көзге балга багышланган бәйрәм сценариясе
материал по теме

                   Кәҗә кергән бакчага

     Көзге табигать күренеше. Сәхнәнең бер ягында агач сурәтләре белән бизәлгән пәрдә.Икенче ягында – йорт макеты. Уртада – киртә белән әйләндереп алынган яшелчә бакчасы. Яшелчәләр булып киенгән балалар урындыкларда утыралар.

  Алып баручы.Әкият сөйлим сезгә,

                            Тезеп сүзләрен сүзгә.

                             Ә сез отып калыгыз,

                             Күңелегезгә салыгыз.

                             Әкият төше –алтындыр,

                             Аңлаганга –акылдыр...

                             Борын-борын заманда

                             Бик ерак бер авылда

                             Уңган әни торган, ди,

                             Ул әнинең бик матур,

                             Иркә кызы булган, ди.

                              Үзе матур булса да,

                              Булган начар гадәте –

                              Эш кушсалар, баш тарткан,

                               Иртәсен дә, кичен дә

                               Гел уйнарга яраткан!

•    Исәнм есез кунаклар! Исәнмесез балалар! Мин сезгә әкият сөйләргә дип ашыгам. Карагыз әле күрми дә торам, бакчада күпме яшелчә үсеп утыра.Яшелчәләр кайчан өлгерә әле балалар? ( Көз көне)

      Әйдәгез әле көз турында бер җыр җырлап алыйк, ә әкиятебез бераз көтеп торыр.

    М.Әндәрҗәнованың “Көз” исемле җыры башкарыла.

Алып баручы.Бигрәк матур җырладыгыз балалар. Әйе, көз көне күп кенә яшелчәләр өлгерә, бөтен табигать алтын төскә күмелә.Алай гына да түгел, көз көне безнең бит әле матур-матур бәйрәмнәребез дә бар.Ягез кем әйтер икән, нинди бәйрәмнәр әле алар?

Балалар. Көз җиткәч балалар мәктәпкә бара,Сөмбелә бәйрәме, Өлкәннәр көне...

Алып баручы.Бик дөрес әйттегез балалар,Белем бәйрәме,...Өлкәннәр көне.Без бүген бакчабызга шушы бәйрәм уңаеннан үзебезнең яраткан кешеләребез –Әби-бабаларыбызны чакырдык.Әйдәгез хәзер аларга үзебезнең матур сүзләребезне җиткерик.

1 бала.

Алып баручы. Молодцы балалар, булдырдыгыз! Хәзер инде әкиятебезне башласак та була.Әбиләребез дә рәхәтләнеп карарлар.

  Кулына буш кәрзин тотып, залга бер Кыз керә.

Кыз бала.(җырлый)

                    Эшлә,эшлә,дип әйтәсез,

                     Минем эшлисем килми.

                     Эшләсәм кулларым сызлый,

                      Билләрем дә бөгелми.

                      Әни тагын эш кушты:

                       -Бакча ни хәлдә икән?

                      Белеп кайт әле,- диде.-

                      Яшелчәләрне җыеп,

                      Алып кайт әле,- диде.

   Нәрсәгә дип азапланып утырталар икән бу яшелчәләрне? Ни Файдасы бар икән шуларның?

 Матур көй астында бии-бии,кыз каршына Кәбестә килеп баса. 

Кәбестә.Мин булам –Кәбестә,

               Үзем яшькелт төстә,

               Күлмәгем күп катлы,

               Үзем бик тә татлы...

               Ашларга да төшәм мин,

               Бәлештә дә пешәм мин.

               Чөнки мине балалар

               Көн дә көтеп алалар.

Кәбестә чүгәләп утыра. Кыз кәбестәне күтәрмәкче була. Бик тырышса да күтәрә алмый.

Кыз бала.Бигрәкләр дә зур икәнсең!

                 Бигрәк авыр икәнсең!

                 Кирәкми!

                 Мин сине алмыйм,

                 Кәрзинемә салмыйм.              

 Кәбестә, үпкәләп, урынына китә. Кыз каршына Суган килә.

Суган.Минем исемем- Суган,

           Мин Һиндстанда туган.

           Мине бик тә мактыйлар,

           Шифалы дип атыйлар.

            Салатка да турыйлар,

           Тураганда елыйлар...

Кыз бала. Шулаймыни? Елатасың,

                  Күзләрне кызартасың...

                  Рәхмәт, искәртүеңә.

                  Кирәкми!

                  Мин сине алмыйм,

                  Кәрзинемә салмыйм.

Суган үпкәләп китә. Кыз янына Кишер килә.

Кишер.Минем исемем – Кишер,

            Теләсәң, болай пешер.

            Теләсәң, ашка тура.

            Мине яраткан бала

            Озын гомерле була...

Кыз бала. Озак еллар яши-яши

                  Азапланып беткәнче,

                  Рәхәтләнеп яшәп калыйм әле

                  Ямьсез картлык җиткәнче.

                  Кирәкми!

                  Мин сине алмыйм,

                  Кәрзинемә салмыйм.

Кишер дә үпкәләп китеп бара.Кыз каршына Кәҗә килә.

Кәҗә.Мә-мә-ә!..Дөрес, дөрес әйтәсең,

          Бигрәк зирәк икәнсең,

          Әйдә бергә дус булыйк,

          Эш турында уйламыйк.

          Рәхәтләнеп ял итеп,

          Бергәләп күңел ачыйк.

          Әнә минем бәтиләр

          Көне буе уйныйлар,

          Уеннан һич туймыйлар.

“Кәҗә бәтиләре” биюе башкарыла

(Кызга.) Бар, рәхәтләнеп уйна,

 Эш турында кайгырма.

Мин бакчаны карармын,

Аңа сакчы булырмын.

Кыз. Ур-ра! Урманга барам! Шунда ял итәм!

          Урманга таба китә.

      Кәҗә. Мин- Кәҗә-мәкәрҗә,

                Кердем сезнең бакчага.

               Яратам кишерен дә,

               Яратам суганын да,

               Кәбестәсен, борчагын,

               Яратам мин барын да!

               Мә-ә,мә-ә!

               Барыгыз да үземә...

               Бакчага хуҗа булам,

               Сезне ашап туенам!