Хоца Намсараев "Тахуунай"
книга (5, 6, 7, 8, 9, 10, 11 класс)

Хоца Намсараев. ТАХУУНАЙ

Наадаха нюурнууд:

Автор

Лама  

Тахуунай

Хэрэгсэл: жабдан, хүндытэй  шэрээ

Хубсаhан: ламын орхимжо, обоодой малгай, хүбүүндэ дэгэл

Автор: Урда сагта нэгэ дасанда эмшэ, гүрэмшэ, тарган пилхагар, табхар улаан лама байhан гэхэ. Энэ ламын хажууда нюдэндөө галтайхан, абааштай аашатайхан  хубараг, тархагар харахан Тахуунай гэдэг байдаг hэн ха. Ламынгаа хүдөө газар гаража ябахадань, тэрэнэйнгээ бообо саахарынь өөрөө мэдээд, эдижэрхидэг болобо ха.

Тэрээнииень ойлгоhон лама хамаг ханза абдараа   хаб- яб гэтэр хаадаг, хабхагладаг болоо hэн ха.  

Сцена 1.

Лама:

• Тахуунай, өө Тахуунай, ерэл даа наашаа! (Тахуунай бии болоно, шэлэ хүзүүгээ маажана)
• Зай, Тахуунай, би мүнөө хүдөө гараха болоод байнаб. Хэды хоноод ерэхэб. Тахил юумэеэ хурайгаад, табаг аягаа аршаад, табхайжа hуунгүйгөөр, таhа гэр байраяа хараад байгаарай!

Маа, энэ хоёр бообо үгы болгонгүйгөөр hайн хадагалаад байгаарай! Ойлгоо гүбши даа?!

• Зай, ламбгай, ойлгооб, ойлгооб.

Сцена 2.(Тахуунай аягын шэрээн хажууда гэдэhээ баринхай ирбайна)

• Хай даа, гэдэhэнэймни үлдэхэ гээшэнь! Хара гүзээмни хабиргадаа няалдахань лэ даа! Тэрэ сагайнгаа шааслангаар гээд, нэгэ бообынь эдижэрхихэ юм байна.  (бага багаар бултынь эдижэрхинэ)

Сцена 3. (Лама  халууданхай, эсэнхэй, гэртээ ерэнхэй гэдэhээ эльбэжэ хэбтэнэ. Тиигээд эгсэ бодоод, хамартаа тамхи гударна. Дээгүүр хараад ооглоно)

• Тахуунай, өө Тахуунай, минии хадагалуулhан үнөөхи хоёр бообоёо абаад ерэлши!

(Тахуунай гүйжэ гараад, нэгэ бообо баринхай бусана)

• Энээнэйшни нүгөөдэнь яаhан бэ?
• Нүгөөдэнь энэл даа, ламбгай.
• Үгы, ши хоёр бообо намhаа абаад, хадагалhанаа мэдэнэ бэзэш?
• Мэдэнэ, мэдэнэ, ламбгай.
• Зай, теэд тэрэ хоёр бообыншни нэгэниинь яаhан бэ?
• Ай багша ламбгай, та ойлгоногуй гээшэлта. Энэ бообо хадаа тэрэ хоёр бообымни нэгэниинь лэ байна ха юм.
• Үгы, ши...  яажа байhан золиг бэ! Би шамhаа нүгөөдэнь яаhан бэ гэжэ асуужа байнам.
• Ламбгай, би танда нүгөөдэнь энэл байна гэжэ хэлэжэл байна гүби. Яагаа ойлгохогүй хүн гээшэбта?
• Ай хара золиг, нэгыень эдижэрхиhэн байба ха юм.
• (таяг абаад, Тахуунайе намнана. )

Сцена 4.

(Лама тулама эсэнхэй, амаа ангайнхай гүйжэ ябана. Тахуунай хойнонь гаранхай энеэжэ ябана)

• Ламбгай, өө ламбгай! (лама залд гээд, гэдэргээ харана.)
• - Ай шолмо, яяр яндан, хомхой хуурай холтоhон даhаа! (намнана, Тахуунай гэдэргээ сухарина)
• Ламбгай, байзыт, эндэтнай ехэ аягүй юумэн боложо байнал! Хашаагаймнай забhараар хамаг зон хаража байнал. Шабинь ламаяа намнажа ябана гээшэ гү гэлсээд лэ, энеэлдээд   ябажа байнал.

(лама нюдөө ехэ болгожо, сошоно, иишэ тиишээ харана)

• Нээрээ хүн хараа гү?!
• Хараа, хараа, энеэлдээд лэ ошожо байгаа hэн.
• Ай халаг даа, хүн зоной наада энеэдэн болобо ха юмбиб. Хэлэхэеэ яанаш, яндуул даhаа! Яяр яндан холтоhон, гэр бараандаа оро саашаа! (гэр руугаа хондогод гээд ороно).

Зоной энеэлдэхэ абяан. Хүшэгэ.