" 4 ноябрь - Бердәмлек көне"нә багышланган монтаж.
материал по теме

Кадерле укытучылар, укучылар, килгән кунаклар!

Бүген  4 ноябрь – Бердәмлек көне. “Бердәмлек “ төшенчәсе туплану, берләштерү мәгънәсенә ия. Элек – электән  безнең татар халкына хас сыйфат бу. Нәкъ менә бердәмлек, татулык күп кенә авырлыкларны җиңеп чыгарга, дошманнарны җиңәргә мөмкинлек биргән.Нәкъ менә шушы бердәмлек безнең илебезнең тынычлыгына, мөстәкыйльлегенә китергән. Бүгенге монтажыбыз да  шушы бәйрәмгә багышланган.

1 укучы.  Үткәннәр бит үткән көннәр  инде,

                 Бүгенге көн кыйммәт гел, дибез,

                 Бүгенге көн дә бит, бер уйласаң

                 Үткән көнгә кайтыр көнебез.

                 Нәрсә ул көн... Тарих битләрендә,

                 Еллар... Эраларга тиң түгел.

                 Гасырлардан гасырларга  шулай

                 Кеше гомере дә бер мизгел.

2 укучы.   Мизгел өчен көрәш кайный җирдә

                  Мирас кала буын – буыннан...

                  Борынгылар - гомер хәзинәсе,

                 Ата – аналардан, борыннан.

                 Борынгыга кайта – кайта яшик,

                 Чишмә башы шуннан башлана.

                 Борынгылар чишмәсен корытсак,

                 Барын кирәк юктан башларга.

3 укучы.  Онытудан курыкма син !

                 Үткәнеңне онытма син.

                  Бел син ерак бабайларның

                  Ничек итеп көн иткәнен,

                  Ни иккәнен, ни кичкәнен.

                  Нинди уйлар, нинди моңнар

                  Безгә калдырып киткәнен.

                  Туган җирнең иреге өчен

                  Зинданнарда интеккәнен.

4 укучы.    hәр карыш җир сугарылган,

                 Шаhит җаннар каннарында

                 Үткән яулар шәүләсе бар

                 Туган якның таңнарында.

                 hәр нигезнең, hәр авылның

                 hәр каланың үткәне бар.

                 Гыйбрәт алырлык мирасның

                 Калганы бар , киткәне бар...

5 укучы.  Горур сүз әйт, сорасалар:

                 Ни кавемнән? Нинди җирдән?

                 Киләчәккә аек  карар

                 Үз тарихын анык белгән!

                 Хәтерләүдән курыкма син!

                 Ил үткәнен онытма син !

6 укучы.   Шушы үткән тарихыбыз безнең

                  Татар халкын бергә туплады.

                  Җиңүләрдә дан – шөhрәткә күмеп,

                  Тынычлыкны илем яклады.

7 укучы.  Яшелле, аклы – кызыллы

                 Туган илем әләме.

                 Кул изәгәндәй җилфердәп,

                 Ул дөньяны сәламли.

                 Сәламли ул hәр кешене,

                 hәр дәүләтне, халыкны –

                 Ул җирдәге байракларга

                 Тигез булып калыкты.

8 укучы.  Төсләренең мәгънәсен дә

                 Ул беркемнән яшерми –

                 Ирек, өмет билгесе дип,

                 Җилфердәтә яшелне.

                 Кызылны кан  hәм яшәү диеп

                 Электән таный халкым.

                  Кызыл төс әләмдә - шатлык

                  Билгесе булып балкый.

9 укучы.    Ак тасма  безне  бәхеткә

                   Илтә торган  туры юл.

                   Ак сөлге кебек кунакчыл,

                   Пакь сөт төсле изге юл.

                   Ниятебез – бердәмлек!

                   Куәтебез – җитәрлек.

                   Әләмне без аңа иң саф

                    Мәгънә биреп күтәрдек.

10 укучы.   Татар иле – Татарстан,

                    Син яңадан калыктың.

                    Син рухы, көче, намусы,

                    Татар дигән халыкның.

Җыр  башкарыла: “Туган  илем  Татарстан“.

1 укучы.  Туган илем көчле, матур минем,

                 Җире – бәрхет, күге –саф, күрәмсең.

                 Татарстан дөнья картасында,

                  Канат җәйгән азат – күгәрчен.

2 укучы. Татарстан – бердәм дәүләт булып ,

                Мәңге яшә , азат, шат илдә,

                Татар халкың биеклектә булсын,

                Аяз булсын туасы иртә.

3 укучы.  Республикам минем – Татарстан,

                Халкым  бәхетенә син туган.

                Сине яклап  ирләр утка кергән,

                Исемеңне тарих ташка куйган.

4 укучы.   Татарстан тәүге адымнарың,

                  Тарих битләрендә тезелгән.

                  Син Иделдә яшьнәп күтәрелдең,

                  Шәhри Болгарыбыз нигезеннән.

5 укучы.   Татарстан, бала чагыбыздан

                  Күңел синең өчен  шатлана.

                  Туган илгә чиксез  мәхәббәтем

                  Синең исемең белән  башлана.

6 укучы.    Төп нигезем  минем,  Татарстан,

                  Синең язмыш – безнең гомерләр.

                  Төп нигезем, аерма син  мине

                  Әткәм - әнкәм  биргән  телемнән.

7 укучы.    Татар  теле – туган  телем,

                  Гасырларны кичкән  тел ул,

                  Давылларда  өзелмичә,

                  Төнбоектай  үскән тел ул.

                  Татар теле  мирас  булып,

                  Борынгыдан калган  тел ул.

                  Татар  теле  - берләштергән,

                  Көнләштергән  изге  тел  ул!

                  Горур  татар  милләтенә

                  Көч  бирүче  гүзәл  тел   ул !

8  укучы.    Без  -   татарлар !

                   Татар  исемен  без,

                    Горур  йөртә  торган  чын  халык.

                    Без  -  татарлар !

                    Шулай диеп  белә  

                    Безне  бөтен  дөнья  илләре.

                    Без  - татарлар !

                    Батыр  халык  дигән

                    Зур  даныбыз  әле  сүнмәде.

                    Без  - татарлар!

                    Шушы  исем  белән

                    Җирдә  яшәү  үзе  бер  бәхет.

        Җыр  башкарыла  “  Татар теле – туган телем “.

               (  Музыкаль  - әдәби  кичә )

Фахрутдинова   Миляуша  Энверовна