвава. И мон сонь кельгса аф аньцек мазышинц инкса. Тяса пара эрямась, сяс мес цебярьхть эряенза. Синь маштыхть покодема, жувата мельге якама. Маштыхть ваймама, маштыхть кштима-морама. Маштыхть идень касфтома, тядянь алянь ужяльдема, сире койхнень ванфтома, кельгсазь эсь кяленьконь. Сембось тя максси тейне эрьгя эрямс и кельгомс эсь емла Родиназень, шачема велезень, Жукуть.

Физьминутка.

5. Работась тексть лангса.

-Морафтость текстть.

-Лия шрифтса максф валти путода кизефкс.

-Кодама корхтама пялькссь тя кизефксть лангс отвечай?

- Сермадость валрисьмотнень, прилагательнайхнень алга таргада китькскат.

Шачема веле… Седи  ваксстонь уженя! Тейне-арам, тяфтама цебярь уженя, кода монь велезе, аш марнек мастор лангса. Тя монь шачема вастозе. Коса васенцеда азыне инь мазы и питни «тядяй» валть. Тяса кяпе шятнян пиже нарнять лангс, тяса ласькондян тундань шудерькснень мельге, тяса эряйхть инь кельгома ломанне.

-Проверясаськ.

6. Творческяй пауза.

а) Аделамс валрисьмоть.

Монь емла Родиназе – тя…

(тя сетьме ульця, кона вайси панжи саттнень потмос;

тя вирсь, коза кизонда ялгань келес ласьконттяма кстынкса;

тя Вад ляйсь, конац терди эсонк лямбе веднясонза эшеляма.)

б)  Сермадость, мезе арьсетяда эсь велентенди.

1. Эрь велеть улихть сонцень проблеманза, конат комболфтыхть седи. Сембодонга оцюсь эздодост – илядонды кржа ломань велети. Велеряйхне кадондсазь эсь эряма вастснон сянкса, мес аш работа. Вели ляткшнихть аньцек сирет. Мон арьсян велезнди, штоба сон афоль юмсе. Мзярда касан и стяян пильге лангс, мон лездан велезенди аф юмамс, а ванфтовомс.

2. Мон верондан и надиян, што Жуку веленьке аф юмай.А велезенди арьсян, штоба сон панчфокс панжель и штоба колганза содальхть.)

6. Кудонь тевсь: сермадода сочинения «Монь шачема масторозе – Жуку велесь»
7. Урокть итогоц.

Кристина.

Жуку велезень мон шнаса,

Куду вятинять-кинять

Тяса шачень, тяса касан

Васьфнян шобдават-илятть.

Надя.

Мон шачень Жуку велеса

И тяса кочксян ень

Сон ащи Вадоть берякса

Сяс кельгса, кельгса сонь!

Медяру лаймоть таньфонза,

И вирьса нармонь циньфть.

Лугаса панжи панчфонзон

Монь велесь тя – аф кинь.

Артем.

Ков мон аф молян, ков аф туян,

Кизень эсь велезон фалу муян.

Кельгома Жукузень весть аф юкстаса,

Шачень вдь, касан и эрян мон тяса.

- Оцю сюкпря тейнть урокть инкса.

Кда сембе ломаттне мастор лангса тяфта арьсельхть и кельголезь шачема вастснон, эста ни можналь аф пелемс минь вандыеньконь инкса.

Спасиба и тейнть, кельгома инжихть. Арьсян, што кельговикс арась тейнть минь шачема ширеняньке – Жуку веленясь – седи эжди вастоняньке.

Уледа шумбрат.

Мора «Велезе монь»

1. Ой, велезе монь – шуфтонят, шуфтонь перяфкат,

И ванозь тонь лангозт сединязе ужняй.

Тонь павазу шиценди монь мялезе касы,

А осалцти тонь – сединязе ризнай.

2.  Вели лажаткшнян пяк, коса афолень уле мон.

Лямбе странав мянь ваймама молемазе аф сай.

Мазы вирьти и Вадоти Жуку велезе терди,

Што  аф молеван тов – сединязе ризнай.

3. Лама эрямань вастта цебярьхть, пяк цебярьхть содан мон.

Аньцек лятфнеса велезень эрь минутаня най.

Ошса эряфсь и пара, велет улихть и мазыхть,

Но, а шачема краенкса сединязе ризнай.